?Fridom blong Jusum o Gud Fasin blong Fridom blong Mekem Joes?
Yusum ejensi wetem waes, i kipim ol joes blong yumi i open mo impruvum wanem yumi save mekem blong jus i stret.
Foto i kam long Kristina Smit Christina Smith; Ol pikja oli kam long Braean Bij
Mi tingbaot yet olsem wanem mi bin wari taem mi bin rere blong luk bisop blong mi blong go long wan misin. Mi stap tingting sapos mi bin gud inaf. Olsem Profet Josef Smit, mi no bin gilti long eni bigfala o rabis sin (luk long Joseph Smith—History 1:28), be mi gohed blong stap wari.
Mi bin wari from mi no bin save stop blong tingbaot fren blong mi Dani (Oli jenisim nem). Blong plante manis we Dani i bin stap tokbaot olsem wanem hem i no save wet blong mekem misinari wok. Be samting ia i no bin hapen afta we hem i bin mitim bisop.
From se Dani i bin tekpat wetem sam yang woman blong mekem sam rabis fasin, hem i talem long mi afta, se hem i bin diskwalifaem hemwan long fultaem misinari wok. Hem i nomo fri blong jusum wan misin.
Dani, long ol toktok blong Presiden Boed K. Peka, Presiden blong Kworom blong Olgeta Twelef Aposol, i bin foldaon long temtesen blong Setan “blong yusum nogud gud fasin blong fridom blong mekem joes.”1
Tru fridom, olsem Blong Ol Yut Oli Kam Strong i tijim, i kam taem yumi yusum ejensi blong yumi blong jus blong stap obei. Lusum fridom, olsem Dani i bin lanem, i kam taem jusum blong no stap obei.
“Taem yu fri blong jusum wanem aksen bae yu tekem, yu no fri blong jusum ol en risal blong hem. Nomata sapos i gud o nogud, ol en risal i folem olsem wan nomol risal blong ol joes we yu mekem.”2
Stap Ol Ejen blong Yumiwan
From ol skripja i tijim se yumi “fri blong jusum,” “fri blong tekem aksen,” mo fri blong mekem ol samting “folem fri tingting blong [yumiwan]” (2 Nifae 2:27; 10:23; D&C 58:27; Hileman 14:30),
?Be yu bin save se toktok ia “fridom blong jusum” i no stap long olgeta skripja? Be, ol skripja i tijim se evri man i mekem samting long saed blong doktrin mo prinsipol … folem gud fasin blong fridom blong mekem joes we mi bin givim long hem, blong mekem se evri man i ansa from sin blong hemwan long dei blong jajmen (luk long D&C 101:78; oli ademap italik).
Elda D. Tod Kristofeson blong Kworom blong Olgeta Twelef Aposol i bin tijim: “Toktok ia ejensi i kamaot [long ol skripja] hemwan nomo o tru wan nara nem gud fasin. … Taem yumi yusum toktok ia gud fasin blong fridom blong mekem joes, yumi stap talemaot long wan stret wei, se fasin blong stap akaontebol i wan impoten pat blong tabu presen ia blong ejensi. Yumi ol man wetem gud fasin mo ol ejen blong yumiwan, fri blong jus be tu responsibol long ol joes blong yumi.”3
Presiden Peka i ademap, “Insaed long ol skripja, ejensi i olsem ‘gud fasin blong fridom blong mekem joes,’ we i minim se yumi save jus bitwin gud mo nogud.”4 Presen ia we God i givim, i minim se yumi “fri blong jusum fridom mo laef we i no save finis, tru long bigfala Man blong givhan blong evri man, o blong jusum blong kam prisena mo ded, folem fasin blong kam prisena mo paoa blong devel” (2 Nifae 2:27).
Setan i Faet Agensem Ejensi
From gud fasin blong fridom blong mekem joes i plei wan impoten rol long plan blong fasin blong sevem man, Setan i bin wantem blong prapa spolem gud fridom blong man blong mekem joes long laef bifo laef long wol ia. Oli bin sakemaot hem from hem i bin faet mo naoia i lukaotem bong trikim mo mekem evri man oli blaen, mo blong lidim olgeta i kam prisena folem tingting blong hem (luk long Moses 4:3–4).
Setan i wantem yumi blong mekem ol joes we i mekem yumi no save gat fridom, we i lid i go long ol rabis fasin mo ol adiksen, mo lego yumi taem yumi nomo gat paoa blong winim ol temtesen. Gudfala samting abaot gospel hem i we i mekem yumi save long ol joes blong yumi mo ol en risal blong ol joes ia. Waes wei blong yusum ejensi, i kipim ol joes blong yumi i open mo impruvum mifala blong save olsem wanem blong folem.
Eksampol blong Sevya
Taem plan blong fasin blong sevem man, oli bin presentem long Bigfala Miting long Heven, Sevya i bin soem long yumi olsem wanem blong yusum gud fasin blong fridom blong mekem ol joes we i moa stret. Jisas Kraes i talem se bae Hem i mekem folem tingting blong Papa, mo glori bae i blong Papa blong oltaem (luk long Moses 4:2). From se Hem i bin glad blong mekem tingting blong Papa mo afta long Garen blong Getsemane mo long kros (luk long Matiu 26:39; Luk 22:42), Jisas i bin pem praes from ol joes blong yumi we i nogud mo soem wan wei blong yumi blong kasem fogivnes tru fasin blong sakem sin.
Sapos yumi folem eksampol blong Sevya, be no talem se, “Mi mekem wanem we mi wantem,” bae yumi talem, “Mi mekem wanem Papa i wantem.”5 Taem yumi yusum gud fasin blong fridom blong mekem joes long wei ia, bae i givim yumi fridom mo hapines.
Taem mi bin go blong luk bisop blong mi from fas intaviu blong mi, mi bin glad se mi bin mekem ol gud joes. Sam manis afta, mi bin go long Guatemala blong mekem misinari wok blong Lod—tijim ol nara man plan ia blong fasin blong sevem man mo olsem wanem gud fasin blong fridom blong mekem joes i plei wan impoten rol long plan ia.