« ចូរមកតាមខ្ញុំ »
ដោយ ប្រធាន ហិនរី ប៊ី អាវរិង
ទីប្រឹក្សាទីមួយក្នុងគណៈប្រធានទីមួយ
តាមរយៈបន្ទូល និង គំរូទ្រង់ ព្រះគ្រីស្ទបានបង្ហាញយើងពីរបៀបខិតទៅជិតទ្រង់ ។
ខ្ញុំមានអំណរគុណដែលបាននៅជាមួយអ្នក ក្នុងសន្និសីទនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនេះ ។ នេះជាសាសនាចក្រទ្រង់ ។ យើងលើកដាក់ព្រះនាមទ្រង់មកលើយើង ពេលយើងចូលក្នុងនគរទ្រង់ ។ ទ្រង់ជាព្រះ ជាព្រះដ៏បង្កបង្កើត ហើយល្អឥតខ្ចោះ ។ យើងជាមនុស្សរមែងស្លាប់ មានសេចក្ដីស្លាប់ និង អំពើបាប ។ តែក្នុងក្ដីស្រឡាញ់ទ្រង់ចំពោះយើង និង គ្រួសារយើង ទ្រង់អញ្ជើញយើងឲ្យខិតមកជិតទ្រង់ ។ នេះជាបន្ទូលទ្រង់ ៖ « ចូរចូលមកជិតយើង នោះយើងនឹងចូលទៅជិតអ្នក ចូរព្យាយាមស្វែងរកយើង នោះអ្នករាល់គ្នានឹងបានជួបយើង ចូរសូម នោះអ្នករាល់គ្នានឹងបានទទួល ចូរគោះ នោះតែងនឹងបានបើកឲ្យអ្នក » ។1
នៅរដូវបុណ្យអ៊ីស្ទើរនេះ យើងបាននឹកចាំពីហេតុផលដែលយើងស្រឡាញ់ទ្រង់ និងការសន្យាដែលទ្រង់បានធ្វើនឹងពួកសិស្សស្មោះត្រង់នៃទ្រង់ ដើម្បីក្លាយជាមិត្តជាទីស្រឡាញ់របស់ទ្រង់ ។ ព្រះអង្គសង្គ្រោះបានធ្វើការសន្យានោះ ហើយប្រាប់យើងពីរបៀបដែលទ្រង់មករកយើង នៅក្នុងការបម្រើយើងចំពោះទ្រង់ ។ ឧទាហរណ៍មួយនៅក្នុងវិវរណៈទៅកាន់ អូលីវើរ ខៅឌើរី ខណៈដែលគាត់បានបម្រើព្រះអម្ចាស់ជាមួយនឹងព្យាការី យ៉ូសែប ស្ម៊ីធ ក្នុងការបកប្រែព្រះគម្ពីរមរមន ៖ « មើលចុះ អ្នកជា អូលីវើរ ហើយយើងនិយាយទៅកាន់អ្នកមកពីសេចក្ដីប៉ងប្រាថ្នារបស់អ្នក ហេតុដូច្នេះហើយ ចូររក្សាព្រះបន្ទូលទាំងឡាយនេះ ទុកនៅក្នុងចិត្តរបស់អ្នកចុះ ។ ចូរមានចិត្តស្មោះត្រង់ ហើយមានចិត្តព្យាយាមក្នុងការកាន់តាមព្រះបញ្ញត្តិទាំងឡាយនៃព្រះចុះ ហើយយើងនឹងឱបក្រសោបអ្នកដោយពាហុនៃសេចក្ដីស្រឡាញ់របស់យើង » ។2
ខ្ញុំធ្លាប់មានក្ដីអំណរនៃការខិតជិតព្រះអង្គសង្គ្រោះ និង ការយាងរបស់ទ្រង់មកជិតខ្ញុំ ដែលជាញឹកញាប់ តាមរយៈទង្វើដ៏សាមញ្ញនៃការគោរពតាមព្រះបញ្ញត្តិ ។
