’E e ’ore roa te pohe

Hō’ē hebedoma i ma’iri a’enei ’ua tupu te Pāsa, ’e ’ua fa’atumu fa’ahou tō tātou mau mana’o i ni’a i te tusia tāra’ehara ’e te ti’a-fa’ahou-ra’a o te Fatu Iesu Mesia. I te matahiti i ma’iri a’enei ’ua feruri rahi au nō ni’a i te Ti’a-fa’ahou-ra’a, ’aita mai te tahi atu mau taime.

Fātata e hō’ē matahiti i teienei, ’ua pohe tā maua nei tamahine ’o Alisa. ’Ua ’aro na ’oia i te ma’i māriri ’aita’ata fātata e va’u matahiti te roara’a, ’e ’ua fāri’i e rave rahi mau tāpūra’a, e rave rahi huru rapa’aura’a, te mau semeio fa’ahiahia, ’e te mau ’oto hōhonu. ’Ua hi’o mātou i tōna tino i te ’ino—roa—ra’a ’a piri atu ai ’oia i te hope’ara’a o tōna orara’a tāhuti nei. E mea māuiui ’ia hi’o i te reira i te tupura’a i ni’a i tā maua nei tamahine here—tā māua ’aiū iti oraora tei pa’ari nō te riro ’ei hō’ē vahine fa’ahiahia tei ’ī i te tālēni, ’ei vahine fa’aipoipo ’e ’ei metua vahine. ’Ua mana’o vau ē e vai māuiui noa vau.

I te matahiti i ma’iri a’enei i te taime nō te Pāsa, hō’ē ’āva’e ri’i noa hou i tōna pohera’a, ’ua pāpa’i Alisa : « Pāsa ’o te hō’ē ïa fa’aha’amana’ora’a i te mau mea ato’a tā’u e ti’aturi nei nō’u iho. ’E ’ia tae i te hō’ē mahana e fa’aorahia ïa vau ’e e ora roa mai au ’ia tae i te hō’ē mahana. ’Ia tae i te hō’ē mahana, ’aore fa’ahou e ’auri ’aore rā e tao’a uaua i roto iā’u. ’Ia tae i te hō’ē mahana e ’ore ïa tō’u mau ri’ari’a ’e tō’u mau maāna’ona’ora’a. ’Aita vau e pure nei ē ’ia tupu ’oi’oi mai te reira tē ’oa’oa nei rā vau ’e tē ti’aturi nei au i te hō’ē orara’a nehenehe i muri a’e i teie nei orara’a ».¹

E ha’apāpū mai te ti’a-fa’ahou-ra’a o Iesu Mesia i te mau mea iho tā Alisa i ti’aturi ’e ’o te ha’amau i roto ia tātou tāta’itahi « te hō’ē ti’aturi i roto ia [tātou] ».² ’Ua fa’aau te peresideni Gordon B. Hinckley i te ti’a-fa’ahou-ra’a ’ei « ’ōro’a rahi roa a’e o te mau ’ōro’a ato’a i roto i te ’ā’ai o te ta’ata nei ».³

’Ua fa’atupuhia te ti’a-fa’ahou-ra’a ’e te tāra’ehara a Iesu Mesia ’e ’ei tufa’a faufa’a rahi i te ’ōpuara’a rahi nō te fa’aorara’a.⁴ E mau tamari’i vārua tātou nā te mau metua i te Ao ra.⁵ ’A haere mai ai tātou i teie orara’a tāhuti, ’ua tā’atihia tō tātou vārua i tō tātou tino. E ’ite tātou i te mau ’oa’oa ’e te mau tāmatara’a ato’a tei ’āpitihia i te orara’a tāhuti nei. ’Ia pohe te hō’ē ta’ata, e fa’ata’a-’ē-hia tōna vārua i tōna tino. ’E nā te Ti’a-fa’ahou-ra’a e fa’ati’a i te vārua ’e te tino o te hō’ē ta’ata ’ia hō’ē fa’ahou, ’e i taua taime ra e riro ai taua tino ra ’ei mea mure ’ore ’e te maita’i roa—e’ita e māuiui, e ma’i ’aore rā te tahi atu mau fifi.⁶

