Koaua aika Bebete ao ni Kakawaki

Tariu ma mwaaneu aika tangiraki, ai irabwi ngkai te ririki are e waaki te maungatabu ni kabuta ao Beretitenti Boyd K. Packer ao Unimwaane L. Tom Perry ao Richard G. Scott a aikoa manga tekateka mai buki ngke n anga aia marooro n tain te maungatabu. Ara ururing ibukiia ae nako mai nanora, ao I reita au karinerine nakoia, ngaiia n tatabemaniia nako a rang okoro ibon irouia ma a katiteuanaaki n aia kakoaua ao aia koaua ibukin Iesu Kristo ao Ana Mwakuri ni Kamaiu.

Irarikin anne, Ngai, n ai aromi, I kakorakoraki ngkai I kamatoa Beretitenti Thomas S. Monson bwa te burabeti, te tia mamata, ao te tia kaotioti, ao I miimi n ana kakaonimaki i nanon tibwangana ae te abotoro n te maan ae raka i aon 50 te ririki.

Ao bon inanon moaningabongin te Kauabong n te wiiki aei, imwiin raoi te aoa 9 n te ingabong ngke a moana aia boowi kaain te Bitiobiriki ma te Beretitentii n Aonon Atia, ake a mena ikai ibukin te maungatabu, are I a weteaki bwa N na kaitibo ma Beretitenti Monson, n raonaki ma ana kauntira. Tabeua te tai imwiina, ngke I nakonako inanon te ruu ni boowi nakon ana aobiti, e taraa n nako nanou ngke I tekateka ni kaitara, ngkai e taetae nakoiu ni katoka nakon nanou. E taetae, n taekina au ririki, bwa I taraa n ataei ao n rang n ataei nakon au ririki.

Ngkanne, inanon tabeua te miniti, e kabwarabwara Beretitenti Monson bwa e mwakuri ni kaineti ma ana kantaninga te Uea, ao e kanakoa te wewete nakoiu nakon te Kooram n te Tengaun ma Uoman. E titirakinai ngkana I butimwaea te wewete aei, imwiin kakoauana n te aro ae kakuba, ma ni kamiimi, I kaeka bwa I butimwaea te wewete. Ao ngkanne, imwaain raoi ae I taekin baike a kaota au namakin, ake bon namakinan te aki tau, e a taetae nakoiu Beretitenti Monson ni kabwarabwara aron weteana bwa te abotoro iroun Beretitenti David O. McKay n taai aika a nako, are e namakina naba iai te aki tau. E karaurau n reireiai, “Bitiobi Stevenson, a tau naake a weteaki iroun te Uea.” Taeka ni karaunano mairoun te burabeti a riki bwa buokan te rau, te aekaki n namakin ni kabotaua ma arou ni buoka karauan nanou n aoa ni korakai aika nako te bong ma te ngaina n te tai are I weteaki iai.

I kamataata te bwai ae I kabwarabwara nakoim aei nakon naba raou ae tangiraki, Lesa, rimwi riki n te bong anne, I tekateka n te tabo ae rau ni koonan te Tembora Tikuea, ma taraakin te tembora ao te Tabaenako ae kakauringaaba ae mena imatara. Ngkai ti kataia n oota ao ni kawaaki baika a riki n te bong anne, ti kunea korakora bwa bon ara onimaki iroun Iesu Kristo ao ara atatai ibukin te babaire ni kakukurei ae korakora. Aei are e a kairai ni kaota au tangira ae korakora nakon Lesa. Boni ngaia kukureiu i nanon maiu ao natin te Atua te aine ae korakora. E kaotaki maiuna man ana ibuobuoki ao ana tangira ae aki inanonano ibukiia aomata ni kabane. N na kataia n teimatoa n tau ibukin te kakabwaia n ara mare ae akea tokina.

