Cov Tshuaj Pleev ntawm Kev Zam Txim

Txhua yam uas los ntawm Vajtswv yog kev hlub, txoj kev kaj, thiab qhov tseeb. Tiam sis peb cov tib neeg nyob hauv ib lub ntiaj teb uas tau poob lawm, thiab uas muaj txoj kev tsaus ntuj thiab kev ntxhov siab. Peb thiaj paub zoo tias tib neeg yuav ua yuam kev, ua tej yam tsis ncaj, thiab yuav ua txhaum. Yog li ntawd, tsis muaj leej twg uas muaj txoj sia nyob, uas yuav tsis raug lwm tus txoj kev ua yuam kev, ua tej yam kom yus tu siab, los yog ua txhaum. Yog ib qho uas peb txhua tus yuav raug

Zoo siab uas vim Vajtswv hlub thiab muaj kev hlub tshua rau Nws cov me nyuam, Nws tau npaj ib txoj kev pab peb kov yeej tej kev ntxhov siab nyob hauv peb lub neej. Nws tau npaj ib txoj kev rau txhua tus uas raug luag tej kev txhaum kom dim. Nws tau qhia peb tias peb zam txim tau! Txawm peb raug lwm tus ua txhaum rau peb ib zaug, peb tsis tas raug zaum ob thaum peb ris lub nra ntawm kev ntxub, kev mob, kev tu siab, los yog kev pauj kua zaub ntsuab. Peb muaj peev xwm zam txim, peb thiaj yuav dim!

Ntau xyoo tas los, thaum kuv kho ib xov laj kab, muaj ib tug ntshiv ntoo chob kuv tus ntiv tes. Kuv sim muab tus ntshiv ntoo tshem thiab xav tias kuv twb ua lawm, tiam sis kuv tsis tau tshem. Sij hawm dhau mus, tawv nqaij npog ntshiv ntoo, thiaj muaj ib lub pob rau ntawm kuv tus ntiv tes. Qhov no meem txom kuv thiab tej lub sij hawm mob heev.

Ntau xyoo tom qab ntawd kuv txiav txim siab kuv yuav ua li cas. Kuv tsuas muab cov tshuaj pleev lub pob thiab siv ntaub qhwv lub pob ntawd. Kuv pheej pleev cov tshuaj tsis tu ncua. Muaj ib hnub kuv tshem ntaub qhwv es ua rau kuv xav tsis thoob vim tus ntshiv ntoo twb tawm ntawm kuv tus ntiv tes lawm.

Cov tshuaj pleev ua rau kuv tawv nqaij mos mos thiaj npaj ib txoj kev rau qhov uas ua rau kuv mob tau ntau xyoo lawm tawm los. Tom qab tau tus ntshiv ntoo tawm lawm, kuv tus ntiv tes zoo sai heev, thiab txij thaum ntawd los, tsis muaj dab tsi uas pom tau tias kuv mob.

Zoo ib yam li ntawd, ib lub siab uas tsis zam txim muaj mob heev uas tsis tas muaj. Thaum peb muab cov tshuaj pleev ntawm tus Cawm Seej txoj Kev Theej Txhoj, Nws yuav ua peb lub siab mos thiab pab peb hloov siab. Nws yeej kho tau cov uas raug mob (saib Yakhauj 2:8).

Kuv xav tias peb feem coob xav zam txim, tiam sis nyuaj rau peb ua li ntawd. Thaum peb raug ib qho uas tsis ncaj, peb hais tias, “Tus neeg ntawd ua txhaum. Tsim nyog lawv raug txim. Kev txim lij nyob qhov twg?” Peb ua yuam kev xav tias yog peb zam txim, ces ntshe yuav tsis muaj kev txim lij thiab yuav tsis raug txim.

Yeej tsis zoo li ntawd. Vajtswv yuav rau txim kom ncaj, vim kev zam txim yuav tsis muaj peev xwm nyiag tau ntawm kev txim lij (saib Amas 42:25). Vajtswv hais tseeb rau peb hais tias cia txoj kev txiav txim rau Nws ib leeg, vim kev txiav txim yog Vajtswv li thiab Nws yuav them rov qab. Tiam sis cia kev kaj siab nrog nej nyob (Q&K 82:23). Tus yaj saub Yakhauj nyob hauv Phau Ntawv Maumoos kuj cog lus tias Vajtswv “yuav nplij nej thaum nej muaj kev txom nyem, thiab nws yuav ris nej tej teeb meem, thiab yuav xa txoj kev rau txim nqis los rau cov uas nrhiav nej txoj kev puas tsuaj” (Yakhauj 3:1).