I muri a’e i te ti’a-fa’ahou-ra’a, e ’ore roa ïa te vārua e fa’ata’a-’ē-fa’ahou-hia i te tino nō te mea ’ua ha’avī roa te ti’a-fa’ahou-ra’a o te Fa’aora i te pohe. Nō te fa’atupu i tā tātou fā mure ’ore, e ti’a ïa ia tātou ’ia fāri’i i teie vārua mure ’ore—te hō’ē vārua ’e te hō’ē tino—tā’atihia ē a muri noa atu. Ma te vārua ’e te tino tāhuti ’ore ’o te tā’atihia, e nehenehe ïa ia tātou ’ia fāri’i i te ’īra’a o te ’oa’oa.⁷ ’Oia mau, mai te mea ’aita e Ti’a-fa’ahou-ra’a, e ’ore roa ïa e nehenehe ia tātou ’ia fāri’i i te ’īra’a o te ’oa’oa e ro’ohia rā tātou i te ’ati ē a muri noa atu.⁸ Tē fa’ariro ato’a nei te mau ta’ata fa’aro’o ē te parau ti’a i te fa’ata’a-’ē-ra’a o tō rātou mau tino i tō rātou mau vārua ’ei fa’atītīra’a. E matara tātou i teie nei fa’atītīra’a nā roto i te Ti’a-fa’ahou-ra’a, ’oia ho’i te fa’aorara’a i te mau tā’amu ’aore rā te mau fifi nō te pohe.⁹ ’Aore roa e fa’aorara’a ’aita ana’e tō tātou tino ’e tō tātou vārua.

E mau ’ōti’a ’e e mau paruparu tō tātou tāta’itahi i te pae tino, te pae ferurira’a, ’e te pae mana’o. ’E e matara teie mau fifi noa atu i teienei tē vai ra te tahi ’o te ’ore roa e matara ra. E’ita ïa teie mau fifi e ha’amāuiui fa’ahou ia tātou i muri a’e i tō tātou ti’a-fa’ahou-ra’a. ’Ua mā’imi ’o Alisa i te fāito rahira’a feiā i ora mai tei ro’ohia i tōna huru ma’i māriri ’aita’ata, e ’ere te mau numera i te mea maita’i roa. ’Ua pāpa’i ’oia : « Tē vai ra rā te hō’ē rā’au, nō reira vau e ’ore ai e mata’u. ’Ua fa’aora a’ena Iesu i tō’u e tō ’outou ma’i māriri ’aita’ata… E maita’i mai au. Tē ’oa’oa nei au ē ’ua ’ite au i te reira ».¹⁰

E nehenehe tā tātou e mono i te ta’o māriri ’aita’ata i te hō’ē o te mau ma’i i te pae tino, te pae ferurira’a ’aore rā te pae mana’o tā tātou e nehenehe e fa’aruru atu. Nā roto i te Ti’a-fa’ahou-ra’a ’ua ora a’ena ïa teie mau ma’i. Te semeio nō te Ti’a-fa’ahou-ra’a, te rā’au hope’a, e’ita ïa e noa’a i te mana o te rā’au nō teie nei tau. Tei roto rā te reira i te mana o te Atua. ’Ua ’ite tātou e nehenehe te reira i te ravehia nō te mea ’ua ti’a fa’ahou te Fa’aora ’e nā te reira e fa’atupu ato’a i te ti’a-fa’ahou-ra’a nō tātou tāta’itahi.¹¹

Tē ha’apāpū mai nei te ti’a-fa’ahou-ra’a o te Fa’aora ē ’o ’Oia te Tamaiti a te Atua ’e te mea Tāna i ha’api’i e mea mau ïa. « ’Ua ti’a fa’ahou ’Oia, mai tāna i parau ».¹² ’Aita atu e tāpa’o pūai a’e nō Tōna hanahana maori rā Tōna ti’ara’a mai raro mai i te mēnema ma te hō’ē tino tāhuti ’ore.