អ្នកធ្លាប់មានបទពិសោធន៍បែបនេះ ។ វាបានកើតឡើងពេលអ្នកជ្រើសរើសចូលរួមការប្រជុំសាក្រាម៉ង់ ។ វាបានកើតមានចំពោះខ្ញុំនៅថ្ងៃបរិសុទ្ធមួយ កាលខ្ញុំនៅក្មេង ។ នៅសម័យនោះយើងទទួលសាក្រាម៉ង់ក្នុងការប្រជុំពេលល្ងាច ។ ការចងចាំពីថ្ងៃមួយកាលពីជាង 65 ឆ្នាំមុន ពេលខ្ញុំបានគោរពបញ្ញត្តិរួមគ្នានឹងគ្រួសារខ្ញុំ និង ពួកបរិសុទ្ធ នៅតែធ្វើឲ្យខ្ញុំខិតជិតនឹងព្រះអង្គសង្គ្រោះ ។
អាកាសធាតុនៅខាងក្រៅត្រជាក់ ហើយងងឹត ។ ខ្ញុំចាំពីការទទួលអារម្មណ៍នូវពន្លឺ និង ភាពកក់ក្ដៅក្នុងរោងថ្វាយបង្គំនៅល្ងាចនោះជាមួយនឹងឪពុកម្ដាយខ្ញុំ ។ យើងទទួលទានសាក្រាម៉ង់ ដែលរៀបចំដោយពួកអ្នកកាន់បព្វជិតភាពអើរ៉ុន ដោយធ្វើសេចក្ដីសញ្ញានឹងព្រះវរបិតាសួគ៌របស់យើងថា នឹងចងចាំព្រះរាជបុត្រាទ្រង់ ហើយគោរពបញ្ញត្តិទ្រង់ជានិច្ច ។
នៅពេលការប្រជុំនោះបញ្ចប់យើងបានច្រៀងបទ « សូមនៅជាមួយនឹងយើងខ្ញុំសិន ថ្ងៃទាបណាស់ហើយ » ដែលមានទំនុកច្រៀងថា ៖ « ឱ! ព្រះអង្គសង្គ្រោះ សូមគង់នឹងខ្ញុំនាយប់នេះ » ។3
ខ្ញុំបានទទួលអារម្មណ៍ពីក្ដីស្រឡាញ់ និង ការយាងមកជិតនៃព្រះអង្គសង្គ្រោះនៅល្ងាចនោះ។ ខ្ញុំទទួលអារម្មណ៍នូវការលួងលោមពីព្រះវិញ្ញាណបរិសុទ្ធ ។
ខ្ញុំចង់មានអារម្មណ៍ពីក្ដីស្រឡាញ់នៃព្រះអង្គសង្គ្រោះ និង ការយាងមកជិតនៃទ្រង់ដែលខ្ញុំធ្លាប់មានក្នុងការប្រជុំសាក្រាម៉ង់កាលពីខ្ញុំនៅក្មេងម្ដងទៀត ។ ដូច្នេះថ្មីៗនេះ ខ្ញុំបានរក្សាបញ្ញត្តិមួយទៀត ។ ខ្ញុំបានស្រាវជ្រាវក្នុងបទគម្ពីរ ។ ក្នុងបទគម្ពីរទាំងនោះ ខ្ញុំបានដឹងថាខ្ញុំអាចធ្វើឲ្យព្រះវិញ្ញាណបរិសុទ្ធ ជួយខ្ញុំទទួលនូវអារម្មណ៍ដែលសិស្សដែលរស់ឡើងពីររូបនៃព្រះអម្ចាស់បានទទួល ពេលទ្រង់បានទទួលការអញ្ជើញរបស់ពួកគេឲ្យយាងមកក្នុងផ្ទះ ហើយគង់នៅនឹងពួកគេម្ដងទៀតនោះ ។
ខ្ញុំបានអានអំពីថ្ងៃទីបីក្រោយពីការឆ្កាង ហើយការយកទ្រង់ទៅដាក់ក្នុងផ្នូរ ។ ពួកស្ត្រីស្មោះត្រង់ និង មនុស្សដទៃទៀតបានឃើញថា ផ្ទាំងថ្មត្រូវបានគេរំកិលចេញពីផ្នូរ ហើយបានឃើញថាសាកសពទ្រង់មិននៅទីនោះឡើយ ។ ពួកគេបានមកដើម្បីលាបប្រេងឲ្យព្រះសពទ្រង់ ដោយសារពួកគេស្រឡាញ់ទ្រង់ ។
មានទេវតាពីរអង្គបានឈរនៅក្បែរនោះ ហើយបានសួរ ហេតុអ្វីបានពួកគេខ្លាច ដោយមានបន្ទូលថា ៖
« ហេតុអ្វីបានជាមករកព្រះអង្គដែលមានព្រះជន្មរស់នៅក្នុងទីខ្មោចស្លាប់ដូច្នេះ ?
