Jerkak ilo Kajoor, Sister ro ilo Zaion
N̄an rikōjparok bujen ro emōj aer oktak ilo m̧ool, jej aikuj ekkatak katak ko raorōk an gospel in im wōr ippād naan in kam̧ool epen kōn m̧ool ko an katak kein.
Eļap aō m̧ōņōņō in kobatok ilo Conference Center in ippān leddik rein, jiron̄ rein, im kōrā rein ilo Kabun̄ in. Jej barāinwōt jeļā ke elōn̄ taujin kurup in sister ro rej bar koba ippān doon ipeļaakin laļ in im alooje kadiwōjļo̧k kein imejatoto, im eļap aō mōnōnō kōn iien in im kein jerbal kein rekōm̧m̧an bwe jen ippān doon ilo juon wōt bōro im kam̧ool jotenin.
Ilo Oktoba 2006, Būreejtōn Gordon B. Hinckley eaar kwaļo̧k juon enaan ņa etan “Jerkak, Em̧m̧aan ro an Anij,” kar etōņake jān juon Al kar je ilo 1911.1 Ekar juon kūr n̄an em̧m̧aan ro ilo Kabun̄ in bwe ren jerkak im kōm̧m̧ane ijoko koņaer. Enaan in eaar jiktok ilo kōlmenļo̧kjeņ e aō ke iaar jar bwe in jeļā ta eo in kwaļo̧k n̄an kom̧.
Sister raņ, jej mour ilo juon “tōre eo enana.”2 Jekjek ko raan kein ad rejjab jet men ko jej kab loi im rekāāl n̄an kōj. Rekar kanaan wōt kaki jān etto āinwōt juon kakkōl im naan in kōketak bwe jen maron̄ maanjabpopo. Ilo 8th jepta in Mormon ej letok kōmeļeļe ko me rekamijak im rem̧ool kōn men ko renaaj waļo̧k raan kein ad. Ilo jepta in, Moronai ej ba ej jeje āinwōt n̄e ej lo raan kein, im ekitbuuj tariņae im ennaan in tariņae ko, menin kattoonon ko, uror ko, ko̧o̧t, im armej ro rej kwaļo̧k ke ejjeļo̧k jim̧we im bōd im̧aan mejān Anij. Ej kōmeleļeik armej rōt en obrak kōn utiej bōro, lokjak kōn nuknuk ko reļļap onaer, im ro rej kōm̧m̧an kōjak kōn kabun̄. Ej kwaļo̧k kōn armej ro robrak kōn men ko an laļ in me rej kajekdoon “ro riaikuj, im keelwan, im rinan̄inmej im en̄taan”3 im jab kile er.
Moronai ej kajjitōkin kōn mour in jetōb ko ad—kōj ro me jej mour ilo raan kein. Ej ba, “Etke kom̧ij jook n̄an bōki ioomi āt eo etan Kraist?”4 Naan in em̧ool im mālij ilo an kōmeļeļeik an ļapļo̧k nana ko an laļ in.
Josep Smith—Matu ej kwaļo̧k bwe ilo raan ko āliktata aeet barāinwōt ro “rej kar kāālet er ekkar n̄an bujen”5 naaj m̧oņe er. Rikōjparok bujen ro ekoba leddik ro, jiron̄ ro, im sister ro ilo Kabun̄ in ro emōj aer peptaij im kōm̧m̧ani bujen ko ippān Jemeier Ilan̄. Aaet kōj aolep jej pād ilo kauwōtata kōn m̧oņ ko an katak ko reriab.
Sister raņ, ijjab tōmak jekjek kein rej etal wōt n̄an aer bōjrak, rej wōnm̧aanļo̧k wōt. Eļan̄n̄e men ko rej waļo̧k kiiō rej jet kōkaļļe ko, jej aikuj kōpooj kōj n̄an jelm̧ae men ko renana renaaj waļo̧k im̧aan. Elukkuun pidodo ad ebweer, ak āinwōt jet armej in bujen, jejjab aikuj ebweer. Āinwōt an Elder Gary E. Stevenson kar ba, “Jemedwōj Ilan̄ ejouj an kōļļā wōņāān ad mour ilo tōre kein renana ilo wāween an kōjepļaaktok tarlep in gospel eo.”6 Eļap aō bōk kainem̧m̧an jān enaan in.
