Stret Lav: Tru Saen blong Evri Tru Disaepol blong Jisas Kraes.

Yumi lavem mo misim Presiden Thomas S. Monson, mo yumi lavem mo sastenem Presiden Russell M. Nelson. Presiden Nelson i gat wan spesel ples insaed long hat blong mi.

Taem mi wan yangfala papa, smol boe blong mitufala, we i gat faef yia, i kambak hom afta skul long wan dei, mo i askem mama blong hem: “Papa i stap mekem wanem kaen wok? Nao hem i eksplenem se ol niufala fren long skul oli stat blong tokbaot wok blong papa blong olgeta. Wan i talem se papa blong hem i jif blong polis blong taon, mo wan narawan i praod blong talem se papa blong hem i jif blong wan bigfala kampani.

So taem oli askem hem abaot papa blong hem, boe blong mi i ansa nomo se: “Papa blong mi i wok long wan ofis long wan kompiuta.” Nao from hem i luk se ansa blong hem i no mekem ol niu fren blong hem i sapraes, hem i ademap: “Mo tu, papa blong mi i jif blong yunives.”

Hemia i endem storian ia.

Mi talem long waef blong mi: “Hem i taem blong tijim hem sam moa ditel blong plan blong fasin blong sevem man, mo hu nao i stret jif.”

Be taem mitufala i tijim ol pikinini blong mitufala long plan blong fasin blong sevem man, lav we oli gat long Papa long Heven mo long Sevya i bin gro, from oli bin lanem se i wan plan blong lav. Gospel blong Jisas Kraes i stanap long lav we Papa mo blong Sevya, Tufala i gat long yumi, mo lav blong yumi long Tufala mo long wanwan long yumi.

Elda Jefri R. Holan i talem: “Fasfala bigfala komanmen blong ful taem we i no save finis i blong lavem God wetem evri hat, strong tingting, maen mo paoa blong yumi—hemia i fasfala bigfala komanmen. Be fasfala bigfala trutok blong ful taem we i no save finis i we God i lavem yumi wetem evri hat, strong tingting, maen mo paoa blong Hem. Lav ia i fandesen ston blong taem we i no save finis, mo i mas stap olsem fandesen ston blong evri dei laef blong yumi.”¹

Olsem fandesen ston blong evri dei laef blong yumi, klin mo stret lav i wan mas blong evri tru disaepol blong Jisas Kraes.

Profet Momon i tijim: “From samting ia, ol brata blong mi we mi lavem tumas, prea long Papa wetem evri paoa blong hat, blong yufala i save fulap wetem lav ia, we hem i bin givim long olgeta we oli ol tru man blong folem Pikinini blong hem, Jisas Kraes.”²

Lav, i tru, hemi tru saen blong evri tru disaepol blong Jisas Kraes.

Ol tru disaepol oli laekem blong givim seves. Oli save se, blong givim seves, i blong soemaot tru lav mo kavenan ia we oli bin mekem long taem blong baptaes.³ Nomata wanem koling blong olgeta long Jos, o rol blong olgeta long komuniti, oli filim se oli wantem moa blong lavem mo wok blong Lod mo ol narafala man.

Ol tru disaepol oli laekem blong fogiv. Oli save se Atonmen blong Sevya i kavremap evri sin mo ol mistek blong wanwan long yumi. Oli save se praes we Hem i bin pem, i “wan praes blong evri samting.” Ol takis, fi, benefit, mo praes long saed blong spirit we i go wetem ol sin, ol mistek, o ol rong wok, evri samting ia i stap insaed long praes ia. Ol tru disaepol oli kwik blong fogivim man mo oli kwik blong askem fogivnes.

Ol dia brata mo sista. Sapos yu stap traehad blong faenem paoa blong fogiv, yu no tingting long wanem ol narawan oli bin mekem long yu, be yu tingting long wanem Sevya i bin mekem blong yu, mo bambae yu faenem pis insaed long ol blesing we i pemaot man blong Atonmen blong Hem.

Ol tru disaepol oli laekem blong mekem tingting blong olgeta i folem hemia blong Lod, wetem pis i stap long hat blong olgeta. Oli gat tingting i stap daon, oli obei from se oli lavem Hem. Oli gat fet blong akseptem fulwan, tingting blong Hem, i no long wanem Hem i stap mekem nomo, be tu, long hao mo wetaem blong mekem. Ol tru disaepol oli save se ol ril blesing oli no oltaem wanem we oli wantem, be i wanem we Lod i wantem blong olgeta.

Ol tru disaepol oli lavem Lod bitim we oli lavem wol, mo oli stap strong mo oli no muvmuv long bilif blong olgeta. Oli stap strong mo stanap long wan wol we i stap jenis mo i fulap long konfius. Ol tru disaepol oli lavem blong lisin long voes blong Spirit mo blong ol profet, mo oli no konfius from ol voes blong wol. Ol tru disaepol oli lavem blong stanap long ol tabu ples,⁴ mo lavem blong mekem ol ples we oli stanap long hem oli kam tabu. Long weaples oli go long hem, oli tekem lav mo pis blong Lod i go long hat blong ol narawan. Ol tru disaepol oli lavem blong obei long ol komanmen blong Lod, mo oli obei from oli lavem Lod. Taem oli stap lavem mo kipim ol kavenan blong olgeta, hat blong olgeta i kam niu mo fasin blong olgeta i jenis.