« ទ្រង់មានព្រះជន្មរស់ឡើងវិញហើយ មិនគង់នៅទីនេះទេ ចូរនឹកចាំពីព្រះបន្ទូលដែលទ្រង់មានព្រះបន្ទូលនឹងអ្នករាល់គ្នា ក្នុងកាលដែលនៅស្រុកកាលីឡេនៅឡើយ
« ថា កូនមនុស្យត្រូវគេបញ្ជូនទៅក្នុងកណ្ដាប់ដៃនៃមនុស្សមានបាបឲ្យគេឆ្កាង ហើយបីថ្ងៃក្រោយមកនឹងរស់ឡើងវិញ » ។4
ក្នុងគម្ពីរ ម៉ាកុស បន្ថែមអំពីការណែនាំរបស់ទេវតាមួយអង្គទៀតថា ៖ « ចូរអ្នករាល់គ្នាទៅប្រាប់ពួកសិស្សទ្រង់ ព្រមទាំង ពេត្រុសផងថា ទ្រង់យាងទៅឯស្រុកកាលីឡេមុនអ្នករាល់គ្នាហើយ អ្នករាល់គ្នានឹងឃើញទ្រង់នៅស្រុកនោះ ដូចជាទ្រង់បានប្រាប់ទុក » ។5
ពួកសាវក និង សិស្សបានជួបជុំគ្នានៅក្រុងយេរូសាឡិម ។ ដូចជាយើងផងដែរ ពួកគេមានការភ័យខ្លាច ហើយឆ្ងល់ ពេលពួកគេពិភាក្សាគ្នាថា តើការស្លាប់ និង ការរស់ឡើងវិញរបស់ទ្រង់មានន័យយ៉ាងណាចំពោះពួកគេ ។
មានពួកសិស្សពីរនាក់បានដើរនៅរសៀលនោះពីក្រុងយេរូសាឡិម ទៅភូមិ អេម៉ោស ។ ព្រះគ្រីស្ទដែលមានព្រះជន្មរស់ឡើងវិញបានលេចមក ហើយបានដើរជាមួយពួកគេ ។ ព្រះអម្ចាស់បានយាងមករកពួកគេ ។
គម្ពីរលូកា ធ្វើឲ្យយើងស្ថិតនៅក្នុងហេតុការណ៍នាល្ងាចនោះជាមួយនឹងពួកគេ ៖
« កាលកំពុងតែនិយាយគ្នា ហើយរិះគិតដូច្នេះ នោះព្រះយេស៊ូវក៏ចូលមកយាងជាមួយនឹងគេដែរ ។
« តែភ្នែកគេត្រូវស្ពិនមិនឲ្យស្គាល់ទ្រង់ទេ ។
« ទ្រង់មានបន្ទូលទៅគេថា តើរឿងអ្វីដែលអ្នកនិយាយគ្នាកំពុងដែលដើរទៅដោយមានមុខស្រងួតដូច្នេះ ?
« ឯម្នាក់ដែលឈ្មោះ ក្លេវប៉ាស គាត់ឆ្លើយថា តើអ្នកស្នាក់នៅក្នុងក្រុងយេរូសាឡិម តែម្នាក់ឯងទេឬអី បានជាមិនដឹងការណ៍ដែលកើតមកនៅគ្រានេះ ? » 6
ពួកគេបានប្រាប់ទ្រង់ពីភាពសោកសៅ ដោយសារព្រះយេស៊ូវបានសុគត ពេលពួកគេទុកចិត្តថា ទ្រង់នឹងក្លាយជាព្រះប្រោសលោះនៃអ៊ីស្រាអែល ។
ពិតជាមានឥទ្ធិពល នៅក្នុងបន្ទូលរបស់ព្រះអម្ចាស់ដែលមានព្រះជន្មរស់ឡើងវិញ ពេលទ្រង់មានបន្ទូលទៅកាន់សិស្សទាំងពីរ ដែលមានភាពសោកសៅនោះ ។
« នោះទ្រង់មានព្រះបន្ទូលទៅគេថា ឱមនុស្សឥតពិចារណា ហើយក្រនឹងជឿអស់ទាំងសេចក្ដីដែលពួកហោរាបានទាយទុកមកអើយ ៖
« តើមិនគួរឲ្យព្រះគ្រីស្ទរងទុក្ខទាំងនោះ ហើយចូលទៅក្នុងសិរីល្អនៃទ្រង់វិញទេឬអី ?
