Uringnga Antai ae Ko Onimakinna

Ngke ruaiwa au ririki, tibu te unaine ae iaia irana, aua te buti ao tebwi ma teuana te inti (1.5 m) abwakina e roko ni motirawa tabeua te wiiki irarikira ni mweengara. Te bwakantaai teuana ngke e mena ikekei, Ngai ma tariu aika uoua aia ririki ti baireia ae ti na kena te bwangabwanga n te marae inukan te kawai man mweengara. I aki ataia bwa bukin tera ti karaoia n tabetai ataeinimwane a ken mwanono. Tia barekareka ma akea te bwai ae ti reke iai n te kaangaanga. Ataenimwane ake irarikira a noora aron kaungan te keniken ao a moanna ni buokiira. Ngkanne ti a bane riki ni barekareka. E matoa kenakin aontano, ngaia are ti a uota te ooti man n te onaroka ni katiia te ran i kabin te mwanono ibukin kamarauan te tano. Ti a bokaboka ngke ti keniken, ma e aki nano ara mwanono.

Temanna n ara kurubu e baireia bwa ti riai ni bita ara mwanono nakon te tabo n uaua, ngaia are tia kaonna n te ran. Ngkai ngai te kabanea n uarereke ao n tangiria n rin inanona, I kiba nako nanona n nooria. Ngkai Ia bon rangi ni barekareka. I aki moa iangoia bwa N na onrake n te bokaboka, ma anne ae I noora tokina.

Ngke e a tabe ni mwaitoro, I rinuukan te kawai, n rinnako inanon au auti. Tibu e tei imwaiu imatan te mataroa ao e rawa ni karinai. E tuangai bwa ngkana e karinai, N na kabokaboka nanon te auti are e a tibwa tia ni kaitiakia. Ngaia are I a karaoa are tangiria te roro are ruaiwa te ririki are a taku bwa eti ao e bon eti ao I a biri ni kaea te mataroa mai buki, ma e waekoa riki ana iango nakon are I iangoia. I a un, kabuki waeu, ao n tua bwa N na rin inanon te auti, ma a teimatoa n in mataroa.

I bon mwaimwai, bokaboka, mariri, n au iango n ataei I taku bwa N na mate i akuun au auti. N tokina, I tuangnga bwa tera ae N na karaoia bwa N na kona n rin n te auti. Imwain ae I ataia, I tei i bukin te auti ngke tibu te unaine e katiiai n te ooti. Imwiin te bwai are kaanga e taraa n aki totoki, tibu te unaine e tuangai bwa I a itiaki ao e karinai inanon te auti. E aabue nanon te auti, ao I a kona ni karinii kunnikaiu aika mwaau man itiaki.

Iangoa aekakin te kaikonaki aei n te maiu, taiaoka iangoi ana taeka Iesu Kristo aikai: “Ao akea te bwai ae bareka ae kona n rin n ueana; ngaia are akea ae kona n rin inanon ana rau ma ti naake a tia n teboki aia kunnikai n raraau, ibukin aia onimaki, ao aia rairannano man aia bure, ao aia kakaonimaki n uaa te toki.”¹

N tei itinanikun au auti ni katiiaki n te ran iroun tibu te unaine e bon aki tamaroa ao e kamwengabuaka. Aki kariaiakan okim nakon te Tama are i Karawa ibukina bwa ti rineia n tiku ke ni bareka n bokabokan te bure e na bon rangi ni kananokawaki n akea tokina. Ti riai n aki kekeweira n te bwai are ti na rinanona bwa ti na oki ao n tiku irarikin Tamara are i Karawa. Ti riai n itiaki.

Imwain rokora n te aonaaba aei, ti riki bwa natin te Atua mwaane ao aine n te boowi ae korakora.² Ngaira n tatabemaniira ti kakauongo raoi, ao akea mai iroura ae matu. N te boowi anne, Tamara are i Karawa e kaota nakoira te babaire. Ibukin bwa te baire e kawakina inaomatara ao e kantaningaira bwa ti na reireinaki man bwaai ake ti rinanona ao tiaki tii mai Irouna, E ataia bwa ti kona n riinga te bure. E ataia naba bwa te bure anne e na kabaarekaira ao ti na aki kona n oki Nakoina ibukina bwa te tabo are E maeka iai e bon itiaki riki nakon te auti are e kaitiakia tibu te unaine.

