Ib tug Qauv rau Kev Kaj Siab Lug
Txoj kev nyob kaj siab lug uas peb txhua tus xav tau yuam kom peb ua ib yam dab tsi—uas yog kawm txog Yexus Khetos, mloog Nws cov lus, thiab nrog Nws taug kev.
Ob peb xyoos tas los lawm, wb ib tug ntxhais thiab tus vauv raug hu los qhia ib hoob me nyuam yaus, muaj tsib tug tub uas muaj plaub xyoos. Wb tus ntxhais uas tus xib hwb qhia thiab wb tus vauv yog tus uas tswj kav lawv, nkawd sim ua tu tu, txawm muaj kev kub ntxhov li cas, kom thiaj qhia tau cov me nyuam ntawd txog txoj moo zoo tej ntsiab cai.
Muaj ib hnub lawv nyob tsis tswm, twb ceeb toom ib tug tub hluas ntau zaus lawm, wb tus vauv tau coj tus tub uas muaj plaub xyoos no tawm ntawm chav kawm mus. Thaum txog nraum, tab tom yuav nrog tus tub hluas tham txog nws tus cwj pwm thiab yuav tau mus nrhiav nws niam txiv, tus tub hluas hais rau wb tus vauv ua ntej nws pib hais lus, tsa nws txhais tes thiab qw nrov nrov hais tias, “Tej thaum—tej thaum—yeej nyuaj rau kuv xav txog Yexus!”
Nyob hauv peb lub neej hauv ntiaj teb no, txawm lub yeeb koob tom kawg yuav zoo npaum li cas los thiab txoj kev taug kev yuav lom zem npaum li cas los, peb yeej yuav muaj tej kev cov nyom thiab peb yuav muaj kev nyuaj siab. Txwj Laug Joseph B. Wirthlin qhia tias: “Peb txhua leej txhia tus yeej yuav ntsib txoj kev nyuaj siab. Yeej yuav muaj ib lub sij hawm twg, uas txhua leej txhia tus yuav raug kev nyuaj siab. Tsis muaj ib tug neeg twg uas tau kev zam cai.”1 “Tus Tswv vim Nws txawj ntse yeej tsis tiv thaiv leej twg ntawm kev nyuaj siab los sis kev tu siab.”2 Qhov uas peb yuav taug kev muaj kev thaj yeeb nyab xeeb, yeej nyob ntawm seb, peb puas muaj teeb meem xav txog Yexus.
Kev nyab xeeb ntawm sab paj hlwb, kev nyab xeeb ntawm lub siab, thiab kev nyab xeeb ntawm sab ntsuj plig tsis los rau peb vim peb muaj cuab kav khiav ntawm tej kev cov nyom, tej kev tu siab los sis kev nyuaj siab. Txawm peb taij thov npaum li cas, txhua yam kev cua daj cua dub yuav tsis ploj mus, yuav tsis kho txhua yam mob, thiab tej zaum peb yuav tsis to taub txhua txoj lus qhuab qhia, txoj ntsiab cai, los sis txhua yam uas cov yaj saub, cov pom tau, thiab cov qhia kev tshwm sim tau qhia rau peb. Tiam sis, peb tau lus cog tseg yuav tau kev nyab xeeb—yog peb ua ib yam.
Nyob hauv Phau Yauhas, tus Cawm Seej qhia tias txawm peb muaj tej teeb meem hauv lub neej no, peb muaj tau kev zoo siab; peb muaj kev cia siab, thiab peb tas yuav ntshai, vim Nws hais tias, “Rau ntawm kuv muaj kev kaj siab.”3 Kev ntseeg Yexus Khetos thiab Nws txoj kev theej txhoj yeej yog, thiab yuav yog tas mus li, thawj thawj txoj ntsiab cai hauv txoj moo zoo thiab yog lub hauv paus rau peb txoj kev cia siab kom muaj kev thaj yeeb hauv ntiaj teb no, thiab txoj sia nyob mus ib txhis hauv lub neej tom ntej.4
Nyob hauv peb txoj kev nrhiav kom tau kev thaj yeeb hauv lub neej uas muaj kev cov nyom no, peb muaj ib tug qauv uas pab tau peb tsom ntsoov txog tus Cawm Seej, uas hais kom peb kawm txog nws, thiab mloog Nws cov lus; ua neej raws Nws tus Ntsuj Plig txoj kev siab mos siab muag, ces nej yeej yuav muaj kev kaj siab lug dhau los ntawm Nws. Nws yog Yexus Khetos.5
Kawm, mloog lus, thiab taug kev—peb theem nrog ib txoj kev cog lus.