Peb cov uas raug lwm tus tej kev ua txhaum, yog peb rau siab ntseeg, peb yuav txais kev nplij siab vim peb paub tias Vajtswv yuav foom koob hmoov rau peb rau txhua yam tsis ncaj ncees uas peb raug. Txwj Laug Joseph B. Wirthlin hais tias: “Tus Tswv foom koob hmoov rau cov uas rau siab ntseeg rau txhua yam uas lawv raug. … Txhua lub kua muag uas los hnub no thaum yav tom ntej yuav muab pauv ib puas npaug kom los kua muag nrog kev xyiv fab thiab kev ris txiaj.”¹

Thaum peb sim zam txim rau lwm tus, thov cia peb nco ntsoov tias peb txhua tus tseem loj hlob ntawm sab ntsuj plig, tiam sis peb nyias nyob nyias qib siab. Txawm yooj yim rau peb pom tej yam uas hloov thiab loj hlob ntawm sab cev nqaij daim tawv, nyuaj rau peb pom kev loj hlob ntawm peb sab ntsuj plig.

Ib qho ntsiab cai txog kev zam txim yog kev saib lawv zoo li Vajtswv saib lawv. Tej lub sij hawm, Vajtswv yuav foom koob hmoov rau peb kom muab lub txiaj ntsim saib lwm tus uas ua rau peb npau taws lub siab thiab sab ntsuj plig. Qhov no tej zaum yuav ua rau peb hlub tus neeg ntawd.

Cov vaj lug kub qhia peb tias Vajtswv txoj kev hlub rau Nws cov me nyuam yeej zoo tag nrho. Nws paub tias lawv muaj peev xwm ua zoo, txawm yog yav tas los zoo li cas los. Nyob hauv txhua zaj, tsis muaj ib tug yeeb ncuab ntawm Yexus Khetos cov thwj tim uas lim hiam tshaj Xaulus los ntawm lub nroog Talaxus. Tiam sis thaum Vajtswv qhia Xaulus txog qhov kaj thiab qhov tseeb, yeej tsis muaj ib tug thwj tim ntawm tus Cawm Seej uas rau siab, ncaj ncees, thiab tsis ntshai npaum li nws. Xaulus hloov los ua tus Thwj Tim Povlauj. Nws lub neej yog ib tug yam ntxwv uas qhia peb tias Vajtswv yeej tsis saib qhov uas tib neeg zoo li cas tam sim no xwb tiam sis Nws kuj saib lawv muaj peev xwm rais los ua neeg zoo li cas. Nyob hauv peb lub neej, peb txhua tus paub cov neeg zoo li Xaulus uas muaj peev xwm ua neeg zoo li Povlauj. Cia li xav seb yuav zoo li cas yog peb tsev neeg, zej zog, thiab neeg nyob thoob plaws lub ntiaj teb yuav hloov li cas yog peb ib leeg yuav saib ib leeg zoo li Vajtswv saib peb?

Feem ntau peb saib tus neeg ua txhaum zoo ib yam li cov dej khov tej thooj loj loj hauv hiav txwv—peb tsuas pom saum ncov thiab tsis pom dab tsi hauv hiav txwv. Peb tsis paub txhua yam txog ib tug neeg lub neej. Peb tsis paub lawv raug li cas dhau los; peb tsis paub lawv tej teeb meem; peb tsis paub lawv tej kev nyuaj siab. Cov kwv tij thiab cov muam, thov to taub kuv zoo. Kev zam txim tsis yog kev pom zoo. Peb tsis hais tias tsis ua li cas yog lwm tus ua phem los sis cia lwm tus ua tsis zoo rau peb vim lawv muaj teeb meem, nyuaj siab, los yog muaj kev qaug zog. Tiam sis peb yeej yuav to taub zoo dua ntxiv thiab nyob kaj siab lug thaum peb pom qhov dav.

Tej zaum cov uas lawv sab ntsuj plig tsis tshua muaj zog yuav ua yuam kev loj heev—tiam sis tsis tsim nyog uas lwm tus yuav saib peb nco ntsoov qhov phem tshaj plaws uas peb tau ua. Vajtswv yog tus txiav txim zoo tag nrho. Nws pom txhua yam ntawm lub siab. Nws paub thiab pom txhua yam (saib 2 Nifais 2:24). Nws tau hais tias tus Tswv yuav zam txim rau tus uas Nws yuav zam txim rau, tiam sis peb yuav tsum zam txim rau tag nrho txhua tus (saib Q&K 64:10).

Yexus Khetos Nws tus Kheej, thaum Nws raug liam tsis ncaj, ces raug ntaus, raug nplawm, thiab raug ntsia saum ntoo khaub lig, thaum tib lub sij hawm ntawd Nws hais tias, “Txiv, thov koj zam txim rau lawv! Rau qhov lawv tsis paub hais tias lawv ua dab tsi” (Lukas 23:34).

