Mataniwiia Taan Kamarurung

Teuana moan kakukurein te tai bon te mwamwananga—n reiakinna mairouia tarira n aine n te aonaaba. Bon akea n ai aron te marurung ni mwakuri n ikotaki, ni kabongana te reitaki ni marooro, ao te reitaki ae nano ma ngkami.

Inanon karekean teuana te taneiai, te tia kariiri n te Bootaki n Aine e titiraki, “Iai riki te bwai ae e onoti ae a riai ni kabanea aia tai riki aine iai?”

I kaeka, “Eng!” ngke n aron ana taetae Beretitenti Russell M. Nelson “Te Bubuti ae Matoa nakoia Tarira” e roko n au iango. Beretitenti Nelson e reirei, “Ti kainanoia Aine aika a Matoa aia atatai iaon ana reirei Kristo”¹

Nibwaai e kabwarabwara ana reirei Kristo n te kawai aei:

“Bwa te mataroa are kam na riai n rin iai bon te rairannano ma te bwabetito inanon te ran; ao imwiina e reke kamaunan ami bure n te ai ao iroun te Tamnei ae Raoiroi. …

“Ao ngkai … I kan titirakini ngkami bwa akea riki te bwai ae kam riai ni karaoia? Taraia I taekina aio nakoimi, A mwaiti riki; bwa kam na bon aki kona n roko n te mwaneka aio n aki tauan ana taeka Kristo ma te onimaki ae matoatoa irouna, n onimakina teuare e tau are iai korakorana ni kamaiu ma te aki nanokokoraki.

“Ngaia ae kam waaki nako man teimatoa inanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane. Mangaia ae kam na waaki nako ni kaawakin ana taeka Kristo, ao n teimatoa ni karokoa te toki, ao taraia e kangai ana taeka te Tama: E na reke iroumi te maiu ae akea tokina.

“… Aio te kawai, ao akea riki te kawai teuana ke te ara are e a tia n taekinaki iaan karawa are e na kona ni kamaiuaki iai te aomata inanon uean te Atua. Ao ngkai, nooria, aio ana reirei Kristo.”²

Bukin tera ngkai ti kainanoa te atatai ae matoa iaon reirei aikai?

I aki toki ni kaitibo ma aine Aika Itiaki ni boong Aika Kaitira ake a rang kainanoa buokaia, ma aki moa rairaki nakon Teuare e kona ni karekei buoka aika akea tokiia. Aki toki n roroko ni ukora te atatai man kakaean “te auti ae bubura man mwawawa.”³

Ngkana ti karikirakea ara atatai n ana reirei Kristo, ti na waekoa ni kunea bwa ti karikirakea tamaroan riki te “te babaire ni kakukurei ae korakora.”⁴Ti kinaa naba bwa ara Tia Kamaiu, Iesu Kristo, bon oin boton te babaire.

Ngkana ti reiakinna bwa ti kanga ni kamanena ana reirei Kristo nakon aroarora n tatabemaniira, ara tangira ibukin te Tia Kamaiu rikirake. Ao ti na kinaa “anne n aki taraaki iango aika kakaokoro, ngaira ni kabane ti kainnanoi te aeka ni mwakuri ni Kamaiu anne ae akea tokina.”⁵ Ti ataia bwa bon Ngaia Aara—“te bwaa are ara Tia Kaboomwi, … aan te kateitei ni koaua, aan te kateitei, … are ngkana [ti] kateia [ti] aki kona ni bwaka.”⁶

E na kanga te reirei aio ni kakabwaiaiira ngkana ti ukora te rau ao te atatai ao ni kekeiaki n teimatoa ni kukurei inanon kaangaanga n te maiu?

N na kona taekina bwa ti na moanna, ngke Nibwaai e taku, “ma te onimaki ae matoatoa iroun [Kristo], n onimakina teuare e tau, are iai korakorana ni kamaiu.”⁷ Ara onimaki iroun Iesu Kristo e anganiira te kona n tokanikai iaon aekan nako kakaewenako.

Ni koauana, ti, aki toki ni kunea ara onimaki ni kakorakoraaki riki ao ara reitaki ma Tamara are i Karawa ao Natina n itiaki inanon te mwakuri ni kakaitara. N na tibwauai tenua katooto.

Te moan, te Tia Kamaiu, Mataniwiia Taan Kamarurung, iai te mwaaka ni biti nanora ao n anganiira kabebetean rawawatara ae matoa are a riki man oin ara bure. Ngke te Tia Kamaiu e reireina te aine n Tamaria ietan te mwanibwa, E atai ana bure neiei aika rawawata. Ngaia are, “te Uea e taraa te nano,”⁸ ao E ataia e na karekei raoi kaetieti.