Būreejtōn Russell M. Nelson ekar jiron̄ kōj juon iiō em̧ootļo̧k: “Men ko rej itok n̄an kakkure Kabun̄ in, katak ko ie, im wāween ad mour reļļapļo̧k. Kōn wōt men in, jeaikuj kōrā ro remaron̄ dim ilo meļeļe kōn katak ko an Kraist im eo enaaj kōjerbal mel̗el̗e kein n̄an katakin jipan̄ kajiririk m̗aantak epepen in armej ro me remaron̄ anjo̗ ioon jerawiwi. Jaikuj kōrā ro me remaron̄ jel̗ā kōn aid ko me rej waļo̧k ilo elōn̄ kain jōkjōk ko. Jaikuji kōrā ro me rejel̗ā wāween tōpar kajoor eo me Anij ej kōpooj n̄an kōrā in kōjparok bujen ro im ro remaron̄ kwal̗o̗k tōmak ko aer kōn peran im iakwe em̗ool. Jeaikuji kōrā ro ewōr ippāer peran im vision āinwōt eo jined Iv.”7
Enaan in ej kalikkar n̄an eō bwe jekdoon jekjekin mour rōt raan kein, ewōr un ko jet n̄an m̧ōņōņō im kōm̧m̧an em̧m̧an. Ij tōmak kōn aolepān buruō bwe kōj sister raņ ewōr ippād kajoor eo eaorōk im tōmak eo me enaaj kōm̧m̧an bwe jen eļļā ioon apan̄ ko jej jelm̧ai ilo raan kein āliktata. Sister Sheri Dew eaar jeje, “Ij tōmak bwe tōre in jej ekkatak n̄an kwaļo̧k im̧we ko jān ad m̧ool in oktak, kōrā ro rikōjparok bujen, im bwe aelōn̄ in kiin̄ eo an Anij enaaj oktak ilo iien eo emōkajtata.”8
Enaaj bōk eļap kijejeto n̄an oktak im n̄an kōjparok bujen ko ad. N̄an kōm̧m̧ane menin, jej aikuj erom jet leddik ro im kōrā ro me rej ekkatak katak ko raorōk an gospel in im wōr ippāer naan in kam̧ool epen kōn m̧ool ko an katak kein. Ewōr jilu eria ko ij tōmak rej pedped ko n̄an kōkajoor naan in kam̧ool ko ad im bwe jen ļōmņak bwe raorōk n̄an jeļāļo̧kjeņ ko ad.
Kein kajuon, jej aikuj likūt Jemedwōj Ilan̄ im Nejin Jisōs Kraist ioļapļap tata in tōmak ko ad im ad mour in lo̧mo̧o̧r. Jisōs Kraist ej ad Rilo̧mo̧o̧r im ad Ripinmuur. Jej aikuj ekkatak im meļeļe kōn Pinmuur eo An im wāween ad mour kaki aolep raan; ukwelo̧k ej juon iaan kōjeraam̧m̧an ko reļļap bwe kōj kajjojo jen pād wōt ilo iaļ in ejim̧we. Jej aikuj kalimjōk Jisōs Kraist āinwōt juon eo jej reilo̧k n̄an e im juon waanjon̄ak n̄an erom āinwōt. Jej aikuj wōnm̧aanļo̧k wōt im katakin baam̧le ko ad im kilaaj ko kōn Karōk in Lo̧mo̧o̧r eo Eļap, eo me ekitbuuj katak ko an Kraist.
Kein Karuo, jaikuj meļeļe aorōkin jepļaaktok eo an katak ko, doulul ko, im maron̄ im kii ko ilo raan kein āliktata. Jej aikuj kam̧ool bwe Josep Smith kar juon eo ekwojarjar kālōt in anij im Irooj eaar kapit i n̄an jepļaaktok eo im jeļā ke e eaar ejaake doulul in an kōrā ro ilo Kabun̄ in me ekar ejja doulul eo mokta ilo Kabun̄ eo an Kraist etto.9
Im Kein Kajilu, jaikuj ekkatak im meļeļe kain̄i im bujen ko an tampeļ. Tampeļ eo ej juon jikin eo ioļapļap tata ilo aolepān tōmak ko rekwojarar, im Irooj ej kajjitōk bwe jen aolep deļo̧n̄e, kajekļo̧kjeņ kake, ekkatak, im pukōt meļeļe n̄an kwe make im lin̄uri. Jenaaj jino meļeļe kake itok wōt jān kain̄i ko an tampeļ, kajoor in kwojarjar ej waļo̧k ilo mour ko ad10 im kōn wōt kain̄i ko an tampeļ, jemaron̄ lo kōjparok kōn kajoor an Anij im Etan enaaj pād iood, An aiboojoj ej jepooļ e kōj, im Enjeļ ro An rej onaake kōj.11 Ij lōmņak eļan̄n̄e jej aolep leļo̧k ad n̄an kajoor in kallim̧ur kein.