« រួចទ្រង់ក៏ស្រាយន័យសេចក្ដីដែលតម្រូវដល់ទ្រង់ពីក្នុងគម្ពីរទាំងឡាយឲ្យគេស្ដាប់ចាប់តាំងពីគម្ពីរលោក ម៉ូសេ និង គម្ពីរពួកហោរារៀងមក » ។ 7
គ្រាមួយបន្ទាប់មកទៀត ដែលបានធ្វើឲ្យចិត្តខ្ញុំកក់ក្ដៅ តាំងពីខ្ញុំនៅក្មេងមកគឺថា ៖
« នោះក៏ជិតដល់ភូមិដែលគេគិតទៅ ហើយទ្រង់ធ្វើដូចជាចង់យាងបង្ហួស ។
« តែគេឃាត់ទ្រង់ដោយពាក្យថា សូមនៅជាមួយនឹងយើងខ្ញុំសិន ពីព្រោះល្ងាចថ្ងៃទាបណាស់ហើយ ដូច្នេះទ្រង់ក៏យាងចូលទៅគង់ជាមួយនឹងគេ » ។8
ព្រះអង្គសង្គ្រោះបានទទួលយកការអញ្ជើញនាយប់នោះ ឲ្យយាងចូលទៅក្នុងផ្ទះនៃសិស្សរបស់ទ្រង់នៅជិតភូមិ អេម៉ោស ។
ទ្រង់អង្គុយសោយអាហារជាមួយពួកគេ ។ ទ្រង់បានយកនំប៉័ងមកប្រសិទ្ធពរ ហើយហែកវាចែកឲ្យពួកគេ ។ ភ្នែកពួកគេត្រូវបានបើកឲ្យស្គាល់ទ្រង់ ។ រួចទ្រង់យាងចេញពីពួកគេទៅ ។ លូកា បានកាត់ត្រាសម្រាប់យើងពីអារម្មណ៍នៃពួកសិស្សដ៏មានពរទាំងនោះថា ៖ « នោះគេនិយាយគ្នាថា តើយើងមិនមានសេចក្ដីខ្មួលខ្មាញ់ក្នុងចិត្ត ក្នុងពេលដែលទ្រង់កំពុងតែមានបន្ទូលនឹងយើង ហើយសំដែងពីគម្ពីរតាមផ្លូវនោះទេឬអី ? »9
នៅក្នុងម៉ោងជាមួយគ្នានោះដែរ សិស្សទាំងពីរនាក់បានរួសរាន់ត្រឡប់ទៅក្រុងយេរូសាឡិម វិញ ដើម្បីប្រាប់ដល់ពួកសាវកទាំងដប់មួយនាក់ពីអ្វីដែលបានកើតឡើងចំពោះពួកគេ ។ នៅគ្រានោះព្រះអង្គសង្គ្រោះបានយាងមកម្ដងទៀត ។
ទ្រង់បានរំឭកឡើងវិញពីការព្យាករណ៍នៃបេសកកម្មទ្រង់ ដើម្បីធ្វើឲ្យធួននឹងបាបនៃកូនចៅទាំងអស់របស់ព្រះវរបិតាទ្រង់ ហើយផ្ដាច់ចំណងនៃសេចក្ដីស្លាប់ ។
« ទ្រង់មានព្រះបន្ទូលទៅគេថា គឺសេចក្ដីនេះហើយដែលបានចែងទុកមក គឺថាព្រះគ្រីស្ទត្រូវរងទុក្ខលំបាក ហើយនៅថ្ងៃទីបីទ្រង់នឹងរស់ពីស្លាប់ឡើងវិញ ៖
« ហើយត្រូវឲ្យកែប្រែចិត្ត និង សេចក្ដីប្រោសឲ្យរួច បានប្រកាសប្រាប់ដល់អស់ទាំងសាសន៍ដោយនូវព្រះនាមទ្រង់ចាប់តាំងពីក្រុងយេរូសាឡិមទៅ ។
« អ្នករាល់គ្នាជាស្មរបន្ទាល់ពីការទាំងនេះ » ។ 10
ព្រះបន្ទូលរបស់ព្រះអង្គសង្គ្រោះពិតចំពោះយើង ដូចជាចំពោះសិស្សរបស់ទ្រង់ពេលនោះដែរ ។ យើងជាសាក្សីនៃការណ៍ទាំងនេះ ។ ហើយទំនួលខុសត្រូវដ៏រុងរឿងដែលយើងបានទទួលយក ពេលយើងធ្វើបុណ្យជ្រមុជទឹកចូលក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានបញ្ជាក់យ៉ាងច្បាស់ចំពោះយើងដោយព្យាការី អាលម៉ា កាលពីច្រើនទសវត្សរ៍មុននៅទន្លេមរមនថា ៖
