“Poadidiong Ei Limpoak”

Pwuhk Sarawi padahkihong kitail me “Koht me limpoak.”¹ Iei Ih me kin ketin kasalehda limpoak mehlel, oh kitial kin anahne limpoak poatoapoato me kin kipehdi koaruhsie. Ihme Presiden Thomas S. Monson mahseniher: “Koht ketin poakohng kumwail detehn kumwail kehn ma kumwail warohng de soh. E kin mie ansou koaros.”²

Kawehwehpen limpoak en Koht kak wiawi ni soangen mwomw kei. Ehu lepin kahs me kitail kin kalap rong rahnwet me dene limpoak en Koht kin “sohte lipilipil.” Mehlel, ahpw, lepin kahs wet sohte kin dierek nan pwuhk sarawi. Pwe iet mwomwen kawehwepen Sapwellime limpoako “limpoak laud oh kaselel”³ “limpoak unsek”⁴ “ “limpoak en komour”⁵ “limpoak poatoapoat.”⁶ Lepin kahs pwukat me wehwe mwahu pwe lepin kahs sohte lipilipil kak elehda kawehwe sapwung me dene Koht kin sohte lipilipilki mehkoaros oh sohte kin kadeik kitail pwe Sapwellime limpoako sohte lipilipil, de Koht sohte kin kupwurki kitail en wia mehkot pwe Sapwellime limpoako sohte lipilipil, de koaruhsien komourlahr nan wehin Koht pwe limpoak en Koht kin sohte lipilipil. Limpoak en Koht sohte kin uhdi oh pahn kohkohlahte soutuk, ahpw emen emen kitail me pahn pilada uwen laud en Sapwellime limpoak ong kitail.

Sises masanih:

“I poakohng kumwail, duwehte Sahmo eh ketin loalloale ie; kumwail en poadidiong ei limpoak.

“Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.”⁷

Pwehn “doula nan” de “poadidiong” limpoak en Sounkomouro wehwehki en ale Sapwellime kalahngan.⁸ Pwehn ale Sapwellime kalahngan, kitail anahne pwoson Sises Krais, koluhkihla dipatail kan, pepdaisla pwehn widensang dipatail kan, ale Ngehn Sarawi, oh kohkohwei nan ahl en peik.⁹

Koht pahn poakohng kitail ansou koaros, ahpw E sohte kak komour kitailla nan dipatail kan.¹⁰ Tamataman dahme Amulek ndahieng Zeezrom me Koht sohte pahn ketin komourla Sapwellime aramas kan nan diparail kan ahpw sang diparail kan,¹¹ kahrepe pwe ma kitail dihp kitail samin oh “sohte mehkot samin kak sohsohki wehin nanleng”¹² de warohng uh mwohn silangin Koht. “Oh Sahmo ketkihong [Krais] manaman en dorehla [Sapwellime aramas] sang diparail kan pwehki koluhla; ihme kahrehda sapwellime tohnleng kan kalohkihda rongamwahuo me iei koluhla, me kin elehda manaman en Soundoro, en komourirailla.”¹³

Kitail kaskuhlki sang nan Pwuken Mormon kahrepen en Krais kalokolok, me wia kasansalpen Sapwellime limpoak, “pwe en ketikihdo kalahngan lapalap, me pahn powehdi kapwungo, oh ketikihdo mehkan rehn aramas akan pwe irail en ahneki pwoson ong ni koluhla.

“Oh sang nin duwen met, kalahngano kak kaitarala en kosonnedo pwung kan, oh kalahngan kin kapel irail pene ni sohte keper, eri mehmen me sohte kin doadoahngki pwoson pwehn koluhla pahn pengpeng lahng kalokolok en anahn akan en kosonnedo koaros; eri mehmen me ahneki pwoson pwehn koluhla pahn sohsohki pilahn en komour lapo.”¹⁴

Koluhla iei Sapwellime kisakis ong kitail, me alahlkihda mehkoat kesempwal.

