ចិត្តល្អ សេចក្ដីសប្បុរស និងសេចក្ដីស្រឡាញ់
ចូរយើងពិនិត្យមើលជីវិតរបស់យើង ហើយប្តេជ្ញាចិត្តធ្វើតាមគំរូរបស់ព្រះអង្គសង្គ្រោះ ដោយការមានចិត្តល្អ ក្តីស្រឡាញ់ និងមានសេចក្តីសប្បុរស ។
បងប្អូនប្រុសជាទីស្រឡាញ់អើយ ខ្ញុំមានកិត្តិយសដោយមានឯកសិទ្ធិថ្លែងទៅកាន់បងប្អូន នៅក្នុងការប្រជុំអ្នកកាន់បព្វជិតភាពនៃព្រះដ៏ស្មោះត្រង់នៅទូទាំងពិភពលោក ។ ល្ងាចនេះខ្ញុំនិយាយអំពីប្រធានបទដែលខ្ញុំធ្លាប់បាននិយាយកាលពីមុន ។
ព្យាការីមរមនបានពិពណ៌នាអំពីបុគ្គលិកលក្ខណៈសំខាន់មួយរបស់ព្រះអង្គសង្គ្រោះ ហើយពួកសិស្សរបស់ទ្រង់ត្រូវតែធ្វើត្រាប់តាម ។ លោកបានថ្លែងដូច្នេះ ៖
« បើសិនជាមនុស្សនោះស្លូតបូត ហើយសុភាពរាបសា ហើយទទួលស្គាល់ដោយនូវព្រះចេស្ដានៃព្រះវិញ្ញាណបរិសុទ្ធថា ព្រះយេស៊ូវគឺជាព្រះគ្រីស្ទ អ្នកនោះត្រូវតែមានសេចក្ដីសប្បុរស ដ្បិតបើសិនជាគេគ្មានសេចក្ដីសប្បុរសទេ អ្នកនោះគ្មានជាអ្វីទាំងអស់ ហេតុដូច្នោះហើយ អ្នកនោះត្រូវតែមានសេចក្ដីសប្បុរស ។
« ហើយសេចក្ដីសប្បុរស តែងតែអត់ធ្មត់ ហើយចិត្តល្អ ហើយពុំចេះឈ្នានីស ហើយពុំចេះអួតខ្លួន ពុំរកប្រយោជន៍ផ្ទាល់ខ្លួន ពុំរហ័សខឹង ។
« ហេតុដូច្នោះហើយ ឱ បងប្អូនដ៏ជាទីស្រឡាញ់របស់ខ្ញុំអើយ បើសិនជាអ្នករាល់គ្នាគ្មានសេចក្ដីសប្បុរសទេ នោះអ្នករាល់គ្នាគ្មានអ្វីទាំងអស់ ដ្បិតសេចក្ដីសប្បុរសពុំបាត់បង់ទៅឡើយ ។ ហេតុដូច្នោះហើយ ចូរតោងជាប់សេចក្ដីសប្បុរសដែលជាសេចក្ដីដ៏មិហិមាបំផុត ដ្បិតអ្វីផ្សេងទៀតនឹងត្រូវខូចបង់—
« ប៉ុន្តែសេចក្ដីសប្បុរស គឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ ហើយស្ថិតស្ថេរនៅជានិច្ច ហើយអស់អ្នកណាដែលមានសេចក្ដីសប្បុរសនៅក្នុងថ្ងៃចុងក្រោយបង្អស់នឹងបានស្រួលដល់អ្នកនោះហើយ ។១
បងប្អូនប្រុសអើយ យើងពុំគោរពបព្វជិតភាពរបស់ព្រះឡើយ ប្រសិនបើយើងពុំមានចិត្តល្អដល់អ្នកដទៃនោះ ។
អែលឌើរ យ៉ូសែប ប៊ី វ៉ឺតលីន ជាមិត្តដ៏ជាទីស្រឡាញ់ និងជាអ្នករួមការងារខ្ញុំ គឺពិតជាមនុស្សមានចិត្តល្អណាស់ ។ លោកបានថ្លែងដូច្នេះ ៖
« ចិត្តល្អមានសារៈសំខាន់ណាស់ចំពោះជីវិតនៃនគរសេឡេស្ទាល ។ ចិត្តល្អគឺជារបៀបមួយដែលមនុស្សមានលក្ខណៈដូចជាព្រះគ្រីស្ទប្រព្រឹត្តចំពោះអ្នកដទៃ ។ ចិត្តល្អគប្បីបង្ហាញឲ្យឃើញទាំងក្នុងពាក្យសម្តី និងទង្វើទាំងអស់របស់យើង ទាំងនៅកន្លែងធ្វើការ សាលារៀន ព្រះវិហារ ហើយជាពិសេសគឺនៅផ្ទះរបស់យើងផ្ទាល់តែម្តង ។
« ព្រះយេស៊ូវជាព្រះអង្គសង្គ្រោះយើងគឺជាគំរូដ៏ឆ្នើមអំពីការមានចិត្តល្អ និងក្តីអាណិតមេត្តា » ។២
ព្រះគម្ពីរបង្រៀនយើងថា ការអនុវត្តបព្វជិតភាពដោយសុចរិតគឺអាស្រ័យលើការរស់នៅរបស់យើងតាមគោលការណ៍នៃចិត្តល្អ សេចក្តីសប្បុរស និងសេចក្តីស្រឡាញ់ ។ នៅក្នុងគោលលទ្ធិ និងសេចក្ដីសញ្ញាយើងបានអានដូច្នេះ ៖
« គ្មានអំណាច ឬឥទ្ធិពលណាអាច ឬគប្បីកាន់កាប់ដោយសារបព្វជិតភាពបានឡើយ លើកលែងតែដោយការលួងលោម … ដោយការទន់ភ្លន់ និងការស្លូតបូត និងដោយការស្រឡាញ់ស្មោះត្រង់ប៉ុណ្ណោះ
« ដោយចិត្តល្អ និងដោយការចេះដឹងពេញទី ដែលនឹងពង្រីកព្រលឹងឲ្យធំទូលំទូលាយ ដោយឥតលាក់ពុត និងដោយឥតមានឧបាយកលឡើយ » ។៣
បងប្អនប្រុសអើយ ចូរយើងពិនិត្យមើលជីវិតរបស់យើង ហើយប្តេជ្ញាចិត្តធ្វើតាមគំរូរបស់ព្រះអង្គសង្គ្រោះ ដោយការមានចិត្តល្អ ក្តីស្រឡាញ់ និងមានសេចក្តីសប្បុរស ។ ហើយនៅពេលយើងធ្វើដូច្នេះ យើងនឹងស្ថិតនៅក្នុងកន្លែងដ៏ប្រសើរមួយ ដើម្បីអំពាវនាវសូមព្រះចេស្តាពីស្ថានសួគ៌សម្រាប់ខ្លួនយើង គ្រួសារ និងសម្រាប់បងប្អូនយើង ដែលជួនកាលមានការលំបាកក្នុងការធ្វើដំណើរត្រឡប់ទៅកាន់ផ្ទះសួគ៌ារបស់យើងវិញ ។ ខ្ញុំសូមអធិស្ឋានដូច្នេះ នៅក្នុងព្រះនាមនៃព្រះយេស៊ូវគ្រីស្ទ ជាព្រះអម្ចាស់ អាម៉ែន ។