« ហើយហេតុការណ៍បានកើតឡើងថា លោកបាននិយាយទៅកាន់ពួកគេថា ៖ មើលចុះ នេះជាទឹកមរមន ( ព្រោះនេះជាឈ្មោះដែលគេហៅ ) ហើយឥឡូវនេះ ដោយអ្នករាល់គ្នាមានបំណងចង់ចូលរួមក្នុងក្រោលនៃព្រះ ហើយដើម្បីឲ្យបានហៅថាជារាស្ត្ររបស់ទ្រង់ ហើយយល់ព្រមទទួលបន្ទុកគ្នាទៅវិញទៅមក ដើម្បីឲ្យបន្ទុកនោះបានស្រាល
« មែនហើយ ហើយយល់ព្រមទួញយំជាមួយនឹងអ្នកណាដែលទួញយំ មែនហើយ ហើយកម្សាន្តទុក្ខដល់អស់អ្នកណាដែលកំពុងត្រូវការកម្សាន្តទុក ហើយឈរជាសាក្សីដល់ព្រះនៅគ្រប់ពេល និង គ្រប់សេចក្ដី និងគ្រប់ទីកន្លែងដែលអ្នករាល់គ្នាបាននៅរហូតដល់ពេលស្លាប់ ដើម្បីឲ្យអ្នករាល់គ្នាអាចបានប្រោសលោះដោយព្រះ ហើយបានរាប់ជាមួយនឹងពួកអ្នកនៃដំណើររស់ឡើងវិញទីមួយ ដើម្បីឲ្យអ្នករាល់គ្នាអាចមានជីវិតដ៏នៅអស់កល្បជានិច្ច ---
« ឥឡូវនេះ ខ្ញុំសូមប្រាប់អ្នក បើសិននេះជាបំណងនៅក្នុងចិត្តអ្នក តើមានអ្វីទៅដែលរារាំងអ្នកមិនឲ្យទទួលបុណ្យជ្រមុជទឹក ដោយនូវព្រះនាមនៃព្រះអម្ចាស់ ដើម្បីធ្វើជាសាក្សីដល់ទ្រង់ថា អ្នករាល់គ្នាបានចូលក្នុងសេចក្ដីសញ្ញាជាមួយនឹងទ្រង់ថា អ្នករាល់គ្នានឹងបម្រើព្រះអង្គ ហើយកាន់តាមព្រះបញ្ញត្តិទាំងឡាយរបស់ទ្រង់ ដើម្បីឲ្យទ្រង់ស្រោចព្រះវិញ្ញាណទ្រង់មកលើអ្នករាល់គ្នាយ៉ាងបរិបូរណ៍ ?
« ហើយឥឡូវនេះ កាលប្រជាជនបានឮពាក្យទាំងនេះ គេក៏បានទះដៃដោយសេចក្ដីអំណរ ហើយស្រែកថា ៖ នេះហើយជាបំណងនៃចិត្តរបស់យើងខ្ញុំ » ។11
យើងស្ថិតនៅក្រោមសេចក្ដីសញ្ញា ទាំងការជួយដល់ជនក្រីក្រ និង ការធ្វើជាសាក្សីពីព្រះអង្គសង្គ្រោះដរាបណាយើងនៅមានជីវិតរស់ ។
យើងអាចធ្វើវាបានដោយគ្មានបរាជ័យ ពេលយើងមានក្ដីស្រឡាញ់ចំពោះព្រះអង្គសង្គ្រោះ និង ក្ដីស្រឡាញ់ទ្រង់ចំពោះយើង ។ ពេលយើងស្មោះត្រង់នឹងសេចក្ដីសន្យាដែលយើងបានធ្វើ នោះយើងនឹងទទួលអារម្មណ៍ក្ដីស្រឡាញ់របស់យើងចំពោះទ្រង់កើនឡើង ដោយសារយើងនឹងទទួលអារម្មណ៍ពីព្រះចេស្ដា និង ការយាងមកជិតយើងក្នុងការបម្រើទ្រង់ ។
ប្រធាន ថូម៉ាស អេស ម៉នសុន បានរំឭកយើងជារឿយៗពីការសន្យារបស់ព្រះអម្ចាស់ចំពោះពួកសិស្សស្មោះត្រង់របស់ទ្រង់ថា ៖ « ហើយអស់អ្នកណាដែលទទួលអ្នក នោះយើងក៏នឹងនៅទីនោះដែរ ត្បិតយើងនឹងទៅពីមុខអ្នក ។ យើងនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តរបស់អ្នក ហើយពួកទេវតារបស់យើងនៅព័ទ្ធជុំវិញអ្នកដើម្បីទ្រអ្នកឡើង » ។12
