Lan̄lōn̄ im Mour ilo Jetōb
N̄e mour ko ad rej pedped wōt ilo Jisōs Kraist im gospel eo An, jemaron̄ en̄jake m̧ōņōņō jekdo̧o̧n ta eo ej waļo̧k—ak ejjab waļo̧k—ilo mour ko ad.
Ro jeiū im jatū rejitenbōro, rainin ikōņaan kōnono kōn juon pedped in katak eo me ej ki n̄an mour in jetōb ko ad. Ej juon pedped in katak eo me enaaj ļapļo̧k an aorōk ilo an inepata im būrom̧ōj ļapļo̧k ipeļaakid.
En̄in ej raan ko āliktata, kōn menin en ejjeļo̧k iaad ej ilbōk n̄e jej lo an kanaan ko kūrm̧ool. Elōn̄ rikanaan ro, ekoba Aiseia, Paul, Nipai, im Mormon, raar lo bwe iien ko reppen renaaj waļo̧ktok,1 bwe ilo tōrein ad aolepen laļ enaaj limotak,2 bwe armej ro renaaj “yokwe er make, … im ro re jab yokwe ro nukier, … rej yokwe men in kabun̄būrueir eḷap jān aer yokwe Anij,”3 im bwe kwōn maron̄ jo̧o̧r jān pā ko pein ro rikarejeran Setan im rej juraake jerbal eo an.4 Ilo m̧ool, kejro ej “tariņae … ippān ro irooj in marok i laḷ, [im] ippān jaran jetōb re nana ijo ko i lan̄.”5
Ilo an ļapļo̧k aitwerōk kōtaan laļ ko, ilo an rikōm̧m̧an jorrāān ro repuwal m̧an ro ejjeļo̧k ruweer, im an ļapļo̧k jerbal tōtoonon ilo aolep jikin jān pejnej n̄an kien ijoko jabdewōt, ta emaron̄ jipan̄ kōj? Ta emaron̄ jipan̄ kōj kajjojo kōn apan̄ ko ad make im idajon̄jon̄ ilo jokin mour ilo raan kein āliktata?
Rikanaan Liai eaar kwaļo̧k juon pedped in katak kōn mour ilo jetōb. Juon, ļōmņak kōn jekjek ko an: Kar būkweļo̧k e bwe en jab kwaļo̧k m̧ool eo ilo Jerusalem im kar jiron̄ jen Irooj n̄an likūt aorōk ko an im etal ippān baam̧le eo an ļo̧k n̄an āne jem̧aden. Eaar jokwe ilo juon im̧ōn em̧ nuknuk im kar mour kōn jabdewōt m̧ōn̄ā emaron̄ loi ilo iaļ eo an n̄an ijo jab jeļā kake, im eaar lale an ļōm̧aro ruo nejin, Leman im Lemuel, elootane katak ko an Irooj im jum̧aik ļaddik ro jatier Nipai im Sam.
Ealikkar, Liai eaar jeļa jum̧ae, nana tam̧m̧win, rub bōro̧, metak, inepata im būrom̧ōj renaaj kar waļo̧k. Jekdo̧o̧n ak eaar peran in kwaļo̧k ilo peran ilo ejjeļo̧k āliklik juon katak kar kwaļo̧k jen Irooj: “Armej ren, bwe ren maron̄ m̧ōņōņō.”6 Antoone! Jen aolep naan ko emaron̄ kar kōjerbali n̄an kōmeļeļeik piktokin im jibadbad ilo mour ko ad ilo mour in, eaar kālet naan in lan̄lōn̄!
Mour in eobrak kōn elōn̄ men ko, mālijjon̄ ko im apan̄ ko an men otemjeļo̧k. Elōn̄ iien kōj kajjojo jej liaajlo̧l, en̄taan, im ebbweer enan̄in joon tok kōj. Ak jej pād ijin n̄an bōk m̧ōņōņō?
“Aaet! Uwaak eo ej aaet! Ak ekōjkan an maron̄? Im ta eo jej aikuj kōm̧m̧ane n̄an bōk m̧ōņōņō eo me Jemedwōj Ilan̄ eaar kōpooje n̄an kōj?