Theem thib Ib: Kawm txog Nws
Nyob hauv Yaxayas peb nyeem hais tias, “Thiab muaj neeg coob yuav mus thiab hais tias, nej cia li los, thiab cia peb nce mus rau saum tus Tswv lub roob, mus rau ntawm Yakhauj tus Vajtswv lub tsev; thiab nws yuav qhia rau peb txog nws tej kab tej ke.”6
Vim haj yam muaj ntau lub tuam tsev hauv ntiaj teb no, peb kawm txog Yexus Khetos thiab Nws lub luag hauj lwm hauv Leej Txiv txoj hau kev ua tus Tsim lub ntiaj teb no, ua peb tus Cawm Seej thiab tus Txhiv Dim, thiab yog tus uas coj kev kaj siab lug los rau peb.
Thawj Tswj Hwm Thomas S. Monson qhia hais tias: “Lub ntiaj teb yog ib qho chaw nyuaj ua neej nyob thiab muaj teeb meem ntau. … Thaum koj thiab kuv mus hauv Vajtswv cov tsev dawb huv no, thaum peb nco qab txog tej kev khi lus uas peb tau khi tseg hauv, peb haj yam yuav txawj tiv mus dhau txhua txoj kev cov nyom uas peb ntsib thiab yuav kov yeej txhua txoj kev haub ntxias uas peb raug. Nyob hauv qhov chaw dawb ceev no peb yuav nrhiav tau kev kaj siab lug.”7
Nyob hauv ib ceg txheem ntseeg lub rooj sab laj thaum kuv nyob nram Amelikas Sab Qab Teb, kuv tau ntsib ib khub niam txiv uas muaj kev tu siab nyuaj siab heev vim nkawd nyuam qhuav xiam nkawd ib tug me nyuam mos liab.
Kuv tab tom xam phaj Tij Laug Tumiri hauv lub rooj sab laj no kuv thiaj tau kawm txog nkawd txoj kev xiam ib tug me nyuam no. Thaum wb tseem sib tham, nws piav tias tsis yog tu siab vim nws tus tub tau tuag lawm, tiam sis nws nyuaj siab heev vim nws yuav tsis pom nws dua li. Nws piav hais tias vim nkawd yog mej zeej tshiab hauv lub Koom Txoos, nkawd tau txuag nyiaj txaus es tau mus rau lub tuam tsev ib zaug xwb, ua ntej nkawd yug tau tus me nyuam tub no, nkawd raug muab khi ua ke ua ib khub niam txiv nrog rau nkawd ob tug ntxhais. Ces nws piav tias nkawd twb txuag nyiaj yuav rov qab mus rau lub tuam tsev tiam sis tsis tau coj nkawd tus me nyuam tub no muab nws khi rau nkawd.
Vim pom tias tej zaum nws to taub yuam kev, kuv piav tias nws yeej yuav rov qab pom nws tus tub dua, yog tias nws rau siab ntseeg, vim hais tias txoj kab ke sib khi uas muab nws khi rau nws tus poj niam thiab ob tug ntxhais yeej khi nws rau nws tus tub thiab, vim nws tus tub yug los rau hauv txoj kev sib khi lus ntawd.
Nws xav tsis thoob, ces nug hais tias puas muaj li ntawd tiag, ces kuv hais tias muaj tseeb mas, nws thiaj nug seb kuv puas kam nrog nws tus poj niam tham, rau qhov nws twb nyuaj siab tau ob lim piam no txij li nws tus tub tuag mus.
