Te Vārua Maita’i

E tō’u mau taea’e ’e tuahine here ē, te a’o atu nei au i teie mahana na ni’a i tō’u ti’ara’a ’ei tāvini na te Fatu e ’oia ato’a ’ei metua tupuna. Ia ’outou e tō’u nei huā’ai here, e ha’api’i ’e e fa’a’ite atu vau i tō’u ’itera’a pāpū nō ni’a i te hōro’a fa’ahiahia a te Vārua Maita’i.

E ha’amata vau ma te fa’a’itera’a i te Māramarama o te Mesia tei hōro’ahia « i te mau ta’ata ato’a o te tae mai i roto i te ao nei ».¹ E fāna’o tātou pā’āto’a i teie māramarama mo’a. Tei roto te reira « i te tā’āto’a ’e na roto ho’i i te mau mea ato’a »,² e na te reira e fa’ati’a ia tātou ’ia ’ite i te mea ti’a i te mea hape.³

E mea ta’a ’ē ra te Vārua Maita’i i te Māramarama o te Mesia. O ’oia te torura’a o te melo nō te Toru Tahi, te hō’ē ta’ata vārua e mau hopoi’a mo’a Tāna, ’e hō’ē i roto i te ’ōpuara’a e te Metua ’e te Tamaiti.⁴

’Ei melo nō te ’Ēkālesia, e nehenehe tā tātou e ’ite tāmau noa i te auhoara’a a te Vārua Maita’i. Na roto i te autahu’ara’a a te Atua tei fa’aho’ihia mai, ’ua bāpetizohia tātou na roto i te utuhira’a ’ia mātara tā tātou mau hara ’e ’ua ha’amauhia tātou i muri iho ’ei mau melo nō te ’Ēkālesia a Iesu Mesia i te Feiā Mo’a i te mau Mahana Hope’a nei. I roto i teie ‘ōro’a, ’ua hōro’ahia ia tātou te hōro’a a te Vārua Maita’i na roto i te tu’ura’a rima o te feiā tei mau i te autahu’ara’a.⁵ I muri iho, e nehenehe ia tātou ’ia fāri’i ’e ’ia tāpe’a i te auhoara’a o te Vārua Maita’i na roto i te ha’amana’o-noa-ra’a i te Fa’aora, te ha’apa’ora’a i Tāna mau fa’auera’a, te tātarahapara’a i tā tātou mau hara, ’e te ’amu-ti’amâ-ra’a i te ‘ōro’a i te mahana Sābati.

E hōro’a mai te Vārua Maita’i i te heheura’a nō te tauturu ia tātou tāta’itahi ’ia rave i te mau fa’aotira’a rarahi nō te orara’a mai te ha’api’ira’a, te mau misioni, te mau tōro’a ’ohipa, te fa’aipoipora’a, te mau tamari’i, te vāhi i reira tātou e ora ai e tō tātou ’utuāfare, e te tahi atu ā. I roto i teie mau mea, te tītau nei te Metua i te Ao ra ’ia fa’aohipa tātou i tō tātou ti’amāra’a, ’ia tuatāpapa ma’ite tātou i te ’ohipa i roto i tō tātou mau ferurira’a mai te au i te mau ture nō te ’evanelia, ’e ’ia ’āfa’i atu i mua Iāna te hō’ē fa’aotira’a na roto i te pure.

E mea faufa’a rahi te heheura’a nō te ta’ata tāta’itahi, e hō’ē tufa’a ana’e ra te reira nō te ’ohipa a te Vārua Maita’i. Mai tā te mau pāpa’ira’a mo’a e ha’apāpū nei, e fa’a’ite ato’a te Vārua Maita’i no te Fa’aora ’e nō te Atua te Metua.⁶ E ha’api’i ’oia ia tātou « te mau mea hau nō te bāsileia nei »⁷ ’e e tūra’i ’oia ’ia « ’ī tātou i te ti’aturi ».⁸ E « arata’i ’oia [ia tātou] ’ia rave i te ’ohipa maita’i… [e] ’ia ha’avā mai te parau-tia ra ».⁹ E hōro’a ’oia « i te mau tane [’e te mau vahine] tāta’itahi… te hō’ē hōro’ara’a [vārua]… ’ia maita’i te mau ta’ata ato’a na roto i te reira ».¹⁰ E « hōro’a ’oia [ia tātou] i te māramarama »¹¹ ’e « e fa’a’ite fa’ahou mai ia [tātou] i te mau parau ato’a ».¹² Na roto i te Vārua Maita’i, e nehenehe ia tātou « ’ia ha’amo’ahia »¹³ ’e ’ia fāri’i i te hō’ē « fa’aorera’a i tā [tātou] mau hara ».¹⁴ O ’Oia te « Fa’aa’o », te hō’ē ā ta’ata tei « fafauhia atu i te mau pipi a te [Fa’aora] ».¹⁵