មានវិធីមួយទៀតដែលអ្នក និង ខ្ញុំទទួលអារម្មណ៍នៃការយាងមកជិតរបស់ទ្រង់ ។ ពេលយើងលះបង់ក្នុងការបម្រើទ្រង់ ទ្រង់ខិតមកជិតមនុស្សដែលយើងស្រឡាញ់ក្នុងគ្រួសារយើង ។ គ្រប់ពេលខ្ញុំត្រូវបានហៅក្នុងការបម្រើរបស់ព្រះអម្ចាស់ឲ្យផ្លាស់ ឬ ចេញពីគ្រួសារខ្ញុំ ខ្ញុំបានឃើញថាព្រះអម្ចាស់កំពុងប្រទានពរដល់ភរិយា និង កូនៗខ្ញុំ ។ ទ្រង់បានរៀបចំពួកអ្នកបម្រើគួរឲ្យស្រឡាញ់របស់ទ្រង់ និងឱកាសនានាដើម្បីនាំគ្រួសារខ្ញុំឲ្យខិតទៅជិតទ្រង់ ។
អ្នកបានទទួលអារម្មណ៍ពីពរជ័យដូចគ្នានេះក្នុងជីវិតអ្នក ។ អ្នករាល់គ្នាភាគច្រើនមានមនុស្សជាទីស្រឡាញ់ ដែលកំពុងវង្វេងចេញពីផ្លូវទៅជីវិតអស់កល្ប ។ អ្នកចង់ដឹងថាតើអ្នកធ្វើអ្វីទៀតដើម្បីនាំពួកគេត្រឡប់មកវិញ ។ អ្នកអាចពឹងផ្អែកលើព្រះអម្ចាស់ដើម្បីទ្រង់យាងទៅជិតពួកគេ ពេលអ្នកបម្រើទ្រង់ដោយក្ដីជំនឿ ។
អ្នកចាំពីការសន្យារបស់ព្រះអម្ចាស់ចំពោះ យ៉ូសែប ស៊្មីធ និង ស៊ីឌនី រិកដុន ពេលពួកគាត់ឃ្លាតឆ្ងាយពីគ្រួសារទៅធ្វើកិច្ចការទ្រង់ ៖ « ស៊ីឌនី និង យ៉ូសែប ជាមិត្តទាំងឡាយរបស់យើង ព្រមទាំងក្រុមគ្រួសាររបស់អ្នកផងដែរ ពួកគេនៅក្នុងព្រះហស្តរបស់យើងហើយ ហើយយើងនឹងប្រព្រឹត្តដល់ពួកគេតាមតែយើងឃើញថាល្អ ត្បិតនៅក្នុងយើងគឺសុទ្ធតែអំណាចទាំងអស់ » ។13
ដូចជា អាលម៉ា និង ស្ដេចម៉ូសាយដែរ មានឪពុកម្ដាយស្មោះត្រង់មួយចំនួន ដែលបានបម្រើព្រះអម្ចាស់បានយ៉ាងល្អជាយូរមកហើយ តែមានកូនដែលដើរវង្វេង ថ្វីបើឪពុកម្ដាយពួកគេលះបង់ចំពោះព្រះអម្ចាស់យ៉ាងណាក្ដី ។ ពួកគាត់ធ្វើអ្វីដែលពួកគាត់អាចធ្វើបាន រួមទាំងជំនួយពីមិត្តស្មោះត្រង់ និងគួរឲ្យស្រឡាញ់ ។
អាលម៉ា និង ពួកបរិសុទ្ធក្នុងជំនាន់គាត់បានអធិស្ឋានសម្រាប់កូនប្រុសគាត់ និង បុត្រាស្ដេច ម៉ូសាយ ។ មានទេវតាមួយអង្គបានយាងមក ។ ការអធិស្ឋានអ្នក និង ការអធិស្ឋាននៃជនដែលអនុវត្តក្ដីជំនឿ នឹងនាំអ្នកបម្រើរបស់ព្រះអម្ចាស់មកជួយសមាជិកគ្រួសារអ្នក ។ ពួកគេនឹងជួយគេឲ្យរើសផ្លូវត្រឡប់មករកព្រះវិញ ទោះជាពេលគេត្រូវបានវាយប្រហារដោយសាតាំង និង អ្នកដើរតាមវា ដែលមានគោលបំណងដើម្បីបំផ្លាញក្រុមគ្រួសារក្នុងជីវិតនេះ និង ក្នុងភាពអស់កល្បក្ដី ។
