Qhov Chaw Dawb Ceev rau Kev Muab Txum Tim Rov Qab Los
Los ntawm Txwj Laug Jairo Mazzagardi
Ntawm Pawg Xya Caum
Palmyra yog qhov chaw rau Kev Muab Txum Txim Rov Qab Los, uas yog qhov chaw uas yuav hnov tau Leej Txiv lub suab tom qab ob phav xyoos.
Kuv ib tug phooj ywg zoo uas yog ib tug mej zeej hauv lub Koom Txoos tau sim ntau xyoo los qhia kuv txog txoj moo zoo qhov uas tej yim neeg nyob tau ua ke. Yuav yog thaum lub Kaum Hli Ntuj xyoo 1978, thaum kuv mus txog lub Tuam Tsev São Paulo thaum lawv qhib rau neeg saib, es thaum kuv nkag mus hauv chav sib khi, kuv thiaj to taub txoj lus qhuab qhia txog tsev neeg uas nyob ua ke mus ib txhis, ces ntau hnub tom qab ntawd kuv tau thov Vajtswv seb lub Koom Txoos no puas muaj tseeb.
Kuv ib txwm tsis yog neeg ntseeg ntuj, tiam sis kuv niam txiv uas tu yeej yog, thiab kuv twb pom tej yam zoo hauv lwm txoj kev teev ntuj. Thaum ntawd hauv kuv lub neej mas, kuv tau xav tias Vajtswv tau pom zoo rau txhua yam kev teev ntuj.
Tom qab kuv mus xyuas lub tuam tsev, kuv tau nrhiav lus teb thaum thov Vajtswv, muaj kev ntseeg thiab cia siab hais tias Vajtswv yuav teb kuv seb, Nws lub Koom Txoos hauv ntiaj teb no yog lub twg.
Tom qab muaj tej kev kub ntxhov ntawm sab ntsuj plig no, thaum kawg kuv tau lus teb meej meej. Kuv raug caw los ua kev cai raus dej. Kuv tau los ua kev cai raus dej, kuv tau ua li ntawd thaum lub Kaum Hli Ntuj hnub tim 31, 1978, ib hmos ua ntej muab lub Tuam Tsev São Paulo fij tseg.
Kuv kawm paub tias tus Tswv paub thiab hlub kuv Nws thiaj kam teb kuv cov lus thov.
Tag kis sawv ntxov ces kuv thiab kuv tus poj niam tau mus rau lub nroog São Paulo mus koom txoj kev sib ntsib muab lub tuam tsev fij tseg.
Peb twb nyob ntawd, tiam sis kuv tsis tau paub hais tias qhov ntawd yog ib lub cib fim loj npaum li cas tiag. Tag kis ces peb tau mus koom cheeb tsam ib lub tuam rooj sab laj.
Peb tau pib taug kev hauv lub Koom Txoos, thiab peb tau nrhiav ib co phooj ywg zoo uas zoo siab tos txais peb hauv txoj kev pauv peb lub neej no.
Tej hoob kawm rau cov mej zeej tshiab uas wb mus koom txhua Hnub Caiv yeej zoo kawg nkaus. Tej ntawd qhia peb ntau thiab ua rau peb xav kom sij hawm yuav dhau mus sai es thiaj txog Hnub Caiv kom peb tau loj hlob ntawm peb sab ntsuj plig.
Kuv tus poj niam wb tos tsis tau rau lub sij hawm uas wb yuav mus hauv lub tuam tsev muab wb tsev neeg khi ua ke tas mus ib txhis. Twb muaj li ntawd ib xyoos thiab xya hnub tom qab ntawd, es yeej yog ib yam zoo kawg nkaus. Kuv xav tias lub neej nyob mus ib txhis raug muab faib rau ob sab ntawm lub thaj rau tej uas muaj ua ntej thiab tom qab txoj kev raug sib khi.
Kuv tau los nyob raws cai ntawm Sab Hnub Tuaj ntawm lub Teb Chaws Amelikas rau ob peb xyoos, kuv paub ib co nroog, feem ntau yog cov uas me me.
Thaum kuv nyeem ntawv los sis hnov txog Thawj Zaj Ua Yog Toog Pom, lawv hais txog neeg coob coob uas sib sau ua ke, ces kuv tsis to taub qhov no.
Kuv pib muaj lus nug ntau. Vim li cas lub Koom Txoos tau raug muab txum tim rov qab los hauv Teb Chaws Amelikas es tsis yog hauv Brazil los sis Italy teb, uas yog kuv cov poj koob yawm txwv lub qub teb chaws?
Tej pab neeg coob coob uas lawv hais txog nyob rau qhov twg, cov neeg coob coob uas tham zom zaws txog tej kev kub ntxhov rau kev teev ntuj nyob twg—vim qhov chaw no yog ib qho chaw uas muaj kev thaj yeeb nyab xeeb xwb?
