Tumoro Bae Lod I Mekem Ol Bigfala Wok long Medel blong Yufala

Ol brata mo sista. ?Yufala i save hamas mifala i lavem yufala? ?Yufala i gat wan tingting o save smol nomo long hamas mifala i lavem yufala? Blong 10 aoa, yufala i lukluk nomo long wanwan fes we i stap kam stanap long pulpit ia, mo long ol semfala 10 aoa ia, mifala tu, we mifala i stap sidaon biaen long pulpit ia, mifala i stap lukluk yufala nomo. Yufala i tajem mifala i kasem medel blong sol blong mifala, yufala ia ol 21 taosen long Konfrens Senta ia, o ol plante grup we yufala i stap long ol mitinghaos mo ol japel, o tu, ol milian we yufala i stap long ol hom blong yufala raon long wol, o maet yufala i fasfas tugeta raon long kompiuta skrin blong famli. Yufala i stap long ples, yufala i stap longwe, aoa afta aoa, we yu werem ol bes Sandei klos blong yufala, mo yufala i gat bes fasin blong yufala. Yufala i singsing, mo yufala i stap prea. Yufala i stap lisin mo yufala i stap biliv. Yufala i merikel blong Jos ia. Mo mifala i lavem yufala tumas.

Yumi bin gat wan nara gudfala jeneral konfrens. Yumi gat blesing blong gat Presiden Tomas S. Monson i stap mo ol mesej blong ol profet. Presiden, mifala i lavem yu, prea from yu, talem tangkyu long yu, mo antap long evri samting, mifala i sapotem yu. Tangkyu long yu, mo ol kaonsela blong yu mo plante bigfala man mo woman lida we oli tijim mifala. Yumi harem miusik we i naes tumas. Oli prea mo toktok long mifala. I tru, Spirit blong Lod i bin stap long ples ia we i fulap. Hem i wan wiken blong insperesen long evri saed.

Naoia. Mi luk tu problem i stap. Wan, i we mi mi wan man ia nomo we i stanap bitwin yu mo aeskrim we yu rere finis blong kakae long en blong jeneral konfrens. Nara problem we i save kam antap i stap long foto ia we mi luk i no longtaem long Intanet.

Pikja

Daenoso i ronem ol pikinini

Sore tumas long evri pikinini blong mi we oli haed andanit jea, be wanem we i tru, i we, i no gat wan long yumi i wantem se tumoro, o dei afta, i prapa spolem ol gudfala filing we yumi bin gat long wiken ia. Yumi wantem holemtaet evri kwaet toktok blong Spirit we yumi bin kasem, mo ol insperesen tijing we yumi bin harem. Be yumi no save stopem hemia, bae afta sam taem we yumi luk heven long laef blong yumi, i mas nid blong yumi kambak long wol, olsem blong talem, we ol situesen we oli no gudgud tumas bae oli fesem yumi bakegen.

Man we i raetem buk blong Hibrus i givim woning long yumi taem hem i raetem se: “I gud blong yufala i stap tingbaot ol samting ia we yufala i kasem bifo. Taem we laet blong God i kamtru long yufala, i gat plante samting we i stap mekem yufala i harem nogud, be ol samting ia oli no winim yufala.”¹ Ol samting ia we oli mekem yumi harem nogud be i givim laet long mifala, oli save kam long plante defren wei, mo i save kam long yumi evriwan. I tru se, evri misinari we i go long misin, i luksave se laef long misin i no olsem kaen laef long misinari trening senta. I semmak tu long yumi, taem bae yumi aot long wan swit sesen long tempol, o wan sakramen miting we i bin fulap long Spirit.

Tingbaot se taem Moses i bin kamdaon afta long eksperiens blong hem long Hil Sinae, hem i faenem ol pipol blong olgeta we oli “mekem sin” mo “tanem baksaed finis” long God.² Oli bin stap daon long hil, oli bisi blong mekem wan smol bul we oli wokem long gol blong wosipim, long stret taem ia we Jehova, antap long hil, i bin stap talem long Moses se: “Bambae yufala i no mas mekem wosip long ol narafala god, yufala i mas mekem wosip blong mi nomo,” mo “bambae yufala i no mas mekem pikja blong ol samting …”³ !Moses i no bin hapi long grup blong ol man Isrel blong hem we oli go olbaot long dei ia!

Long taem blong seves blong Hem long wol, Jisas i tekem Pita, Jemes mo Jon oli go antap long Hil we Hem i Kam Narafala, mo ol skripja oli talem se: “Trifala i luk we fes blong hem i saen olsem san, mo klos blong hem oli kam waet olsem laet blong san.”⁴ Ol heven oli open, ol profet blong bifo oli kam, mo God Papa i toktok.

