Niaj Hnub Tau Ib txoj Kev Zam Nej tej Kev Txhaum

Nyob hauv lub ntiaj teb no peb yug los kom muaj ib lub cev nqaij daim tawv thiab muaj cib fim yug dua tshiab ntawm sab ntsuj plig.³ Cov yaj saub thiab cov thwj tim ntuas kom peb “sawv los mus cuag Vajtswv,”⁴ thiab “yug dua tshiab,”⁵ thiab rais los ua neeg tshiab uas nrog Yexus Khetos koom ib txoj sia⁶ thaum peb txais cov koob hmoov uas muaj dhau los ntawm Yexus Khetos txoj Kev Theej Txhoj. “Txoj hauj lwm zoo, txoj kev hlub, thiab txoj kev zoo ntawm tus Mexiyas Dawb Huv”⁷ yuav pab peb kov yeej tej kev qia dub thiab kev cuaj khaum ntawm tus neeg ntiaj teb thiab rais los ua neeg uas muaj siab dawb siab zoo thiab ncaj ncees. Tus Tswv ntuas kom peb ua neej zoo peb thiaj li yuav “sawv tsis muaj qhov ceb rau ntawm [tus Tswv] xub ntiag nyob rau hnub kawg.”⁸

Tus Yaj Saub Yauxej Xamiv piav meej txog qhov uas vim li cas cov kab ke pov thawj hwj tseem ceeb heev nyob hauv Yexus Khetos txoj moo zoo: “Txoj kev yug dua tshiab, yeej los ntawm Vajtswv tus Ntsuj Plig los thaum ua tej kab ke.”⁹ Cov lus no qhia txog tus Vaj Ntsuj Plig Dawb Huv txoj hauj lwm thiab vim li cas muaj cov kab ke dawb huv nyob hauv tus txheej txheem yug dua tshiab ntawm sab ntsuj plig.

Tus Vaj Ntsuj Plig Dawb Huv yog tus mej zeej thib peb hauv Pawg Vajtswv. Nws yog ib tug ntsuj plig thiab ua tim khawv txog txhua yam tseeb. Nyob hauv phau vaj lug kub tus Vaj Ntsuj Plig Dawb Huv hu ua tus Nplij Siab,¹⁰ ib tug Xib Hwb,¹¹ thiab tus Muab Kev Tshwm Sim.¹² Tsis tas li ntawd xwb, tus Vaj Ntsuj Plig Dawb Huv yog ib tug uas ua kom dawb huv¹³ ib tug uas ntxuav thiab rho kev phem tawm ntawm tib neeg lub siab zoo li nws yog hluav taws.

Cov kab ke dawb huv yeej tseem ceeb nyob hauv tus Cawm Seej txoj moo zoo thiab nyob hauv tus txheej txheem los cuag Nws thiab kev nrhiav kev yug dua tshiab los ntawm sab ntsuj plig. Cov kab ke yog tej yam dawb huv uas muaj lub ntsiab ntawm sab ntsuj plig, yeej tseem ceeb mus ib txhis, thiab txuas rau Vajtswv tej kev cai.¹⁴ Yuav tsum muaj ib tug uas tuav cov yuam sij ntawm lub pov thawj hwj kom tso cai rau tag nrho txhua yam kab ke uas cawm neeg txoj sia thiab kab ke lub cim nco txog.

Cov kab ke cawm seej thiab kev tsa nto uas ua nyob hauv tus Tswv lub Koom Txoos yeej tsis yog kab ke los sis tej lub cim xwb. Tiam sis, cov kab ke cawm seej yog tej txoj kev uas peb txais tau cov koob hmoov thiab lub hwj chim saum ntuj ceeb tsheej nyob rau hauv peb lub neej.

Thiab lub pov thawj hwj loj zog no tswj hwm txoj moo zoo thiab tuav tus yuam sij ntawm tej txuj ci neeg paub tsis txog ntawm lub nceeg vaj, uas twb yog tus yuam sij ntawm txoj kev paub txog Vajtswv.

Yog li ntawd, dhau los ntawm tej kab ke ntawd, thiaj pom lub hwj chim ntawm Vajtswv tshwm sim.

Thiab yog hais tias tsis muaj tej kab ke ntawd, thiab txoj cai ntawm lub pov thawj hwj, ces twb tsis pom lub hwj chim ntawm Vajtswv tshwm sim los rau neeg uas muaj cev nqaij daim tawv.¹⁵

Cov kab ke uas peb txais thiab coj raws nraim li, yeej tseem ceeb kom tau Vajtswv lub hwj chim thiab tag nrho cov koob hmoov uas peb txais tau dhau los ntawm tus Cawm Seej txoj Kev Theej Txhoj.

