Cov Mus Saib Xyuas Tom Tsev tsab Xov, Plaub Hlis Ntuj 2015
Tej Cwj Pwm ntawm Yexus Khetos: Tsis Muaj Siab Xav Dag
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab tej luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Thaum peb to taub tias Yexus Khetos tsis muaj siab xav dag, ua rau peb rau siab coj raws li Nws tus yam ntxwv. Txwj Laug Joseph B. Wirthlin (1917–2008) ntawm Pawg Kaum Ob tug Thwj Tim hais tias: “Kev ntxias txhais hais tias yus coj lwm tus mus ua yuam kev. … Ib tug neeg uas tsis muaj siab xav dag yog ib tug neeg uas tsis muaj txim, ua ncaj ncees, muaj siab dawb huv, thiab niaj hnub hauv nws lub neej nws ua raws li tej ntsiab cai ncaj ncees. … Kuv ntseeg tias niaj hnub nim no cov mej zeej hauv lub Koom Txoos yuav tsum tsis txhob muaj siab xav dag vim ntau tus nyob hauv lub ntiaj teb no tsis to taub lub ntsiab cai no tseem ceeb npaum li cas.”1
Hais txog kev ua siab dag, Thawj Tswj Hwm Dieter F. Uchtdorf, tus Pab Cuam thib Ob hauv Thawj Pawg Thawj Tswj Hwm, hais tias: “Tsis muaj leej twg uas zoo ib yam li Yexus Khetos zoo li peb paub peb yuav tsum ua.” Tiam sis peb mob siab xav kov yeej peb tej kev ua yuam kev thiab tej kev xav ua txhaum. Peb xav ua zoo dua ntxiv kawg siab kawg ntsws nrog Yexus Khetos txoj Kev Theej Txhoj txoj kev pab.”2
Peb paub tias, “Vajtswv yuav txiav txim rau peb raws li tej yam peb ua, tej yam uas peb xav hauv peb lub siab, thiab saib seb peb yog neeg zoo li cas.”3 Tiam sis thaum peb hloov siab lees txim, peb yuav ua neeg dawb huv ntxiv—thiab “tag nrho cov uas muaj siab huv tau koob hmoov: vim lawv yuav pom Vajtswv” (Mathais 5:8).
Vaj Lug Kub Ntxiv
Los ntawm cov Vaj Lug Kub
Cov me nyuam tsis muaj siab xav dag. Yexus Khetos hais tias: “Cia li tso cov me nyuam yaus los cuag kuv, tsis txhob txwv lawv, rau qhov Vajtswv lub [nceeg vaj] yog cov neeg uas muaj lub siab zoo li cov me nyuam yaus no tug. … Yexus txawm rub cov me nyuam yaus ntawd los rau hauv nws xub ntiag; nws cev tes plhws lawv txhua tus thiab foom koob hmoov rau lawv” (Malakaus 10:14, 16).
Yexus Khetos kuj txhawb pab cov me nyuam nyob hauv Amelikas tom qab Nws raug ntsia saum ntoo khaub lig. Nws txib kom cov neeg coj lawv cov me nyuam yaus tuaj rau Nws thiab “tau muab lawv tso rau hauv av ncig nws, thiab Yexus tau sawv ntsug hauv nruab nrab; …
“… [Thiab] nws tau quaj, thiab cov neeg coob coob tau ua tim khawv txog nws, thiab nws tau muab lawv tej me nyuam yaus, ib tug dhau ib tug, thiab tau foom koob hmoov rau lawv, thiab tau thov Leej Txiv rau lawv. …
“Thiab thaum lawv tau ntsia kom pom lawv tau ntsia lawv tej qhov muag mus rau saum ntuj, thiab … lawv tau pom tej tim tswv tau nqis tawm saum ntuj ceeb tsheej los zoo ib yam li nyob hauv plawv hluav taws; thiab lawv tau nqis los thiab tau vij ib puag ncig cov me nyuam ntawd, … thiab tej tim tswv tau muab kev pab rau lawv” (3 Nifais 17:12, 21, 24).
© 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/14. Pub txhais ua lus Hmoob: 6/14. Kev txhais Visiting Teaching Message, April 2015. Hmong. 12584 295
Xav Txog Qhov No
Peb yuav kawm dab tsi los ntawm cov me nyuam yaus txog kev tsis muaj txim? (Saib Guide to the Scriptures, “Guile.”)