ទុកចិត្តលើព្រះដោយឥតងាករេ
ប្រសិនបើយើងខ្ជាប់ខ្ជួន ហើយឥតងាករេក្នុងជំនឿយើង ព្រះអម្ចាស់នឹងបង្កើនសមត្ថភាពយើងឲ្យយកឈ្នះលើឧបសគ្គក្នុងជីវិត ។
បងប្អូនប្រុសស្រីជាទីស្រឡាញ់ ខ្ញុំចង់ចាប់ផ្ដើមសារលិខិតខ្ញុំនៅថ្ងៃនេះ ដោយថ្លែងទីបន្ទាល់ថា ខ្ញុំដឹងថា ប្រធាន ថូម៉ាសអេស ម៉នសុន គឺជាព្យាការីរបស់ព្រះនៅជំនាន់យើង ។ ទីប្រឹក្សារបស់លោកក្នុងគណៈប្រធានទីមួយ និងពួកសាវកដប់ពីរនាក់ក៏ជាពួកព្យាការី ពួកអ្នកមើលឆុត និងពួកអ្នកទទួលវិវរណៈដែរ ។ ពួកលោកតំណាងឲ្យព្រះអម្ចាស់ ព្រះយេស៊ូវគ្រីស្ទ ហើយមានសិទ្ធិប្រកាសពីព្រះទ័យ និងព្រះឆន្ទៈរបស់ទ្រង់ដែលបានបើកសម្ដែងដល់ពួកលោក ។ ខ្ញុំសូមថ្លែងទីបន្ទាល់ថា ការធ្វើតាមការប្រឹក្សារបស់ពួកលោកនាំឲ្យមានសុវត្ថិភាព ។ ព្រះអម្ចាស់កំពុងបំផុសគំនិតពួកលោកឲ្យគូសបញ្ជាក់ពីការពង្រឹងជំនឿរបស់យើងលើព្រះវរបិតាសួគ៌ និងព្រះរាជបុត្រាទ្រង់ ព្រះយេស៊ូវគ្រីស្ទ និងដង្វាយធួនរបស់ទ្រង់ ដើម្បីយើងមិនងាករេ កាលយើងជួបឧបសគ្គនៅជំនាន់យើងនេះ ។
ក្នុងព្រះគម្ពីរមរមន យើងបានអានអំពីបុរសម្នាក់ឈ្មោះ អាំម៉ូន ដែលបានបញ្ជូនមកពីដែនដីសារ៉ាហិមឡា ទៅកាន់ដែនដីលីហៃ-នីហ្វៃដើម្បីសួរទាក់ទងនឹងបងប្អូនរបស់លោក ។ នៅទីនោះលោកបានរកឃើញស្តេច លីមហៃ និងរាស្ត្ររបស់ទ្រង់ដែលត្រូវពួកសាសន៍លេមិនចាប់ឃុំឃាំង ។ ស្តេច លីមហៃ ត្រូវបានលើកទឹកចិត្តដោយសាររឿងដែល អាំម៉ូន បានចែកចាយអំពីប្រជាជនរបស់លោកនៅសារ៉ាហិមឡា ។ ព្រះទ័យរបស់ទ្រង់ ពោរពេញដោយក្ដីសង្ឃឹម និងអំណរដ៏ខ្លាំងរហូតទ្រង់បានប្រមូលរាស្ត្រទ្រង់ទៅព្រះវិហារបរិសុទ្ធ ហើយមានបន្ទូលថា
« ហេតុដូច្នេះហើយ ចូរអ្នករាល់គ្នាងើបមុខឡើង ហើយអររីករាយចុះ ហើយដាក់ទីទុកចិត្តរបស់អ្នកទៅលើព្រះ ។ …
« … ប្រសិនបើអ្នករាល់គ្នាបែរត្រឡប់មករកព្រះអម្ចាស់ដោយស្មោះពីចិត្ត…ហើយបម្រើទ្រង់ឲ្យអស់ពីការព្យាយាមនៃគំនិតវិញ… ទ្រង់នឹងដោះលែងអ្នកឲ្យរួចផុតពីសេវកភាព ស្របតាមបំណង និងព្រះហឫទ័យរបស់ទ្រង់ » ។១
