Te mau haapiiraa tumu e te mau parau tumu i roto i te mau hiro‘a faaroo
Na Elder L. Tom Perry
No te Pŭpŭ no te Tino Ahuru Ma Piti Aposetolo
Te tuu nei te hiro‘a faaroo tata‘itahi i to’na faufaa hoê i roto i to tatou maramaramaraa i te evanelia a Iesu Mesia.
I te parauraahia mai ia’u ia paraparau i roto i te tuhaa pureraa a te autahu‘araa, i te amuiraa rahi, oioi roa to’u mana‘o i te haereraa i ni‘a i te hoê orometua Paraimere faahiahia mau. To’na hinaaro rahi, o te faaineineraa ïa ia matou ia vai ti‘amâ no te farii i te autahu‘araa. Ua rave oia i te tahi hi‘opo‘araa ia au i te mau titauraa no te manuïaraa i te Paraimere—tamau aau i te i‘oa o te mau melo o te Pŭpŭ no te Tino Ahuru Ma Piti Aposetolo e na reira atoa te mau hiro‘a faaroo. Teie atoa ta’na parau fafau ia matou—ia roaa ia matou paatoa i te faahiti aau i na hiro‘a faaroo e ahuru ma toru, e nehenehe matou e ma’iti i te hoê vahi no te hoê ohipa faaoaoaraa ei haapiiraa hopea na matou.
Ua feruri matou i te hoê vahi ta matou i au ia haere no te ori mata‘ita‘i i roto i te natura na ni‘a i te mau ofaʻi rahi i ni‘a noa a‘e i te pahuraa pape matamua i te tomoraa no te faa tahoni Logan Canyon, i apatoerau no Utaha. Te vai ra te hoê mahora na‘ina‘i i ni‘a i te reira mau ofaʻi rahi, e vahi tano no te tahi pae auahi no te tunu i te maa « hot dogs » e no te tunu paa i te « marshmallow ». A ma’iti ai matou i tera vahi, aita matou i feruri i to matou orometua, e taata paari oia e e ere to’na tino i te mea etaeta roa. Ahani matou i feruri rii a‘e, e tae mai paha te mana‘o e, e taime fifi no’na no te haere i reira. Atira noa’tu, ua hinaaro oia i te haapa‘o i ta’na parau e ua imi i te rave‘a no te pee ia matou.
Na mua roa, ua paʻuma matou i te hoê aivi na‘ina‘i. I tera ra tau aita e niuniu uira na reira no te opani ia matou ia haere na reira. Ua tauturu matou i to matou orometua e ua tae i ni‘a te aivi. Ia tae i ni‘a, e titapou matou i roto i te hoê vahi ofaʻifaʻi tei parauhia « Turtle Back ».
I to matou taeraa i ô, ua faafaea rii to matou orometua no te huti rii i te aho. I te taime matou a faaineine ai no te parahi e no te tamaa, ia maitai a‘e oia ua haapii mai i ta matou haapiiraa hopea. Ua parau mai oia ia matou i to’na oaoa i te haapiiraa ia matou i te Paraimere i na matahiti e piti i ma’iri. Ua haafaahiahia oia ia matou no to matou tamauraa i te mau hiro‘a faaroo. Ia parau mai oia i te numera, e faahiti atu matou i te hiro‘a. I muri iho ua parau oia, aita e auraa i te tamau-aau-raa i te mau hiro‘a faaroo e hau atu i te tamau-noa-raa i te tahi mau ta‘o maoti ra ia maramarama matou i te mau haapiiraa tumu e te mau parau tumu i roto ia ratou. Ua faaitoito oia ia matou ia tuatapapa i te haapiiraa tumu o te evanelia e haapiihia nei i roto i te mau hiro‘a faaroo. Ua faataa mai oia e, ua tatuhaahia te haapiiraa tumu i roto i te mau hiro‘a faaroo.
I. Te Atuaraa e te Haapiiraa tumu a te Mesia
Ua haapii tatou i roto i te hiro‘a faaroo matamua e, e toru tino i roto i te Atuaraa. Te Atua te Metua, Iesu te Mesia e te Varua Maitai.
Te haapii nei te piti o te hiro‘a faaroo e, tei ia tatou nei te hopoi‘a no ta tatou mau ohipa i ni‘a i te fenua nei.