Stret lav, i tru saen blong evri tru disaepol blong Jisas Kraes.

Mi bin lanem abaot klin mo stret lav long mama blong mi. Hem i no wan memba blong Jos.

Wan dei, plante yia i pas, mi visitim mama blong mi, we i stap faet wetem kansa. Mi save se bambae hem i ded, be mi wari se hem i bin stap safa. Mi no talem wan samting, be hem i savegud mi, nao i talem: “Mi save se yu stap wari.”

Nao, mi sapraes, mo hem i askem wetem voes blong hem we i nomo gat paoa: “Yu save tijim mi hao blong prea? Mi wantem prea from yu. Mi save se oli stat wetem ‘Dia Papa long Heven,’ be afta, bae mi talem wanem?”

Taem mi nildaon long saed blong hem mo hem i prea from mi, mi filim wan lav we mi neva filim bifo. Hem i simpol, i tru, i stret lav. Nomata we hem i no save abaot plan blong fasin blong sevem man, insaed long hat blong hem i gat plan blong lav blong hem, plan blong lav we wan mama i gat long boe blong hem. Hem i harem bodi i soa, i traehad blong faenem paoa blong prea. Mi harem voes blong hem i sloslo nomo, be mi bin filim lav blong hem.

Mi tingbaot we mi tingting se: “Hao wan i save harem i soa tumas be yet i save prea from wan narawan? Hem nao i stap long nid.”

Nao, ansa i kam klia long maen blong mi: klin mo stret lav. Hem i lavem mi tumas mekem se hem i fogetem hemwan bakegen. Long taem ia we hem i moa had, hem i bin lavem mi i bitim hemwan bakegen.

Nao, ol dia brata mo sista. ?Hemia i no wanem we Sevya i bin mekem? Yes i tru, long wan lukluk we i luk long taem we i no save finis mo i moa bigwan. Be long medel blong sobodi blong Hem we i moa bigwan, long garen, long naet ia, Hem nao i bin man ia we i bin nidim help, i safa long wan wei we yumi no save tingting long hem o andastanem. Be long en, Hem i fogetem Hemwan, mo i bin prea from yumi kasem mak we Hem i bin pem ful praes. ?Olsem wanem nao Hem i save mekem hemia? From stret lav blong Hem long Papa, we i bin sendem Hem, mo lav blong Hem long yumi. Hem i lavem Papa mo yumi i bitim Hemwan bakegen.

Hem i pem praes from wan samting we Hem i no bin mekem. Hem i pem praes from ol sin we Hem i no bin mekem. ?From wanem? Stret lav. From se Hem i bin pem ful praes, Hem i bin save givim yumi ol blesing blong wanem Hem i bin pem, sapos yumi sakem sin. ?From wanem Hem i givim hemia? Bakegen, mo oltaem, i stret lav.

Stret lav, i tru saen blong evri tru disaepol blong Jisas Kraes.

Presiden Thomas S. Monson i bin talem: “Bae yumi stat naoia, tedei nomo, blong talemaot lav blong yumi long evri pikinini blong God, nomata oli ol memba blong famle, ol fren, olgeta we yumi save olgeta, o ol strenja.Taem yumi girap long wanwan moning, bae yumi gat strong tingting blong soem lav mo kaen fasin long huia i stap long rod blong yumi.”⁵

Ol brata mo sista. Gospel blong Jisas Kraes i wan gospel blong lav. Komanmen ia we i bigwan moa, i abaot lav. Long mi, evri samting i abaot lav. Lav long Papa, we i bin sakrifaesem Pikinini blong Hem from yumi. Lav blong Sevya we i bin sakrifaesem evri samting from yumi. Lav blong wan mama o wan papa we bae i givim eni samting from ol pikinini blong olgeta.Lav we yumi gat long olgeta we yumi givim kwaet seves long olgeta, plante long yumi i no save, be Lod i save gud. I lav ia blong olgeta we oli stap fogivim evriwan mo oltaem. I lav ia blong olgeta we oli stap givim moa bitim we oli kasem.

Mi lavem Papa blong mi long Heven. Mi lavem Sevya. Mi lavem gospel. Mi lavem Jos ia. Mi lavem famli blong mi. Mi lavem gudfala laef ia. Long mi, evri samting i abaot lav.

Mi prea se dei ia, blong tingbaot Laef Bakegen long Ded blong Sevya bae i wan dei blong kam niu bakegen long spirit long wanwan long yumi. Bae dei ia i stat blong wan laef we i fulap long lav, i “fandesen ston blong evri dei laef blong yumi.”

Bae hat blong yumi i fulap long klin mo stret lav, i tru saen blong evri tru disaepol blong Jisas Kraes. Hemia i prea blong mi, long nem blong Jisas Kraes, amen.