Ibukina bwa Tamara are i Karawa e tangiriira ao iai ana kantaninga bwa e na angani[ira] te aki mamate ao te maiu are akea tokina,”³ Ana baire ni kotaki ma tibwangan te Tia Kamaiu—temanna are e kona ni buokiira bwa ti na itiaki n aki taraia bwa barekara ngaira. Ngke e katanoata Tamara are i Karawa bwa e kainnanoa te Tia Kamaiu, I kakoaua bwa ngaira ni kabane ti rairaki nakon Iesu Kristo, te Rikitemanna n Tamnei, Temanna are e tokanikai n riki n ai aron te Tama.⁴ I kakoaua bwa ni kabane ngaira ti ataia bwa bon Ngaia, are akea mai iroura ae e kona ni karaoia, ma ti Ngaia.

N te onaroka are i Ketetemwane ao iaon te kaibangaki are i Korokota, Iesu Kristo e korakai n rabwatana ao n tamneina, n ruru ni maraki, tiinako raraana man bwangabwangan kunna, e bubutia Tamana bwa e na uota nako te mwangko mai Irouna,⁵ ao E bon karaoia.⁶ Bukin tera e karaoia? N oin ana Taeka, E tangiria n neboa Tamana ao ni katia Ana mwakuri ni “katauraoia natiia aomata.”⁷ E tangiria ni kawakini ana berita aika tabu bwa ti na kona n okira mweengara. Tera are e tuangiira bwa boon mwiina? E tii bubuti ma ngaira ni kaoti ara bure ao n rairi nanora bwa ti aonga n aki korakai n ai arona.⁸ E kaoira bwa ti na itiaki bwa ti aonga n aki katukaki itinanikun ana auti Tamara are i Karawa.

E ngae ngke totokoan te bure e tangiraki ibukin te baeten n te maiu, ma nakon nakoraoina n ana Mwakuri ni Kamaiu Iesu Kristo, e aki warekaki bwa tera te bure are ti a tia ni karaoia ke mwaitira buure aika ti a tia ni karaoi inanon te mwanono ae ataaki. E aki kakaawaki bwa ti na mama ke ni bwainrang ibukin te bure are, n aron are e taku Nibwaai, “ti kai rootaki” iai.⁹ E aki kakaawaki bwa n te tai teuana ao ti na kakea bongan karineara ni karimoa¹⁰

Are e warekaki bwa Iesu Kristo, natin te Atua, e korakai “ni maraki ma te karawawataki ao te kaririaki n aekaia nako;” ao aio “bwa e na kakoroaki te taeka are e na uota iaona marakiia ao aorakiia ana aomata”¹¹ Te bwai ae kakaawaki bwa E ruo ni kamangoria,¹² ni kamangoria nako aon te aba “n rinanon bwaai ni kabane”¹³ ao ni korakai “n ae korakora riki nakoia aomata nako” are a kona.¹⁴ Te bwai ae kakaawaki riki bwa Kristo e bubuti ibukira nakon te Tama, “ni kangai: te Tama, noora marakin ao maten teuare akea ana bure, are ko kakatonga Irouna; … mangaia are, Tamau, tai katuaaia tariu ake a kakoaua arau, bwa aonga n nakoiu ao ni karekea te maiu ae aki tootoki.”¹⁵ Anne te bwai ae bwainaki ao e na riai n anganiira ni kabane te kantaninga ae boou ao n teimatoa reitinako ni kataia ni katamaroa, ibukina bwa E tuai ni mwaninga taekara.¹⁶

I kakoaua bwa te Tia Kamaiu e na bon aki tannako mai iroura ngkana ti nanorinano n ukoukoria bwa ti aonga n rairinanora; e na bontai iangoia bwa ngaira aomata aika aki tau ni bitaki nakon ae tamaroa, e nae na tai kangai, “Oo tiaki, manga ngkoe naba”, e na bon tai katinanikuira ibukin kabwakara n ataia bwa matoara aron totokoan te bure. E bane n ota iai ni kabane, ma te namakin n rawawata, mama, te un bwa anne tokina ngkana ko bure.