Te fa’aha’amana’o atu nei au ia tātou pā’āto’a e ’aita te Vārua Maita’i i hōro’ahia mai nō te ha’avī ia tātou. Te ’imi nei te tahi o tātou ma te pa’ari ’ore i te arata’ira’a a te Vārua Maita’i i roto i te mau fa’aotira’a ha’iha’i ato’a i roto i tō rātou orara’a. E ha’afaufa’a ’ore ïa te reira i Tāna ’ohipa mo’a. E fa’atura te Vārua Maita’i i te ture nō te ti’amâra’a. E parau marū mai ’oia i tō tātou ferurira’a ’e i tō tātou mau ’ā’au nō ni’a i te mau mea faufa’a rahi.¹⁶

E nehenehe tā tātou tāta’itahi e ’ite i te mana o te Vārua Maita’i na roto i te tahi atu mau rāve’a. E itehia Tāna mau parau ri’iri’i na roto i te mau fāito pūai e rave rahi mai te au i tō tātou iho mau hina’aro ’e tō tātou iho mau huru orara’a.

I teie mau mahana hopea nei, te ha’apāpū atu nei mātou ē o te peropheta ana’e o te nehenehe e fāri’i i te heheura’a na roto i te Vārua Maita’i nō te tā’āto’ara’a o te ’Ēkālesia. ’Ua ’aramōinahia te reira e te tahi mau ta’ata, mai te taime a tāmata ai Aarona ’e Miriama e tītau ia Mose ’ia pe’e atu ia raua. Ua ha’api’i ra te Fatu ia raua ’e ia tātou. ’Ua parau ’Oia :

« E peropheta i ’ō ’outou na, ’ua mātaro vau nei o Iehova i te fa’a’ite iāna…

« Te parau vaha noa nei au iāna »¹⁷

I te tahi mau taime e fa’ahema te ’enemi ia tātou i te mau mana’o hape o tā tātou e nehenehe e hape e no ’ō mai i te Vārua Maita’i ra. Te fa’a’ite nei au e na te ha’apa’ora’a i te mau fa’auera’a ’e te tape’ara’a i tā tātou mau fafaura’a e pāruru ia tātou ’ia ’ore e fa’ahemahia. Na roto i te Vārua Maita’i e nehenehe ïa ia tātou ’ia ite i taua mau peropheta ha’avare ra o te ha’api’i i te mau fa’auera’a a te ta’ata nei ’ei parau tumu.¹⁸

A fāri’i ai tātou i te fa’aurura’a a te Vārua Maita’i no tātou iho, e mea maita’i ’ia ha’amana’o e e’ita e nehenehe ia tātou ’ia fāri’i i te heheura’a nō vetahi ’ē. ’Ua ’ite au i te hō’ē taure’are’a tāne tei parau atu i te hō’ē tamahine ’āpī, « ’ua fāri’i au i te hō’ē moemoea e o oe ta’u vahine fa’aipoipo ». ’Ua feruri teie tamahine ’āpī i taua parau ra ’e ’ua pāhono atu, « ’ia fāri’i ato’a ana’e au i taua moemoea ra, e haere mai ïa vau e paraparau ia ’oe ».

E nehenehe ia tātou pā’āto’a ’ia fa’ahemahia ’ia vaiiho i tō tātou iho mau hina’aro ia na ni’a a’e i te arata’ira’a a te Vārua Maita’i. ’Ua tāparu te peropheta Iosepha Semita i te Metua i te Ao ra ’ia fa’ati’a iāna ia hōro’a i na 116 ’api mātāmua nō te Buka a Moromona ia Martin Harris. ’Ua mana’o Iosepha e mana’o maita’i te reira. I te mātāmua, ’aita te Vārua Maita’i i hōro’a atu iāna te mau mana’o ha’apāpūra’a. I te pae hope’a, ’ua fa’ati’a te Atua ia Iosepha ’ia hōro’a ihoa i te mau ’api. ’Ua mo’e te mau ’api ia Martin Harris. Nō te hō’ē tau, ’ua ’īriti atu te Fatu i te hōro’a nō te hurira’a parau i te peropheta, ’e ’ua ha’api’i mai Iosepha i te hō’ē ha’api’ira’a māuiui mau ’e te faufa’a rahi o tei ha’amaita’i i te toe’a o tāna tāvinira’a.