Afta wan eksperiens olsem wetem heven, Jisas i kamdaon long hil mo ?i faenem wanem? Faswan, Hem i faenem disaepol blong Hem i raorao wetem olgeta we oli agensem olgeta from wan blesing we oli givim long wan yang boe mo i no kamtru. Afta Hem i traem blong winim tingting blong Olgeta Twelef—mo i no wokaot—se bae oli salem Hem i go long ol lokol man blong rul we bae oli kilim Hem i ded. Afta, wan i talem se i taem blong pem takis, mo wantaem nomo Hem i go pem. Afta long hemia, Hem i mas tok strong long samfala brata from se oli stap raorao se huia bae i moa hae long kingdom blong God. Evri samting ia i lidim Hem long wan poen we hem i talem: “!Aa! ! … yufala i no bilif nating! ?Bambae mi mas stap wetem yufala i go kasem wetaem?”⁵ Hem i bin gat janis blong askem kwestin ia i bitim wan taem, long taem blong seves blong Hem. !Ating hemia nao i mekem we Hem i wantem go stap Hemwan antap long ol hil!

Taem yumi luksave se yumi evriwan i mas kamdaon long ol gudfala eksperiens blong lukluk long ol samting nating blong laef, bae mi wantem leftemap tingting blong yufala long en blong jeneral konfrens ia.

Faswan, long ol dei we oli stap kam, sapos yu luk sam samting i stap blokem sam pipol raon long yu, be tu, yu faenem sam samting long laef blong yuwan we i no fit nating long standet blong ol mesej we yu bin harem long wiken ia, yu no slakem tingting long saed blong spirit mo yu no givap. Gospel, Jos, mo ol bigfala miting ia we i hapen tu taem long wan yia, tingting biaen long olgeta i blong givim hop mo insperesen, i no blong daonem tingting. Enemi nomo, we i enemi blong yumi evriwan, bae i traem winim tingting blong yu se ol tingting we oli kamaot long jeneral konfrens oli mekem yu wari tumas mo oli no ril, se pipol i no save kam gud moa, se i no gat wan we i stap progres. ?Mo from wanem Lusifa i talem toktok ia? From se hem i save se hem, hem i no save kam gud, se bae hem i no save progres, se blong taem we i no save finis bae hem i no save gat wan gud fiuja. Hem i wan man nating, mo hem i gat limit, mo hem i wantem yumi evriwan i harem nogud tu. No foldaon long hemia. Wetem presen ia we i Atonmen, mo paoa blong heven blong helpem yumi, yumi save kam gud moa, mo gud samting abaot gospel i we, yumi winim poen taem yumi stap gohed blong traem, nomata yumi no win oltaem.

Taem i bin gat toktok i stap go insaed long Jos se huia bae i gat raet long blesing blong heven mo huia bae i no gat, Lod i talem long Profet Josef Smit: “From i tru, mi talem long yufala, mi stap givim ol presen blong gud blong olgeta we oli lavem mi mo oli stap obei long … komanmen blong mi, mo hem we i traem blong mekem olsem.”⁶ !Man!, bae yumi evriwan i no talem tangkyu from toktok ia: “hem we i traem blong mekem olsem.” Hemia i sevem laef blong mi from se samtaem, !hemia nomo nao yumi save givim! Yumi harem gud long tingting ia se sapos God i wantem givim praes long olgeta we oli fetful evriwan, bae Hem i no gat plante man long lis blong Hem.

So plis, tingbaot tumoro, mo evri dei afta long hemia, se Lod i blesem olgeta we oli wantem kam gud moa, we oli akseptem nid blong gat komanmen, mo stap traem blong obei long olgeta, we oli laekem tumas ol klin fasin blong Kraes, mo oli traehad blong kasem ol fasin ia. Sapos yu foldaon smol long rod ia, evriwan tu i stap foldaon; Sevya i stap ia blong helpem yu blong gogohed. Sapos yu foldaon, askem strong paoa blong Hem. Prea strong olsem Alma: “O Jisas, …, gat sore long mi.”⁷ Bae Hem i helpem yu blong girap bakegen. Bae Hem i helpem yu blong sakem sin, blong mekem gud samting bakegen, blong yu stretem wanem yu gat blong stretem, mo gogohed. I no longtaem afta, bae yu gat sakses we yu stap lukaotem.

“Wanem we yu askem long mi, bambae mi mekem long yu,” Lod i talem.

“… putum tras blong yu long Spirit ia we i lidim man blong mekem gud—yes, blong mekem samting i stret, blong wokbaot wetem tingting we i stap daon, blong yumi mekem stret jajmen. …

“… [Nao] evri samting we bambae yu askem long mi, … we oli stret mo gud, … bambae yu kasem olgeta.””⁸

!Mi laekem doktrin ia! Hem i talem bakegen se bae yumi kasem blesing from tingting blong yumi blong wantem mekem gud, iven taem yumi stap traehad blong mekem. Mo i mekem yumi stap tingbaot se kwalifae from ol blesing ia, yumi mas mekemsua se yumi no blokem ol blesing ia long ol narawan: yumi mas mekem i stret long ol man, be i no mekem i no stret; yumi mas wokbaot wetem tingting i stap daon, be i no wetem flas fasin; yumi mas jajem man long stret mo gud fasin, i no se yu nomo yu save samting.