Xwv kom peb yuav to taub tus txheej txheem uas peb niaj hnub yuav txais tau txoj kev zam peb tej kev txhaum, peb xub yuav tsum to taub tias qhov uas muaj peb txog kab ke dawb huv uas sib txheeb uas ua rau peb txais tau Vajtswv lub hwj chim: kev cai raus dej, kev tso tes saum taub hau kom pub lub txiaj ntsim tus Vaj Ntsuj Plig Dawb Huv, thiab lub cim nco txog.

Kev cai raus dej kom txais tau kev zam txim rau kev txhaum “yog thawj txoj kab ke ntawm [Yexus Khetos] txoj moo zoo”¹⁶ thiab yuav tsum muaj kev ntseeg tus Cawm Seej thiab hloov siab lees txim tiag tiag ua ntej. Txoj kab ke no “yog ib lub cim thiab ib txoj lus txib uas Vajtswv tau muab rau [Nws cov me nyuam] thiaj yuav nkag tau mus hauv Nws lub nceeg vaj.”¹⁷ Yeej muab neeg ua kev cai raus dej los ntawm lub Pov Thawj Hwj Aloos. Nyob hauv tus txheej txheem los cuag tus Cawm Seej thiab yug dua tshiab ntawm sab ntsuj plig, kev cai raus dej yog thawj txoj kev ntxuav peb sab ntsuj plig kom tsis muaj kev txhaum.

Kev khi lus thaum ua kev cai raus dej muaj peb lo lus cog tseg tseem ceeb: (1) txaus siab ris Yexus Khetos lub npe, (2) nco ntsoov txog Nws, thiab (3) coj raws li Nws tej lus txib. Qhov koob hmoov uas cog lus tias peb yuav txais thaum peb ua raws li kev khi lus no yog qhov uas “[peb] yuav muaj nws tus Ntsuj Plig niaj hnub nrog [peb] nyob.”¹⁸ Yog li ntawd, kev cai raus dej yog kev npaj txais lub cib fim kom muaj tus thib peb ntawm Pawg Vajtswv nrog peb nyob niaj hnub.

Tom qab yus ua kev cai raus dej yuav tsum raug raus ntawm tus Ntsuj Plig thiaj tiav lawm.¹⁹ Raws li tus Cawm Seej qhia Nikaudemaus hais tias, “Tus uas tsis yog dej thiab Vajtswv tus Ntsuj Plig yug, tus ntawd yeej yuav tsis tau ua Vajtswv haiv neeg ib zaug li.”²⁰

Peb zaj lus uas tus Yaj Saub Yauxej Xamiv hais, qhia qhov uas txoj kab ke ua kev cai raus dej kom txais kev zam txim rau tej kev txhaum thiab kev tsa tes saum taub hau kom txais lub txiaj ntsim Vaj Ntsuj Plig Dawb Huv sib txuas li cas.

Zaj thib ib: “Kev cai raus dej yog ib txoj kab ke dawb huv uas pab yus npaj siab txais yuav tus Vaj Ntsuj Plig Dawb Huv; nws yeej yog txoj kev thiab tus yuam sij uas cia yus txais tau tus Vaj Ntsuj Plig Dawb Huv ntag.”²¹

Zaj thib ob: “Tsim nyog npaum txoj kev muab ib hnab av xuab zeb ua kev cai raus dej, yog tias tsis ua kom thiaj tau txais kev zam txim rau tej kev txog txhaum thiab txais yuav tus Vaj Ntsuj Plig Dawb Huv. Txoj kev cai raus dej tsuas yog ib nrab ntawm txoj kab ke ntawd, thiab yuav tsis muaj qab hau dab tsi li yog tias tsis ua lwm qhov ntawd---uas yog kev cai raus rau hauv tus Vaj Ntsuj Plig Dawb Huv.”²²

Zaj thib 3: “Txoj kev cai raus dej tsis muaj qab hau dab tsi li, yog tias tsis muaj kev cai raus ntawm hluav taws thiab tus Vaj Ntsuj Plig Dawb Huv. Tag nrho tej no yeej nyob ua ke thiab yuav tsum ua tag nrho.”²³

Qhov uas lub ntsiab cai hloov siab lees txim, txoj kab ke ua kev cai raus dej thiab kev txais lub txiaj ntsim Vaj Ntsuj Plig Dawb Huv, thiab qhov koob hmoov uas yog kev txais kev zam txim rau tej kev txhaum sib txheeb mas cov vaj lug kub qhia txog qhov no ntau zaus.