Kuv twb nug coob leej tiam sis lawv tsis paub teb kuv. Kuv tau nyeem txhua yam tsav uas lawv sau ua lus Portuguese thiab ces ua lus As Kiv tiam sis nrhiav tsis pom ib yam dab tsi uas nplij kuv siab. Kuv tau nrhiav tas zog.
Thaum lub Kaum Hli Ntuj xyoo 1984, kuv tau mus koom lub tuam rooj sab laj thaum kuv tseem ua ib tug pab cuam hauv ceg txheem ntseeg pawg thawj tswj hwm. Tom qab lub rooj sab laj, kuv mus rau lub zos Palmyra, New York, xav nrhiav lus teb.
Thaum tuaj txog, kuv sim to taub seb: Vim li cas tau muaj Kev Txum Tim Rov Qab Los nyob ntawm no, thiab ua cas muaj kev kub ntxhov ua luaj li ntawm sab ntsuj plig? Cov neeg coob coob uas kuv hnov txog hauv Yauxej zaj lus tau tuaj qhov twg tuaj? Ua cas muaj nyob ntawd?
Lub sij hawm ntawd, lo lus teb zoo tshaj plaws rau kuv yeej yog vim muaj Teb Chaws Amelikas tus Txhooj Lij Choj uas muab kev ywj pheej rau tib neeg.
Tag kis ntawd kuv tau mus xyuas lub Tsev Grandin, uas yog lub tsev uas lawv tau luam tawm thawj Phau Ntawv Maumoos. Kuv thiaj mus hauv Koog Ntoo Dawb Ceev, nyob ntawd kuv tau rau siab thov Vajtswv.
Tsis tshua muaj neeg nyob ntawm tej kev hauv lub zos me me Palmyra ntawd. Tej pab neeg coob coob uas Yauxej tham txog nyob rau qhov twg?
Tav su ntawd kuv tau txiav txim mus rau Peter Whitmer thaj teb ces thaum kuv mus txog kuv nrhiav pom ib tug txiv neej nyob ntawm lub qhov rais hauv lub me nyuam tsev. Nws ob lub qhov muag ci ntsa iab. Kuv hais nyob zoo rau nws thiab tau pib nug tib cov lus ntawd.
Nws nug kuv hais tias, “Koj puas muaj sij hawm?” Kuv tias muaj.
Nws piav tias lub Pas Dej Erie thiab Ontario thiab, es nyob ntim sab hnub tuaj, tus Dej Hudson yeej nyob hauv thaj tsam ntawd.
Thaum xyoo 1800 tawm lawv tau ua ib tug kwj deg rau lawv tsav nkoj, uas mus dhau plaws thaj tsam ntawd, tus kwj deg ntev tshaj 300 mais (480 km) kom mus tau txog tus Dej Hudson. Twb yog ib txoj kev ua lag luam loj heev lub sij hawm ntawd, vim tsuas muaj tib neeg lub zog thiab cov tsiaj txhu uas pab khiav hauj lwm.
Palmyra yog lub hauv paus rau txoj kev ua tus kwj deg no. Cov neeg ua no xav tau cov neeg uas txawj ua txuj ci, cov neeg pab ua hauj lwm, tej yim neeg, thiab lawv cov phooj ywg. Coob tug neeg tau tuaj ntawm lwm cov zos thiab tej chaw deb deb, zoo li Ireland, yuav ua hauj lwm ua tus kwj deg.
Yog ib lub sij hawm dawb ceev thiab raug kuv sab ntsuj plig heev vim kuv twb nrhiav tau pab neeg coob coob lawm. Lawv tau coj lawv tej kab lig kev cai thiab tej kev ntseeg tuaj. Thaum tus txiv neej qhia kuv txog lawv tej kev ntseeg, kuv txawm to taub thiab zoo nkaus li Vajtswv tau qhib kuv qhov muag ntawm sab ntsuj plig lawm.
Lub sij hawm ntawd, kuv thiaj to taub tias Vajtswv peb Leej Txiv, vim Nws txawj ntse, twb npaj tswv yim seb Nws yuav ua li cas thiaj coj Yauxej Xamiv los, nyob hauv ib qho chaw uas muaj kev kub ntxhov hais txog kev teev ntuj, vim hais tias nyob hauv Khu-Maulas ntawd, twb muab cov phiaj kub uas yog Phau Ntawv Maumoos zais cia.
Nov yog qhov chaw rau Kev Muab Txum Txim Rov Qab Los, uas yog qhov chaw uas yuav hnov tau Leej Txiv lub suab tom qab ob phav xyoos, yuav nrog tus tub hluas Yauxej Xamiv tham, thaum uas nws mus hauv Koog Ntoo Dawb Ceev yuav thov Vajtswv thiab hnov cov lus uas hais tias : “Nov yog Kuv Tib Leeg Tub Cia li mloog Nws lus!”1
Nyob ntawd nws pom ob tug Neeg uas nkawd qhov kaj thiab qhov yeeb koob piav tsis tau li. Muaj tseeb tiag, Vajtswv tau tshwm sim rau tib neeg pom dua. Txoj kev tsaus ntuj uas npog lub ntiaj teb pib ploj zuj zus mus lawm.
