A Kabwaia man Kukurei Ake A Kawakin Ana Tua te Atua

Tabeua te tai ae nako ni kawarakin Aotiteria, I mwananga nakon mwanokun te aba ae moan te tikiraoi ae e mena i mataniwin taari ae rangi n ataaki bwa te tabo ni karebaba. Ngke I nakonako iaon te bike, e katikaki nanou, n tamaroan bwarobwaron nao i akuun te mwanoku ma nao aika a uarereke ni bwarobwaro nako mataniwin taari.

Ngke I tabe ni karaurau n nakonako, I nooria kurubu aika taan karebaba mai Amerika. Iai te bwai ae a aki kukurei iai, a taetae n takarua ao ni kotea taari. Ngke I titirakiniia bwa tera ae riki, a kotea akuun te mwanoku are e bwaro mai iai te nao.

“Taraa ikekei,” e taetae temanna ma te aki kukurei. “Ko kona n noora te bwai ae totoko?” Ngke I karaua n taraia, I noora raoi te bwai ae e totoko ae aroraki nako marawa, n te tabo are a bwaro mai iai nao aika a bubura. Titebo ma e karaoaki te bwai ane e totoko man te kunnikai ae matoatoa bibirana ao ni boutokaaki ni bwaai akana a beibeti iaon taari. Irouia taan karebaba, e bwaka nako kabin marawa.

E reitia te tia karebaba mai Amerika, “Ti motirawa ikai ao tii aei ara tai inanon maiura ni karebaba iaon nao aika a bubura. Ti kona ni karebaba iaon nao aika a uarereke aika a bwaro inanon te kamwanoku, ma ti aki kona ni karebaba iaon nao aika a bubura ngkai ti tuukaki n te bwai are e totoko arei. Ti aki ataia bwa bukin tera e mena ikekei te bwai ae totoko. Are ti bane n ataia bwa aei e a bon kanakobuaka mwanangara.”

Ngke a moanna n raraoma taan karababa, e a manga katikaki nanou nakon te tia karebaba are temanna ae kaan—te mwane ae ikawai riki ao bon kaain te aba. E taraa n aki kan taotaonaki nanona ngke e ongongoora n taian ngurengure ibukin te bwai are totoko.

N tokina e teirake ao e kawariia kaain te kurubu. N akea te bwai ae taekinna, e anaa ana bwai ni kataratara man ana baeki are i akuuna ao e angan temanna te tia karebaba, e kotea te bwai are e totoko. A bane ni kabonganai aia bwai ni kataratara taan karebaba ni kabane. Ngke e a roko n au tai, ni buokakiu man te bwai ni kataratara, I kona n noora te bwai teuana are I bon tuai nooria mai mwaina: ingietan te ika—taian bakoa aika a bubura aika a amwarake irarikin te rakai n iteran te bwai are e totoko.

A waetata n aki kakarongoa kaain te kurubu. Te tia karebaba are e ikawai riki e karina ana bwai ni kataratara ni nnena ao e boonako. Ngke e karaoa anne, e atong taeka ake N na aki kona ni mwaninga taekaia: “Tai taetae n aki akaka ibukin te bwai are e totoko,” e taku. Bon tii ngaia te bwai are e kawakini ngkami man te kamaunaaki.”

“Ngke ti tei iaon te bike ae tamaroa anne, a moanna ni bitaki ara iango n ae waekoa. Te totoko are e matoatoa man roko n tiana—are e taraa ni katoka te ngarengare ao te kakukurei man te karebaba iaon nao aika bubura—e a tia n riki bwa te bwai teuana ae rangi ni kaokoro. Man ara atatai ae boou n te kaangaanga are e tataninga man raba iaan taari, te bwai are e totoko e a karekea te kamanomano, te kamaiuaki, ao te rau.

Ngkai Ngai ao ngkoe ti nakonako ni kawain te maiu ao ni kakoroi bukin ara iango, Ana tua te Atua ao ana kainibaire—aekan te bwai ae totoko—e kona n tabetai ni kaangaanga bwa ti na matata iai. A kona n taraa ni matoatoa, n totokoa te kawai are e taraa ni kaunga ao ni kakukurei are e tabe n touaki irouia aomata aika a bati. N aron are e kabwarabwara te Abotoro are Bauro, “Bwa ti nooraba maki ngkai n te tirotaam”¹ ma iai tian ara nooraba bwa ti bon aki kona n ataa te kaangaanga ae karabaaki i aana.

Ma ane E “ata[i ] bwaai ni kabane”² e ataia raoi bwa a mena iaa taian kaangaanga akanne. E anganiira te kairiiri ae mimitong, rinanon Ana tua ao ana kairiiri n tangira, bwa ti aonga ni kararoai kaangaanga akanne—bwa ti aonga ni kaeta kawaira inanon maiura are e kamanoaki man kaangaangan te bure are e tataningaira man kona n uruaniira.³

Ti kaota ara tangira ibukin te Atua—ao ara onimaki i Rouna—man karaoan ara kabanea n tamaroa ni katoa bong n ri mwiin te kairi are E a tia ni kawenea i bukira ao man kawakinan tuua ake E anganiira. Ti kaota te onimaki anne ao te tangira n aanga ake ti tuai raoi n oota ibukin ana tua te Atua ke tao te kawai anne are E tuangira bwa ti na iria. Bon te babaire ae beebete irakin te kawai inanon bwaai aika a totoko n te tai are ti ataia bwa iai taan kamwane aika a kakang wiia ake a kiri bobotaki i tinaniku. E bon kaangaanga riki kaetakin kawaira ni bwaai aika a totoko ngkai ti kabanei nanora iaon nao ake a kakukurei man anainano ake n te itera are teuana. Ao irarikina inanon taai akanne—taai ake ti rineia bwa ti na kamwakura ara onimaki, ni kaaki ara onimaki iroun te Atua, ao ni kaota ara tangira Nakoina —bwa ti rikirake inanon te aro n tamnei ao ni karekei kabwaia aika a mwaiti.

