Meram im Mour eo an Laļ in
Bwebweanto eo jeļā kake im eaorōk kōn ļotak eo an Rilo̧mo̧o̧r eo loe ilo ruo jebta in Luk ilo Kallim̧ur Ekāāl. Ij obrak kōn kam̧oolol kajjojo iien ij riiti kōn em̧m̧akūt eo an Josep im Meri n̄an Bethelehem, jikin m̧ōn̄ā an menin mour eo ettā, ļotak eo ettā an Irooj Jisōs Kraist, seperd ro, im enjeļ ro rej kean̄ “naan ko rem̧m̧an, naan in lan̄lōn̄ eļap … n̄an armej otemjeļo̧k” (Luk 2:10).
Jepļaaktok eo an gospel eo ilo raan ko āliktata ej letok juon bar m̧ōttan bwebwenato eo kōn ļotak eo an Rilo̧mo̧o̧r ilo Bok in Mormon. Ennaan eo aō ej kalikkar dam̧o̧ļo̧k in kōmeļeļeļ in kōn Kūrijm̧ōj eo m̧oktata Ilo ad ļōmņak kōn m̧ōttan in ippān doon, ij kūr eok n̄an pijaik ļo̧k eok make ilo m̧akūtkūt kein im jab baj ron̄jake naan ko.
Ij jar bwe Jetōb Kwojarjar eo enaaj jipan̄ eok kedi eoon kein n̄an eok im baam̧le eo am̧ (lale 1 Nipai 19:23) im kobrak būruwōmi kōn m̧ool in jetōb in Kūrijm̧ōj.
Samuel RiLeman eo
Bwebwenato eo ad ej ijjino ilo ānen Zarahemla jet iiō ko m̧okta jān ļotak eo an Rilo̧mo̧o̧r. Samuel RiLeman eo ekar itok ibwilijin armej ro n̄an kwaļo̧k ukweļo̧k im kanaan kōn Kraist. Kiiō jouj im kajjieon̄ in ļōmņak bwe kwoj 10 iiō dettan im uwaan juon jarlepju eo ej ron̄jake juon rikanaan an Anij kanaan kōn m̧akūtkūt ko ilju im jekļaj.
Samuel eaar kean̄: “Lo, ij lewōj n̄an kom̧ juon kōkaļļe; bwe ļalem iiōō rej itok, im lo, innām ej itok eo Nejin Anij n̄an lo̧mo̧ren aolep ro renaaj tōmak ilo Etan.
“Im lo, men in inaaj lewōj n̄an kom̧ āinwōt juon kakōļļe in iien An itok; bwe lo, enaaj lōn̄ meram ko ilo lan̄, jon̄an ilo bon̄ōn eo m̧okta jān An itok enaaj ejjeļo̧k marok, jon̄an enaaj waļo̧k n̄an armej āinwōt n̄e e raan.
“Kōn menin, enaaj wōr juon raan im juon bon̄ im juon raan im en kar ejjeļo̧k bon̄; im en̄in enaaj n̄an kom̧ juon kōkaļļe. …
“Im lo, enaaj wōr juon iju ekāāl enaaj tak… ; im men in barāinwōt enaaj juon kōkaļļe n̄an kom̧ ” (Hilamōn 14:2–5).
Ļotak eo an Rilo̧mo̧o̧r
Ilo an kar iien ko eļļā ļo̧k, “kanaan ko an ri kanaan ro raar jino kūrm̧oolļo̧k ilo dipieo; bwe eaar jino wōr kakōļļe ko reļļapļo̧k im men in bwilōn̄ ko reļļapļo̧k jerbali ilubwilijin armej ro” (3 Nipai 1:4).
Ļōmņak ļalem iiō ko raar eļļā ļo̧k im kwoj kiiō 15 iiō dettam̧. Emaron̄ ke alikkar am̧ kememej kanaan ko an Samuel ilo am̧ ļōmņak jekjek ko rej waļo̧k kiiō ilo tōre in kwoj mour ie.
“A eaar wōr ro raar jino ba bwe iien eaar eļļā bwe naan ko ren kūrm̧ool, ko kar kōnono jān Samuel, RiLeman eo.
