Visiting Tijing Mesej, Jun 2014
Tabu Misin blong Jisas Kraes: Givim Seves
Stadi long toktok ia wetem prea mo luklukgud blong save wanem blong serem. ?Olsem wanem nao taem yu andastanem laef mo misin blong Sevya i leftemap fet blong yu long Hem mo blesem olgeta we yu stap lukaotem olgeta tru long visiting tijing? Blong kasem moa infomesen, go long reliefsociety.lds.org.
Fet• Famle • Help
Taem yumi givhan long ol narawan, yumi kam olsem ol tru man mo woman blong folem Jisas Kraes, we i soem eksampol long yumi. Presiden Tomas S. Monson i talem: “Olgeta we oli gat nid oli stap raon long yumi. … Yumi ol han blong Lod long wol ia, wetem komanmen blong givim seves mo blong leftemap ol pikinini blong Hem.”1
Linda K. Beton, Rilif Sosaeti jeneral presiden, i bin tijim: “Wetem praktis, wanwan long yumi i save kam olsem Sevya taem yu stap wok from ol pikinini blong God. Blong helpem yumi gud moa blong [givim seves] long wanwan long yumi, mi wantem blong givim fo toktok blong tingabaot: ‘Faswan lukluk, afta givim seves.’ … Taem yumi mekem olsem, yumi stap kipim ol kavenan, mo seves blong yumi, olsem seves blong Presiden Monson, bae i soemaot se yumi ol tru disaepol.”2
Yumi save prea evri moning blong luksave ol janis blong givim seves long ol narawan. “Papa long Heven bae i lidim yu, mo ol enjel bae oli helpem yu,” Deved L. Bek, Yang Man jeneral presiden i bin talem. “Bae yu kasem paoa blong blesem ol laef mo sevem ol sol.”3
I Kamaot long Ol Skripja
I Kamaot long Histri blong Yumi
Long Oktoba 1856 jeneral konfrens, Presiden Brigham Yang (1801–77) i bin anaonsem se ol paeonia we oli pulum hankat oli stap krosem yet bigfala fil mo we evriwan i nid blong karem i kam tugeta ol kaekae mo ol samting blong helpem olgeta kwiktaem. Lusi Mesev Smit i bin raetem se ol woman “ol tekemaot ol pitikot sket blong olgeta, ol stoking, mo evri samting we oli save givim, stret insaed long Tabenakol, mo hipimap insaed long ol wagun (kat).”
Taem ol paeonia we oli bin go blong sevem olgeta, oli stat blong kam insaed long Sol Lek Siti, Lusi i bin raetem, “Mi neva filim i moa …gud long eni wok we mi stap mekem long laef blong mi, from i gat wan filing blong yuniti i bin stap long ol pipol ia. Mi go insaed long stoa nomo mo talem wanem mi wantem; sapos hem i klos, oli makem nomo mo no pem.”4
Presiden Joj Albet Smit (1870–1951) i tokbaot blong givhan long ol narafala man: “Bae oli makem hapines blong yumi we i no save finis long fasin we yumi givim yumiwan blong helpem ol narafala man.”5
Tingbaot Hemia
-
?Olsem wanem prea i save lidim yumi blong kam olsem ol tul long ol han blong Lod?
-
?Olsem wanem fasin blong givhan long ol narafala man i helpem yumi kipim ol kavenan blong yumi?
© 2014 i kam long Intellectual Reserve, Inc. Oli gat evri raet. Oli printim long YSA. Oli letem long Inglis: 6/14 Oli letem translesen: 6/14 Translesen blong Visiting Teaching Message, June 2014. Bislama. 10866 852