Sister raņ, barāinwōt ro rediktata ilubwijiid jemaron̄ jerkak ilo tōmak im kōm̧m̧ane ijo koņaad eaorōk n̄an kalōk aelōn̄ in kiin̄ eo an Anij. Ajri rej ijjino bōk aer make naan in kam̧ool ilo aer riit ak ron̄jake jeje ko rekwojarjar, jar aolep raan, im bōk kwojkwoj eo ilo juon wāween eo eļap meļeļein. Aolep ajri im jiron̄ ro remaron̄ er ro jinointata rej bukwelōlō ilo iien an baam̧le kōm̧m̧ane nokon ko aer. Aaet eļan̄n̄e m̧weo imōm ejjab lukkuun kwojarjar, waanjon̄ak eo am̧ make ilo am̧ tiljek n̄an gospel in emaron̄ kōm̧m̧an oktak ilo mour eo an baam̧le eo am̧ im ro m̧ōttam̧.
Jiron̄ ro ilo Kabun̄ in rej aikuj kalimjōk er make āinwōt jet ro raorōk ilo aer bōk koņaer ilo jerbal in lo̧mo̧o̧r in me ej tōl jān priesthood eo im jab āinwōt rietale ak rijipan̄. Kom̧ jiron̄ raņ komij kabwijer kūr ko im emōj kapit kom̧ kaki jān ro rej kabwijer kii ko an priesthood n̄an jerbal āinwōt jet ritōl ro ewōr ippāer kajoor im maron̄ ilo jerbal in. Ilo ami kōm̧m̧ane kūr ko ami āinwōt jet būreejtōnji ilo kūlaaj ko ami im kōpooj kom̧ ilo jetōb, kapilōk doon, kwaļo̧k naan n̄an ro uwaan kilaaj eo ami, im katakin doon kōn gospel eo, kom̧ij kōm̧m̧ane ijo koņaami ilo jerbal in im kom̧ im ro m̧ōttami naaj jeraam̧m̧an.
Aolep kōrā rej aikuj kalimjōk er make āinwōt rijipan̄ ro raorōk ilo jerbal in an priesthood. Kōrā ro ilo Kabun̄ in rej būreejtōn, rikakpilōklōk, rikaki, im ro uwaan ko̧o̧njel, sister ro, im mama ro, im aelōn̄ in kiin̄ eo an Anij ejjab maron̄ wōnm̧aanļo̧k ijjeļo̧kin n̄e jej jerkak im kakūrm̧ool eddo ko ad kōn tōmak. Jet iien ej aikuj wōr ippād jeļāļo̧kjeņ eļap kōn ta eo emaron̄ tōprak.
Ij kab tin ioon juon sister in Mexico eo emeļeļe ta meļeļein an kōm̧m̧ane kūr eo an kōn tōmak. Marfissa Maldonado kar kūr n̄an katakin jabōt jikuuļ eo an jodikdik ro jilu iiō rem̧ootļo̧k. Ewōr 7 an rijikuuļ ke rej leļo̧k kūr in, ak kiiō ewōr 20 rijikuuļ ro rej pād ilo kūlaaj eo an aolep iien. Iaar kajjitōk ippān, ilo aō bwilōn̄, ta eo eaar kōm̧m̧an bwe en lōn̄ļo̧k oraer. Ej uwaak ilo ettā, “O, ekar jab kōn n̄a wōt. Aolep ro uwaan kūlaaj eo raar jipan̄.” Raar ippān doon, im raar lo etan ro eto aer jab bar jar im raar jino aer ippān doon im kūr tok er bwe ren rool tok n̄an kabun̄ in. Ekar barāinwōt wōr ro raar peptaij tok kōn wōt kijejeto ko aer.
Sister Maldonado eaar ejaake juon iaļan bōk meļeļe ak website n̄an ro uwaan kūlaaj eo an im kar ņa etan “N̄a Nejin Anij,” im eaar jeje jet en̄jake ko rekōketak im jet eoon kajjojo iien ilo juon wiik. Ej jeje n̄an rijikuuļ ro nejin im kakememej er kōn jerbal ko aer im naan in katak. Ej en̄jake ke eaorōk bwe jen kōnono n̄an doon ilo wāween ko me rekkar, im ekar lukkuun jerbal menin. Eaar ba n̄an n̄a, “Eļap aō iakwe rijikuuļ ro aō.” Iaar en̄jake iakwe eo an ke ej ba kōn kijejeto ko aer, im waanjon̄ak eo an eaar kakememej eō kōn juon eo me ewōr an tōmak im an jerbal emaron̄ lukkuun tōprak ilo jerbal kōn jipan̄ eo an Irooj.