“Im raar jino m̧ōņōņō ioon ro jeir im jatier, im ba: “Lo iien eo eaar eļļā, im naan ko an Samuel raar jab kūrm̧ool; kōn menin, ami lan̄lōn̄ im ami tōmak kōn menin raar waan.
“Im ālikin men kein raar kōm̧m̧an juon iruj eļap iaolepān āneo; im armej ro raar tōmak raar jino kanooj būrom̧ōj, n̄e ab jān jabdewōt wāween men ko kar kōnono remaron̄ kar jab kūrm̧ool.
“A lo, raar lale ilo niknik n̄an raan eo im bon̄ōn eo im raan eo ren kar āinwōt juon raan āinwōt n̄e eaar ejjeļo̧k bon̄, bwe ren maron̄ jeļā bwe tōmak eo aer eaar jab waan.
“Kiiō ālikin men kein eaar wōr juon raan kōjenolo̧k jān ro rejjab tōmak, bwe aolep ro raar tōmak ilo imminene ko ren leļo̧k er n̄an mej ijello̧kun wōt kakōļļe eo en kar jejjet kūtien, eo kar leļo̧k jān Samuel rikanaan eo” (3 Nipai 1:5–9).
Ro jeiū im jatū, jemaron̄ ke jino meļeļe ta eo emaron̄ kar āinwōt n̄an kōttar kōkaļļe eo kōn itok eo An im barāinwōt jelm̧ae jorrāān eo kōn mej? Kwe im n̄a naaj ke kar jutak pen im dim ilo tōmak, ak jenaaj ke kar ebbweer im makun ļo̧k?
Innām, ilo m̧ool, kōkaļļe eo kōn ļotak eo an Kraist kar kanaan kake jān Samuel ekar waļo̧k. Ilo juon jekjek in kaen̄taanan an kabun̄ im ilo an 15 iiō dettan, kwoj bwilōn̄ juon jota ilo an aļ eo tulo̧k bōtaab ejjeļo̧k marok.
“Im armej ro raar jino ļo̧kjānaer kōnke eaar ejjeļo̧k marok ke bon̄ eaar itok. …
““Im raar jino in jeļā bwe Nejin Anij eaikuj waļo̧k m̧ōkaj; aaet, … aolep armej … raar kanooj ilbōk otem ilbōk jon̄an raar wōtlo̧k n̄an bwidej. …
“Im ālikin men kein eaar ejjeļo̧k marok ilo aolepān bon̄ōn eo, a eaar meram āinwōt n̄e eaar ilo lukwolpān raan. “Im ālikin men kein aļ eaar bar tak ilo jibbon̄, … im raar jeļā bwe eaar raan eo Irooj en kar ļotak, kōnke kar kakōļļe eo kar leļo̧k.
“Im ālikin men kein, aaet, men otemjej, pilin̄ otemjeļo̧k, ekkar n̄an naan ko an rikanaan ro.
“Im ālikin men kein barāinwōt bwe juon iju ekāāl eaar waļo̧k, ekkar n̄an naan eo(3 Nipai 1:15, 17, 19–21).
Raan eo Jisōs ear ļotak eaar juon raan in jo̧o̧r n̄an ritōmak ro ilo Laļ eo Ekāāl. Meram eo āinwōt kōkaļļe in ļotak eo an Rilo̧mo̧o̧r eaar lukkuun lo̧mo̧o̧ren mour ko aer.
Mej im Jerkakpeje eo an Rilo̧mo̧o̧r
Kiiō pijaik ļo̧k ium̧win 30 iiō ko remoot ļo̧k im kwoj jibadōk ļo̧k 50 iiō dettam̧. Kwoj maron̄ in wōt kememej ilo alikkar katak ko an Samuel im en̄jake ko am̧ āinwōt juon jodikdik ke kōkaļļe eo kōn ļotak eo an Irooj kar kwaļo̧k.
Juon iaan kōkaļļe ko kōn mej eo an Kraist kar kanaan kake jān Samuel eaar jilu raan ko rekanooj marok jilōn̄lōn̄ (lale Hilamōn 14:27; 3 Nipai 8:3).
