Txiaj Ntsim Zoo Tag Nrho

Thaum lub caij Christmas, peb ua koob tsheej txog peb Leej Txiv Saum Ntuj Ceeb Tsheej lub txiaj ntsim zoo tag nrho uas yog Nws Leej Tub uas Nws Hlub Yexus Khetos, tus Cawm Seej ntawm neeg ntiaj teb. Kom ua lub cim rau lub txiaj ntsim zoo tshaj no, lub caij Christmas yog ib lub sij hawm rau peb feem coob muaj kev xyiv fab los ntawm qhov uas peb pub rau luag. Peb twb kawm dhau los hais tias qhov no yeej yog ib qho nyuaj heev.

Thaum xyoo 1970 kuv yog ib leej txiv uas muaj peb tug me nyuam tub. Ib yam li tej khub niam txiv, kuv tau khwv ua hauj lwm kom pab tau kuv tsev neeg loj hlob. Ob hnub tom qab hnub Christmas kuv paub kuv yuav tsum mus deb ua lag luam, cia kuv tus poj niam, Kathleen, saib xyuas kuv cov tub thaum lawv phav tsis mus kawm ntawv. Vim kuv paub tias lawv txoj kev zoo siab yuav nyob ntawm seb lawv puas txais tej khoom plig zoo rau lub caij Christmas rau lawv ua si, peb thiaj li ua tib zoo xaiv lawv tej khoom plig. Rau peb tus me nyuam tub hlob, uas muaj xya xyoo, peb muab ib lub tshuab ntsuas huab cua, kom paub tias huab cua yav tom ntej yuav zoo li cas.

Peb kawm tias yuav tsum muab nws dhos koom ua ke. Kuv tus tub thiab kuv zaum thiab muab nws lub tshuab ntsuas huab cua zoo nkauj dhos ua ke. Peb muab ntau qho tso rau ntawm lub rooj thiab ua tib zoo nyeem tej lus qhia kom paub muab dhos ua ke.

Tom qab ob peb teev, ua rau kuv paub zoo tias txawm peb yuav muab tag nrho tej qhov ntawd dhos ua ke raws li qhov yog los, tseem muaj teeb meem ntawm qhov uas ua rau cov kua hauv lub tshuab ntsuas huab cua nce thiab nqis. Kuv sim tsis qhia kuv tus tub tias kuv ua xyem xyav, tiam sis thaum lig lig tsaus ntuj, tom qab nws pw lawm, kuv nyuaj siab dhau kuv thiaj li sau hauv kuv phau ceev xwm txheej sau ib tsab ntawv rau lub koom haum uas tau ua lub tshuab ntsuas huab cua ntawd. Nov yog ib feem ntawm tsab ntawv ntawd, uas kuv zoo siab kuv tsis tau xa mus.

“Wb tus tub zoo siab rau nws lub tshuab ntsuas huab cua. Nws muaj xya xyoo thiab muaj kev ntseeg tias ib qho uas zoo nkauj npaum li no yuav tsum khiav zoo xwb xwb. Kuv cia siab tias huab cua yuav tsis hloov ua ntej nej teb kuv, vim kuv tsis xav nyiag mus sab saud thiab ntxias nws los ntawm kev siv tes kho nws lub tshuab, thiab kuv tsis xav kom nws tsis ntseeg nej lub tshuab ntsuas huab cua. … Thov nej qhia kuv paub muab nws kho. Tsis yog nws yuav tsis ntseeg nej tiam sis nws yuav tsis ntseeg kuv yog nej tsis pab kuv.”