អ្នកចាំពីពាក្យដែលនិយាយដោយទេវតាទៅកាន់ អាលម៉ា ជាកូន និង បុត្រា ម៉ូសាយ ដែលបះបោរថា ៖ « ហើយម្ដងទៀត ទេវតានិយាយថា ៖ មើលចុះ ព្រះអម្ចាស់ទ្រង់បានឮពាក្យអធិស្ឋានទាំងឡាយរបស់រាស្ត្រទ្រង់ និង ព្រមទាំងពាក្យអធិស្ឋានទាំងឡាយរបស់អ្នកបម្រើទ្រង់ផង គឺ អាលម៉ា ជាឪពុកអ្នក ត្បិតលោកបានអធិស្ឋានដោយសេចក្ដីជំនឿ ដ៏ជោគជាំអំពីអ្នក សូមឲ្យអ្នកអាចបាននាំមកឲ្យស្គាល់នូវសេចក្ដីពិត ហេតុដូច្នេះហើយដោយគោលបំណងនេះហើយ ដែលខ្ញុំបានមកបរិវត្តអ្នកអំពីព្រះចេស្ដា និង សិទ្ធិអំណាចនៃព្រះ ដើម្បីឲ្យពាក្យអធិស្ឋានទាំងឡាយរបស់ពួកអ្នកបម្រើទ្រង់ អាចបានឆ្លើយតបស្របតាមសេចក្ដីជំនឿរបស់គេ » ។14
ការសន្យាខ្ញុំចំពោះអ្នកដែលអធិស្ឋាន និង បម្រើព្រះអម្ចាស់ថា អ្នកនឹងមិនអាចមានរាល់ពរជ័យដែលអ្នកប្រាថ្នាចង់បានសម្រាប់ខ្លួនឯង និង គ្រួសារទេ ។ តែខ្ញុំអាចសន្យាអ្នកថា ព្រះអង្គសង្គ្រោះនឹងយាងខិតជិតអ្នក ហើយប្រទានពរអ្នក និង គ្រួសារអ្នកជាមួយអ្វីដែលល្អបំផុត ។ អ្នកនឹងមានការលួងលោមពីក្ដីស្រឡាញ់ទ្រង់ ហើយទទួលអារម្មណ៍នូវចម្លើយនៃការយាងមកជិតរបស់ទ្រង់ ពេលអ្នកឈោងទៅជួយដល់អ្នកដទៃ ។ ពេលអ្នករុំរបួសដល់ជនក្រីក្រ ហើយផ្ដល់ការលាងសម្អាតនៃដង្វាយធួនទ្រង់ ដល់ជនដែលសោកសៅក្នុងអំពើបាប នោះព្រះចេស្ដារបស់ព្រះអម្ចាស់នឹងគាំទ្រអ្នក ។ ព្រះហស្តទ្រង់នឹងលាតសន្ធឹងជាមួយនឹងដៃអ្នកដើម្បីជួយ និង ប្រទានពរដល់កូនចៅនៃព្រះវរបិតាសួគ៌យើង រួមទាំងសមាជិកគ្រួសារអ្នកដែរ ។
មានការរៀបចំសម្រាប់ការវិលត្រឡប់ដ៏រុងរឿងសម្រាប់យើង ។ ពេលនោះយើងនឹងឃើញការបំពេញសន្យារបស់ព្រះអម្ចាស់ដែលយើងស្រឡាញ់ ។ ទ្រង់គឺជាអ្នកដែលស្វាគមន៍យើងចូលក្នុងជីវិតអស់កល្បជាមួយទ្រង់ និង ព្រះវរបិតាសួគ៌យើង។ ព្រះយេស៊ូវគ្រីស្ទរៀបរាប់បែបនេះថា ៖
« ចូរស្វែងរកដើម្បីនាំមក ហើយតាំងឡើងក្រុងស៊ីយ៉ូនរបស់យើងចុះ ។ ចូរកាន់តាមព្រះបញ្ញត្តិទាំងឡាយរបស់យើងនូវគ្រប់អ្វីៗទាំងអស់ ។
« ហើយបើសិនជាអ្នកកាន់តាមព្រះបញ្ញត្តិទាំងឡាយរបស់យើង ហើយកាន់ខ្ជាប់ដរាបដល់ចុងបំផុត នោះអ្នកនឹងបានជីវិតដ៏នៅអស់កល្បជានិច្ច គឺជាអំណោយទានដ៏មហិមាបំផុតនូវគ្រប់អំណោយទានទាំងឡាយនៃព្រះ » ។15