“Im ālikin men kein eaar wōr marok jilōn̄lōn̄ emijel ioon aolepān mejān āneo, jon̄an ro ie raar jab wōtlo̧k raar maron̄ en̄jake nijōk in marok;
“Im eaar jamin maron̄ wōr meram, kōnke marok jilōn̄lōn̄ eo, jaab kantōl ko, jaab til ko; im ejjeļo̧k kijeek en maron̄ kar kōjo̧ … , āindein bwe en ejjeļo̧k jabdewōt meram n̄an jidik;
“Im eaar ba ejjeļo̧k jabdewōt meram loe, jaab kijeek, jaab rabōlbōl, jaab aļ, jaab allōn̄, jaab ijo ko, bwe āindein ļap in kar nijōk ko in marok jilōn̄lōn̄ eo ioon mejān āneo.
“Im ālikin men kein eaar pād tōrean eo jilu raan ko bwe eaar ejjeļo̧k meram kar loe” (3 Nipai 8:20–23).
Ewi kar kōjkan en̄jake raan ko jilu kōn marok lep eo pen kōmeļeļeļeik innām, juon tōre ejjab to tok ālik, koba ippān jarlepju eo 2,500 armej ro ilo tampeļ eo ilo ānen Bun̄ Peļļo̧k? Komaron̄ ke arrome ļo̧k wōj eo an iien eo ke Rilo̧mo̧o̧r eaar wanlaļ tak jān lan̄ ko im kean̄, “Lo, N̄aij Jisōs Kraist … N̄aij meram eo im mour eo an laļ”? (3 Nipai 11:10–11; italics added).
N̄an kuk tok in ejeno̧lo̧k ilo tampeļ eo, ruo iaan naan ko m̧oktata Rilo̧mo̧o̧r eo eaar kōjerbale n̄an kwaļo̧k kadkad In make raar “meram eo.” Samuel eaar kanaan kōn juon kōkaļļe in meram. Kōkaļļe eo kōn meram kar letok ilo ļotak eo an Rilo̧mo̧o̧r. an armej ro ilo kuk tok eo an jarlepju eo, marok jilōn̄lōn̄ eo eļap, im mijak eo kar luko̧rko̧re jān meram eo em̧ool, em̧ool Jisōs Kraist.
Bwebwenato eo kōn Kūrijm̧ōj eo m̧oktata ilo Bok in Mormon ej jipan̄ kōj n̄an katak im kolaplok ad meļeļe bwe Jisōs Kraist ej “meram eo ej romaak ilo marok” (lale K&B 10:57–61). Ilo aolep tōre ko ilo mour ko ad, ilo aolep jekjek ko jemaron̄ iooni, im ilo kajjojo idajon̄jon̄ jemaron̄ jelm̧ai, Jisōs Kraist ej meram eo me ej joļo̧k mijak, letok kallim̧ur im tōl eo, im ej kwaļo̧k aenōm̧m̧an im lan̄lōn̄ eo ej wōnm̧aan ļo̧k wōt.
Elōn̄ iaan ememļo̧kjeņ im iminene ko an Kūrijm̧ōj rejjab jem̧ļo̧k ekoba tōm̧a ko rokoktak—tōm̧a ko ioon wōjke ko, tōm̧a ko ilowaan im itulikin m̧ōko, kāāntōļ ko ioon tebōļ ko ad. Kōm̧m̧an bwe aiboojoj in tōm̧a ko an aolep iien aļete ren kakememej kōj kōn E eo ej unin aolep meram.
Aaet ilo iaļ ko am̧ remarok en romaak
Meram eo indeeo.
Kōjatdikdik ko im mijak ko an aolep iiō ko
Rej iokwaj Eok joteen in.
(“O Little Town of Bethlehem,” Al, nōm̧. 208).
Ij kam̧ool bwe Jisōs eaar ļoktak ilo Bethlehem, ilo anjo kar kakūrm̧ool mijen im jerbal eo An ilo mour in, im āinwōt ad jerkakpeje Irooj, Ej mour rainin. Ij kōm̧m̧ane āindein ilo etan ekwojarjar Jisōs Kraist, amen.