ជំនឿនៃរាស្ត្ររបស់ស្តេចលីមហៃ បានរងឥទ្ធិពលយ៉ាងខ្លាំងមកពីសម្ដីរបស់អាំម៉ូន រហូតពួកគេបានធ្វើសេចក្ដីសញ្ញាមួយនឹងព្រះដើម្បីបម្រើទ្រង់ ហើយគោរពបទបញ្ញត្តិទ្រង់ មិនថាពួកគេមានស្ថានភាពលំបាកបែបណានោះទេ ។ ដោយសារជំនឿរបស់ពួកគេ ពួកគេអាចបង្កើតផែនការមួយ រត់គេចខ្លួនរួចពីកណ្ដាប់ដៃរបស់ពួកសាសន៍លេមិន ។២
សូមពិចារណាពីសារៈសំខាន់នៃការអញ្ជើញដែលស្ដេចលីមហៃបានធ្វើដល់រាស្ត្រទ្រង់ និងភាពពាក់ព័ន្ធរបស់វាចំពោះយើង ។ ទ្រង់បានមានបន្ទូលថា « ហេតុដូច្នេះហើយ ចូរអ្នករាល់គ្នាងើបមុខឡើង ហើយអររីករាយចុះ ហើយដាក់ទីទុកចិត្តរបស់អ្នកទៅលើព្រះ » ។ជាមួយនឹងបន្ទូលទាំងនេះ លីមហៃបានអញ្ជើញរាស្ត្រទ្រង់ឲ្យមើលទៅអនាគតកាល តាមរយៈភ្នែកនៃជំនឿ ដើម្បីប្ដូរការភ័យខ្លាចរបស់ពួកគេនឹងសុទិដ្ឋិនិយមនៃក្ដីសង្ឃឹមដែលកើតមកពីជំនឿ ហើយមិនងាករេក្នុងការទុកចិត្តលើព្រះនៅគ្រប់ស្ថានភាព ។
ជីវិតរមែងស្លាប់គឺជាគ្រាមួយនៃការសាកល្បងដែលយើងត្រូវបង្ហាញឲ្យឃើញ ថាតើយើងនឹងធ្វើគ្រប់រឿងដែលព្រះអម្ចាស់ជាព្រះនៃយើងនឹងបង្គាប់ឲ្យយើងធ្វើដែរទេ ។៣ ការណ៍នេះនឹងតម្រូវឲ្យមានជំនឿឥតងាករេលើព្រះគ្រីស្ទ ទោះស្ថិតក្នុងគ្រាដ៏លំបាកក្ដី ។ វានឹងតម្រូវឲ្យយើងដើរឆ្ពោះទៅមុខដោយមានជំនឿខ្ជាប់ខ្ជួនលើព្រះគ្រីស្ទ ដោយដឹកនាំដោយព្រះវិញ្ញាណ និងដោយទុកចិត្តថា ព្រះនឹងប្រទានដល់សេចក្ដីត្រូវការយើង ។៤
នៅចុងបញ្ចប់នៃការងារបម្រើលើផែនដីរបស់ទ្រង់ ពីមុនពេលគេយកទ្រង់ទៅដាក់ឃុំ ព្រះអង្គសង្គ្រោះបានបង្រៀនពួកសិស្សទ្រង់ថា « នៅលោកីយ៍នេះ នោះអ្នករាល់គ្នាមានសេចក្តីវេទនាមែន ប៉ុន្តែត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ » ។៥