I kaota au tangira ae moan te korakora nakoia natira mwaane aika aman ao aia utu, teniman ibuakoia a mena ikai ma buuia aika titikiraoi, tinaia tibura aika onoman, te kaaman, te mitinare, ae e reke kariaiakana n tiku n riaon are aia tai ni matu mitinare ao ae E mataku n te boowi ma ana beretitenti n te mition ao buuna man mweengaia ni mitinare i Taiwan. I tangiriia n tatabemaniia nako ao I tangiria aroia n tangira te Tia Kamaiu ao te euangkerio.

I kaota au tangira nakoia kaain au utu: nakon tinau ae tangiraki ao nakon tamau, are a tia ni mate n te ririki ae nako, are a tia ni katuka inanou te koaua are e tiku n au ururing man taai ake rimoa. I anga au kakaitau nakoia tariu, mwaaneu, ao buuia aika kakaonimaki, n ai aron naba ana utu Lesa, ake angiina a mena ikai n te bong aei. I kanakoa au kakaitau ae bati nakoia utu, raao, mitinare, taan kairiiri, ao taan reirei irarikin naba aikai.

I a tia ni kakabwaiaki man au reitaki ae kaan ma kaain te Moan Beretitenti, te Tengaun ma Uoman, Itingaun, ao beretitentii ni bootaki. I kaota au tangira ao au karinerine nakoimi ni kabane aine ao mwaane ao ni kataia ni kororaoi n ara reitaki imarenara ae reitinako. Te Bitiobiriki n Tararua a kimwareirei n te reitaki ae kanga ai aron karawa. I aki mwaninga au reitaki ni katoa bong ma Bitiobi Gérald Caussé, Bitiobi Dean M. Davies, ao taani mwakuri.

I tei imatami bwa kakoauan ana taeka te Uea are koreaki n te moan mwakoro n Reirei ao Berita aika Tabu: “Bwa bwaninin [te] euangkerio e na taetaekinaki irouia aika mamaara ao aika mangori ni karokoa tokin te [aonaaba], ao i mataia uea ao tani motikitaeka.”¹ Taeka aikai a roko i mwain ana katanoata te Uea are e kaota ana tangira te Karo nakoia Natina: “Mangaia ae, Ngai te Uea, atakin te kaangaanga are e na roko i aoia kaain te aonaba, I wetea au tia mwakuri Iotebwa Timiti te Ataei, ao n taetae nakoina mai karawa, ao n anganna tua.”²

Tamara are i Karawa ae tangiraki ao Natina, Iehova, a ataa moan bwaai ao te toki,³ a kauka karawa, ao a karokoa te kabanea n tai ni kaitarai kabuanibwai bwa A ataia bwa e na roko. Te Abotoro Bauro e kabwarabwarai baika a kakamaaku aika a na kaoti bwa “taai ni kabuanibwai.”⁴ Ibukiu, aei bairean ana kaboomwi ae tituaraoi te Tama are i Karawa ngkai ti maiu inanon taai ni kabuanibwai bwa ti maiu naba n te tai ae bwanin.

Ngkai I korakai ibukin namakinan te aki tau n te wiiki aei, I karekea te namakin ae onoti are e boaai ma ni karaua nanou: n na aki iangoi baika I aki kona ni karaoi ma N na kabotoa au iango ni baika I kona ni karaoi. I kona ni kaota au koaua ni koauan te euangerio.

Aikai taeka ake I tataekin tebubua te tai nakoia kaain te Ekaretia ao nakoia aomata ake tiaki kaain te aro: “Te Atua bon Tamara are i Karawa ae [tatangira]. Boni ngaira Natina. … E tang ma ngaira ngkana ti karawawataaki ao ni kimwareirei ngkana ti karaoa are e eti. E tangiria n reitaki ma ngaira, ao ti kona n reitaki ma Ngaia rinanon te tataro. …

“Tamara are i Karawa e katauraoa nakoira, Ngaira natina, te kawai n … oki ni maeka ma Ngaia. … Boton ana babaire [Tamara are i Karawa] bon ana Mwakuri ni Kamaiu Iesu Kristo.”⁵

Tamara are i Karawa e anga Natina nako aon te aonaaba ni kamaiuia aomata ni kabane man aia bure. Man koaua aika kakawaki aikai I kaota au koaua, ao I karaoia n aran Iesu Kristo, amen.