Te horo‘a nei te toru i te hoê hi‘oraa i te misioni a te Faaora no te faaoraraa i te mau tamarii a te Metua i te Raʻi.
Te haapii nei te maha i te faufaa o te mau parau tumu e te mau oro‘a matamua.
Ua riro te mana o te mau parau a to matou orometua, ei hoê puna faaûruraa no’u no to’na faatumuraa i ni‘a i te tuatapaparaa i te evanelia. Te arata‘i nei te mau papa‘iraa ia tatou i te hoê faito parau mau ei reira tatou e nehenehe ai e haavâ i te ite ta tatou e farii nei, e mea tano anei e aore râ e mea hape. No ô mai i te Atua te haapiiraa tumu mau, te puna e te niu no te mau parau mau atoa. Te itehia nei te mau haapiiraa e te mau faahi‘oraa no te haapiiraa tumu mau i roto i te evanelia a to tatou Fatu e Faaora. No ô mai ia Satane ra, te metua o te mau parau haavare, te mau haapiiraa hape. To’na hiaai, o te haapiʻo, o te taui e o te tuʻino i te mau parau mau tei heheuhia mai. Ua hinaaro oia ia haavare ia tatou ia moʻe te puromu no te tahi o tatou i ni‘a i te tere hoʻiraa i to tatou fare i te raʻi.
Te haapii nei te mau papa‘iraa mo‘a nahea i te ape i te mau haapiiraa hape. Ei hi‘oraa, i roto i ta Paulo rata ia Timoteo, te tai‘o nei tatou :
« Te mau parau mo‘a atoa i papaihia ra e mea faaurua mai ïa e te Atua, e e mea maitai ei haapiiraa, ei a‘oraa, ei faaiteraa hapa, ei faaite mai i te parau-tia ra :
« Ia au roa te taata no te Atua i te mau ohipa maitatai atoa ra » (2 Timoteo 3:16–17).
No te Ekalesia, ua riro teie haapiiraa tumu mai te hoê ofaʻi uira i roto i te hoê niuniu afaʻifaʻi. Ia tatara oe i te ofaʻi uira, e faufaa ore te niuniu afaʻifaʻi. Te hoê ekalesia aita e haapii-faahou-hia ra i te haapiiraa tumu mau, e mea faufaa ore ïa. Eita te reira e nehenehe e faahoʻi ia tatou i to tatou Metua i te Ao ra e i to tatou fare mure ore.
II. Te faanahoraa e te faanahonahoraa o te autahu‘araa
Ia haamata tatou i te maramarama i te haapiiraa niu a te Mesia, e haapii mai te pae e te ono o te hiro‘a faaroo ia tatou i ni‘a i te faanahoraa e te faanahonahoraa o te autahu‘araa. I raro a‘e i te faatereraa a te Fatu, ua faanaho Iosepha Semita i te Ekalesia a te Faaora ma te faaohipa i te haamanaraa o te autahu‘araa—te mana o te Atua. Hoê â faanahoraa ta Te Ekalesia a Iesu Mesia i te Feia Mo‘a i te Mau Mahana Hopea Nei i ta te Mesia i faanaho e i arata‘i a faaea ai Oia i ni‘a i te fenua nei.
Auê ïa mahana hanahana no Iosepha Semita e no Oliver Cowdery i te avaʻe no me 1829, i to raua haereraa i roto i te uru raau no te pure no ni‘a i te haapiiraa tumu no te bapetizoraa no te faaoreraa hara ta raua i tai‘o a iriti ai raua i te Buka a Moromona. E mea rahi te mau haapiiraa tei haapiihia no ni‘a i te bapetizoraa e tera e tera ekalesia i te omuaraa o te mau matahiti 1800, e ua ite o Iosepha raua Oliver e, e ere te taatoaraa i te mea mau. Ua hinaaro raua i te ite i te faanahoraa tano no te bapetizoraa e o vai tei farii i te haamanaraa no te bapetizo.
No te pahono i ta raua aniraa i mua i te Fatu, ua fâ mai te hoê veʻa no te raʻi mai ia raua, o Ioane Bapetizo. Ua tuu oia i to’na puʻe rima i ni‘a i to raua upoo no te horo‘a ia raua i te haamanaraa no te bapetizoraa ma te parau e : « I nia iho ia orua e ta’u na tavini taeae nei, i te i‘oa o te Mesia ra te horoa’tu nei au i te Autahu‘araa a Aarona » (PH&PF 13:1).