Eliza R. Snow, Būreejtōn eo Eutiej an Doulul eo an Kōrā kein karuo, eaar letok uwaak in. Kōn men eo eaar waļo̧k ilo Missouri, kar waļo̧k ilo juon iien m̧ōļo̧ ilo 1838,7 e im jet Armej ro Rekwojarjar kar kipel er n̄an diwōjļo̧k jen bukwōn eo ilo iien m̧ōļo̧ eo. Juon jota, baam̧le eo an Eliza raar jokwe juon bon̄ ilo juon em̧ edik kar kōjerbale jen rijipokwe ro Rekwojarjar. Enan̄in aolepen kōk ko kōtaan aļaļ kien kar bōki im tile n̄an kein kattil jen ro raar itok mo̧kta, kōn menin eaar wōr ettal kōtaan aļaļ ko jon̄an juon kuuj emaron̄ deļo̧n̄. Eaar lukkuun m̧ōļo̧, im m̧ōn̄ā ko kijeer raar lukkuun kwōj.
Bon̄on eo jet 80 armej raar koboob ilowaan m̧wiin edik , 20 nee aetokan (6.1 meta jikuae). Elōn̄ raar jijet ak jutak aolepen bon̄on eo n̄an bōk māņeen. Itunam̧ōj, juon kurup in em̧m̧aan ro raar kūk ippān doon iturin kijeek eo, ilo aer al al in jar ko im jet rej kōmat piteto. Eliza eaar ba: “Ejjeļo̧k elotaan eaar waļo̧k—aolep raar m̧ōņōņō, im ekajet jān wāween an armej kalimjek eok, ruwamejet ro ren kar bōk kōm̧ n̄an tūrāap eo ekam̧ōņōņō ijeļo̧kin jar eo me em̧oj an rikien kōm̧akut er.”
Eliza eaar kwaļo̧k en̄taan eo, m̧ōļo̧ ilo bon̄on eo eaar lukkuun nana. Eaar ba: “Eaar juon joteen eo ekam̧ōņōņō. Ejjeļo̧k ak ro rekwojarjar rej m̧ōņōņō ium̧win jabdewōt jekjek.”8
En̄in men eo! Ejjeļo̧k ak ro rekwojarjar rej m̧ōņōņō ium̧win jabdewōt jekjek. Jemaron̄ en̄jake m̧ōņōņō men̄e enanan raan eo, enana wiik eo, ak bōlen enana iiō eo!
Ro jeiū im jatū, m̧ōn̄ōņō eo jej en̄jake edik jetņakin ilo wāween mour ko ad im aolep men otemjej jej kōm̧m̧ani kōn mije mour ko ad.
N̄e mour ko ad ilo karōk in lo̧mo̧o̧r eo an Anij, me Būreejtōn Thomas S. Monson ej kab mōj an kwaļo̧ke n̄an kōj, im Jisōs Kraist im gospel eo An, jemaron̄ en̄jake m̧ōņōņō jekdo̧o̧n ta eo ej waļo̧k—ak ejjab waļo̧k—ilo mour ko ad. Mōņōņō ej itok jān im kōn E. E ej unjen aolep m̧ōņōņō Jej en̄jake ilo iien Kūrijm̧ōj ilo ad al, “Joy to the world, the Lord is come.”9 Im jemaron̄ en̄jake aolepen iiō in. N̄an Armej ro Rekwojarjar, Jisōs Kraist ej m̧ōņōņō!
En̄in ej unin an mijinede ro ad likūt kapijuknen ko aer n̄an kwaļo̧k gospel eo An. Kōttōbar in ejjab n̄an kōļapļo̧k oraņ ro uwaan Kabun̄ in. Ijoke, mijinede ro ad rej kwaļo̧k im peptaij10 n̄an bōktok m̧ōņōņō n̄an armej ro ilo laļin!11
Āinwōt an Rilo̧mo̧o̧r eo letok aenōm̧m̧an “eḷḷā jān jeḷā otemjej,”12 Ej barāinwōt letok kajoor, ājmour, im menwar kōn m̧ōņōņō eo epen kōmeļeļeki. N̄an waanjon̄ok, koban en̄jake m̧ōņōņō n̄e ajri eo nejūm̧ ej nan̄inmej, ak n̄e ejako jerbal eo am̧, ak n̄e lieo ak ļeo ippam̧ ej kaarmejete eok. Aaet en̄in ej m̧ōņōņō eo Rilo̧mo̧o̧r eo ej letok. Mōņōņō eo An em̧ool, ekōm̧m̧an bwe “en̄taan kein renaaj n̄an jidik wōt iien”13 im Enaaj ukōti en̄taan ko ad n̄an ļapļo̧k. 14
Innām, elemen, ad maron̄ bōk m̧ōņōņō in? Jemaron̄ jino “reiļo̧k n̄an Jisōs, Ri tōl im Ri koweeppān tōmak eo ad”15 “ilo ļōmņak otemjej.”16Jemaron̄ leļo̧k kam̧m̧oolol ko n̄an E ilo jar ko ad im ilo ad pokake buje ko jaar kōm̧m̧ani Ippān im Jemedwōj Ilan̄. Ilo an Rilo̧mo̧o̧r eo jino lukkuun alikar tok n̄an kōj im jej akweļap kōn m̧ōņōņō eo An bwe e letok n̄an kōj, m̧ōņōņō eo ad enaaj ļapļo̧k.
Mōņōņō ekajoor, n̄an mije wōt m̧ōņōņō in ebōktok kajoor eo an Anij n̄an mour ko ad. Bwe ilo aolep men otemjeļo̧k, Jisōs Kraist ej riwaanjon̄ok eo ad eļap “kōn lan̄lōn̄ eṃōj likūt e iṃaan, Ear en̄taan ilo debwāāl,.”17 Ļōmņak kake! Bwe En maron̄ dipuk en̄taan eo ioon laļ in, ad Rilo̧mo̧o̧r eaar mije wōt m̧ōņōņō!
Im ta m̧ōņōņō eo em̧ōj likūt E im̧aan? Ilo m̧ool ekoba m̧ōņōņō eo erreeo, emour, n̄an kōkajoorļo̧k kōj; m̧ōņōņō eo n̄an kōļļāik wōnāān jerawiwi ko an aolep ro renaaj ukweļo̧k; m̧ōņōņō eo ekōm̧m̧an bwe kejro en jepļaakļo̧k n̄an kapijuknen ilo—karbab im erreeo—n̄an mour ippān jined im jemed ilan̄ im baam̧le ko.
Eļan̄n̄e jenaaj mije wōt m̧ōņōņō eo enaaj waļo̧k n̄an kōj, ak n̄an ro jej iakwe, ta eo jemaron̄ dipuki kiiō me emaron̄ kainepata, kōmetak, kamijak, jab jejjet, ak bōlen jab jerbal?
Juon baba ilo juon jetōbin jekjek eo ekauwōtata kar mije m̧ōņōņō eo ālkin eaar erreeo im jim̧we im̧aan Irooj—m̧ōņōņō eo ilo an erreeo jān jerawiwi im jook—im m̧ōņōņō eo bōke kōn aenōm̧m̧an ilo ļōmņak. Mije in eaar leļo̧k n̄an e peran im jibadbad n̄an dipuki men me epen: kar lukkkuun kwaļo̧k n̄an kōrā eo ippān im bisop eo kōn jorrāān eo an kōn pija nana im an jab erreeo. Kiiō em̧ōj an dipuki aolep men otemejļo̧k ippān bisop eo an kōn kapilōk ko n̄an kōm̧m̧ani kōn aolepen būruween n̄an bar bōk leke ippān kōrā eo.
Juon jiron̄ eaar mije wōt erreeo eo an, n̄an jipan̄ e dipuk kajirere ko an ro m̧ōttan, ilo an etal jen m̧ōm ko an kanniōk, ak jekjek ko renana an mour in jetōb.
Juon em̧m̧aan eo eaar kōjekdo̧o̧n kōrā eo ippān im kijon̄ illu ippān ajri ro nejin, kiiō ej mije wōt m̧ōņōņō n̄an erreeo n̄an bōk Jetōb Kwojarjar āinwōt m̧ōttan. Mije in eaar lōn̄aj e bwe en joļo̧k piktokin armej,18 eo emakijkij an waļo̧k, im aikuj kōm̧m̧an oktak.
Juon m̧ōtta eaar jiron̄ eō kōn idajon̄jon̄ ko an m̧oktaļo̧k. Eaar ba, “Iaar jeļā bwe in en̄taan kōn m̧ōņōņō. En̄taan eo aō eaar jako ļo̧k kōn m̧ōņōņō ilo Kraist.”19
Ta eo kejro maron̄ dipuki, ilo ad mije wōt m̧ōņōņō eo “em̧ōj likūti im̧aad”?20 Innām ta ukweļo̧k eo enaaj pidodo? Ta m̧ōjņo̧ eo enaaj erom̧ kajoor? 21 Ta erreeo eo enaaj erom̧ juon jeram̧m̧an?22 Ta inepata ko, aaet būrom̧ōj ko, enaaj oktak n̄an em̧m̧an eo ad?23 Im ta jerbal in jipan̄ eo epen Irooj enaaj maron̄ in letok?24
Ilo add mije wōt Rilo̧mo̧o̧r eo innām ļoor jon̄ok eo An n̄an mije m̧ōņōņō, jej aikuj in juļo̧k men ko renaaj kakkure m̧ōņōņō eo ad. Keememej Korihor, rijum̧ae Kraist eo? Eaar ba jabdewōt riab ko ņae Rilo̧mo̧o̧r, Korihor eaar etal jen jikin n̄an jikin m̧ae kar bōktok e im̧aan pris ro routiej ro raar kajjjitōk ippān: “Etke kwōj ilo̧k im kaankeke iaļ ko an Irooj? Etke kwōj katakin armej rein bwe enaaj jamin wōr Kraist, n̄an kabbōjrak aer m̧ōņōņō?”25
Jabdewōt men eo ej jum̧ae Kraist ak katak eo An enaaj kabbōjrak m̧ōņōņō eo ad. Ekoba jeļāļo̧kjeņ an armej, ekoba online im ilo blogosphere, me ejjeļo̧k oktak jen ta eo Korihor eaa kōm̧m̧nae.26
Eļan̄n̄e jenaaj kalimjōk laļin im ļoor jon̄ok eo an kōn m̧ōņōņō,27 jejamin jeļā m̧ōņōņō. Ro rejjab mour jim̧we remaron̄ en̄jake elōn̄ en̄jake ko im kaliomo ko, ak, reban en̄jake m̧ōņōņō!28 Mōņōņō ej juon menin letok n̄an ro rej tōmak.29 Ej juon menin letok ej itok jen ilo ad kajieon̄ mour jim̧we, āinwōt an Jisōs Kraist kar kwaļo̧k.30
Eaar katakin kōj elemen ad bōk m̧ōņōņō. N̄e jej kālet Jemedwōj Ilan̄ bwe en ad Anij31 im n̄e jemaron̄ en̄jake Pinmuur eo an Rilo̧mo̧o̧r jerbal ilo mour ko ad, jenaaj obrak kōn m̧ōņōņō. 32 Aolep iien jen kam̧ōņōņōik lim̧aro ak ļōm̧aeo pāleer im tōl ajri ro nejid, aolep iien jen jeo̧rļo̧k an doon bōd ak jeo̧rļo̧k aer bōd, jemaron̄ en̄jake m̧ōņōņō.
Aolep raan bwe kejro en kālet n̄an mour kake kien ko an celestial, aolep raan bwe jen kōjparok bujen ko ad im jipan̄ ro jet n̄an kōm̧m̧an āindein, m̧ōņōņō eo enaaj ad.
Ron̄jake Sam kein: “Iar likūt Jeova iṃaō iien otemjej; kōn An pād i anmooṇū I jāmin ṃakūtkūt. … Im lan̄lōn̄ indeeo enaaj [An]” 33 Ilo an katak in eddōk lo būruwōd, kajjojo raan emaron̄ raan in m̧ōņōņō im laudin̄din̄.34Āindein Ij kam̧ool ilo āt eo ekwojarjar etan Jisōs Kraist, amen.