Mesazhi i Vizitave Mësimore, Gusht 2014
Misioni Hyjnor i Jezu Krishtit: Mesia
Studiojeni me lutje këtë material dhe kërkoni të dini se çfarë të thoni. Në ç’mënyrë të kuptuarit e jetës dhe roleve të Shpëtimtarit do ta rritë besimin tuaj tek Ai dhe do t’i bekojë ato për të cilat kujdeseni nëpërmjet vizitës mësimore? Për më tepër informacion, shkoni te reliefsociety.lds.org.
Besim, Familje, Ndihmë
Shkrimet e shenjta na mësojnë se ne mund të banojmë në praninë e Perëndisë “nëpërmjet meritave dhe mëshirës dhe hirit të Mesias së Shenjtë” (2 Nefi 2:8). Mesia është “një fjalë aramaike dhe hebraike që do të thotë ‘i vajosuri’. Në Dhiatën e Re, Jezusi quhet Krisht që është ekuivalenti në greqisht i Mesias. Do të thotë Profeti i vajosur, Prift Mbret dhe Çlirimtar.”1
Plaku Xhefri R. Holland, i Kuorumit të Dymbëdhjetë Apostujve, dëshmoi: “Unë e di se [Jezu Krishti] është i Shenjti i Izraelit, Mesia që do të vijë një ditë përsëri në lavdinë finale, të mbretërojë në tokë si Zot i zotërve dhe Mbret i mbretërve. Unë e di që nuk ka emër tjetër të dhënë nën qiell me të cilin mund të shpëtohet një burrë [ose grua].”2
“[Jezu Krishti] është Shpëtimtari dhe Shëlbuesi i botës”, tha Presidenti Diter F. Uhtdorf, Këshilltar i Dytë në Presidencën e Parë. “Ai është Mesia i premtuar. Ai jetoi një jetë të përsosur dhe shleu për mëkatet tona. Ai do të jetë gjithmonë pranë nesh. Ai do t’i luftojë betejat tona. Ai është shpresa jonë; Ai është shpëtimi ynë; Ai është udha.”3
Shkrime të Shenjta Shtesë
Nga Shkrimet e Shenjta
Dishepullet femra të Krishtit kanë qenë dëshmitare të rolit të Tij si Mesia. Maria Magdalena ishte një dishepulle e Jezu Krishtit. Ajo ishte e para që e pa se “guri ishte hequr nga varri” mëngjesin e Ringjalljes së Krishtit. Ajo “kishte mbetur jashtë varrit, dhe po qante” pasi zbuloi se trupi i Tij nuk ishte më brenda varrit.
Pastaj, “ajo u suall prapa dhe pa Jezusin, që qëndronte në këmbë; por ajo nuk e dinte se ishte Jezusi.
Jezusi i tha: ‘O grua, pse po qan? Kë kërkon?’ Ajo, duke menduar se ishte kopshtari, i tha: ‘Zot, po e pate hequr ti, më trego ku e vure dhe unë do ta marr’.
Jezusi i tha: ‘Mari!’. Dhe ajo atëherë u kthye dhe i tha: ‘Rabboni!’, që do të thotë: Mësues.” Maria e dalloi se Ai nuk ishte kopshtari, por Jezu Krishti, Mesia. (Shih Gjoni 20:1–17.)
© 2014 nga Intellectual Reserve, Inc. I rezervohen të gjitha të drejtat. Shtypur në SHBA. Miratuar për anglisht: 6/14. Miratuar për përkthim: 6/14. Përkthim i Visiting Teaching Message, August 2014. Albanian. 10868 101
Merreni Parasysh Këtë
Përse është e rëndësishme ta kuptoni rolin e Shpëtimtarit si Mesia?