O Oe o se Faiaoga i le Ekalesia a Iesu Keriso.

Ua valaauina oe e le Atua e aoao Lana fanau i le ala a le Faaola. Sa vaetofiaina oe i lenei valaauga i le pule o Lana perisitua paia. Tusa lava pe le o oe o se faiaoga ua i ai le tomai masani, a o e ola agavaa, tatalo i aso taitasi, ma suesue i tusitusiga paia, o le a avatu e le Tama Faalelagi ia te oe le tosinaga ma le mana o le Agaga Paia (tagai 2 Nifae 33:1)

O i latou ua tuuina atu i lau vaavaaiga o fanau a le Atua, ma ua Ia silafia mea latou te manaomia ma le ala sili e aapa atu ai ia te i latou. E ala i le Agaga Paia, o le a taialaina ai oe i le taimi o au tapenapenaga ma a o e aoao atu. O le a Ia faaali atu ia te oe mea e tatau ona e fai atu ai ma mea e tatau ona e faia.

O le faamoemoega taua o le aoaoina o le talalelei o le suia lea o olaga. O lau sini o se faiaoga, o le fesoasoani lea ia i latou e te faiaoga ai e faia mea uma latou te mafaia ina ia liua ai i le talalelei a Iesu Keriso---o se sini e faalautele i talaatu o taimi o le vasega. Valaaulia i latou e te faiaoga ai e auai atoatoa i le faatinoga o lo latou lava aoaoina o mataupu faavae ma aoaoga faavae a Keriso ma galulue ai i mea latou te aoaoina. Fautuaina i latou e fai a latou lava suesuega ma suesuega faaleaiga i fafo atu o le vasega o le uluai taulaiga o lo latou aoaoina o le talalelei. A o latou galulue ai i le faatuatua e ala i le suesue o le tagata lava ia, ma faatasi ai ma aiga, o le a latou valaaulia le Agaga i o latou olaga ma faamanuiaina atili nai lo se isi lava mea e fai e le faiaoga.

Aoao atu na o le aoaoga faavae lava o le talalelei toefuataiina a Iesu Keriso o loo maua i tusitusiga paia ma upu a perofeta o aso e gata ai. O aoaoga faavae mama---faavavau, o upumoni e le masuia e aoao mai e le Atua ma Ana auauna---e valaaulia ai le Agaga ma o loo i ai le mana e suia ai olaga.

O le valaauga e faiaoga o se faatuatuaga paia, ma o se mea masani le lagona lofituina i nisi o taimi. Ae manatua o le Atua na valaauina oe, ma o le a Ia le tuulafoaiina lava oe. O le galuega lenei a le Alii, ma a e auauna atu “ma lou loto atoa, manatu, mafaufau ma le malosi atoa” (MFF 4:2) o le a Ia faalauteleina ou gafatia, meaalofa, ma taleni, ma o le a faamanuiaina olaga o i latou e te faiaoga ai i lau auaunaga.