Tsis muaj neeg pab ua ntej twb txog lub sij hawm yuav tsum ua kom lub txiaj ntsim Christmas ntawd khiav tau. Tiam sis wb tus tub, tus uas tam sim no yog ib leej txiv lawm, nco qab txog kev hlub uas wb muaj thaum wb ib leeg pab ib leeg. Thiab nws tseem muaj kev ntseeg hais tias tus txheej txheem ntawm Vajtswv txoj kev tsim lub ntiaj teb thiab huab cua no ua rau yus thiaj twv tau txog huab cua. Nws txoj kev ntseeg ntawd yeej tsis ploj mus vim wb ua hauj lwm ntau kom lub tshuab ntsuas huab cua khiav tau.

Los ntawm lub sij hawm ntawd wb tau kawm qhov uas nej twb paub lawm: Feem ntau yuav tsum muaj luag txoj kev pab kom muab kev xyiv fab rau lwm tus. Yus nrhiav tsis tau thaum nyob yus ib leeg xwb. Kev koom ua ke nrog lwm tus ua rau kev xyiv fab ncha mus thiab nyob ruaj khov kho. Thiab qhov tseem ceeb tshaj plaws, kev ntseeg tus Cawm Seej, tus uas tsim txhua yam thiab lub hauv paus ntawm kev zoo siab tas mus ib txhis, caw neeg txais Vajtswv txoj kev hlub, uas yog lub txiaj ntsim zoo tshaj plaws thiab lub hauv paus ntawm kev xyiv fab uas tsis ploj mus.

Qhob tseeb no twb nkag hauv peb lub siab thaum ib lub caij Christmas ntau xyoo tom qab wb tau sim kho lub tshuab ntsuas huab cua.

Kuv txiav txim tsim thiab txua ntoo ua ib lub thawv tso tej yam muaj nqi rau kuv tus poj niam. Yuav tsum muaj ntau tus neeg siab zoo uas muaj tej cuab yeej thiab txuj ci uas kuv tsis muaj los pab kuv. Kuv nrog lawv ua hauj lwm tau ntau lub lim tiam. Kuv kuj yuav tsum muaj tus Vaj Ntsuj Plig Dawb Huv txoj kev pab kom kuv paub yuav ntxiv txoj kev hlub thiab kev ntseeg txoj moo zoo rau hauv lub txiaj ntsim ntawd.

Nyob hauv lub hau kuv txua ntoo uas peb tsev neeg tus qauv tsiaj ntawv. Ntawm pem hauv ntej kuv kho ob daim. Kuv txua ntoo ua kuv lub npe thawj tus tsiaj ntawv rau ib daim, thiab kuv tus poj niam thawj tus tsiaj ntawv rau ib daim. Kom qhib lub thawv ntawd yuav tsum siv ob tus yuam sij, ib tus yuav qhib lub ntsuas phoo nyob rau ntawm kuv tus tsiaj ntawv thiab ib tug yuav qhib lub ntsuas phoo nyob rau ntawm kuv tus poj niam tus tsiaj ntawv.

Tam sim no peb siv lub txiaj ntsim no ua peb tsev neeg lub thawv tso tej yam uas muaj nqi. Yog li ntawd thaum lub caij Christmas uas nws nyob hauv qab tus ntoo thiab txij ntawd los, qhov uas peb pom lub thawv ntawd ua rau peb ib leeg hlub ib leeg hauv peb lub siab thiab xav txog tus Cawm Seej txoj kev txi kom peb thiaj muaj kev sib yuav thiab ua tau ib tsev neeg nyob mus ib txhis. Tam sim no, lub thawv uas muaj peb tsev neeg tej daim duab thiab tej daim ntawv sau zaj nkauj Christmas, nws nyob ze peb lub piano qub qub nyob hauv peb chav nyob. Qhov uas kuv tsim lub txiaj ntsim ntawd uas rau kuv hlub kuv tsev neeg thiab tus Xib Hwb.