សូមពិចារណាមួយភ្លែតជាមួយនឹងខ្ញុំ—ព្រះយេស៊ូវគ្រីស្ទ ជាព្រះរាជបុត្រាសំណប់តែមួយគត់របស់ព្រះវរបិតា បានរស់នៅក្នុងជីវិតឥតបាប ហើយយកឈ្នះរាល់ការល្បួង ការឈឺចាប់ ឧបសគ្គ និងការរងទុក្ខទាំងឡាយនៃលោកិយ ។ ទ្រង់បានបង្ហូរព្រះលោហិតក្នុងសួនច្បារគែតសេម៉ានី ទ្រង់បានរងទុក្ខនូវការឈឺចាប់គួរឲ្យស្ញែងខ្លាចដែលរកពាក្យថ្លែងពុំបាន ។ ទ្រង់បានលើកដាក់លើអង្គទ្រង់នូវរាល់ការឈឺចាប់ និងជំងឺទាំងឡាយរបស់យើង ។ ទ្រង់ត្រៀមជាស្រេចដើម្បីជួយ—យើងម្នាក់ៗ—ជាមួយនឹងបន្ទុកគ្រប់យ៉ាង ។ តាមរយៈព្រះជន្ម ការរងទុក្ខ ការសុគត និងការមានព្រះជន្មឡើងវិញរបស់ទ្រង់ ទ្រង់បានដកយករាល់ឧបសគ្គដែលរារាំងដល់ភាពរីករាយ និងការស្វែងរកសុភមង្គលរបស់យើងនៅលើផែនដីនេះ ។ អត្ថប្រយោជន៍នៃពលិកម្មដ៏ធួនរបស់ទ្រង់ត្រូវបានផ្ដល់ដល់ជនដែលទទួលយកទ្រង់ ហើយបដិសេធខ្លួនឯង និងជនដែលផ្ទុកឈើឆ្កាងទ្រង់ ហើយធ្វើតាមទ្រង់ ជាអ្នកដើរតាមទ្រង់ដ៏ពិត ។៦ ហេតុដូច្នេះ កាលយើងអនុវត្តជំនឿលើព្រះយេស៊ូវគ្រីស្ទ និងដង្វាយធួនទ្រង់ យើងនឹងទទួលបានកម្លាំង បន្ទុកយើងនឹងស្រាល ហើយតាមរយៈទ្រង់ យើងនឹងឈ្នះលើលោកិយនេះ ។
បងប្អូនប្រុសស្រី កាលយើងគិតពីកម្លាំង និងក្ដីសង្ឃឹមដែលយើងអាចទទួលពីព្រះអង្គសង្គ្រោះ យើងមានហេតុផលដើម្បីងើបមុខយើងឡើង អររីករាយ ហើយដើរឆ្ពោះទៅមុខដោយឥតងាករេ « ដ្បិតអ្នកណាដែលសង្ស័យ នោះប្រៀបដូចជារលកសមុទ្រដែលត្រូវផាត់ដោយខ្យល់ ទាំងរំពើកចុះឡើង ។… ដ្បិតអ្នកនោះជាមនុស្សមានចិត្ត ២ ចេះតែសាវាក្នុងគ្រប់ទាំងផ្លូវ » ។៧
ដូចគ្នានេះដែរ ស្ដេចលីមហៃបានលើកទឹកចិត្តថា ចូរ« បែរត្រឡប់មករកព្រះអម្ចាស់ដោយស្មោះពីចិត្ត… ហើយបម្រើទ្រង់ឲ្យអស់ពីការព្យាយាមនៃគំនិតវិញ ប្រសិនបើអ្នករាល់គ្នាធ្វើយ៉ាងនេះ ទ្រង់នឹងដោះលែងអ្នកឲ្យរួចផុតពីសេវកភាព ស្របតាមបំណង និងព្រះហឫទ័យរបស់ទ្រង់ » ។៨
សូមស្ដាប់បន្ទូលផ្ទាល់របស់ព្រះអង្គសង្គ្រោះ កាលទ្រង់អង្វរដល់យើងថា