Hnub Caiv yav tav su, tom qab lub rooj sab laj, kuv tau nrog Muam Tumiri tham thiab qhia nws txog txoj lus qhuab qhia zoo kawg nkaus no thiab. Txawm nws tseem mob siab, tsam no nws muaj chaw cia siab me ntsis nws thiaj nug hais tias, “Kuv puas yuav rov qab puag kuv tus me tub dua tiag tiag li? Nws puas yog kuv li tas mus ib txhis?” Kuv hais rau nws yog tias nws ceev nws tej kev khi lus, ces lub hwj chim muab neeg sib khi hauv lub tuam tsev, vim yog muaj Yexus Khetos lub hwj huam, ces nws yeej muaj cuab kav rov qab nrog nws tus tub nyob ua ke thiab mam li puag tau nws dua.
Muam Tumiri, txawm nws nyuaj siab vim nws tus tub tau tso lub neej no tseg los, los kua muag muaj kev ris txiaj thiab muaj kev thaj yeeb nyab xeeb vim muaj tej kab ke dawb ceev hauv lub tuam tsev, rau qhov peb tus Cawm Seej thiab tus Txhiv Dim tau muab tej no rau peb.
Txhua zaus peb mus hauv lub tuam tsev—nyob ntawm txhua yam uas peb hnov, ua thiab hais; hauv txhua txoj kab ke uas peb ua; thiab hauv txhua txoj kev khi lus uas peb khi tseg—peb tsom ntsoov txog Yexus Khetos. Peb hnov kev kaj siab lug thaum peb hnov Nws cov lus thiab kawm los ntawm Nws tus yam ntxwv. Thawj Tswj Hwm Gordon B. Hinckley qhia tias, “Mus rau tus Tswv lub tsev thiab nyob ntawd hnov Nws tus Ntsuj Plig thiab nrog Nws tham thiab nej yuav muaj kev thaj yeeb nyab xeeb uas nej nrhiav tsis tau hauv lwm qhov chaw hlo li.”8
Theem thib Ob, Mloog Nws cov Lus
Nyob hauv phau Lus Qhuab Qhia thiab Kev Khi Lus peb nyeem hais tias txawm yog los ntawm Nws lub suab los yog los ntawm Nws cov tub qhe lub suab los yeej zoo ib yam.9 Txij thaum Adas lub caij nyoog mus rau txhua tiam neeg rau peb tus yaj saub uas muaj sia nyob, Thomas Spencer Monson, tus Tswv tau hais lus dhau ntawm Nws cov neeg sawv cev. Cov uas mloog thiab cuab pob ntseg mloog tus Tswv cov lus, raws li cov yaj saub qhia tseg, yuav nrhiav tau kev puaj phais thiab kev nyab xeeb.
Nyob hauv Phau Ntawv Maumoos peb nrhiav pom ntau qhov yam ntxwv uas piav seb txoj kev ua raws li tus yaj saub cov lus ntuas thiab nrog nraim tus yaj saub sawv ruaj khov yuav tseem ceeb npaum li cas, muaj ib zaj lus qhia uas peb kawm hauv Lihais zaj ua yog toog pom tsob ntoo uas cawm txoj sia, uas nyob hauv 1 Nifais tshooj 8. Yeej tsis muaj ib lub sij hawm twg uas lub tsev loj thiab dav muaj neeg coob npaud uas tham zom zaws luag thuam, coj tib neeg ua yuam kev, thiab muaj kev kub ntxhov ntau npaum li peb lub caij nyoog no. Nyob hauv tej nqe no peb nyeem txog ob pab neeg thiab lawv mloog cov lus ntawm lub tsev loj no li cas.
Pib hauv nqes 26, peb nyeem hais tias:
“Thiab kuv kuj tau tsa qhov muag ntsia ib puag ncig thiab tau pom, ib lub tsev loj thiab dav nyob ntawm tus kwj deg uas muaj dej sab tiv. …
“Thiab nws muaj neeg nyob puv nkaus, … thiab lawv tau luag thuam thiab taw tes ntshis rau cov uas tau los … thiab tau tab tom noj cov txiv.