Nifais qhia hais tias, “Vim lub qhov rooj uas nej yuav tsum nkag yog txoj kev hloov siab lees txim thiab txoj kev ua kev cai raus dej; thiab tom qab ntawd yuav los ib txoj kev zam nej tej kev txog kev txhaum los ntawm hluav taws thiab los ntawm tus Vaj Ntsuj Plig Dawb Huv.”²⁴

Tus Cawm Seej tau tshaj tawm hais tias, “Nim no qhov no yog txoj lus txib: Cia li hloov siab lees txim, nej sawv daws tag nrho hauv qab ntuj kawg, thiab los cuag kuv thiab ua kev cai raus dej nyob ntawm kuv lub npe, xwv kom nej yuav … dawb huv vim nej txais tus Vaj Ntsuj Plig Dawb Huv, xwv kom nej yuav sawv tsis muaj qhov ceb rau ntawm kuv xub ntiag nyob rau hnub kawg.”²⁵

Kev tso tes saum taub hau kom txais lub txiaj ntsim Vaj Ntsuj Plig Dawb Huv yog ib txoj kab ke uas ua dhau los ntawm txoj cai Pov Thawj Hwj Mekixedes. Nyob hauv tus txheej txheem los cuag tus Cawm Seej thiab yug dua tshiab ntawm sab ntsuj plig, kev txais tus Vaj Ntsuj Plig Dawb Huv lub hwj chim uas ua kom neeg dawb huv nyob hauv peb lub neej ua rau peb thiaj txais tau kev ntxuav tas mus li kom peb sab ntsuj plig tsis muaj kev txhaum. Txoj koob hmoov zoo no yeej tseem ceeb vim “tsis muaj ib yam uas tsis dawb huv yuav mus nrog Vajtswv nyob tau li.”²⁶

Vim peb yog cov mej zeej hauv tus Tswv lub Koom Txoos, peb tau koob hmoov los ntawm thawj txoj kev ntxuav peb tej kev txhaum uas muaj thaum peb ua kev cai raus dej thiab qhov uas peb muaj cib fim txais tau kev ntxuav peb tej kev txhaum tas mus li uas muaj dhau los ntawm tus Vaj Ntsuj Plig Dawb Huv lub hwj chim—tus uas yog tus thib peb hauv Pawg Vajtswv.

Cia li xav txog ib tug neeg ua liaj ua teb cia siab rau tus txheej txheem ntawm kev tseb noob thiab kev sau qoob loo. Qhov uas nws to taub kev tseb noob thiab kev sau qoob loo sib txheeb li cas yog ib qho uas pab nws paub nws tej hom phiaj thiab pab nws txiav txim thiab ua txhua yam uas tus neeg ua liaj ua teb ua txhua lub caij nyoog hauv ib xyoo. Yog li ntawd, qhov uas cov kab ke ua kev cai raus dej kom txais kev zam txim rau tej kev txhaum thiab kev tsa tes saum taub hau kom txais lub txiaj ntsim Vaj Ntsuj Plig Dawb Huv sib txheeb yuav tsum pab peb ua txhua yam thaum peb coj raws li Yexus Khetos nyob hauv txhua lub caij nyoog ntawm peb lub neej.

Lub cim nco txog yog kab ke thib peb uas peb yuav tsum ua kom tau Vajtswv lub hwj chim. Xwv kom peb yuav ceev pe tus kheej kom tsis txhob muaj qhov ceb los ntawm lub ntiaj teb, tus Tswv txib peb kom mus rau Nws lub tsev thov Vajtswv thiab fij peb tej cim nco txog thaum yog tus Tswv hnub dawb huv.²⁷ Cia li xav txog qhov uas peb foom koob hmoov rau lub cim ntawm tus Tswv lub cev thiab cov ntshav, cov mov mog thiab cov dej, kom dawb huv. “Au Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab tshwj cov mov mog no [los sis cov dej no] tseg cia kom dawb huv rau lawv sawv daws cov tau noj [los sis haus].²⁸ Peb ua kom lub cim nco txog dawb huv kom nco txog Yexus Khetos txoj kev dawb huv, txog qhov uas peb yuav tsum muaj Nws txoj Kev Theej Txhoj, thiab txog peb txoj kev lav ris ua raws li peb cov kab ke thiab kev khi lus peb thiaj yuav “sawv tsis muaj qhov ceb rau ntawm [Nws] nyob rau hnub kawg.”²⁹

Txoj kab ke txais lub cim nco txog yog kev dawb huv uas caw peb hloov siab lees txim tiag tiag thiab rov qab ua neeg tshiab ntawm sab ntsuj plig. Qhov uas peb txais lub cim nco txog, tsis ua rau peb txais kev zam txim rau peb tej kev txhaum. Tiam sis thaum peb ua tib zoo koom siab ua txoj kab ke dawb huv no nrog rau ib lub siab mob thiab lub siab xav ua zoo, ces peb txais lo lus cog tseg hais tias peb yuav muaj nws tus Ntsuj Plig niaj hnub nrog peb nyob. Thiab dhau los ntawm tus Vaj Ntsuj Plig Dawb Huv lub hwj chim uas ua kom peb dawb huv uas niaj hnub nrog peb nyob, ces peb niaj hnub txais tau kev zam txim rau peb tej kev txhaum.