’Ua riro te Vārua Maita’i ’ei tufa’a faufa’a rahi no te Fa’aho’ira’ahia mai te ’Evanelia. Nō ni’a i tōna tai’ora’a i tōna ’āpīra’a ia Iakobo 1:5, ’ua fa’ati’a te peropheta Iosepha, « ’aita roa ā te hō’ē pāpa’ira’a mo’a i ’ō ma te pūai rahi a’e i roto i te ’ā’au o te ta’ata nei, mai tō teie nei ’īrava i ’ō mai i roto i tō’u nei ’ā’au ».¹⁹ Te mana tei fa’a’itehia e Iosepha Semita o te mana ïa o te Vārua Maita’i. ’Ei hope’ara’a, ’ua haere atu Iosepha i roto i te hō’ē ’uru rā’au i pihai iho i tōna fare ’e ’ua tūturi ihora nō te ani i te Atua. E mea pūai ’e e mea hanahana mau te ’Ōrama Mātāmua tei tupu i muri mai. Te ’ē’a rā i arata’i atu i taua farereira’a i te Metua ’e te Tamaiti ’ua ha’amata ïa na roto i te hō’ē fa’aurura’a a te Vārua Maita’i ’ia pure.

’Ua tae mai te mau parau mau heheuhia nō te ’evanelia tei fa’aho’ihia mai na roto i te hōho’a nō te ’imira’a na roto i te pure, te fāri’ira’a ’e te pe’era’a i muri iho i te parau ri’iri’i a te Vārua Maita’i. A feruri na i teie mau hi’ora’a : te ’īritira’a i te Buka a Moromona, te fa’aho’ira’ahia mai te autahu’ara’a ’e te mau ‘ōro’a, ha’amata na te bāpetizora’a, ’e te fa’ati’ara’a o te ’Ēkālesia―nō parau i te tahi mau mea. Te fa’a’ite pāpū nei au i teie mahana, ’e e tae mai te heheura’a a te Fatu i te Peresidenira’a Mātāmua ’e te ’Ahuru ma Piti ’Āpōsetolo mai teie ihoa huru fa’anahora’a. Mai teie ato’a te huru e nehenehe e fāri’i te heheura’a o te ta’ata iho.

Te ha’apoupou nei tātou i te mau ta’ata ato’a tei pe’e i te Vārua Maita’i nō te fāri’i i te ’evanelia tei fa’aho’ihia mai, ma te ha’amata na te mau melo nō te ’utuāfare iho a Iosepha Semita. I tō Iosepha tamaiti paraura’a i tōna metua tāne nō ni’a i te fāra’a mai o Moroni, ’ua fāri’i tōna metua tāne i te hō’ē ’itera’a ha’apāpū nōna iho. I te reira iho taime, ’ua ’īriti-’ē-hia tāna mau hopoi’a i roto i te fa’a’apu ’e ’ua fa’aitoitohia ’oia i te pe’e atu i te arata’ira’a a te melahi.

I roto i tō tātou mau ti’ara’a metua ’e e feiā fa’atere, e na reira ana’e na tātou. E fa’aitoito na tātou i ta tātou mau tamari’i ’e ia vetahi ’ē ’ia pe’e i te arata’ira’a a te Vārua Maita’i. A na reira ai tātou, te pe’e ra ’ia tātou iho i te hi’ora’a o te Vārua Maita’i, i te arata’ira’a na roto i te marū, te ha’eha’a, te hāmani maita’i, te fa’aoromai ’e te here mau.²⁰

Te Vārua Maita’i o hō’ē rāve’a ïa nō te ’ohipa a te Atua, i roto i te mau ’utuāfare ’e i roto i te tā’āto’ara’a o te ’Ēkālesia. Ma taua itera’a ra, e fa’a’ite atu vau i te tahi mau hi’ora’a tō’u nō te Vārua Maita’i i roto i tō’u iho orara’a ’e te tāvinira’a i roto i te ’Ēkālesia. Te pūpū nei au i teie mau hi’ora’a ’ei itera’a pāpū nō’u ē e ha’amaita’i te Vārua Maita’i ia tātou pā’āto’a.

E rave rahi mau matahiti i teie nei, ’ua ’ōpua maua te tuahine Hales i te fāri’i i tō’u mau hoa ’ohipa i te hō’ē tāmā’ara’a taa ’ē i tō maua fare. I tō’u ho’ira’a i te fare, ’ua fāri’i au i te hō’ē fa’a’itera’a ’ia tāpe’a i te fare o te hō’ē vahine ivi o tā’u e hahaere. I tō’u pātōtōra’a atu i te ’ōpani o te tuahine, ’ua parau mai ’oia, « i pure na vau e ’ia haere mai ’oe ». Nō hea mai taua fa’a’itera’a ra ? Nō ’ō mai ïa i te Vārua Maita’i ra.