« កុំឲ្យចិត្តអ្នករាល់គ្នាថប់បារម្ភឡើយ អ្នករាល់គ្នាជឿដល់ព្រះហើយ ចូរជឿដល់ខ្ញុំដែរ ។ …
« បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិខ្ញុំចុះ ។ …
« អ្នកណាដែលមានបញ្ញត្តិរបស់ខ្ញុំ ហើយកាន់តាម គឺអ្នកនោះហើយដែលស្រឡាញ់ខ្ញុំ ឯអ្នកណាដែលស្រឡាញ់ខ្ញុំ នោះជាទីស្រឡាញ់នៃព្រះវរបិតាខ្ញុំហើយ ខ្ញុំនឹងស្រឡាញ់អ្នកនោះដែរ ក៏នឹងសម្ដែងខ្លួនឲ្យអ្នកនោះស្គាល់ផង » ។៩
ព្រះប្រទានពរយើងស្របតាមជំនឿយើង ។១០ ជំនឿគឺជាប្រភពនៃការរស់នៅជាមួយនឹងបំណង និងទស្សនវិស័យដ៏អស់កល្បនៃព្រះ ។ ជំនឿគឺជាគោលការណ៍អនុវត្តមួយដែលបំផុសឲ្យមានភាពឧស្សាហ៍ព្យាយាម ។ វាគឺជាកម្លាំងមួយដ៏សំខាន់ ហើយរស់រវើកនៅក្នុងឥរិយាបថ និងបំណងប្រាថ្នាវិជ្ជមានដើម្បីធ្វើរឿងគ្រប់យ៉ាងដែលព្រះ និងព្រះយេស៊ូវគ្រីស្ទសុំដល់យើងដោយស្ម័គ្រចិត្ត ។ វាធ្វើឲ្យយើងលុតជង្គង់ចុះដើម្បីទទូចអង្វរសូមការដឹកនាំ ហើយក្រោកឡើងធ្វើសកម្មភាពដោយទំនុកចិត្ត ដើម្បីសម្រេចកិច្ចការនានាស្របតាមព្រះទ័យទ្រង់ ។
ច្រើនឆ្នាំកន្លងទៅ កាលកំពុងបម្រើជាប្រធានបេសកកម្ម ខ្ញុំបានទទួលការហៅទូរសព្ទមួយមកពីឪពុកម្ដាយរបស់អ្នកផ្សព្វផ្សាយជាទីស្រឡាញ់របស់យើងម្នាក់ ដោយប្រាប់ខ្ញុំអំពីការស្លាប់នៃប្អូនស្រីគាត់ ។ នៅគ្រាដ៏ឈឺចាប់នោះ ខ្ញុំចាំថា អ្នកផ្សព្វផ្សាយសាសនានោះ និងខ្ញុំបានពិភាក្សាអំពីផែនការនៃសេចក្ដីសង្គ្រោះដ៏អស្ចារ្យរបស់ព្រះសម្រាប់កូនចៅទ្រង់ និងរបៀបដែលចំណេះដឹងនេះនឹងលួងលោមចិត្តគាត់ ។
ទោះជាគាត់ស្រឡាំងកាំង ហើយសោកសៅដោយរឿងអកុសលនោះក្ដី ក៏អ្នកផ្សព្វផ្សាយសាសនារូបនេះ—បានរីករាយនៅក្នុងជីវិតប្អូនស្រីគាត់ដែរ—តាមរយៈទឹកភ្នែកនៃជំនឿរបស់គាត់លើព្រះ—បានរីករាយសម្រាប់ជីវិតរបស់ប្អូនស្រីគាត់ ។ គាត់បានបង្ហាញការជឿជាក់ឥតងាករេលើសេចក្ដីមេត្តាករុណាដ៏ទន់ភ្លន់របស់ព្រះអម្ចាស់ ។ គាត់បានប្រាប់ខ្ញុំដោយប្ដេជ្ញាចិត្តថា