’Ua ’ite tātou i te mau ta’ata tei ’ite i te ti’a-fa’ahou-ra’a i te tau o te Faufa’a ’Āpī. Ta’a ’ē noa atu i te mau vahine ’e te mau tāne tā tātou i tai’o i roto i te mau ’evanelia, tē ha’apāpū nei te Faufa’a ’Āpī ia tātou e mau hānere ta’ata tei ’ite mata i te Fatu tei ti’a fa’ahou mai.¹³ ’E ’ua parau mai te Buka a Moromona e rave rahi atu ā mau hanere tei ’ite : « ’E ’ua haere ihora te mau ta’ata ra, tu’u atu ra i tō rātou rima i tāna ’ao’ao… ’e ’ua ’ite mata [rātou], ’e ’ua fāfā rima ho’i, ’e ’ua ’ite pāpū roa rātou, ’e ’ua fa’a’ite ē, oia ïa, ’o tā te mau peropheta i pāpa’i iāna ra ē, ’oia te haere mai ».¹⁴

’Ua ’āmuihia atu i taua mau ’ite tahito ra te mau ’ite o te mau mahana hope’a nei. ’Oia mau, i te ’ōmuara’a o teie nei tau tu’ura’a ’evanelia, ’ua ’ite Iosepha Semita i te Fa’aora tei ti’a fa’ahou ’e te Metua.¹⁵ ’Ua fa’a’ite te mau peropheta ’e te mau ’āpōsetolo ora i te parau mau nō te Mesia ora tei ti’a fa’ahou.¹⁶ Nō reira e nehenehe tā tātou e parau, « ’Ua hā’atihia tātou e taua naho’a rahi i ’ite nei ».¹⁷ E nehenehe tā tātou tāta’itahi ’ia riro ’ei tufa’a nō te hō’ē naho’a rahi tei ’ite nā roto i te mana o te Vārua Maita’i ’e te mea tā tātou e fa’ahanahana nei i te Pāsa ’ua tupu mau ïa—’e ’ua tupu mau ihoa te Ti’a-fa’ahou-ra’a.

E mono te tupura’a mau o te ti’a-fa’ahou-ra’a o te Fa’aora i tō tātou ’oto ’e te ti’aturira’a nō te mea e ’āpitihia te reira i te ha’apāpūra’a e mea mau te tā’āto’ara’a o te tahi atu mau fafaura’a a te ’evanelia—te mau fafaura’a tei riro ’ei mau semeio mai te Ti’a-fa’ahou-ra’a. ’Ua ’ite tātou e mana Tōna nō te tāmā ia tātou i tā tātou mau hara ato’a. ’Ua ’ite tātou ē ’ua rave ’Oia i ni’a iho Iāna tō tātou ato’a mau ma’i, mau māuiui ’e te mau ’ohipa ti’a ’ore tā tātou i fa’aoroma’i.¹⁸ ’Ua ’ite tātou ē ’ua « ti’a mai ’oia mai te pohe mai ma te ora i raro a’e i tōna pererau ».¹⁹ ’Ua ’ite tātou e nehenehe Tāna e fa’aora ia tātou noa atu tō tātou huru paruparu. ’Ua ’ite tātou ē « e horoi ’Oia i tō [tātou] roimata ; ’e e ’ore roa te pohe, ’e te ’oto, ’e te mihi, ’e te māuiui, e ’ore ato’a ïa ».²⁰ ’Ua ’ite tātou e nehenehe ia tātou ’ia « fa’ati’a-roa-hia nā roto ia Iesu… tei fa’atupu i teie nei tāra’ehara ti’a mau »²¹ mai te mea noa e fa’aro’o tō tātou ’e e pe’e tātou Iāna.