“Thiab tom qab uas lawv tau noj cov txiv ntawd tas lawv tau txaj muag, vim cov neeg ntawd tau luag thuam lawv; thiab lawv tau ncaim mus rau hauv cov kev txwv tsis pub mus thiab tau ploj mus lawm.”10
Hauv nqes 33 peb nyeem txog lwm cov neeg uas ua txawv txav rau txoj kev luag thuam uas los ntawm lub tsev loj ntawd. Lihais piav hais tias cov uas nyob hauv lub tsev ntawd “tau taw tes ntshis thuam kuv thiab cov uas tab tom noj cov txiv ntawd; tiam sis peb tsis quav ntsej lawv li.”11
Ib qho uas txawv rau cov uas txaj muag, poob zoov, thiab tau ploj mus thiab cov uas tsis quav ntsej tej kev luag thuam los ntawm lub tsev ntawd vim lawv nyob ruaj khov nrog rau tus yaj saub, yeej nyob hauv ob kab lus tseem ceeb: qhov ib, “tom qab lawv tau noj,” thiab qhov ob, “cov ua tab tom muab noj.”
Thawj pawg neeg twb tuaj txog tsob ntoo, tau nrog tus yaj saub sawv ntawd ib pliag, tiam sis tsuas noj lub txiv. Lawv tsis tau noj ntxiv, vim lawv cia tej kev luag thuam los ntawm lub tsev ntawd pauv lawv siab, uas ua rau lawv txav ntawm tus yaj saub mus thiab taug tej kev txwv tsis pub mus, lawv thiaj tau ploj mus.
Qhov fab ntxeev rau cov uas noj ces tau taug mus lwm txoj kev yog cov neeg uas pheej muab cov txiv ntawd noj. Cov neeg no tsis quav ntsej tej kev kub ntxhov hauv lub tsev, lawv nyob twj ywm nrog tus yaj saub, thiab tau muaj kev puaj phais thiab kev kaj siab lug. Peb txoj kev cog lus rau tus Tswv thiab Nws cov tub qhev tsis yog ib qho uas peb ua tau ib nrab sij hawm xwb. Yog peb ua li no ces, peb yuav tsis muaj cuab kav tiv taus cov uas sim ua rau peb txoj kev nyab xeeb puas tsuaj mus. Thaum peb mloog tus Tswv dhau ntawm Nws cov tub qhev uas muaj txoj cai, peb thiaj sawv hauv tej qhov chaw dawb huv thiab yuav tsis txav mus li.
Tus yeeb ncuab muab lus teb cuav uas tej zaum zoo nkaus li yog lus teb tiam sis tiag tiag mas coj peb mus kev deb ntawm kev nyab xeeb uas peb xav tau. Nws muab qhov cuav uas zoo nkaus li yog qhov tseeb thiab kev puaj phais, tiam sis thaum kawg ces, zoo ib yam li lub tsev loj thiab dav ntawd, yuav vau hlo, es ua rau txhua tus uas nyob hauv nrhiav kev nyab xeeb yuav raug kev puas tsuaj xwb.
Qhov tseeb yeej nyob hauv lub Koom Haum Me Nyuam Yaus ib zaj nkauj hais tias: “Tus yaj saub hais tias: Ua raws li Vajtswv cov lus txib. Ua li ntawd thiaj muaj kev puaj phais thiab kev kaj siab lug.”12
Theem thib Peb: Taug Kev Txo Hwj Chim Muaj Nws tus Ntsuj Plig
Txawm hais tias peb tawm ntawm txoj kev deb npaum li cas los, tus Cawm Seej caw peb rov qab los thiab nrog Nws taug kev. Txoj kev caw los nrog Yexus Khetos taug kev yog ib txoj kev caw kom nrog Nws mus hauv lub vaj Khexemanes thiab ntawm Khexemanes mus rau lub Roob Khauj Kaum Taub Hau thiab ntawm lub Roob Khauj Khaum Taub Hau mus rau hauv lub Ntxa. Yog ib txoj kev caw mus saib thiab muab Nws txoj kev theej txhoj nruab rau hauv peb lub neej, rau qhov nws pab tau txhua leej txhia tus. Yog ib txoj kev caw los hloov siab lees txim, siv lub Nws lub hwj chim ntxuav peb kom dawb huv, thiab tuav rawv Nws txhais caj npab uas nws xyab los rau peb. Yog ib txoj kev caw kom tau kev nyob kaj siab lug.