គាត់នឹងបន្តបម្រើបេសកកម្មគាត់ឲ្យអស់ពីជំនឿ និងចិត្តឧស្សាហ៍ ដើម្បីមានភាពសក្ដិសមទទួលបានការសន្យាដែលព្រះមានដល់គាត់ និងគ្រួសារគាត់ ។ នៅគ្រាដ៏លំបាកនេះ អ្នកផ្សព្វផ្សាយសាសនាស្មោះត្រង់ម្នាក់នោះបានបង្វែរចិត្តគាត់ទៅរកព្រះ បានដាក់ការទុកចិត្តទាំងស្រុងលើទ្រង់ ហើយបានធ្វើការតាំងចិត្តជាថ្មីដើម្បីបម្រើទ្រង់ឲ្យអស់ពីការព្យាយាម ។
ប្រសិនបើយើងពុំបានចាក់ឫសដោយការទុកចិត្តដ៏ខ្ជាប់ខ្ជួនលើព្រះ និងបំណងប្រាថ្នាបម្រើទ្រង់ទេ បទពិសោធន៍ឈឺចាប់នានានៃជីវិតរមែងស្លាប់អាចនាំយើងឲ្យមានអារម្មណ៍ដូចជាយើងមានបន្ទុកដោយសារនឹមមួយដ៏ធ្ងន់ ហើយយើងអាចបាត់បង់ការលើកទឹកចិត្តដើម្បីរស់នៅតាមដំណឹងល្អឲ្យបានពេញលេញ ។ ដោយគ្មានជំនឿ នៅទីបំផុតយើងនឹងបាត់បង់សមត្ថភាពក្នុងការឲ្យតម្លៃដល់ការរៀបចំទាំងឡាយនៃព្រះរបស់យើងអំពីរឿងដែលនឹងកើតឡើងក្រោយមកទៀតនៅក្នុងជីវិតយើង ។១១
នៅគ្រាសាកល្បងទាំងនេះ មារសត្រូវ—ដែលតែងតែឃ្លាំមើល—ព្យាយាមប្រើការវិនិច្ឆ័យ និងការយល់ឃើញរបស់យើងទាស់នឹងយើង ។ វាព្យាយាមធ្វើឲ្យយើងជឿថា ការរស់នៅតាមគោលការណ៍ទាំងឡាយនៃដំណឹងល្អគឺឥតប្រយោជន៍ ។ សូមចងចាំថា ការវិនិច្ឆ័យរបស់មនុស្ស « មិនទទួលសេចក្តីខាងឯព្រះវិញ្ញាណនៃព្រះទេ ពីព្រោះជាសេចក្តីល្ងង់ល្ងើដល់គេ » ។១២ សូមចងចាំថា សាតាំង « គឺជាខ្មាំងសត្រូវ [របស់] ព្រះ ហើយ [វា] ប្រឆាំងនឹងទ្រង់ឥតឈប់ឈរ ហើយអញ្ជើញ និងញុះញង់ [យើង] ឲ្យធ្វើបាប ហើយឲ្យធ្វើអ្វីដែលអាក្រក់ឥតឈប់ឈរសោះឡើយ » ។១៣ យើងមិនត្រូវបណ្ដោយឲ្យវាបោកបញ្ឆោតយើងបានឡើយ ពីព្រោះកាលយើងឲ្យវាបោកបញ្ឆោក យើងធ្វើឲ្យជំនឿយើងធ្លាក់ចុះ ហើយបាត់បង់អំណាចទទួលបានពរជ័យរបស់ព្រះ ។
ប្រសិនបើយើងខ្ជាប់ខ្ជួន ហើយឥតងាករេក្នុងជំនឿយើង ព្រះអម្ចាស់នឹងបង្កើនសមត្ថភាពយើងឲ្យយកឈ្នះលើឧបសគ្គក្នុងជីវិត ។ យើងនឹងមានលទ្ធភាពទប់ស្កាត់ការសម្រេចចិត្តអវិជ្ជមាន ហើយយើងនឹងអភិវឌ្ឍលទ្ធភាពដើម្បីយកឈ្នះ ទោះជាវាទំនងជាឧបសគ្គដ៏ធំក្ដី ។ នេះគឺជាអ្វីដែលជួយរាស្ត្ររបស់ស្តេចលីមហៃធ្វើការគេចខ្លួនដ៏អស្ចារ្យមួយចេញពីពួកសាសន៍លេមិន ។