I te hō’ē taime, i muri a’e i te hō’ē ma’i rahi, ’ua peresideni au i te hō’ē ’āmuira’a titi. Nō te fa’aherehere i tō’u nei pūai, ’ua ’ōpua vau i te fa’aru’e i te fare purera’a i muri noa a’e i te purera’a a te feiā fa’atere autahu’ara’a. I muri a’e ra i te pure hope’a, ’ua parau mai te Vārua Maita’i iā’u, « haere ’oe i hea ? ». ’Ua fa’auruhia vau ’ia aroha rima i te mau ta’ata ato’a a haere atu ai rātou i rapae au i te piha. A haere mai ai te hō’ē peresibutero ’āpī, ’ua fa’auruhia vau ’ia hōro’a atu iāna te hō’ē poro’i taa ’ē. ’Ua hi’o ’oia i raro, ’e ’ua tia’i au ’ia hi’o mai ’oia i tō’u mata, ’e ’ua nehenehe iā’u ’ia parau, « a pure i te Metua i te Ao ra, a fa’aro’o i te Vārua Maita’i, ’e a pe’e i te mau muhumuhu o te hōro’ahia atu ia ’oe, ’e e maita’i ïa tō ’oe orara’a ». ’Ua parau mai te peresideni titi i muri mai e nō ho’i noa mai ra teie taure’are’a mai tāna misioni mai. Ma te ’itera’a i te hō’ē fa’a’itera’a pāpū, ’ua fafau te peresideni titi i te metua tane o teie nei tamaiti e mai te mea e ’āfa’i mai ’oia i tāna tamaiti i te purera’a autahu’ara’a, « e paraparau ïa Elder Hales iāna ». Nō te aha vau i fa’aea mai ai nō te aroha rima i te mau ta’ata ato’a ? Nō te aha vau i fa’aea ai nō te paraparau i teie tamaiti ’āpī ta’a ’ē ? Nō hea mai te tumu o tō’u mana’o tauturu ? E mea ohie roa : Nō te Vārua Maita’i mai.

I te ’ōmuara’a o te matahiti 2005, ’ua arata’ihia vau ’ia fa’aineine i te hō’ē poro’i nō te ’āmuira’a rahi nō ni’a i te mau misionare pa’ari tāne ’e vahine. I muri a’e i te ’āmuira’a, ’ua fa’ati’a mai te hō’ē taea’e : « A fa’aro’o ai mātou i te ’āmuira’a… ’ua fa’aputapū ’oi’oi roa te Vārua o te Fatu i tō’u ’ā’au… Mea māramarama roa te poro’i nō’u ’e nō tō’u hoa here. E ti’a ia maua ’ia tāvini i te hō’ē misiōni i teie ihoa taime. I tō’u hi’ora’a atu i tā’u vahine fa’aipoipo, ’ua ’ite au e ’ua fāri’i ato’a ’oia i taua mau fa’a’itera’a nō ’ō mai i te Vārua ».²¹ E aha tei ’āfa’i mai i teie pāhonora’a pūai i te reira iho taime ? Te Vārua Maita’i.

I tō’u iho nei huā’ai, ’e te feiā ato’a e fa’aro’o mai nei i tō’u nei reo, te pūpū atu nei au i tō’u ’itera’a pāpū nō ni’a i te heheura’a a te ta’ata tāta’itahi ’e te arata’ira’a tāmau i te mau mahana ato’a, te fa’aarara’a, te fa’aitoitora’a, te pūai, te tāmāra’a vārua, te tāmāhanahanara’a, ’e te hau o te tae mai i tō tātou ’utuāfare na roto i te Vārua Maita’i. Na roto i te Vārua Maita’i, e ’ite ïa tātou i « te rahira’a o [tō te Mesia] aroha fa’aherehere »²² ’e te mau semeio o te ore roa e fa’aea.²³

Te fa’a’ite nei au i tō’u ’itera’a ta’a ’ē e te ora nei te Fa’aora. Te fa’a’ite nei au i tō’u here ’e tō’u māuruuru rahi i te Metua i te Ao ra nō te hōro’a a te Vārua Maita’i, na roto i te reira e heheu mai ai ’Oia i Tōna hina’aro ’e e pāturu mai ai ’Oia ia tātou i roto i tō tātou orara’a. I te i’oa o Iesu Mesia, amene.