N te Nu Tetemanti, Anania e aki oota n ana kaetieti te Uea ae e na kakaea Tauro ma ni kakabwaia—te aomata ae iai kariaiakana iaan te tua bwa e na kabureia aomata aika taan kakoaua Kristo. Ma ibukina bwa e aongeaba nakon ana tua te Atua, Anania bon te bwai ni mwakuri ae e kakawaki ni bungiakin te Abotoro ae Bauro n te aro n tamnei.⁴

Ngkana ti kakoaua te Uea, ni kamwakura ara onimaki, n ongeaba n Ana tua, ao n rimwin te kawai are E kateia ibukira, ti na riki n aekakin te aomata are e tangiria te Uea bwa ti na riki iai. Bon aio “rikira”—rairakin te nano—anne te kabanea ni kakawaki. N aron Unimwaane Dallin H. Oaks ngkai e taku: “E aki tau bukin temanna bwa e na karaoa ae eti n akea ana namakin. Taian tua, otenanti, ao berita aika tabu tiaki te mwane are e na karinaki ni bangken karawa. Ana euangkerio Iesu Kristo bon te baire are e na kaotia nakoira bwa aekakira arora are ti na riki iai are E tangiria Tamara are i karawa.”⁵

Te ongeaba ae koaua, are ngkana, ti anga ngaira ni kabane Nakoina ao ni kariaia Ngaia bwa E na kairi kawaira n taai aika a raraoi ao n taai aika a kaangaanga, n ataia bwa E kona ni karikiira nakon are ti kona ni karikiira nako iai.

Ngkana ti anga ngaira nakon Ana kantaninga, ti rikirake inanon te rau ao te kukurei. E reirei te Uea ae Beniamina bwa ake a kawakin ana tua te Atua a “kakabwaiaki ao ni kukurei” … ni bwaai ni kabane, n te maiu n rabwata ao n tamnei.”⁶ E tangirira te Atua bwa ti na kukurei. E tangirira bwa ti na karekea te rau. E tangirira bwa ti na tokanikai. E tangirira bwa ti na maiu man kamanoaki man ana kariiri te aonaaba ae e katobibira.

Ni karaoia n te anga teuana, ana tua te Uea bon tiaki kaetieti aika a kaangaanga ake ti riai n teimatoa n reiakin ni kaitarai ma bon oin ara kantaninga n te mau aei bwa ti aonga ni karietataaki imwina. Ma, taian totoko aika a kateaki iroun te Uea bon ibukin kamaiuara man te buakaka ao kairarang aika a urubwai are a na katikira rikaki nako marawan te nanokawaki. A kanakoaki ana tua te Uea n te tangira ao n te mwamwannano; a baireaki ibukin kimwareireira n te maiu aei⁷ n aron mwaitin ae a baireaki ibukin kimwareireira ao karietataakira n te maiu are imwiina. A katanea te kawai are ti na mwakuriia—ao ae kakaawaki riki, a na kaota arora ae ti na riki nako iai.

N aron bwaai ni kabane aika a raraoi ao ni koaua, E tei Iesu Kristo bwa te katooto ae te kabanea n tamaroa. Te mwakuri n ongeaba ae moan te korakora n te maiu are akea tokina e riki ngke E anga Ngaia ae te Nati nakon ana kataninga Tamana. Ana bubuti ma te nanorinano ae moan te korakora bwa E na uotaki nako te mwangko mairouna—bwa E aonga n toui tabeua kawai nakon are e a tia ni katauaki Ibukina—Kristo E anga Ngaia nakon te kawai are e tangiria Tamana bwa e na nako iai. Bon te kawai are rinanon Ketetemwane ao Korokota, te tabo are E rinanon te korakai ma te karawawataki ae kaangaanga iangoana ao are E kaakeaki iai ngkai e kitanaki iroun Tamnein Tamana. Ma n te kawai naba anne are n tokina te ruanimate ae akea kanoana n te katenua ni bong, n tang n takaruaea “E a uti”⁸ are a ongo ao n namakinna naake a Tangiria. E irianaki n te kukurei ae akea kabotauana ma ni karaunano are e boboto iaon Ana mwakuri ni Kamaiu ibukiia Natin te Atua ni kabane n te maiu are akea tokina. Ngkana ti kariaia nakon Ana kantaninga ni katokanikaiaki iroun te Tama, E anganiira Kristo te rau are akea tokina, te kukurei are akea tokina, ao te maiu are akea tokina.

I kaotia bwa ngaira natin te Atua aika a tangiraki. I kakoaua bwa E tangiriira bwa ti na kukurei ao ni mano ao ni kakabwaiaaki. Ibukin te kantaninga anne, E a tia ni katauraoa te kawai ibukin okira Nakoina, ao E a tia ni katei bwaai n totoko are a na kamanoira inanon kawaira. Ngkana ti karaoa ara kabanea n tamaroa n ira te kawai anne, ti na kunea te kamanoaki, te kukurei, ao te rau ni koaua. Ao ngkana ti kariaia Ana kantaninga, ti na riki n aron are E tangiria. N aran Iesu Kristo, amen.