Peb yeej tau koob hmoov txhua lub lim tiam vim peb muaj cib fim xav txog peb lub neej los ntawm txoj kab ke txais lub cim nco txog, kom rov qab khi lus dua, thiab txais lo lus cog tseg ntawm kev khi lus no.³⁰

Tej lub sij hawm Haiv Neeg Ntseeg hauv Hnub Nyoog Kawg xav rov qab ua kev cai raus dej dua—yog li ntawd lawv yuav rov qab ua neeg huv thiab neeg tsim nyog zoo ib yam li thaum hnub uas lawv txais txoj kab ke ntawm txoj moo zoo thib ib. Kuv thov kom qhia nej tias peb Leej Txiv Saum Ntuj Ceeb Tsheej thiab Nws Leej Tub uas Nws Hlub tsis xav kom peb muaj kev xav kom yug dua tshiab ntawm sab ntsuj plig ib zaug xwb nyob hauv peb lub neej. Cov koob hmoov uas yog kev niaj hnub txais tau kev zam txim rau peb tej kev txhaum dhau los ntawm cov kab ke ntawm txoj moo zoo pab peb to taub hais tias kev cai raus dej yog ib qhov chaw uas peb pib kom ua peb sab ntsuj plig loj hlob tuaj hauv lub ntiaj teb no; tsis yog ib qhov chaw uas peb yuav xav rov qab mus xyuas ntau zaus.

Cov kab ke ua kev cai raus dej, kev tso tes saum taub hau kom txais lub txiaj ntsim Vaj Ntsuj Plig Dawb Huv, thiab lub cim nco txog tsis yog cov kab ke uas nyias nyob nyias; tiam sis, cov kab ke no yeej sib txheeb thiab pab txhawb nqa peb txoj kev vam meej uas pab peb txais kev txhiv dim. Txhua txoj kab ke pab txhawb nqa peb lub hom phiaj, tej kev xav, thiab tej yam peb ua ntawm sab ntsuj plig. Leej Txiv txoj hau kev, tus Cawm Seej txoj Kev Theej Txhoj, thiab cov kab ke ntawm txoj moo zoo muab kev tshav ntuj rau peb kom peb mus tom ntej thiab vam meej ib kab rau ib kab thiab ib zaj rau ib zaj mus txog rau ntawm peb txoj hmoov mus ib txhis.

Peb yog cov neeg tsis zoo tag nrho uas siv zog ua neej hauv lub ntiaj teb no raws li Leej Txiv Saum Ntuj Ceeb Tsheej txoj hau kev zoo tag nrho kom peb vam meej mus ib txhis. Tej yam uas peb yuav tsum ua kom coj raws li Nws txoj hau kev yeej muaj yeeb koob, muaj siab hlub tshua, thiab nyuaj ua. Tej lub sij hawm peb rau siab tag nrho thiab lwm lub sij hawm xav tias peb tsis tsim nyog. Tej zaum peb xav paub seb peb puas muaj peev xwm ua raws li lo lus txib kom sawv tsis muaj qhov ceb rau ntawm Nws lub xub ntiag nyob rau hnub kawg.

Nrog rau tus Tswv txoj kev pab thiab dhau los ntawm Nws tus Ntsuj Plig lub hwj chim uas “qhia [peb] txhua yam,”³¹ peb yeej yuav txais koob hmoov kom paub tias peb sab ntsuj plig ua tau dab tsi. Cov kab ke ua rau peb paub tej hom phiaj thiab muaj hwj chim ntawm sab ntsuj plig hauv peb lub neej thaum peb siv zog yug dua tshiab thiab rais los ua txiv neej thiab poj niam zoo li Yexus Khetos.³² Nws yuav ua kom peb tej kev qaug zog muaj zog, thiab tej yam peb ua tsis tau los peb yuav kov yeej tej ntawd.

Txawm peb txhua tus yuav tsis rais los ua neeg zoo tag nrho hauv lub neej no, peb yeej ua tau neeg tsim nyog thiab tsis muaj qhov ceb thaum muab peb ntxuav “los ntawm [tus Me Nyuam Yaj] cov ntshav.”³³ Kuv cog lus thiab ua tim khawv tias peb yuav tau koob hmoov kom muaj kev ntseeg tus Cawm Seej ntxiv thiab txais kev nplij siab ntawm sab ntsuj plig ntxiv thaum peb nrhiav kom niaj hnub tau txoj kev zam peb tej kev txhaum, thiab, thaum kawg, sawv tsis muaj qhov ceb rau ntawm tus Tswv thaum hnub kawg. Kuv ua tim khawv li no los ntawm Yexus Khetos lub npe dawb ceev, amees.