Tej lub sij hawm kuv tseem pom thiab ua tsaug rau cov neeg uas pab kuv tsim lub thawv ntawd. Thaum kuv rov qab pom lawv dua, kuv rov qab muaj kev xyiv fab vim peb tsim ib lub txiaj ntsim ntawm kev hlub tsev neeg thiab ua ib lub cim rau kev hlub tus Cawm Seej. Kuv pom kev xyiv fab los ntawm kuv cov phooj ywg txoj kev luag nyav, ib yam li muaj thaum peb ua hauj lwm ua ke ua lub thawv ntawd.

Nej paub los ntawm tej yam nej twb tau ua thaum lub caij Christmas hais tias kev xyiv fab li no los ntawm kev tsim thiab muab tej txiaj ntsim ntawm kev hlub rau lwm tus. Piv txwv hais tias, nej feem coob tau pab ib tug me nyuam mus muab khoom qab zib rau cov uas kho siab heev thaum lub caij Christmas. Tus uas txais lub txiaj ntsim me me los ntawm ib tug me nyuam xav tias lub txiaj ntsim no muaj nqi npaum li tej tshuaj tsw qab. Thiab ua rau ib tug me nyuam uas muab ib lub txiaj ntsim li no nco txog cov neeg Txawj Ntse uas coj txiaj ntsim los ntawm Sab Hnub Tuaj rau tus Cawm Seej. Tus uas muab txiaj ntsim thiab tus uas txais yuav nco txog Yexus Khetos thiab muaj kev hlub thiab kev ris txiaj.

Cov tub hluas ntxhais hluas nyob hauv lub Koom Txoos, nrog lawv cov thawj coj, muaj peev xwm muab lub txiaj ntsim ntawm kev hlub thiab lus tim khawv nyob hauv tej dab ua kev cai raus dej hauv peb cov tuam tsev. Qhov uas muaj ntau lub tuam tsev nyob ze cov tub hluas ntxhais hluas ua rau lawv feem coob haj yam muaj cib fim ua li ntawd, thiab haj yam ua tau ntau dua li qub. Cov npisov thiab cov thawj coj ntawm cov tub hluas ntxhais hluas pab txhawb nqa lawv; tej tug kuj yuav koom nrog cov hluas ua hauj lwm hauv lub tuam tsev. Lawv txhua tus muab qhov koob hmoov ntawm kev ntxuav thiab kev ua dawb huv uas los ntawm tus Cawm Seej rau cov uas txais tsis tau lub txiaj ntsim ntawd thaum lawv ua neej nyob.

Cov tub txib ntau zuj zus tuaj lawv koom nrog tus Cawm Seej thiab lawv cov khub muab lub txiaj ntsim txoj sia nyob mus ib txhis rau lwm tus. Vim tau hloov hnub nyoog uas yus tsim nyog mus ua cov tub txib txoj hauj lwm, muaj ntau tus uas yuav muaj kev xyiv fab muab qhov txiaj ntsim uas muaj nqi tshaj plaws rau lwm tus. Cov tub txib kuj muab Phau Ntawv Maumoos rau txhua tus uas lawv ntsib. Yog ib lub txiaj ntsim uas yog kev hlub thiab lus tim khawv, uas raug tsim los ntawm Vajtswv txoj kev tshoov siab rau cov yaj saub puag thaum ub. Tus Cawm Seej xav kom cov yaj saub ntawd pab kom tsim tej txiaj ntsim lus tim khawv nyob hauv Phau Ntawv Maumoos, thiab nws xav kom cov tub txib pab muab rau lwm tus.

Tej tsev neeg kuj muab txiaj ntsim ntawm kev hlub thiab lus tim khawv thaum lub caij Christmas los ntawm kev hu nkauj, tsis yog los ntawm lawv tej lus xwb. Thaum kuv yog ib tug tub hluas, kuv yuav koom nrog kuv tsev neeg nyob ncig peb lub piano uas yog hom Winkler, es tam sim no nws muaj ib puas xyoo tawm. Lub piano ntawd nyob hauv peb chav nyob, nyob ze lub thawv tso tej yam muaj nqi. Lub piano yog ib qho qub txeeg qub teg uas muaj nqi vim kuv txiv muab lub txiaj ntsim no rau kuv niam thaum nkawd tsis muaj nyiaj ntau. Kuv niam kuv txiv paub kev txom nyem nkawd thiaj li txuag heev. Tej txiaj ntsim uas peb txais thaum lub caij Christmas yeej tsis loj. Tiam sis kuv niam muaj ib suab nkauj siab zoo heev. Thaum lub caij Christmas nws ntaus piano thaum nws coj peb hu nkauj Christmas thiab nkauj qhuas Vajtswv uas dawb ceev.