Jodikdik ro nejid rej obrak kōn kajjitōk ko reppen aolep raan, im elōn̄ jet ewōr ro rejitōn bōro ippāer ro me epen aer lo uwaak ko n̄an kajjitōk kein. Nuuj eo em̧m̧an in ej bwe ewōr uwaak ko n̄an kajjitōk kein. Ron̄jake enaan ko jān ritōl ro ad. Emōj kakijōrjōr kōj n̄an ekkatak im meļeļe Karōk eo Ekam̧ōņōņō an Jemedwōj Ilan̄. Emōj kakememej kōj kōn katak ko ilo Naan in Kean̄ an Baam̧le.12 Emōj rōjan̄ kōj n̄an katakin im kōjerbal kein jipan̄ kein āinwōt jet kein jon̄ak n̄an dāpij kōj ilo iaļ in eaidik im eaitok.
Emaron̄ juon iiō em̧ootļo̧k, iaar loļo̧k juon mama eo ewōr jet nejin ajri jidik eo eaar kālet n̄an kōm̧m̧ane juon wāween em̧m̧an n̄an dāpij ajri ro nejin ņae elōn̄ kareel ko renana me rej iooni ilo online im ilo jikuuļ. Ej kālet juon unin kōnono kajjojo wiik, ekkā an kālet men eo enaaj bōktok elōn̄ arto artak ko ilo online, im ej jino kōn arto artak ko me eļap meļeļeir ilowaan wōt wiik en n̄e ro nejin remaron̄ kajjitōk kajjitōk ko im ej lukkuun lale bwe ren meļeļe eļaptata kōn jorrāān ko ekkā aer waļo̧k im reppen. Ej kōm̧m̧an bwe m̧weo im̧ōn en juon jikin ejokone n̄an bōk lōn̄tak kajjitōk kein im katak ko an gospel me eļap meļeļeir.
Ij inepata n̄e jej pād im mour ilo juon mejatoto in kajejtokjen bōd ko me jet iien jej aolep kajejtokjen ad katakin katak ko rejjejet. Jej likjab ilo ad katakin jiron̄ ro nejid me rej kōpopo n̄an erom juon mama me eļapļok an aorōk kōnke jejjab kōņaan kajook ro me rejjan̄in m̧are, ro me ejjan̄in wōr nejier, ak ro epen aer kōm̧m̧an kālet n̄an raan ko rej itok wōt. Ilo bar juon wāween, jemaron̄ bārainwōt likjab n̄an kwaļo̧k aorōkin jeļāļo̧kjeņ kōnke jejjab kōņaan kwaļo̧k ke enaan in eļapļo̧k an aorōk jan m̧are. Jej kōjekdoon ad kwaļo̧k ke Jemedwōj Ilan̄ ej kōmeļeļeik m̧are ikōtaan ļeo im lio kōnke jejjab kōņaan kainepataik ro me rej jab kōm̧m̧ane wāween in. Im jemaron̄ lo an jab pidodo n̄an arto artak kōn pālele eo ikōtaan kōrā n̄an kōrā im em̧m̧aan n̄an em̧m̧aan.
Ilo m̧ool, sister ro, jej aikuj kōjerbal jouj im iakwe, ak jen barāinwōt kōjerbal lōmņak ko ad im ad jeļāļo̧kjeņ kōn karōk in lo̧mo̧o̧r n̄an kwaļo̧k ilo peran im kalikar n̄e ej itok n̄an katakin ajri im jodikdik ro nejid katak ko an gospel me raorōk bwe jen meļeļe n̄an kōjebwebweik laļ in eo me jej pād ie rainin. Eļan̄n̄e jejjab katakin ajri ro nejid im jodikdik ro katak ko rem̧ool—im katakin er ilo an mālij—laļ in enaaj katakin er riab ko an Setan.
Eļap aō iakwe gospel in an Jisōs Kraist, im eban jem̧ļo̧k aō kam̧olool kōn iaļ in, kajoor in, im jipan̄ ko emōj litok n̄an eō kajjojo raan āinwōt juon leddik eo nejin Anij. Ij kam̧ool bwe Irooj eaar kōjeraam̧m̧an kōj, āinwōt jet kōrā ro rej mour ilo tōre kein reppen, kōn aolep kajoor, menin letok, im maron̄ ko remenin aikuj n̄an jipan̄ kōpooj laļ in n̄an Itok eo Kein Karuo an Irooj Jisōs Kraist. Ij jar bwe jenaaj aolep lo lukkuun aorōkid im jerkak im erom jet kōrā in tōmak im peran ro me Jemed Ilan̄ ekōņaan bwe jen erom. Ilo etan Jisōs Kraist, amen.