Auê ïa mahana faahiahia i roto i te aamu o teie nei ao ! Ua faahoʻi-faahou-hia mai te autahu‘araa i ni‘a i te fenua nei.
Ia farii ana‘e tatou i te autahu‘araa, e farii tatou i te haamanaraa no te ohipa i te i‘oa o te Atua e ia arata‘ihia na te eʻa o te parau mau e te parau ti‘a. E puna faufaa rahi teie haamanaraa ia tae mai te mana parau ti‘a e te faaûruraa no te maitai o te mau tamarii a te Atua i ni‘a i te fenua nei, e e vai noa te reira i ô atu i te paruru. Ua titau-atoa-hia ia faaho‘i-faahou-hia mai te autahu‘araa na mua a‘e te Ekalesia mau a Iesu Mesia a faanahohia ai. Tera ïa te haapiiraa rahi ta tatou e haapii i roto i na hiro‘a faaroo pae e te ono.
III. Rave‘a tauturu mure ore no te tere tahuti nei
Te faataa mai nei na hiro‘a faaroo e toru no muri iho—tehitu, te vaʻu, e te iva—i te mau rave‘a tauturu e vai ra no te arata‘i ia tatou i roto i te tere tahuti nei. Ua horo‘ahia mai ia tatou te mau horo‘a pae varua no te arata‘i ia tatou a pee noa ai tatou i te mau haapiiraa a te Fatu e no te paruru atoa ia tatou i mua i te ino. O te mau papa‘iraa mo‘a atoa te tahi arata‘i—mai te mea e tai‘o maite tatou i te parau a te Atua, e faaite mai oia i to tatou eʻa no te ho‘iraa i te ora mure ore.
Te haapii nei te hiro‘a faaroo iva ia tatou e, ua heheu mai te Atua, te heheu nei Oia e e riro Oia i te heheu mai ananahi e rave rahi parau mau hanahana e te faufaa i Ta’na mau peropheta, ite e heheu parau. Ua haapii tatou e, ei apiti no te faarooraa i te reo iti haʻihaʻi e te mărû o te Varua, e te tai‘oraa atoa i te mau papa‘iraa mo‘a, te vai nei te tahi atu puna arata‘iraa, o to tatou ia mau feia faatere o te Ekalesia, tei ma’itihia, tei piihia e tei faataahia no te haamaitai i to tatou oraraa na roto i te mau haapiiraa ta ratou e haapii mai.
IV. Te mau melo misionare
Te haapii nei te hiro‘a faaroo ahuru, te ahuru ma hoê e te ahuru ma piti nahea i te faatere i te ohipa misionare e nahea i te faaite i te evanelia i roto i te hoê ao ua rau te mau fenua e te mau ture. Ua haapii tatou no ni‘a i te haaputuputuraa o Iseraela no te faaineineraa i te Tae-piti-raa o te Faaora. Ua haapiihia tatou e, e ti‘amâraa to te tane e to te vahine ia farii e aore râ ia pato‘i i te parau a te Atua mai te au i to raua hinaaro. Ei faahopearaa, ua haapii tatou e, a haaparare noa ai tatou i te evanelia a Iesu Mesia i na poro e maha o te fenua nei, e ti‘a ia tatou ia faatura i te mau faatereraa hau o te fenua tata‘itahi o tei tomohia e tatou. Oia mau, te ti‘aturi nei tatou e, e mea ti‘a ia haapa‘o, ia faatura e ia paturu tatou i te mau ture o te fenua.
V. A titau i te mau hiro‘a
Te horo‘a nei te hiro‘a faaroo ahuru ma toru i te haamaramaramaraa taa ê i te huru e ti‘a ai ia tatou ia faatere i to tatou oraraa e ia faaite ia tatou i mua i te taata. Te tai‘o nei te reira : « Te ti‘aturi nei matou e, e mea ti‘a i te taata ia ora ma te parau ti‘a, ma te haavare ore, ma te viivii ore, ma te aau maitai, ma te haapa‘o maitai e ma te hamani maitai i te mau taata atoa. Te pee nei hoʻi matou i te aʻoraa a Paulo : Te ti‘aturi nei matou e te tia’i nei hoʻi i te mau mea atoa. E rave rahi te mau mea i faaoromaihia e matou, e te hinaaro nei hoʻi matou ia faaroromai i te mau mea atoa. E mai te mea te vai atura te mau mea maitai, te mau mea faahiahia, te mau mea roo maitai, e te mau mea poupouhia ra, e titau ïa matou i te reira ».