Kuv tsis paub yog tias nws xav tias nws caw peb los txais ib lub txiaj ntsim uas yuav nyob tas mus li. Tiam sis txawm kuv tseem yog ib tug me nyuam tub los, kuv muaj kev xyiv fab thaum peb hu tej zaj nkauj ntawd. Cov nkauj ua rau peb lub tsev me me puv npo nrog kev thaj yeeb nyab xeeb. Ua rau kuv hnov tau kuv niam kuv txiv thiab kuv ob tug kwv tij txoj kev hlub, thiab kuv Leej Txiv Saum Ntuj Ceeb Tsheej thiab tus Cawm Seej Yexus Khetos txoj kev hlub.

Kuv paub tias txoj kev hlub uas kuv hnov thaum ntawd yeej zoo ib yam li qhov uas muaj hauv lub neej ua ntej lub neej no nyob hauv lub ntuj ntsuj plig. Ua rau kuv xav muaj txoj kev hlub no nyob hauv kuv tsev neeg thaum yav tom ntej. Thiab kuv xav ua neej nyob kom kuv tsim nyog rov qab mus rau kuv lub tsev nyob suam ntuj nrog kuv tsev neeg, es kuv paub Leej Txiv Saum Ntuj Ceeb Tsheej thiab tus Cawm Seej yuav tos txais. Nim no thaum kuv pom lub thawv tso tej yam muaj nqi thiab lub piano, ua rau kuv nco qab txog kev hlub nrog kuv tsev neeg, thiab tus Cawm Seej txoj kev hlub.

Thaum peb hu nkauj hauv pawg hu nkauj, tsev neeg thiab hoob kawm, thiab raws li peb tau mloog hmo no, tej zaj nkauj Christmas no ua rau peb nco txog peb txoj kev qw zoo siab thaum peb kawm tias peb yuav los rau lub ntiaj teb no thiab yuav muaj ib tug Cawm Seej txhiv peb dim. Muaj ib hnub peb yuav koom nrog cov tim tswv saum ntuj ceeb tsheej hu tej zaj nkauj ntawd.

Kuv thov Vajtswv kom tus Ntsuj Plig foom koob hmoov rau peb, thaum lub caij Christmas thiab thaum yav tom ntej nrog lub hwj chim muab lwm lub txiaj ntsim ntawm kev hlub thiab lus tim khawv txog Yexus Khetos thiab Nws txoj moo zoo uas raug txum tim rov qab los. Kuv paub tias tus Ntsuj Plig yuav coj peb txhua ua ntau yam thiab ua tej yam yooj yim kom muab kev hlub, kev ntseeg thiab kev xyiv fab rau lwm tus thaum lub caij zoo siab no.

Kuv ua tim khawv tias Yexus Khetos yog Vajtswv Leej Tub tiag tiag thiab yog tus Cawm Seej ntawm neeg ntiaj teb. Nws yog tus txiaj ntsim zoo tag nrho ntawm peb Leej Txiv uas hlub peb. Thaum lub caij no thiab txhua lub caij, peb tus Cawm Seej caw peb koom nrog Nws thiab lwm tus pub lub txiaj ntsim kev xyiv fab uas muaj nqi tshaj plaws. Kuv thov Vajtswv kom peb ua li no, los ntawm Yexus Khetos lub npe, amees.