Ngke e roko te aine n te mwanibwa, Iesu—e tei ibukin te ran ae maiu—e taku, “Kamai ba N na moi.” Ara Tia Kamaiu e na taetae n aron aei nakoira n te bwana ae ti kina ngkana ti nako Ina—bukina bwa E kinaira. E mwakuri ma ngaira n ara kaangaanga ae ngkai. Ao ibukina bwa antai Ngaia ao tera ae E a tia ni karaoia ibukira, E ota iai. Bukina bwa e a tia n rinanon marakira, E kona n anganiira te ran ae maiu ngkana ti ukouria. E reirei aei nakon ainen Tamaria ngke E kangai, “Ngke tao ko ata ana bai n tituaraoi te Atua, ao Teuae kangai nako im, Kamai ba N na moi; ao ko a kamani butia iai, ao E a anganiko te ran ae maiu. Tokin te atatai, te aine e kaeka n te onimaki ao e taku, “Teuaei, kamai te ran anne, ba I aonga n aki manga taka.”

Imwiin te aine n Tamaria arei e karekea te taneiai aei ma te Tia Kamaiu, e “kitana ana baata te aine, ao e nako n te kawa, ao e taku nakoia aomata,

“Mai, nora te aomata are tuangai ba’i ni kabane ake I karaoi: tao te Kristo Ngaia?”

E tia ni karekea te tia kakoaua—e a tia n moana karekean te ran ae maiu—ao, e tangira kakoauan aron Arona n Atua nakoia tabeman.⁹

Ngkana ti roko Nakoina ma te nanorinano ao nanora ni kan reireinaki—riki ngkana ti namakina te nanokawaki ibukin ara kaairua, buure, ao uruan tuua—E kona ni bitiira, “ibukina e mwaaka ni kamaiu.”¹⁰ Ao ma nanora aika bitaki, ti kona, n ti te arona ma ainen Tamaria, n nako nanon oin ara kaawa—mweengara, reirei, ao taabo ni mwakuri—ni kakoaua Ibukina.

Te Kauoua, Mataniwiia taan Kamarurung e kona ni kakorakoraira ngkana ti taneiai ni maraki are e roko man aia mwakuri tabeman aika aki raoiroi. I a tia ni karekei marooro aika mwaiti ma aine aika a kekeiaki ma kataakia aika a kaangaanga. Kawakinan berita aika tabu ake a karaoi inanon te tembora e a tia n riki bwa te mwananga ni kamarurung ae kaangaanga. A karawawataaki man uruan berita aika tabu, naano aika uruaki, ao ni mwane iroun temanna ae a onimakinna. Mwaitiia bon buure ni wenenibure ao taetae, tangako, ao korakoran te namakin n tangako, n tainako e riki mai imwiin kani kakaraoakina irouia aomata tabeman.

Taneiai aikai, e ngae ngke a aki riki imwiin aia mwakuri taari aine aika a rawawata, a katikui namakinan buure aika mwaiti ao a maama. N aki ataia bwa a na kanga ni kabuai naano aika korakora are a taneiai iai, a mwaiti ake a kataia n aki tabeakini, a kataia ni mwaninga taekaia.

Te kantaninga ao te kamarurung aki kuneaki man kawakinan bwaai aika raba ma inanon ootan ao ana tangira ara Tia Kamaiu, Iesu Kristo. ¹¹ Unimwaane Elder Richard G. Scott e reirei: “Ngkana akea am bure ae kakaiaki, tai karawawatako i mwiin te bure teuana n akea bukina.  … Ko kona n namakina te nanoanga. … Ko riai n aki katoka iaom te namakin n te bukinaki.   …Ngkana ko a tia ni karaoa te bwai ae riai ni buoka te aomata ae ko tangiria, katuka rawawatam iaan waen te Tia Kamaiu.  …Ngkana ko karaoia, ko na aki ti kunea te rau ma e na kaota am onimaki inanon mwaakan te Tia Kamaiu n tabeka rawawatan te bure mai iroun are ko tangiria rinanon ana rairannano ao ana ongotaeka.”

E reitinako: “Bwaninin te kamarurung e na roko rinanon am onimaki iroun Iesu Kristo ao Mwaakana ao konabwaina, rinanon Ana mwakuri ni Kamaiu, ni kamaoi mwaka ake aki eti ao buure ake ko bon karaoi.”¹²

Ngkana ko kuneko bwa ko mena n te aro aei, te kamarurung e na abwabwaki mwakuriana. E na kainanoiko n tataro mwaaka ni ukora te kairi ao buoka aika riai, n ikotaki ma  taan ni katabu ni koaua n te nakoanibonga. Ngkana ko reiakina te reitaki ni koaua, katea tianakim ae riai ao tao ukori reirei aika tamaroa. Kateimatoan te marurung n tamnei n rinanon te mwakuri e kakawaki! Uringa kinaakim mai karawa. Ngkami bon natin te Atua aine. Onimakina ana babaire Tamam are akea tokina ibukim. Reitinako ni katoa bong ni karikirakea am atatai iaon   ana reirei Iesu Kristo. Mwakuria te onimaki n te bong koraki ni kamatebwaia te ran ae maiu man ana mwanibwa te Tia Kamaiu. Onimaki iaon mwaakan te entaumente are e karaoaki ibukira rinanon te otenanti ao berita aika tabu. Ao kariaia mwaakan te Tia Kamaiu ni kamarurung ao Ana mwakuri ni Kamaiu inanon maium.