E ti‘a ia tatou paatoa ia titau i teie hiro‘a ma te ora roa i te hoê oraraa ei faahiʻoraa i te reira. Ua patuhia te mau parau mau tei haapiihia i roto i te mau hiro‘a faaroo hoê i ni‘a i te tahi, mai te huru ra te mau tuhaa o te hoê niuniu afaʻifaʻi tei tamauhia te tahi i ni‘a i te tahi. Mai te hamaniraa aravihi e tamaumau nei i te mau tuhaa o te hoê niuniu afaʻifaʻi, te horo‘a nei te mau hiro‘a faaroo ia tatou i te mau haapiiraa tumu rahi no te Faaho‘i-faahou-raa. Te tuu nei te hiro‘a faaroo tata‘itahi i to’na faufaa hoê i roto i to tatou maramaramaraa i te evanelia a Iesu Mesia.
Ua tauturu mai to’u orometua Paraimere ia’u i te faaotiraa ia tamau i te mau haapiiraa tumu o te basileia. Ua haapii mai oia ia’u ia imi i te auraa hohonu e vai ra i roto i teie mau parau ohie o te hiro‘a faaroo. Ua parau fafau mai oia ia’u e, ia tuu vau i te faufaa ia haapii i teie mau parau mau mo‘a, e taui roa mai teie ite o ta’u i apo i to’u oraraa ei mea maitai a‘e, e te faaite atu vau ia outou e, ua tupu mau te reira.
I te otiraa te haapiiraa nehenehe a to’u orometua i ni‘a i teie mouʻa no Logan Canyon, ua faaea maoro rii matou, i te hora i faataahia e matou. Te topa ra te mahana, e ua mana‘o matou, e fifihia matou.
Ua aro to’u orometua ia tae i to matou vahi taa ê, no te ho‘iraa mai râ ua riro ei fifi rahi no matou. Te faaite nei teie vahi i te ino o ta matou ma’itiraa no ta matou faaoaoaraa. Ua fifi matou i te paʻumaraa i ni‘a i te aivi, hau atu râ no te hoê vahine paari.
I to matou tafifiraa no te faatae ia’na i ni‘a i te aivi, faura mai nei e piti mutoʻi. Ua tono mai te peresideni Paraimere ia raua no te imi ia matou, ua riʻariʻa oia ua moʻe matou. Aita roa teie fifi ta matou i faaruru e te mau haapiiraa i haapiihia, e mo‘e-roa-hia’tu i‘au i roto i to’u oraraa.
Outou te feia apî tamaroa—Te faaitoito nei au ia outou ia faaohipa i to outou feruriraa maramarama no te tuatapapa e no te haapii i te mau hiro‘a faaroo e te mau haapiiraa tumu ta ratou e haapii nei. O ratou o te mau mea faufaa roa a‘e, e te papû roa a‘e, o te mau faahitiraa poto roa a‘e o te haapiiraa tumu o te Ekalesia. Mai te mea e faaohipa outou ia ratou no te arata‘i i ta outou mau tuatapaparaa o te evanelia a Iesu Mesia, e ite outou e, ua faaineinehia outou no te faaite atu i mua i teie nei ao i to outou iteraa papû no te parau mau tei faaho‘i-faahou-hia mai. Ua ti‘a atura ïa ia outou ia faaite ma te ohie e te afaro e te hohonu i te mau ti‘aturiraa niu ta outou e poihere nei ei melo no Te Ekalesia a Iesu Mesia i te Feia Mo‘a i te Mau Mahana Hopea Nei.
Te apiti atu nei au i to’u iteraa papû i te parau mau o na hiro‘a faaroo e ahuru ma toru na roto i te i‘oa o to tatou Fatu e Faaora, o Iesu Mesia, amene.