Ekei pahn akpwungki me Koht kin ketin kapaiada me dipan oh me sohte dipan koaros—ni arail kin doadoahngki mahsen me Sises ketin wia nan sapwellime Padahk en Pohn Dohlo: “[Koht] kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.”¹⁵ Mehlel, Koht kin ketin kamwerehdi pohn Sapwellime serihkan kapai koaros me E kak—kapai kan koaros me limpoak oh kosonned oh kopwung oh kalahngan kak mweidada. Oh E ketin kupwurki kitail en alasang:

“I ndaiong kumwail, kumwail poakohng amwail imwintihti kan, wia mwahu ong me kin kailongkin kumwail, kapakapki me kin wia suwed ong kumwail;

“Pwe kumwail en wiahla sapwellimen Sahm me ketiket nanleng seri.” ¹⁶

Ahpw, kapai lap kan en Koht kin peipeiante peik. Presiden Russell M. Nelson kawehwe me: “Limpoak en Koht me duwehte dunen wahnrohs lingan ehu—oh mour soutuk—pil iangahki kapai kan me kitail anahne warohng, sohte wia kisakis kei me sohte kasikpe ma sohte warohng. Me dipan akan sohte kak wekidohng irail Kupwure oh idingehng en kapai irailda nan diparail kan [tehkAlma 11:37]. Ma irail anahne ren iang paieki Sapwellime dunen wahnrohso, irail anahne koluhla.”¹⁷

Pallahsang koluhla oh wiahla aramas mwakelekel men iangahki inou me kitail pahn “kenkenla ni imwin rahno,”¹⁸ mie pil ehu ire kesempwal me pid poadidiong limpoak en Koht. Poadidiong Sapwellime limpoako pahn kahrehda atail kak kasawiada atail kak koaros, pwehn duwehla Ih.¹⁹Presiden Dieter F. Uchtdorf mahsani me: “Mahk en Koht sohte kapwureikitaillahte nan atail mour mwakelekel en mahso. … Sapwellime koasondi me inenen ileile; E ketin kupwurki Sapwellime serihkan en duwehla Ih.”²⁰

Pwehn poadidiong limpoak en Koht ni mwomw wet anahne en idawehn Kupwure ni unsek. Met wehwehki en ale Sapwellime peneu ansou me anahnepe mie, “Pwe Kauno kin ketin kapwungala me E kin ketin loalloale.”²¹ Met wehwehki poakohng oh papah mehteikan duwehte Sises Ah poakong oh papah kitail.²² Met wewehki en esehla “en kapwaiada kosonned en wehin celestial” pwe kitail en kak “ahneki kapai en celestial.”²³ Oh pwe kitail en kak duwehla Ih, Samatail Nanleng ketin peki kitail en “lohdi ong pahn songisong en Ngehn Sarawi oh [pwilikihdi] nin duwen aramas emen oh [wiahla] souleng emen sang ni Tomw en Kauno, Krais, oh [wiahla] nin duwen serihmen, me peik, ohpampap, karakarahk, kanengamah, direkihla limpoak, kin men dukila pahn mehkoaros me Kauno ketin mwangih me konehng en kohieng ih, nin duwen serihmen me kin dukila rehn eh pahpao.”²⁴

Elder Dallin  H. Oaks mahsani me: “Kadeik lapo sohte kasawihte atail wiewia mwahu oh suwed koaros—ahpw dahme kitail wiadahr. Pwe iei kadehdepen dahme atail wiewia oh madamadau kan eledahr—dahme kitail duwelahr.”²⁵

Soai en Helen Keller wia karasaras ehu me karasa uwen limpoak en Koht eh kak wekidala aramas me men wekila. Helen ipwidi nan Alabama nan United States nan 1880. Ni eh mahkihte sounpwong 19, e alehdi soumwahu ehu me kahrehiong eh sohla kak rong oh kilang wasa. E inenen loaloakoang oh kin mwarosala ni eh kin song en wehwehki dahme wiewiawi limwah. Ni eh kin kilang en ah peneineiko arail kin kamwakid ewerail pwehn lokaia, “e kin inenen lingeringerda [pwehki] e sohte kak iang koaskoasoipeneo.”²⁶ Ni ansou me Helen lel sounpar weneu, ah anahn en iang koaskoasoi oh ah kin “lingeringero inenen ukla oh kin kak wiawi rahn koaros, ekei ansou awa koaros.”²⁷

En Helen pahpa/nohno alehda ah sounpadahk liemen adaneki Anne Sullivan. Me duwehte atail kin wiahki Sises Krais me kin wehwehki atail souitar akan,²⁸ Anne pil ahnekihdi kahpwal laud pwehn pil kak wehwehki en Helen souitar akan. Ni eh sounpar limau, soumwahu ehu lel nan mesen Anne me kahrehda eh sohla kak kilang wasa mwahu. Ni en Anne eh sounpar walu, ah nohnou mehla; ah pahpao mweselsang ih oh Jimmie, rie pwutak tikitik; oh ira eri pekederla nan wasahn apwali seri paisuwed kan oh uwen suwed en wasao kahrehda Jimmie mehla mwurinte sounpwong silu. Pwehki ah ngihtehte, Helen ahpw kereda nan Perkins Sukuhl en me maskun oh sohte kilang wasa mwahu, wasa e inenen pweida ie. Koadoahkpen meseo ahpw wiawi kahrehda e kak kilangada wasa oh wadawad. Ni en Helen eh pahpao rapahki aramas nan Perkins Sukuhl pwehn sounpadahki nah serepeino, Anne me pilipilda.²⁹

E sohte wia irair kansenamwahu ehu ni tapio. “Helen kin woki, kini, oh kikim ah sounpadahko oh katipwasang oapwoat ngihn liho. [Anne] ahpw kakala apwali mwurin eh kamwakid [Helen] ong nan kisin ihmw ehu nan sapwen Keller ko. Sang ni kanengamah oh koasondi teng, liho ahpw alehdi en serio mohngiong oh likilik.”³⁰ Duwehtete, ni atail kin likiala oh sohla men dukiong Sounkaweido, E kak ketin kamwakid kitail en marainla oh keirda.³¹

Pwehn sewese Helen en esehla lepin lokaia kan, Anne kin sipehlih eden dipwisou mengei kan ki sendin pehkan pohn pehn Helen kan. “[Helen] perenki mwadong wet, ahpw e sohte kin wehwehki lao lel ansou me Anne sipehli ‘p-i-h-l’ ni eh kangkakerehdi pihl pohn pehn ‘Heleno]. Mwuri [Helen] ntingidi me:

“‘I wiahkintehiou kehn mwomwen mehkot me I ese ahpw manokehla … oh ni wiepe kapwuriamwei lokaia ahpw sansalohng ie. I esehda ansouo me “p-i-h-l” iei mehkoat lemwlemwur me kerkeredi pohn pehiet. Lepin koasoio kapiriehda, kihiengie marain, koapworopwor, peren oh kasaledek iehla! … Mehkoaros mie ederail, oh ehu ehu ahd kin kihiengie madamadau kapw ehu. Ni aht pwurala ni ihmwo mehkoaros me I sair likamw re wie mwekmwekidki mour.”’³²

Ni en Helen Keller eh keirda oh mahla, liho ndandkihla eh kin poakohng lokaia, ah semen en nting, oh ah kadek kapahrek nan pokon.

Nan kasdo ehu me pid en Helen Keller ah mour, e sansal uwen en ah nohno/pahpa itarkihla en Anne Sullivan ah doadoahk ni eh wekidala en neira serepeino ah wiewia ni en Helen eh kin wiewia mwahu ni ansoun mwenge, oh kin wilikpene ah likoun limwi peh mwurin mwenge. Ahpw Anne ese me Helen kak wia me laudsang mwohkan mehlel oh mie mehkot kesempwal akan e kak wiahda.³³ Kitail pil kak itarkihla dahme kitail kalewehdier nan atail mour kan, oh kitail itarkiher dahme miehier, ahpw atail Soundoro mwahngi atail kak lingan kan me kitail kak kilangte “nan kilahs edied ehu.”³⁴ Emen emen kitail pahn ahneki peren ni ansou me kitail pahn kasawiada atail kak duwehte peren me Helen Keller alehdi ni ansou me e kasawiada lokaia, kamarainda oh kasaledekla ih. Emen emen kitail kak poakohng oh papah Koht oh ahneki mweimwei en kapai rietail akan. “Ahpw duwen Pwuhk Sarawi eh mahsanih, soahng kan me aramas saikinte kilang de rong, soahng kan me aramas saikinte lemehda en kak wiawi, iei me Koht ketin kaunopadahng irail kan me kin poakohng Ih.”³⁵

Kitail anahne medemedewe dahme Koht ketin loieng pwehki sapwellime limpoako. Sises ketin kasalehda me pwehn tomwki dipatail kan oh doreikitail sang mehlahn paliwar oh palingehn, Sapwellime lokoloko kahrehiong ih oh “mehlel Koht weirek koasukiloal, oh nta keredihsang nan pwoahr koaros, oh lokolok ni paliwar oh palingehn—oh kahrehda [Ah] men pweieksang nim kep katik wet.”³⁶ Sapwellime tihwohla nan Kedsemani oh pohn lohpwuho lapasang dahme aramas kak ale.³⁷ Ahpw pwehki Sapwellime limpoak ong Seme oh kitail, E ketin powehdi, kahrehda, E kak ketkiheng kitail komour oh mour poatopot.

Meid kapwuriamwei en Sounkomouro eh ketin lokolok oh kakerehdi nta sang pwoahr en kili koaros”³⁸ nan Kedsemani wasahn kamwutepene wahn olive. Pwehn wiahda leh nan mwein Sounkomouro, re kin katapwure takai laud ehu pohn wahn olive kan oh kamwutehpene. Me mwutehrko kin audaudieng nan kopwou mwuterek peipeida kan oh kaposokehda ehu kopwou pohn ehu. Uwen toutou en posokeho me kin wiahda leh me keieu mwahu. Tuhke laud pil kin pwildi pohn kopwouko pwehn toutoudi. Oh takai pil kin pirapirieng ni imwin tukeho pwehn idangidi kehlail kopwouko.³⁹ Oh ehi, leh weitahta duwehte nta me kin tepin keresang nan kopwouko.

I kin medewe en Madiu ah koasoia duwen en Sounkomouro Ah ketlong nan Kedsemani nipwong kansensuwedo me E ketin “inenen toutou oh diren nsensuwed.  …

“Ih eri ketlahsang mperail oh poarkihdiong silangi nanpwel, loulou, mahsani, Ipa, ma kak, a komw ketikihweisang ie dahl en lokolok wet; eri, soh, kaidehkin nseneiet, pwe kupwuromwihte en pweida.”⁴⁰

Eri, ni en Sapwellime weireko eh lalauda, E ketin peki ni keriepak en kasaledekla oh, ele ni en Sapwellime weireko ah doarala mehlel, E ketin peki ni kesilipak. E ketin powehdi weireko lao mehkoaros wiawiher oh pweidahr.⁴¹ E ketin wia met pwehki kumwail oh ngei.

Limpoak en Koht wia kisakis kesempwal ehu! Mehlel Koht pil lokoloki irail kan me soikala Ih?”⁴² Ni limpoak E ketin katamankinkitail, “Kilang, I kapahwei limei kat ong kumwail, oh mehmen me pahn kohdo … I pahn alehda; oh meid pai irail akan me pahn kohdo rehi.”⁴³

Kumwail sohte pahn poakehng Ih me ketin poakehng kumwail mahs?⁴⁴ Eri peikiong Sapwellime kosonned akan.⁴⁵ Kumwail sohte pahn kempoakapanki Ih me ketin pwilikihdi Sapwellime ieias pwehki kumwail?⁴⁶ Eri peikiong Sapwellime kosonned akan.⁴⁷ Kumwail sohte pahn poadidiong Sapwellime limpoak? Eri peikiong Sapwellime kosonned akan.⁴⁸ I kapakapki me iei kitail pahn poadidiong Sapwellime limpoak, ni mwaren Sises Krais, amen.