ខ្ញុំសូមអញ្ជើញបងប្អូនឲ្យដាក់ការទុកចិត្តទាំងស្រុងលើព្រះ និងលើការបង្រៀនរបស់ពួកព្យាការីទ្រង់ ។ ខ្ញុំសូមអញ្ជើញបងប្អូនឲ្យរំឭកសេចក្ដីសញ្ញាជាមួយនឹងព្រះ បម្រើទ្រង់ឲ្យអស់ពីដួងចិត្តបងប្អូន មិនថាស្ថានភាពនៃជីវិតនេះស្មុគស្មាញយ៉ាងណានោះទេ ។ ខ្ញុំសូមថ្លែងទីបន្ទាល់ថា តាមរយៈអំណាចនៃជំនឿឥតងាករេរបស់បងប្អូនលើព្រះគ្រីស្ទ បងប្អូននឹងបានរួចពីសេវកភាពនៃអំពើបាប ភាពសង្ស័យ ការឥតជំនឿ អពមង្គល ការរងទុក្ខ ហើយបងប្អូននឹងទទួលរាល់ពរជ័យដែលបានសន្យាមកពីព្រះវរបិតាជាទីស្រឡាញ់នៃយើង ។
ខ្ញុំសូមធ្វើទីបន្ទាល់ថា ព្រះមានពិត ។ ទ្រង់មានព្រះជន្មរស់ ។ ទ្រង់ស្រឡាញ់យើង ។ ទ្រង់ព្រះសណ្ដាប់ការអធិស្ឋានយើងក្នុងគ្រាយើងមានសុភមង្គល និងគ្រាយើងមានភាពសង្ស័យ ភាពសោកសៅ និងភាពអស់សង្ឃឹម ។ ខ្ញុំសូមធ្វើជាសាក្សីថា ព្រះយេស៊ូវគ្រីស្ទ គឺជាព្រះអង្គសង្គ្រោះនៃពិភពលោក ។ ទ្រង់ជាអង្គប្រោសលោះរបស់យើង ។
ខ្ញុំសូមបញ្ចប់សុន្ទរកថារបស់ខ្ញុំនៅថ្ងៃនេះជាមួយនឹងទំនុកច្រៀងក្នុងទំនុកតម្កើងបទ « Not Now but in the Coming Years » ដែលមាននៅក្នុងទំនុកតម្កើងជាភាសាព័រទុយហ្គាល់ ៖
បើពពកបាំងពន្លឺព្រះអាទិត្យចូលក្នុងចិត្តយើង
បើការឈឺចាប់ធ្វើឲ្យយើងរងទុក្ខ មិនថ្វីទេ មិនយូរ យើងនឹងបានស្គាល់ទ្រង់ ។
ព្រះយេស៊ូវសូមដឹកនាំយើងដោយព្រះហស្តទ្រង់ ហើយទ្រង់នឹងប្រាប់យើងពីហេតុផល
បើយើងស្ដាប់សំឡេងទ្រង់ នោះទ្រង់នឹងប្រាប់យើង ។
ទុកចិត្តលើព្រះដោយឥតងាករេ ហើយឲ្យទ្រង់គាំទ្រយើង
ច្រៀងពីសិរីរុងរឿងដ៏និរន្ដរ៍របស់ទ្រង់ ដ្បិតទ្រង់នឹងពន្យល់នៅពេលក្រោយ ។១៤
ខ្ញុំសូមនិយាយការណ៍ទាំងនេះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន។