Anij Enaaj Kōm̧ōrāik Aolep Dānnin Kōmjaalal

Āinwōt m̧ōttan wōt karōk eo an Jemedwōj Ilan̄, Ekar kōtļo̧k bwe būrom̧ōj en maron̄ deļo̧n̄ tok ilo en̄jake ko ad ilo mour in.¹ Ilo tōre in me kōj kajjojo eoktak jon̄an metak in mālijjon̄ ko jej iooni, jemaron̄ jeļā jon̄an juon ak bar juon, kōj aolep rej en̄taan im kakkōt. Ej jar eo aō in bwe Jetōb Kwojarjar en tōl kōj n̄an juon meļeļe eo eļapļo̧k kōn etke menin aikuj āindein.

N̄e jej lo en̄jake ko reppen ilo mour an mour in jān mejān tōmak eo ad ilo Kraist, jemaron̄ barāinwōt lo bwe ewōr juon jibadbad an Anij ilo ad en̄taan. Juon eo etiljek emaron̄ en̄jake m̧ool ko an kōkapilōklōk in an Pita. Ekar je, “A eļan̄n̄e kom̧ en̄taan kwōjarjar kōn n̄a, kom̧ m̧ōņōņō wōt.”² Ilo ad kōjerbal “būruōmi n̄an meļeļe,”³ jemaron̄ ļapļo̧k jim̧or ilo maron̄ eo ad n̄an kijenmeji mālijjon̄ ko ad im ekkatak jeni—im em̧m̧anļo̧k jān—er. Kain melele rot in ej bōktok juon uwaak n̄an kajjitōk ko etto an pād ibūrwōd “Etke men ko renana rej waļo̧k n̄an armej ro rem̧m̧an?”

Aolep ro rej ron̄jake rainin ej pād ippāer jet wāween ajimakeke ko, ebbweer, limō, ak būrom̧ōj. Ilo an ejjeļo̧k “mejān tōmak”⁴ im meļeļe kōn m̧ool eo ejjeļo̧k jem̧ļo̧kin, jojoļāār im en̄taan ekkā aer waļo̧k ippād ilo mour in kōm̧m̧an bwen jab alikkar m̧ool ko ejjeļo̧k jem̧ļo̧kin bwe karōk eo eļap an Jemed Ilan̄ em̧ool ej juon karōk in m̧ōņōņō ejjeļo̧k jem̧ļo̧kin. Ejjeļo̧k bar juon wāween n̄an bōk tarlepin lan̄lōn̄ in.⁵

Anij ej karuwaineneik kōj n̄an uwaak ilo tōmak n̄an en̄taan ko ad make bwe jen maron̄ totaki kōjeram̧m̧an ko im bōk jeļāļo̧kjeņ eo me jejjab maron̄ ekkatak ilo bar juon wāween. Jej ekkatak n̄an kōjparok kien ko ilo aolep jekjek im kōjkan, bwe “im eo ej kijenmej ilo en̄taan, wōņāān eo n̄an ejja in wōt eļapļo̧k ilo aelōn̄ in lan̄.”⁶ Im ilo ad riit ilo jeje ko kwojarjar, “Eļan̄n̄e kwo būrom̧ōj, kūr ioon Irooj am Anij kōn owar, bwe jetōb eo am en maron̄ lem̧ōņōņō.”⁷

Rijilōk Paul, e make ekar jab ruwamaijet ilo en̄taan eo eļap, ekar kōjerbale en̄jake eo an make n̄an katakin m̧wilaļ im aiboojoj in jibadbad indeeo ej itok n̄e jej niknik im kijenmej. Ekar ba, “Bwe am en̄taan eo e mera im jidik wōt an pād, eļap otem ļap an jerbale n̄an kōm aiboojoj e kanooj em̧m̧anļo̧k im indeeo.”⁸ Ilo bar juon wāween, jemaron̄ jeļā ilubwilijin en̄taan ko ad bwe Anij ekar letok juon jineekjej eo ejjeļo̧k jem̧ļo̧k.

Maron̄ eo an Paul n̄an kōnono kōn mālijjon̄ ko, kakkure ko, im būrom̧ōj ko an mour in an āinwōt “en̄taan ko remera” ļōmņak ko rebōd kōn lukkuun ta eo ekar en̄taan kake, eo ekar oranļo̧k kōn jibadbad eo ejjeļo̧k jem̧ļo̧kin an gospel eo. Tōmak eo an Paul ilo Jisōs Kraist ekōm̧m̧an bwe jen maron̄ ineek men otemjej. Ļalem kōttan aer den̄ļo̧ke; jilu alen den̄ļo̧ke kōn alal; juon alen kade; jilu alen aer rube wa eaar uwe ioon; ikutkut aō uwōta kōn mej, rikowadon̄, im jemjein jemjaten riab; eaar mōk im metak, kwōle im maro, im kar kalbuuj ilo pio im keelwaan.⁹

Elōn̄ wōt iaad rekar akweļap ippān Anij n̄an kōm̧akūt wāween in jān ad en̄taan, im n̄e kōmour eo ad jej pukōte ejjab waļo̧k, jekar ioon jelm̧ae mālijjon̄ n̄an ļōm̧ņak bwe Ejjab ron̄jake. Ij kam̧ool bwe, men̄e ilo iien ko, E ej ron̄jake jar ko ad, ewōr juon un bwe Ej kōtļo̧k en̄taan ko ad bwe ren wōnm̧aanļo̧k,¹⁰ im enaaj jipan̄ er kotaki.¹¹

Ilo juon elmakot im ennaan, Paul ej jiron̄ kōj kōn juon “kalōklōk” ilo kanniōk eo jejaje kake, eo ekar kōm̧m̧an bwen ļap an en̄taan im kōm̧m̧an bwe en bukwelōlō jilu kōttan, akweļap n̄an Irooj bwen bōk e. Ilo uwaak n̄an jar ko an Paul, Irooj ekar jab kōm̧m̧akūt kalōklōk eo ak Ekar kōnono aenōm̧m̧an im leļo̧k meļeļe n̄an būruwōn, ba, “Aō jouj e bwe n̄an eok, bwe Aō kajoor e weepānļo̧k ilo m̧ōjņo̧.” Kōn meļeļe in ekāāl, Paul ekar maron̄ errā im kam̧ m̧oolol kōn kalōklōk eo ekar bōke. Ekar ba, “Innām inaaj kanooj … m̧ōņōņō in kōmmejāje, bwe kajoor an Anij en pād ioō.”¹²

Ilo ad bōk maron̄ in ejejjet ej kōmaron̄ ad kijenmej wōt ilo mour ko ad, kabūrom̧ōjm̧ōj ko im metak ko an mour rej oktak im pidodo n̄an kōj,¹³ im jej jino kile im aaet leļo̧k kam̧m̧oolol kōn en̄jake ko Anij ej litok n̄an kōj n̄an katakin kōj kijenmej ilo iaļ in n̄an mour indeeo.

N̄e jej loe ad make jerbal kōn mālijjon̄, emaron̄ pen kile mālijjon̄ ko ad āinwōt kōkkaļļe ko jej ļoor iaļ eo ejim̧we ilo mālijjon̄ ko ad make āinwōt rikaļoor ro. Bōtaab, men̄e jej lo kōj make ilo iien ad lukkuun en̄jake ad ebbweer ak lukkuun m̧ōņōņō, emaron̄ erom juon kōjeraam̧m̧an.

Ilo kar juon aō ijjitōn̄ n̄an kweilo̧k eo eļap an stake ilo Philippines, būruwō ekar rub ke ikar jeļā kōn juon men ekabūrom̧ōjm̧ōj n̄an Brother Daniel H. Apilado. Brother Apilado im kōrā eo pāleen raar peptaij ilo 1974. Rekar nōbar jepļaaktok eo an gospel eo im kar liāp ilo tampeļ eo. Ālkin, aer kar jeraam̧m̧an kōn ļalem ajri ro raiboojoj. Ilo Juļae 7, 1997, tōre in Brother Apilado ekar jerbal āinwōt stake būreejtōn eo, juon kijeek ekar jino ilo m̧weo im̧weer. Ļaddik eo erūttotata nejin Apilado ekar lo̧mo̧o̧ren jemān im kar kanōktok jān men ko rourur, innām bar ettōrļo̧k n̄an m̧weo im lo̧mo̧o̧ren ro jet. Ekar iien eo āliktata Brother Apilado ekar loe an ļaddik eo nejin mour. Armej ro rekar kwaļo̧ki tok jān kijeek eo ekar kōrā eo pāleen Brother Apilado Dominga, im kajjojo ajri ro nejin ļalem.

Mool eo bwe Brother Apilado ekar mour kōn juon mour ekar kam̧ōņōņō n̄an Anij ke kabūrom̧ōjm̧ōj in ekar waļo̧k ekar jab bōbrae kabūrom̧ōjmōj eo ak kar kōm̧m̧an an nan̄inmej jān kabūrom̧ōjm̧ōj ko rekar waļo̧k tokālik. Ak an tiljek ilo kōjparok bujen ko an im kōjerbal tōmak ilo Kraist ekar leļo̧k n̄an e kam̧ool ilo kallim̧ur eo bwe enaaj bar koba ippān kōrā eo pāleen im baam̧le eo an. Kōjatdikdik in ekar erom juon an̄kō n̄an jetōb eo an.¹⁴

Ilo iien loļo̧k eo aō, Brother Apilado, kiiō stake petriak eo, ekar kwaļo̧k kadkad in kōrā eo pāleen ekāāl, Simonette, im ļaddik ro ruon nejin, Raphael im Daniel. Em̧ool, Jisōs Kraist emaron̄ im enaaj “kūtimi ro e rup būrueir.”¹⁵

Ilo aō kwaļo̧k bwebwenato in an Brother Apilado, ij inepata bwe luuj in eļap eo an emaron̄ kōm̧m̧an bwe elōn̄ ren ļōmņak kōn būrom̧ōj im en̄taan ko aer make rejjab lukkuun aorōk ilo keidi. Jouj im jab keidi, ak kappukōt n̄an ekkatak im kōļapļo̧k maron̄ eo am̧ n̄an meļeļe im kōjerbal pedped in katak ko ejjeļo̧k jem̧ļo̧kier ilo am̧ etetal ilo upaaj in jorrāān eo am̧ make.

Eļan̄n̄e imaron̄ kōnono n̄an kom̧ kajjojo—“kom̧ otemjej rej jerbal im ban”¹⁶—in kwaļo̧k ke en̄taan ko ami make; būrom̧ōj ko ami kajjojo; ami en̄jake ajimakeke, luuji ak ebbweer; metak ko ami, en̄taan ko, im aolep kain nan̄inmej; Jemed ilo Lan̄ im Nejin rejeļā kaki aolep. Kom̧in peran! Kom̧win tōmak! Im tōmak ilo kallimūr ko an Anij.

Kōttōbar eo im mijen eo an Jisōs Kraist ekar n̄an “bōk Ioon metak ko im nan̄inmej ko an armej ro An,” n̄an “bōk Ioon m̧ōjņo̧ ko aer,” n̄an “bōk Ioon jero̧wiwi ko an armej ro An.”¹⁷

N̄an lukkuun bōk menin letok ko an Rilo̧mo̧o̧r eo ad ekar litok, kōj aolep aikuj in ekkatak bwe en̄taan ilo im jān en̄taan eo make ejjab maron̄ katakin ak letok n̄an kōj jabdewōt men raorōk m̧ae iien jej lukkuun bōk koņaad jān ekkatak jān en̄taan ko ad.

Elder Neal A. Maxwell ekar kwaļo̧k ippād ta eo ekar ekkatak kōn unleplep in en̄taan ilo naan kein:

“Wāween ko rem̧ool kōn en̄taan, lukkuun kijenmej, emaron̄ kōm̧m̧an bwe jen em̧m̧anļo̧k. …

“… Lukkuun kijenmej ekoba ad meanwōd, pād ilubwilijin en̄taan eo ad, n̄an katak jān en̄jake ko rejeleti. Ijjelo̧kin ad baj kijoone men kein, rej aikuj eļļā kōn kōj … ilo wāween ko me rej kokwojarjar e kōj.”¹⁸

Ikar lale ilo mour im waanjon̄ak ko an ro jet me rej kajoor im pād wōt ilo tōmak ilo Jisōs Kraist im kallim̧ur ko An ej kōpooji kōjatdikdik eo em̧ool kōn men ko rem̧m̧anļo̧k rej itok. Kōjatdikdik eo em̧ool ej kapen kōj, ej bōktok maron̄ im kajoor eo jaikuji n̄an ad kijenmej.¹⁹ N̄e jej kobaik en̄taan ko ad n̄an juon kallim̧ur em̧ool kōn jibadbad in mour in ad ioon laļ in im eļaptata n̄an jineekjej eo ej kōttare kōj ilo jikin ko rekwojarjar ilan̄, tōmak eo ad ilo Kraist ej ļapļo̧k im jej bōk aenōm̧m̧an n̄an jetōb ko ad.

Innām jemaron̄ lo meram eo ilo jem̧ļo̧kin juon tanōļ. Elder Jeffrey R. Holland ekar katakin: “Em̧ool ej meram ilo jem̧ļo̧kin tanōļ eo. Ej Meram eo an Laļ in, Iju in Raan im Emeram, “meram eo ejjeļo̧k jem̧ļo̧kin, eo me ejjāmin marok’ [Mosaia 16:9]. Ej Anij ļapļap an Anij Emake.”²⁰

Jemaron̄ bōk kajoor ilo ad jeļā bwe aolep en̄jake ko reppen ilo mour in rej an jidik wōt iien; aaet maroklep ko ilo bon̄ ko rej oktak n̄an joraanlo̧k ko kōn tiljek.

N̄e men otemjej rej dedeļo̧k im n̄e jekar kijenmej e men otemjej kōn tōmak ilo Jisōs Kraist, kar kallim̧uri kōj bwe “Anij enaaj kōm̧ōrāik [dānnin] kōmjaaļaļ otemjej [jān] mejeir.”²¹

Ij kam̧ool bwe Anij Jemād im Nejin, Jisōs Kraist, rej mour im bwe Er rej rikōjparok kallim̧ur ko. Ij kam̧ool bwe Rilo̧mo̧o̧r eo ej karuwaineneik kōj aolep n̄an itok im bōk m̧ōttan Pinmuur eo An. Ilo ad kōjerbale tōmak eo ad ilo E, Enaaj kotak kōj im ineek kōj jān aolep mālijjon̄ ko ad, eļaptata, lo̧mo̧o̧ren kōj ilo laļ an aiboojoj eo an al. Imaron̄ ke karuwaineneik kom̧ n̄an itok n̄an Kraist, kijenmej ilo tōmak, im jino wāppen ilo E, im bōk lan̄lōn̄ eo ewāppen ilo E. Ilo āt eo ekwojarjar etan Jisōs Kraist, amen.