Te Katenua, Mataniwiia Taan Kamarurung e kona ni kamweraoira ao ni kateimatoira ngkana ti taneiai ni maraki “koauan te aki rau n te maiu ae mamate,” ¹³ n aron urubwain te aba, aorakin te iango, aoraki, aoraki aika wene ni maan, ao te mate. I tia ni kaitibo n te tai aki maan nako ma te ataeinaine ae arana Josie ae e rang kamataiia te nano n arona ni karawawataaki man aki kona ni rarairaki n rabwatana ma nanona ni kukurei ni kan reitaki ae korakora. Aio teutana aron mwanangana nakon kamarurung are e tibwaia ma ngai:

“Korakoran kaangaangan te tai ake a riki iaon au utu ao ngai are ti aranna ‘ana bong aontano’ E moanaki ma te namakin ae aki kakukurei ni bwaai ake e rinanona ao arona ni buakakaana ni kakai un ao aki butimwaai aekan bwanaa, tautauana, ke te oota. E bon korakora mwaitin unin ana iango. Iai teuana ana bong ibuakona are I aki kona ni mwaninga.

“E riki ngke I moanna ni karekea te aki konamaki n rarairaki, n rikin te taneiai aei e riki te maaku. I kona n uringa te tang, rannimata ni waanako rikaaki mai matau ngke I ikerakea te ang. Ma korakoran te rawawata e riki ni kerikaaki nakon te maraki are imwina ngke I taratara n noora nanon tinau n nanokawaki, ni kan buokai.

“Ma te namakin n nanokawaki n tarakin rawawatau n te aro aei. Ma ti aki ataia raoi bwa arona e na rikirake ni buakaka, ti bon raroa man karekean te taneiai ni korakoran te kakai.

“Ngke e waakinako ananaun te aoa, tinau e wirikiriki ni kaokiokia man kaokiokia, ‘N na karaoi bwaai ni kabane bwa kona aki namakina te aro aei.’

“Imwiin te tai, e a roko ni korakora buakakan te rotongitong, ao ngke I a kakoaua I aki konaa moana n taua, ngkanne e a riki te bwai teuana ae kamimi.

“Kakawakin ao tamaroan te mwaaka e karina n roko n rabwatau. Ngkanne, ma te korakora e riaon korakorau,’¹⁴ I taekinna nakon tinau ma au koaua itiua te taeka ni bitakin-te maiu ngke te taeka ni kaokiokia nakoina tangiran uotakin marakiu. I taku, ‘Ko riai n aki karaoia; Temanna ae e a kaman karaoia.’”

Man buakakan te aroaro ae kakamaaku n aorakin te iango, Josie e taetae ibukin korakoran te koaua iroun Iesu Kristo ao Ana mwakuri ni Kamaiu.

E bon aki kamarurungaki raoi n te bong arei, ma e karekea ootan te kantaninga inanon tain te rootongitong ae rangin ni korakora. N te bong aei, ni boutokaaki man te reirei ae matoatoa n ataakin ana reirei Iesu Kristo ao te kakorakoraaki ni katoa bong man ana ran ae maiu te Tia Kamaiu, Josie e waakinako ni kawaina n nako ni kamarurung ao ana onimaki ae matoatoa iroun MataniwiiaTaan Kamarurung. E buokiia tabeman iaon kawaia. Ao e taku, “Ngkana te rotongitong e namakina te reitinako, I katine iaan iangoan Ana nanoanga. A tei bwa te oota ni kairi ngkana I kekeiaki ni kaitarai kaangaanga.”¹⁵

Tariu I kakoaua bwa—

Ko na aki reitinako ni uota te rawawata n nanokawaki aika a riki man te bure—ti ngkoe.

Ko na aki uota te maraki ae e riki man te mwakuri ae aki eti mairouia tabeman—ti ngkoe.

Ko na aki karekea te taneiai n namakinan te maraki n te maiu n rabwata—ti ngkoe.

Te Tia Kamaiu E bubuti:

“Kam aki okirai ngkai, ma n rairinanomi man ami bure, ma n rairaki, bwa I aonga ni kamarurung ngkami?

“… Ngkana kam kawarai ao e na reke iroumi te maiu are akea tokina. Nooria, e aroraki baiu ae nanonga nakoimi, ao ane e roko nakoiu ao  … N na butimwaia.” ¹⁶

“[E] na karaoi bwaai ni kabane n anaa aio mairoum.” N koauana, “[E] a kaman karaoia.” N aran Iesu Kristo Mataniwiia Taan Kamarurung amen.