Peb sawv daws twb hnov ib zaug hauv peb lub neej, thaum peb hnov mob thiab nyuaj siab vim peb tau ua txhaum thiab muaj txim, rau qhov “yog peb hais tias peb tsis muaj txhaum, peb rov dag peb xwb, thiab peb yeej tsis paub qhov tseeb hlo li.”13 Tiam sis, “txawm [peb] tej kev txhaum dub doog,” thaum peb muab Yexus Khetos txoj Kev Theej Txhoj nruab rau peb lub siab thiab nrog Nws taug kev dhau los ntawm kev hloov siab lees txim tiag tiag, “tej ntawd yuav ua kom dawb paug li daus.”14 Txawm peb nyuaj siab vim peb muaj txim los, peb yuav tau kev kaj siab lug.
Amas tus Hluas raug yuam los lees nws tej kev txhaum thaum tus Tswv ib tug tim tswv los xyuas nws. Nws siv cov lus no piav txog qhov xwm txheej no hais tias:
“Kuv tus ntsuj plig tau raug txom nyem kawg nkaus thiab tsim txom nrog tag nrho kuv tej kev txhaum.
“… Muaj tseeb tiag, kuv tau pom tias kuv tau ntxeev siab tawm tsam kuv tus Vajtswv, thiab kuv tsis tau coj nws tej lus txib dawb huv.”15
Txawm nws tau ua txhaum loj npaum li cas, thiab nws tseem raug txom nyeem los, nws hais ntxiv tias:
“Kuv kuj tau nco txog kuv tau hnov kuv txiv txoj kev qhia tej uas yuav muaj los yav tom ntej rau cov neeg txog txoj kev los ntawm tus Yexus Khetos, Vajtswv ib tug tub, los theej ntiaj teb tej kev txhaum.
“… Kuv tau quaj nyob hauv kuv lub siab tias: Au Yexus, koj tus uas yog Vajtswv tus Tub, thov zam txim rau kuv.”16
“Thiab ib txwm tsis tau, mus txog thaum kuv tau quaj thov tus Tswv Yexus Khetos rau txoj kev zam txim, kuv kuj tau txais kev zam txim rau kuv tej kev txhaum. Tiam sis saib seb, kuv tau quaj thov nws thiab kuv thiaj nrhiav tau txoj kev thaj yeeb rau kuv tus ntsuj plig”17
Zoo li Amas, peb yuav nrhiav kev kaj siab lug rau peb tus ntsuj plig thaum peb nrog Yexus Khetos taug kev, hloov siab lees txim rau peb tej kev txhaum, thiab muab Nws lub hwj chim uas kho tau tso rau hauv peb lub neej.
Txoj kev kaj siab lug uas peb sawv daws xav tau yeej ntau tshaj txoj kev xav xwb. Peb yuav tsum ua ib yam dab tsi—thaum kawm txog Nws, mloog Nws cov lus, thiab nrog Nws taug kev. Tej zaum peb yuav tsis muaj cuab kav tswj kav tej yam uas kawj hauv peb lub neej, tiam sis peb muaj cuab kav seb peb siv tus qauv rau kev thaj yeeb uas tus Tswv tau muab no li cas—ib tug qauv uas pab peb ib sij nco qab xav txog Yexus.
Kuv hais lus tim khawv tias Yexus Khetos yog “txoj kev, yog qhov tseeb, thiab yog txoj sia”18 thiab dhau los ntawm Nws xwb peb yuav muaj kev kaj siab lug hauv lub neej no thiab txoj sia nyob mus ib txhis hauv lub neej tom ntej. Los ntawm Yexus Khetos lub npe, amees.