O le talitonu i se mea po o se tasi. E pei ona faaaoga soo i tusitusiga paia, o le faatuatua o le talitonu ma le faalagolago ia Iesu Keriso e taitaia ai se tagata e usiusitai ia te ia. O le faatuatua e ao ona faaautū ia Iesu Keriso ina ia mafai ai e lenā faatuatua ona taitai atu se tagata i le faaolataga. E faatuatua foi le Au Paia o Aso e Gata Ai i le Atua le Tamā, le Agaga Paia, le mana o le perisitua, ma isi vaega taua o le talalelei toefuataiina.
O le faatuatua e aofia ai se faamoemoe i mea e lē o vaaia, ae peitai e moni, (Epe. 11:1; Alema 32:21; Eteru 12:6). E faatupuina le faatuatua e ala i le faalogo i le talalelei e aoaoina e auauna tofia ua auina mai e le Atua (Roma 10:14–17). E lē faatupuina le faatuatua i vavega, ae faatupuina le faatuatua malosi e ala i le usiusitai i le talalelei a Iesu Keriso. I se isi faaupuga, e oo mai le faatuatua e ala i le amiotonu (Alema 32:40–43; Eteru 12:4, 6, 12; MF&F 63:9–12).
O le faatuatua moni e oo mai ai vavega, faaaliga vaaia, miti, faamalologa, ma meaalofa uma a le Atua na te tuuina mai i lana Au Paia. E ala i le faatuatua e maua ai e se tasi le faamagaloga o agasala ma mulimuli ane e mafai ona mau ai i luma o le Atua. O le lē i ai o le faatuatua e taitai atu ai se tasi i le atuatuvale, e oo mai lea ona o le amiolētonu (Moro. 10:22).