E koaua te rairannano e mwakuri. Tiaki te bwai ae karioaki ke te karaobwai “n te iango ae akea baireana.”¹⁷ Iai mwaakana ni kabebetei rawawata ao n onei mwiia n te onimaki. E kona ni kairiiri nakon te bitaki n nano ae korakora are e reke man “akean te nano ni karaoan te buakaka, ma n reitinako ni karaoa ae tamaroa.”¹⁸ Te rairannano ae kainnanoaki e aki bebete. Karekean bwai aika akea tokiia aki bebete. Ma e uaana. Ngke Beretitenti Boyd K. Packer n ana kabanea ni maroro nakoia Ka-Itingaun n te Ekaretia: “Aio te Mwakuri ni Kamaiu: Te Mwakuri ni Kamaiu e aki katuka te mwaka, akea mwiina. Tera are e karaoia e katia. … Te Mwakuri ni Kamaiu akea nooran mwiina, akea mwanekana. E kamaiu, ao are e kamaiuia e teimatoa maiuna.”¹⁹

Ai aron naba ara kantaninga ni manga maeka ma te Tama e boboto iaon ana Mwakuri ni Kamaiu Iesu Kristo, iaon ana anganano temanna te Aomata ae akea ana bure bwa e na katoka i aona, ni kabane ni kabotauaki nakon ana kairoro te motikitaeka, anaakin rawawatan aia bure aomata ni kabane, n ikotaki ma buure akanne are natin te Atua mwane ao aine are e aki riai n rineia bwa e na korakai i bon ibukina.

Ngkai membwa n ana Ekaretia Iesu Kristo Ibukiia Aika Itiaki ni Boong aika Kaitira, ti tibwa te mwaaka ae korakora n ana Mwakuri ni Kamaiu te Tia Kamaiu nakoia aomata riki tabeman ibukina bwa ti ataia bwa ngkana ti karaoi berita aika a tabu, reitinako n rairinanora, ao n teimatoa ni ua te toki, E na karaoira bwa ti na abaaba ma Ngaia²⁰ ao n Ai arona ti na karekei ni kabane ana bwai te Tama.²¹ Anne te reirei ae rang ni kakawaki ao e bon koaua. Ana mwakuri ni Kamaiu Iesu Kristo e karika ana kakao te Tia Kamaiu bwa “kam na moaniban te raoiroi, n ai aron Tamami are i karawa ngkai moaniban te raoiroi.”²² e bon kona n riki nakon are un n aki kona n rootaki.

Koroboki aika tabu e reirei bwa aomata ni kabane a riai “ni motikaki taekaia n aron ana motikitaeka ae tabu te Atua.”²³ N te bong arei akea ara tai ni karaba ibuakon te kurubu ae bubura ke ni koteia tabeman ni bukiniia ibukin barekara. Ma te kakukurei, koroboki aika a tabu a reirei naba bwa Iesu Kristo, E korakai ibukin ara bure, are bon te tia Tei Imarenara ma te Tama, are e araniira bwa Raoraona, are e tangiriira n ua te toki, N tokina e na bon riki bwa ara tia moti. Teuana are n tabetai te kakabwaia ae aki taraaki n ana Mwakuri ni Kamaiu Iesu Kristo bwa “te Tama … e angan te Nati, te motikitaeka ni kabane.”²⁴

Tariu ao mwaneu ngkana kam bwarannano, ke n titiraki ngkana a kona ni kabwaraaki ami bure aika a mwaiti, taiaoka uringnga antai are e tei “imare[nara] ao te motikitaeka,” are e kaonaki n te nanoanga nakoia natiia aomata,” ao are e a tia ni katoka Iaona buakakara ma ara bure ao “ni kakoroa bukin te moti.”²⁵ N taekana teuana, n aron Nibwaai n ana tai n raraoma, e uringnga “antai ae [ko] onimakinna,”²⁶ riki Iesu Kristo, ao imwiina n rairannano ni manga rinanona riki “ma te kantaninga ae tamaroa ma ni kororaoi.”²⁷ N aran Iesu Kristo, amen.