« ត្បិតអស់អ្នកណាដែលរស់នៅនឹងបានគ្រងផែនដីទុកជាមរតក ហើយអស់អ្នកណាដែលស្លាប់ទៅនឹងបានសម្រាកពីការងាររបស់ខ្លួន ហើយកិច្ចការទាំងឡាយរបស់ពួកគេនឹងជាប់តាមពួកគេ ហើយពួកគេនឹងបានទទួលមកុដនៅក្នុងវិមានទាំងឡាយនៃព្រះវរបិតារបស់យើង ដែលយើងបានរៀបចំសម្រាប់ពួកគេនោះ » ។16
ខ្ញុំសូមថ្លែងទីបន្ទាល់ថា ដោយព្រះវិញ្ញាណ យើងអាចធ្វើតាមការអញ្ជើញរបស់ព្រះវរបិតាសួគ៌ថា ៖ « នេះជាព្រះរាជបុត្រាដ៏ស្ងួនភ្ងារបស់យើង ចូរស្ដាប់តាមទ្រង់ចុះ ! » ។ 17
តាមរយៈបន្ទូល និង គំរូទ្រង់ ព្រះគ្រីស្ទបានបង្ហាញយើងពីរបៀបខិតទៅជិតទ្រង់ ។ កូនចៅគ្រប់រូបរបស់ព្រះវរបិតាសួគ៌ ដែលបានជ្រើសរើសឲ្យចូលតាមរបងនៃបុណ្យជ្រមុជទឹក ចូលក្នុងសាសនាចក្រទ្រង់នឹងមានឱកាសនៅក្នុងជីវិតទទួលការបង្រៀនពីដំណឹងល្អទ្រង់ ហើយបានស្ដាប់ការអញ្ជើញរបស់ទ្រង់ថា « ចូរមកតាមខ្ញុំ »18 ពីពួកអ្នកបម្រើដែលទ្រង់បានហៅ ។
អ្នកបម្រើទ្រង់គ្រប់រូបដែលបានចុះសេចក្ដីសញ្ញានៅក្នុងនគរទ្រង់លើផែនដី និង ក្នុងពិភពវិញ្ញាណ នឹងទទួលការដឹកនាំពីទ្រង់តាមរយៈព្រះវិញ្ញាណ ពេលពួកគេប្រទានពរ ហើយបម្រើអ្នកដទៃជំនួសទ្រង់ ។ ហើយពួកគេនឹងទទួលអារម្មណ៍ក្ដីស្រឡាញ់របស់ទ្រង់ ហើយរកឃើញអំណរក្នុងការខិតទៅជិតទ្រង់ ។
ខ្ញុំជាសាក្សីម្នាក់អំពីការរស់ឡើងវិញរបស់ព្រះអម្ចាស់យ៉ាងប្រាកដ ដូចជាខ្ញុំបាននៅទីនោះនាល្ងាចនោះជាមួយនឹងសិស្សទាំងពីរនាក់ក្នុងផ្ទះតាមផ្លូវទៅភូមិអេម៉ោសដូច្នោះដែរ ។ ខ្ញុំដឹងថាព្រះមានព្រះជន្មរស់យ៉ាងប្រាកដដូចយ៉ូសែប ស្ម៊ីធដែរ ពេលគាត់បានឃើញព្រះវរបិតា និង ព្រះរាជបុត្រាក្នុងសសរពន្លឺនៃពេលព្រឹកដ៏ភ្លឺត្រចះត្រចង់មួយក្នុងព្រៃនៅភូមិ ប៉ាល់ម៉ៃរ៉ា ។
នេះជាសាសនាចក្រពិតនៃព្រះយេស៊ូវគ្រីស្ទ ។ មានតែនៅក្នុងកូនសោដែលប្រធាន ថូម៉ាស អេស ម៉នសុន កាន់ប៉ុណ្ណោះ ទើបមានអំណាចដែលផ្សារភ្ជាប់យើងជាគ្រួសារ ដើម្បីរស់នៅនឹងព្រះវរបិតាសួគ៌យើង និង ព្រះអម្ចាស់ព្រះយេស៊ូវគ្រីស្ទជារៀងរហូតបាន ។ នៅថ្ងៃជំនុំជំរះ យើងនឹងឈរនៅចំពោះព្រះភក្ត្រព្រះអង្គសង្គ្រោះ ។ វាជាពេលអំណរមួយសម្រាប់ជនដែលបានខិតមកជិតទ្រង់ ក្នុងការបម្រើទ្រង់នៅជីវិតនេះ ។ វាជាក្ដីអំណរដើម្បីស្ដាប់ឮពាក្យថា ៖ « ប្រពៃហើយ បាវល្អស្មោះត្រង់អើយ » ។19 ខ្ញុំសូមធ្វើទីបន្ទាល់ដូច្នេះក្នុងនាមជាសាក្សីម្នាក់នៃព្រះអង្គសង្គ្រោះដែលបានរស់ឡើងវិញ និង ជាព្រះប្រោសលោះយើង ក្នុងព្រះនាមនៃព្រះយេស៊ូវគ្រីស្ទ អាម៉ែន ។