Vim peb pom tsis deb, tej lub sij hawm yooj yim rau peb tu siab rau cov uas tsis ua zoo li peb los yog xav zoo li peb. Tej zaum peb coj cwj pwm tsis txais yuav lwm tus vim lawv xav txawv txog tej yam xws li kev nyiam ib pawg ntaus pob, los sis vim lawv ntseeg txawv txog kev kav teb chaws, los sis tsis ntseeg kev teev ntuj zoo li peb.

Thawj Tswj Hwm Russell M. Nelson qhuab ntuas peb zoo thaum nws hais tias, “Cov cib fim mloog cov uas tsis ntseeg li peb los yog ntseeg kev kav teb chaws txawv ntawm peb pab tau kom muaj siab dav thiab pab peb kawm tau.”²

Phau Ntawv Maumoos hais txog ib lub sij hawm thaum “cov neeg ntawm lub koom txoos tau pib muab hlob nyob ntawm lawv tej qhov muag, thiab … tau pib nyiam thuam, ib leeg rau ib leeg, thiab … tau pib tsim txom cov uas tsis ntseeg raws li lawv tej siab xav thiab siab nyiam” (Amas 4:8). Thov cia peb txhua tus nco ntsoov tias Vajtswv tsis saib yus lub tsho los yog saib yus koom nrog pawg kav teb chaws twg. Tiam sis, raws li Amoos hais tias, “[Vajtswv] ntsia los rau noob neej sawv daws; thiab nws paub tag nrho tej kev xav thiab tej kev xav tau ntawm lub siab” (Amas 18:32). Cov kwv tij thiab cov muam, nyob hauv tej kev sib tw ntawm lub neej no, yog peb yeej, thov kom peb muaj kev tshav ntuj. Yog peb tsis yeej, thov kom peb muaj kev tshav ntuj. Vim yog peb muaj kev tshav ntuj ib leeg rau ib leeg, ces thaum hnub kawg peb lub nqi zog yeej yuav yog kev tshav ntuj.

Ib yam li muaj tej lub sij hawm thaum peb txhua tus raug luag ua txhaum rau peb, tej lub sij hawm peb kuj yog tus uas ua txhaum. Peb txhua tus ua yuam kev thiab xav tau kev tshav ntuj, kev hlub tshua, thiab kev zam txim. Peb yuav tsum nco ntsoov tias kev zam txim rau peb tej kev txhaum nyob ntawm seb peb puas zam txim rau lwm tus. Tus Cawm Seej hais tias:

“Yog nej zam txim rau tus uas ua txhaum rau nej lawm, nej Leej Txiv tus uas nyob saum ntuj ceeb tsheej thiaj yuav zam txim rau nej:

“Tiam sis yog nej tsis zam txim rau lwm tus, nej Leej Txiv tus uas nyob saum ntuj ceeb tsheej yuav tsis zam txim rau nej thiab” (Mathais 6:14–15).

Txawm muaj ntau yam uas tus Cawm Seej hais tau nyob hauv tus Tswv zaj Lus Thov Vajtswv, uas yeej tsis ntev, yus yeej xav paub vim li cas Nws tau hais li no “Thiab thov zam txim rau peb tej kev tshuav nuj nqis, ib yam li peb zam txim rau cov uas tshuav peb nqi” (Mathais 6:12; 3 Nifais 13:11).

Vajtswv txib Nws Leej Tub los kom peb txais tau kev zam txim, yog li ntawd cia peb zoo siab vim Nws txaus siab kho peb txhua tus kom zoo. Tus Cawm Seej txoj Kev Theej Txhoj tsis yog rau cov uas yuav tsum hloov siab lees txim xwb; yog rau cov uas yuav tsum zam txim. Yog tias nyuaj rau nej zam txim rau lwm tus los sis zam txim rau nej tus kheej, cia li thov Vajtswv pab nej. Kev zam txim yog ib lub ntsiab cai zoo kawg uas kho tau yus lub siab kom zoo. Peb tsis tas raug txom nyem ob zaug. Peb muaj peev xwm zam txim tau.

Kuv ua tim khawv txog Vajtswv txoj kev hlub thiab kev ua siab ntev rau tag nrho Nws cov me nyuam thiab txog Nws txoj kev xav kom peb ib leeg hlub ib leeg ib yam li Nws hlub peb (saib Yauhas 15:9, 12). Thaum peb ua li no, peb yuav ua rau lub ntiaj teb txoj kev tsaus ntuj nti ploj mus thiab txais tau lub yeeb koob ntawm Nws lub nceeg vaj. Peb thiaj yuav dim. Los ntawm Yexus Khetos lub npe, amees.