I te pae hope’a nō te oratorio ha’aputapū ’ā’au nō ni’a i te Mesia, ’ua pāpa’i o Handel i te pehe nō te ’āpe’e i te mau parau ’oa’oa a te ’āpōsetolo Paulo nō ni’a i te Ti’a-fa’ahou-ra’a.

« Inaha, e fa’a’ite atu vau ia ’outou i te parau ’aro ; e’ita tātou e hope i te ta’oto, e hope rā tātou i te fa’ahuru-’ē-hia,

« E’ita e māhia, mai te ’amora’a mata nei, ’ia tae i te pū hōpe’a ra : … e ’oto mau ho’i te pū, ’e e fa’ati’ahia tei pohe ma te tāhuti ’ore, e fa’ahuru-’ē-hia tātou.

« ’E teie nei tino tāhuti noa, ’ia riro ’ei tino tāhuti ’ore e ti’a ai, ’o teie nei tino pohe noa, ’ia riro ’ei tino pohe ’ore.

« … ’Ua tupu ïa te parau papa’ihia ra i reira, ’Ua horomi’i-roa-hia te pohe i te rē i riro ra.

« E hade ē, tei hea tō ’oe tara ? E hade ē, tei hea tō ’oe rē ?… 

« ’E teienei, ’ia ha’amaita’ihia te Atua, ’o te hōro’a mai i te rē nō tātou, nō tō tātou Fatu ra nō Iesu Mesia ».²²

Tē māururu nei au nō te mau ha’amaita’ira’a tā tātou e fāri’i nei nā roto i te tāra’ehara ’e te ti’a-fa’ahou-ra’a o te Fatu ’o Iesu Mesia. Nō te feiā ato’a tei huna i te hō’ē tama ’aore rā tei heva i pīha’i iho i te ’āfata o te hō’ē hoa fa’aipoipo ’aore rā tei māuiui i te pohera’a te hō’ē metua ’aore rā te tahi ta’ata tei herehia e rātou, ’ua riro ïa te Ti’a-fa’ahou-ra’a ’ei tumu nō te ti’aturira’a pūai. E aha ïa te pūai o te ’ohipa e tupu ia ’ite fa’ahou tātou ia rātou—’eiaha noa ’ei mau vārua ’ei mau tino rā tei ti’a fa’ahou mai.

Tē hina’aro mau nei au ’ia ’ite fa’ahou i tō’u metua vahine ’e ’ia ’ite i tōna rima marū ’ia tāpe’a mai iā’u ’e ’ia hi’o atu i roto i tōna nā mata here. Tē hina’aro nei au ’ia ’ite i te mata ’ata’ata o tō’u metua tāne ’e ’ia fa’aro’o i tāna ’ata ’e ’ia ’ite fa’ahou iāna ’ei ta’ata maita’i roa tei ti’a fa’ahou mai. Mai roto atu i te hō’ē hi’ora’a fa’aro’o, tē mana’o nei au ia Alisa ’o te ātea ’ē roa i te mau fifi ato’a o te orara’a nei ’aore rā i te tara o te pohe—te hō’ē Alisa tei ti’a fa’ahou, tei maita’i roa ’e tei upo’oti’a ’e tei ’ī i te ’oa’oa.

I te tau Pāsa i ma’iri a’enei, ’ua pāpa’i noa ’oia : « Te ora nā roto i Tōna ra i’oa. ’Ua rahi tō’u ti’aturi. I te mau taime ato’a. I roto i te mau mea ato’a. Tē here nei au i te Pāsa ’o te fa’aha’amana’o iā’u ».²³

Tē fa’a’ite pāpū nei au i te tupura’a mau o te Ti’a-fa’ahou-ra’a. Tē ora nei Iesu Mesia, ’e ’aua’a a’e ’Oia e ora fa’ahou ïa tātou pā’āto’a. I te i’oa o Iesu Mesia, ’āmene.