Ces txawm muaj raws li tej kev tshwm sim txog txoj kev Muab Txum Tim Rov Qab Los lawm: “Ces kuv txawm pom ib tug tim tswv ceeb tsheej ya sau nruab ntug, nws coj txoj moo zoo uas nyob mus ib txhis los qhia rau tej neeg uas nyob thoob plaws hauv lub qab ntuj no, tsis hais haiv neeg twg, xeem twg thiab cov neeg uas hais yam lus twg los nws qhia txhua tus huv tib si.”2
Hauv ob peb xyoo xwb Yauxej raug coj mus rau tej ntawv ceev xwm txheej txog tej kev tshwm sim uas qhia tej uas yuav muaj los, tej kev khi lus, thiab tej kab ke uas cov yaj saub thaum ub tau sau cia, uas yog peb Phau Ntawv Maumoos.
Muab tsis tau Yexus Khetos lub Koom Txoos txum tim rov qab los yog tias tsis muaj txoj moo zoo uas nyob mus ib txhis, uas muab tshwm tuaj hauv Phau Ntawv Maumoos uas ua ib Zaj Ntxiv txog Yexus Khetos, nws twb yog Vajtswv tib Leeg Tub, Vajtswv tus Me Nyuam Yaj, tus uas tau tshem lub ntiaj teb tej kev txhaum mus.
Khetos hais rau Nws cov neeg hauv Yeluxalees tias:
“Kuv muaj lwm pab yaj uas tsis nyob hauv lub nkuaj no.”3
“Kuv yog tus tswv yug yaj uas zoo. Kuv paub kuv pab yaj thiab kuv pab yaj paub kuv.”4
Thaum kuv sawv kev ntawm Whitmer thaj teb, kuv tsis nco qab seb kuv puas tau hais tias sib ntsib dua. Kuv tsuas nco qab tias kuv kua muag poob ntawm kuv ntsej muag. Lub hnub tab tom poob es lub ntuj zoo nkauj kawg.
Kuv lub siab nyob kaj siab lug thiab tau kev thaj yeeb nyab xeeb. Kuv muaj kev ris txiaj ntau.
Nim no kuv paub yog vim li cas. Vim tus Tswv twb muab kev paub thiab qhov kaj rau kuv lawm.
Thaum kuv taug kev mus tsev, muaj ntau nqe vaj lug kub uas los rau hauv kuv lub paj hlwb: tej lus cog tseg rau Leej Txiv Anplaham hais tias los ntawm nws cov xeeb leej xeeb txwv txhua yim neeg hauv ntiaj teb no yuav tau koob hmoov .5
Thiab vim muaj li no, tau ua cov tuam tsev xwv kom thiaj muab tau hwj chim rau neeg ntiaj teb dua xwv kom thiaj khi tau tej yim neeg ua ke, tsis yog mus txog thaum tuag mam li sib ncaim tiam sis yuav nyob ua ke tas mus ib txhis.
“Thiab yuav tau muaj tias nyob rau hauv lub caij kawg, thaum lub roob ntawm tus Tswv lub tsev nyob yuav raug tsa rau saum tej ncov roob, thiab yuav raug tsa nyob siab dua li tej roob, thiab txhua haiv neeg yuav ntws los mus rau nws.”6
Yog nej leej twg uas hnov kuv tej lus no muaj tej lus nug hauv nej nruab siab, tsis txhob tso tseg!
Kuv caw nej los ua raws li tus Yaj Saub Yauxej Xamiv tus yam ntxwv thaum nws nyeem hauv Yakanpaus 1:5: “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws, nws tsis khuv xim li.”
Tej yam uas tshwm hauv Khumaulas yog tej yam tseem ceeb ntawm txoj Kev Muab Txum Tim Rov Qab Los, vim Yauxej Xamiv tau txais cov phiaj kub uas muaj Phau Ntawv Maumoos. Phau no pab peb txav mus nyob ze Yexus dua li lwm phau ntawv hauv ntiaj teb no.7
Kuv hais lus tim khawv tias tus Tswv tsa cov yaj saub, cov pom tau, thiab cov neeg qhia kev tshwm sim ua cov uas coj kav Nws lub nceeg vaj hauv lub caij nyoog kawg no thiab hauv Nws txoj kev uas nyob mus ib txhis tej yim neeg yuav tau nyob ua ke tas mus li. Nws hlub Nws cov me nyuam. Nws teb peb cov lus thov Vajtswv.
Rau qhov muaj Nw txoj kev hlub, Yexus Khetos tau theej peb lub txhoj. Nws yog tus Cawm Seej rau lub ntiaj teb no. Kuv ua tim khawv txog qhov no los ntawm Yexus Khetos lub npe dawb ceev, amees.