Brata mo sista. Fasfala bigfala komanmen blong evri taem we i no save finis, hem i blong lavem God wetem ful hat, ful paoa blong tingting, ful maen mo ful paoablong yumi—hemia nao fasfala komanmen we i bigwan long evriwan. Be fasfala trutok we i moa bigwan long evriwan mo i blong evri taem we i no save finis, hem i we God i lavem yumi wetem ful hat, ful paoa blong tingting, ful maen mo ful paoa blong Hem. Lav ia i fandesen ston blong taem we i no save finis, mo i mas fandesen ston blong evri dei laef blong yumi. Yes, hem i wetem stret save ia nomo we i laet olsem faea insaed long sol blong yumi we bae yumi gat tras blong gogohed blong biliv, gogohed blong traem kam antap, gogohed blong askem fogivnes from sin blong yumi, mo gogohed blong gat gladhat long neiba blong yumi.

Presiden Joj K. Kanon i tijim: “Nomata tes i bigwan, nomata hadtaem i bigwan, nomata harem nogud i bigwan, God bae i no ronwe long yumi. Hem i neva ronwe, mo bae Hem i neva mekem. Hem i no save mekem. Hemia i no fasin blong Hem blong mekem olsem. Oltaem bae i stanap long saed blong yumi. Bae yumi pas tru long bigfala faea we i laet; yumi save pas tru long ol solwota we i dip; be bae yumi neva bon o harem se i tumas. Bae yumi kamaot long evri tes mo taem ia we i had, we yumi kam moa gud, mo moa klin from ol hadtaem ia.⁹

Nao, wetem strong tingting ia we i stap ring long heven olsem samting we i soem rod long yumi oltaem long laef blong yumi, we i kamaot tru long stret mo klin laef, ded mo Atonmen blong Lod Jisas Kraes, bae yumi save ronwe long risal blong sin mo krangke fasin—blong yumi mo blong ol narawan—long eni wei we oli kamaot long hem long rod blong evri dei laef blong yumi. Sapos yumi givim hat blong yumi long God, sapos yumi lavem Lod Jisas Kraes, sapos yumi mekem bes we yumi save mekem blong laef folem gospel, nao long tumoro—mo evri nara dei—hem i wan bigfala mo gudfala dei, nomata yumi no luksave se i wan gud dei. ?From wanem? !From Papa long Heven i wantem se i olsem! Hem i wantem blesem yumi. !Wan laef we i gat praes, i fulwan mo i no save finis i stap stamba blong plan blong sore we Hem i gat long ol pikinini blong Hem! I wan plan we i stanap long trutok ia se “evri samting oli wok tugeta blong gud blong olgeta we oli lavem God.”¹⁰ So yu gohed blong traem. Gohed blong trastem Hem. Gohed blong biliv. Gohed blong gro. Heven i stap klapem han from yu, tedei, tumoro, mo blong oltaem.

“?Weswe? ?Yufala i no save? ?Yufala i no harem stori blong hem? Aesea i talem.

“Olgeta we oli taed, hem i stap givim paoa log olgeta, mo olgeta we oli no strong hem i stap mekem olgeta oli strong bakegen. …

“Be olgeta we oli stap luk long Hae God …hem i stap givim paoa long olgeta. Bambae oli girap olsem we oli gat wing olsem pijin ya, igel. …”

“Mi mi Hae God, … Mi nao mi stap mekem yufala i strong mo stap talem long yufala se !Yufala i no fraet! !Mi bambae mi givhan long yufala!”¹¹

Ol brata mo sista. Bae Papa long Heven we i gat lav i blesem yufala tumoro blong yufala i tingbaot hao Hem i bin filim tedei. Bae i blesem yumi blong traehad, wetem longfala mo strong tingting, from ol tingting we yumi harem oli talem long konfrens wiken ia, wetem save ia se lav blong Hem we i kam long heven, mo givhan blong Hem bae i stap wetem yumi taem yumi traehad—no, bae i stap wetem yumi, speseli taem yumi traehad bigwan.

Sapos yu luk se ol gospel standet ia oli hae tumas, mo yu no kam antap gud long ol dei we oli stap kam, tingbaot gud toktok blong Josua long ol pipol blong hem taem oli bin fesem denja long fiuja. Hem i talem: “Yufala i mas mekem yufala i klin long fes blong Hae God fastaem, from we tumoro, hem bambae i mekem ol merikel long medel blong yumi.”¹² Mi talem semfala promes ia tu. Hem i promes blong konfrens ia. Hem i promes blong Jos ia. Hem i promes blong Hem we i mekem ol gudfala samting ia, we Hem, Hemwan i “Gudfala, Kaonsela, God we I Hae Olgeta, … Prins blong Pis.”¹³ Hem, mi mi wan witnes long Hem, mo long Hem, konfrens ia i stanap olsem wan testeman. Long nem blong Jisas Kraes, amen.