Te Kimwareirei ao Kamaiuan te Tamnei

Tariu ma mwaneu, n te bong aei I tangiria ni maroroakina te reirei are e riai nakon kamaiuan tamneira. Bon te reirei are e na raka riki kakawakina n aron taai ni kananokawaki ao ake a kakuba n aki kantaningaaki rikiia.

Aikai bon boong ni kaitira, ngaia akea mairoura ake a na mimi ngkana a noori taeka ni burabeti bwa a koro bukiia. Ni mwaitiia burabeti, n ikotaki ma Itaia, Bauro, Nibwaai, ao Moomon, a noori tai aika kamamate ake a na roko,¹bwa inanon ara bong n te aonaaba e na maeiei ao te rurunga ae tawe,²bwa a na riki aomata ba taan “tangiria ibon irouia, … taan bangaomata, … taan tangira riki te kukurei nakon te Atua,”³ao a na mwaiti ake a na tautoronaki iroun Tatan ake a boutokaa mwakuri ni kakaitara.⁴Ngaia, ngkoe ao Ngai ti “kaunrabwata … ni kaitaraia tan taua aron te taekan aonaaba aei, [ao] tanga n tamnei aika buakaka ake i ani karawa.”⁵

Ngke te bobuaka imarenaia aaba e a roko ni korakorana, ngke taan kakaitara aika a kakaamaku a tiringiia aomata aika akea aia bure, ao ngke mwakuri n iowaawa ni bwaai ni kabane man te bitiniti nakon te tautaeka e rikirake aroia, tera ae e na buokiira? Tera ae e na kona ni buokiira n tatabemaniira ma oin ara ikakorakora ao man tarai raoi kakaewenakoara ni maeka inanon kaitira ni bong aikai?

Te burabeti Riaai e reirei te reirei ibukin kamaiuan te tamnei. Te Moan, e iangoa aron ana kaangaanga: E bon aki karauaki ibukin kabwarabwaraan te koaua i Ierutarem ao e tuangaki iroun te Uea ni kitan ana bwai ni kabane ao n otinako ma ana utu nakon te rereua. E a tia ni maeka inanon te auti n rianna ao e maiu iaon kanaia are a kona ni kunea iaon kawaia nakon tokin kawaia ae aki ataia, ao e tia n tarataraia natina mwaane aika uoman, Reimwan ao Remuera, ni kakaitara ana reirei te Uea ao n ekinakoia tariia Nibwaai ao Taam.

E mataata, Riaai e ata te kaaitara, iango n raraoma, marakinnano, maraki, aki kukurei, ao te nanokawaki. Imwaina, e katanoata n aki maaku ao ma akean te kabanetai n reireiia te kawai are e bon kaotaki iroun te Uea: “Ao a riki aomata bwa aonga ni karekea te kimwareirei.”⁶ Iangoia! Aron taeka ni kabane are e kamanenai ni kamataata aron ao bukin maiura ikai n te maiu ae mamate, e rinea te taeka kukurei!

A mwaiti taai ni maiura ake ti aki kona ni waaki n te kawai are ti a tia ni baireia, kakatai ao kakaewenako n aroia nako. Ngaira n tatabemaniira ti karekei aroia ngkana iai te nanokawaki, te un, ao taonakira n te bwarannano. Imwaina ti roko ikai ni karekea te kukurei?

Eng! Te kaeka e takaruaeaki eng! Ma e na kanga anne ni koaua? Ao tera ae ti na karaoia ni karekea te kukurei are Tamara are i Karawa e katauraoaki ibukira?

Eliza R. Snow, te kauoman Beretitenti n te Bootaki n Aine ni Kabuta, e anga te kaeka ae kakanngo. Ibukin ana oota Missouri ae aki ataaki n tiringakiia aomata aika mwaiti, e karaoaki ni moanaki n tain kaangaangan te kamwaitorotoro n 1838,⁷ neiei ao tabeman Aomata aika Itiaki a imanonoaki ni kitana te titeite n tain te kamwaitoro. Teuana te tairiki, ana utu Eliza a tiku n te auti ae te kai are e kabonganaki irouia Aomata aika Itiaki ake taan birinako. Angiin te bokaboka are kaniman marenan kain te auti a kounako ao a bue ibukin te aia irouiia koraki ake a kairiia, ngaia are a mwaiti bwangabwanga imarenan kaai are e kona te katamwa ni kawakawa n rin iai. E rang korakora te mwaitoro, ao kanaia a buraoki n ran.

Te tairiki anne te katautau 80 aomata ni kauangii inanon te auti ae uarereke anne, ti 20 te tikuea buuti (6.1 tikuea miita). E angii aika tekateka ke a tei ni kabanea te tairiki ni kataia ni kabueeia. Itinaniku, te kurubu ni mwaane a kabanea te tairiki n ikoikotaki ni katobibia te ai ae urarake, ma tabeman a anenei kuuna n taromauri ao tabeman aumun buteeta ake a buraoki. Eliza e koreia: “Akea te ngurengure ae a ongo—ni kabane a kukurei, ao taekaia man taraaia, ianena a na araniira bwa aomata ni mwamwananga n ukoukora te kukurei ao te kakangare nakon riki bwa kurubu n aomata ake a kanakoaki iroun te kowana ni maeka n taabo tabeua.”

Ana ribooti Eliza n te korakai anne, mwaitoron-rii n te tairiki e kakubanako kakoauaan rikin bwaai aika a tamaroa. E katanoata: “Te tairiki e rang kakukurei. Akea ma ti Aomata aika Itiaki a kona n riki ni kukurei iaan kaangaanga ni kabane.”⁸

Ngaia anne! Aomata aika Itiaki a kona ni kukurei iaan aroaro ni kabane. Ti kona n namakina te kimwareirei ngkana ti mena ni boong aika buakaka, wiiki aika buakaka, ke buakakan riki te ririki!

Tariu ao mwaneu ae kam tangiraki, te kimwareirei ae ti namakinna e uarereke nakon karaoana ma aroaron maiura ao bwaai ni kabane are e na karaoaki ma tarakin raoi maiura.

Ngkana e katuruaki raoi maiura iaon ana babaire ni kamaiu, are Beretitenti Thomas S. Monson e reireiira, ao Iesu Kristo ao Ana euangkerio, ti kona n namakina te kukurei n aki ongeia bwa tera ae riki—ke a aki riki—inanon maiura. Te kimwareirei e roko mai Irouna ao ibukina bon Ngaia. Bon Ngaia oin ni kabane te kimwareirei. Ti namakinna n tain te Kiritimati ngkana ti anene, “Kimwareirei nakon te aonaaba, te Uea e a roko.”⁹ Ao ti kona n namakinna ni katoa ririki. Ibukiia Aomata aika Itiaki, Iesu Kristo e karekea te kimwareirei!

Anne bukina bwa ara mitinare a kitana mwengaia n tataekina Ana euangkerio. Aia kouru aki karikirakea mwaitiia kain te Ekaretia. N arona, ara mitinare a reirei ao a bwabetito ¹⁰ ni uota te kimwareirei nakoia aomata n te aonaaba! ¹¹

N aron te kawai anne te Tia Kamaiu e anga te rau ae “are te rau ae aki kona n ataki teutana,”¹² E anga naba buburan, korakoran te namakin ao mwaitin te kimwareirei are n aki kakoaua ana koaua te aomata ke kabwarabwaraan te rabwata ae mamate. Ibukin te katooto, e taraa n aki riai namakinan te kimwareirei ngkana am ataei e taonaki ma te aoraki ae akea katokana, ke ngkana e bua am mwakuri ke kainabam e a tia ni keweiko. Ngaia anne koauan te kimwareirei are e anga te Tia Kamaiu. Kimwareireina e bon reitinako, ni kakoauaira bwa “karawawataakira e na riki ma ti inanon te tai ae kimototo”¹³ ao riki n onea karawawatam nakon taian kakabwaia.¹⁴

E kanga, ngkanne, ti kona ni karekea te kukurei anne? Ti kona ni moanna man “taratara nakon Iesu Kristo te tia karika ara onimaki ao te tia kakoroa”¹⁵ “inanon iango ni kabane.”¹⁶ Ti kona ao n aki toki n anga te kakaitau Nakoina inanon ara tataro ao man kawakin otenanti ake ti karaoi ma Ngaia ao Tamara are i Karawa. Ngke ara Tia Kamaiu e riki ao n raka ma n raka koauana nakoira ao ngke ti bubuti ibukin Ana kimwareirei bwa ti na anganaki, ara kimwareireira e na rikirake.

Te kimwareirei e korakora, ao katuruan ara iango iaon te kimwareirei e uota mwaakan te Atua nako nanon maiura. N aron kawain bwaai ni kabane, Iesu Kristo bon ara banna ni katooto, “are taona nanona nakon te kaibangaki i bukin te kimwareirei are kamenaki i ma’ina.”¹⁷ Iangoa aron anne! N te aro bwa e na kona Ngaia n rinanon te taneiai ae kammaraki ae akea ae e a tia n rinanona iaon te aba, ara Tia Kamaiu e katurua te iango iaon kimwareirei!

Ao tera te kimwareirei are e kamenaaki Imatana? Koauana e kairaki ma te kimwareirei ni kaitiaki, kamarurung, ao ni kakorakoraira; te kimwareirei ni kaboan ara bure ibukiia ake a na rairinanoia; te kimwareirei ni karaoan ae riai ibukim ao ibukiu n okira te mweenga—n itiaki ao n tau—ni maeka ma ara Karo i Karawa ao ara utu.

Ngkana ti katurua ara iango iaon te kimwareirei are e na roko nakoira, ke nakoia koraki ake ti tangiriia, tera ti kona n teimatoa ngkai n taraan rootakira, maraki, kakamaaku, inanonano, ke ae taraa ni kaangaanga?

Temanna te karo n arona n tamnei ae tuai eti e katurua te iango iaon kukurein te itiaki ao n tarakina ao n tau iroun te Uea—te kimwareirei man kainaomataana man te bure ao te maama—ao te kimwareirei ni karekea raun te iango. Katuruan te iango anne e ninikoria ni ukora te kabwarabure nakon buuna ao te bitiobi n taekan ana kaangaanga ma tamnei aika buakaka ao te wenenibure are e riki imwin karaoana. Ngkai teuaei e karaoi bwaai ni kabane are maroroakinna ana bitiobi mangaia ni kataia ma nanona ni kabane ni kaoka aron te onimakinaki iroun buuna ae tangiraki.

Te ataeinaine e katurua ana iango iaon te kimwareirei n tiku ni itiaki man te wenenibure, buokana n teimatoa man aia kaenaena raoraona, ngke e nakonako ni kararoa man kinaakin ao karioan te wenenibure, ma te tamnei e kakamaaku, arona.

Temwaane are aki toki ni kakea bonganan buna ao ni karaoia bwa anuana n un n takarua nakoia natina, e katurua te iango iaon te kimwareirei n riki n tau ni karekea te Tamnei ae Raoiroi n reitinako n raonna. Katuruan te iango n ungannano anne ni kanakoa te aro n aomata,¹⁸ n aron are e tia ni kakaraoia n toua mwina, ao ni karaoa kainnanoan te bitaki.

N te tai ae aki man nako raoraou ni mwakuri e tuangai taekan uabwi te ririki n nako ni mwanangaia ae rawawata. E taku, “I reiakina te rawawata ma te kimwareirei. Rawawatau e bua inanon kimwareirein Kristo.”¹⁹

Tera are ngai ao ngkoe ti kona n rinanona n teimatoa, ngkana ti katurua iangoan te kimwareirei are e “kamenaki i mwaira?²⁰ Tera te rairannano ngkanne are e na riai? Tera mamaarara ae na riki bwa te korakora?²¹ Tera kamarakakira n riki bwa te kakabwaia? ²² Tera te aki kukurei, riki taai ni karawawata, are a na bitaki nakon ara tamaroa?²³ Ao tera kakaewenako n te mwakuri nakon te Uea ae ti na kona n anga?²⁴

Ngkana ti mwakuri korakora ni katurua te iango iaon te Tia Kamaiu ao ngkanne n tou mwiin ana baaten n katurua iangoan te kimwareirei, ti kainnanoia ni kararoai bwaai ake a na uruana kukureira. Uringa Korioa, te ante-Kristo? E taekin aika mwaiti kairuan taekan te Tia Kamaiu, Korioa e nakon te tabo teuana ma teuana ni karokoa e a uotaki nako mataia ibonga aika rietaata n titirakinna: “E aera ngkai ko mwamwananga ni kabwaouai ana kawai te Uea? E aera ngkai ko reireinia te botanaomata aio bwa a na kaakea te Kristo, bwa ko na urua kukureia?”²⁵

Bwaai ni kabane are a na kauntaba Kristo ke Ana reirei a na uruana kimwareireira. Anne n ikotaki ma kanoan aia iango aomata, ngaia mwaitiia n onrain ao ni koreaki taekaia inanon koroboki, are e bon karaoia ni koaua Korioa.²⁶

Ngkana ti taraa te aonaaba ao n tou mwiin are e taekinna n te aro bwa ti na karekea te kukurei,²⁷ ti na aki ataa te kimwareirei. Taan aki karaoa te etieti a na taneiai ni karekea mwaitin te namakin n rabwata ao aia iango, ma a aki karekea te taneiai n te kimwareirei!²⁸ Te kimwareirei bon te bwai n tangiira ibukin te kakaonimaki.²⁹ Bon te bwai n tangira are e roko mai nanom ni raoi ni kataia ni maiuna te etieti, are e reireiaki mairoun Iesu Kristo.³⁰

E reireiniira bwa ti na kanga ni karekea te kimwareirei. Ngkana ti rinea Tamara i Karawa bwa Atuara³¹ ao ngkana ti kona n namakina ana Mwakuri ni Kamaiu te Tia Kamaiu ni mwakuri inanon maiura, ti na kaonaki ma te kimwareirei.³² Ni katoa tai are ti tararuaia buura ao ni kamanoia ara ataei, ni katoa tai ti kabwara ana bure temanna ke ni bubuti kabwaraan te bure, ti kona n namakina te kimwareirei.

Ni katoa bong ngkoe ao ngai ti na rinea maiuakinan ana tua te tiretio, ni katoa bong are ti kawakin ara berita aika tabu ao ni buokiia tabeman ni karaoa ae ti te arona, te kimwareirei bon ara bwai.

Mwannanoan ana taeka te tia korea te Areru: “I kaki Iehova I matau n aki toki: ibukina e bon mena I angataiu, N na aki mwemwe … I [Rouna] e kimwareirei nanou.”³³ Ngkai te reirei e nim inanora, n tatabemaniira nako ao ni katoa bong a kona n riki bong ni kimwareirei ao ni kukurei.³⁴ Ngaia ae I kakoaua n aran Iesu Kristo ae tabu, amen.