Coj Yam Ntxwv Zoo Li Sarah rau Lwm Tus

Thaum yav tas los nyuaj rau kuv hais tias yog kuv txoj kev ntseeg thaum kuv teb ib lo lus nug yooj yim teb xws li “Vim li cas koj tsis haus kafes?” Yav dhau los kuv tsuas hais tias “Iab heev” los sis “Kuv tsis nyiam dej kafes xwb.”

Vim li cas kuv txaj muag? Vim li cas kuv ntshai tiv thaiv kuv txoj kev ntseeg? Thaum kuv xav txog qhov no, kuv tsis to taub kuv ntshai dab tsi. Tiam sis kuv nco qab thaum twg kuv tsum tsis thov txim ntxiv li lawm.

Muaj ib hnub nyob hauv kuv hoob kawm lus Akiv hauv tsev kawm ntawv high school, tus xib hwb hais tias peb yuav saib ib qho kev ua yeeb yam hauv TV uas kuv paub tias tsis tsim nyog kuv saib. Lwm tus tub ntxhais kawm ntawv qw zoo siab, tiam sis kuv tus khub Sarah tsa nws tes thiab nug seb nws mus puas tau.

Thaum tus xib hwb nug vim li cas, Sarah teb kiag hais tias, “Vim kuv yog ib tug neeg Maumoos thiab kuv tsis saib kev ua yeeb yam thaum lawv hais lus phem.”

Qhov uas nws ua siab loj sawv tab meeg txhua tus hauv hoob kawm ua rau kuv xav tsis thoob. Vim Sarah ua li ntawd, kuv kuj sawv thiab nyob sab nraud tos mus txog thaum lawv saib tiav lawm.

Ua rau kuv hloov siab mus ib txhis. Kuv pib piav txog kuv txoj kev ntseeg, tsis zam ntxiv lawm. Yog li ntawd, kuv ntseeg kuv tus kheej thiab koom tes hauv lub Koom Txoos thiab tsev kawm ntawv ntxiv.

Kuv tsis tau qhia Sarah hais tias nws tus yam ntxwv muaj nqi rau kuv, tiam sis kuv xyaum coj zoo li nws. Tam sim no kuv paub tias qhov uas kuv yog ib tug mej zeej hauv Vajtswv lub Koom Txoos zoo kawg nkaus yeej tsis yog ib qho uas yuav tsum ua rau kuv txaj muag. Kuv cia siab hais tias, kuv yuav coj yam ntxwv zoo li Sarah rau lwm tus.