Ang Pasko—Panahon sa Paghigugma, Pagserbisyo, ug Pagpinasayloay

Malipay kong magtan-aw sa mga bata nga mahinamong nagpaabut sa panahon sa Pasko! Ako usab sa Primary pa ko nahinumdom sa akong pagpaabut niini didto sa Argentina. Usa ka tuig, gipalimpyuhan sa among mga magtutudlo sa Primary ang karaan namong mga dulaan, gipahugasan ang buhok sa among mga monyeka, ug gipatarong ang ilang mga sinina aron ihatag ngadto sa mga bata nga sa Pasko naa sa hospital.

Atol sa semana nga nanglimpyo ko sa daan nakong mga monyeka, nangutana si mama kon unsay akong gihimo niini. Akong gisulti ang gisugo sa among mga magtutudlo sa Primary, ug mitubag siya, “Mohatag sab ka sa mga bata og usa sa nindot nimong mga dulaan.”

Niana mitubag ko, “Ngano man?”

Dayon may gisulti siyang butang nga dili nako makalimtan sa tanang katuigan. Miingon siya, “Cris, maayo gayud nga makahatag og butang nga atong ganahan, butang nga lisud ihatag kay ganahan kita niini, butang nga sakripisyo. Kana ang gasa ngari nato sa atong Langitnong Amahan. Gipadala Niya ang Iyang Anak, si Jesukristo—dili bisan kinsa nga anak. Gipadala Niya ang Iyang Pinangga ug hingpit nga Anak aron makabalik kita og puyo uban Kaniya.”

Niadtong tuiga, sa akong paghatag sa paborito nakong mga dulaan, mas nasabtan na nako ang gasa sa Amahan sa Langit kanato—Iyang Pinalanggang Anak, si Jesukristo, nga mapinanggaon ug walay pagpanukong mihatag sa Iyang kinabuhi para nato.

Matag tuig, isip bahin sa among pagsaulog sa Pasko, magbasa si papa gikan sa kasulatan og nindot nga istorya ni Lucas:

“Ug nahitabo nga niadtong mga adlawa miabut gikan kang Cesar Augusto ang usa ka sugo sa pagpanglista sa tanang nanagpuyo sa tibuok kalibutan. …

“Ug ang tanan nangadto aron sa pagpalista, ang matag usa ngadto sa iyang kaugalingong lungsod.

“Ug si Jose usab gikan sa Galilea, sa gawas sa lungsod sa Nazaret, mitungas sa Judea sa lungsod ni David, nga ginganlan og Bethlehem; …

“Sa pagpalista uban kang Maria, ang iyang pangasaw-unon nga nagsabak.

“Ug samtang didto sila, miabut ang panahon nga siya mag-anak.

“Ug iyang gianak ang iyang panganay nga usa ka lalaki, ug kini iyang giputos sa mga bakbak ug gipahigda sa pasungan, kay wala na may luna alang kanila sa balay nga abutanan.

“Ug niadtong dapita may mga magbalantay sa mga karnero didto sa sibsibanan, nga nanagtukaw sa kagabhion sa pagbantay sa ilang mga hayop.

“Ug, mitungha kanila ang usa ka manolunda sa Ginoo, ug ang himaya sa Ginoo misidlak libut kanila: ug sila giabut og dakong kalisang.

“Apan ang manolunda miingon kanila, Ayaw na kamo kalisang; kay tan-awa, gidad-an ko kamog maayong balita sa dakong kalipay nga magaabut sa tanang katawhan.

“Kay alang kaninyo natawo karon sa lungsod ni David ang Manluluwas nga mao ang Kristo nga Ginoo.

“Ug ang inyong ilhanan mao kini; Inyong makaplagan ang usa ka gamayng bata nga naputos sa mga bakbak, ug nagahigda sa pasungan.

“Ug sa kalit diha uban sa manolunda ang usa ka langitnong panon nga nanagdalayeg sa Dios, ug nanag-ingon,

“Himaya sa Dios sa kalangitan, ug sa yuta panagdait sa mga tawo nga iyang gikahimut-an.”¹

Mga kaigsoonan, karon unsaon nato sa pagtagamtam ang samang kalinaw ug pakigdait sa katawhan?

Sa akong paghinuktok niini nga pangutana sa milabayng pipila ka semana, sa paghunahuna nga ang Pasko maoy panahon sa paghatag, tulo ka buhat—tulo ka gasa nga atong ikahatag—misantop sa akong hunahuna. Dayag lang nga kita, mohatag niining mga gasa sa tibuok tuig, apan sa maanindot nga panahon sa Pasko, hinumduman nato ang gasa sa Amahan nga Iyang Anak ug hunahunaon unsaon nato pagsunod ang Ilang ehemplo samtang palamboon nato ang tinagsa natong abilidad og tinguha sa paghatag.

1. Ang Pasko panahon sa paghatag og gugma.

Ang atong Amahan sa Langit ug ang atong Manluluwas, si Jesukristo, talagsaong mga ehemplo sa gugma. Ang kasulatan nagtudlo: “Kay gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.”²

Gitudloan kita sa atong Manluluwas pinaagi sa ehemplo nga higugmaon ang tanan. Gitudloan sab kita nga higugmaon ang Dios ug atong mga silingan sama sa atong kaugalingon.

Mipasabut si Elder John A. Widtsoe:

“Ang hingpit ug importanting matang sa gugma tingali dili nato masabtan, apan may mga pagsulay aron kini mamatikdan.

“Ang gugma manukad kanunay sa kamatuoran. … Ang pamakak ug panglingla, o ubang pagsupak sa moral nga balaod, ebidensya nga wala ang gugma. Ang gugma mahanaw kon wala ang kamatuoran. … Mao nga, … [siya] nga magbakak sa iyang minahal, o magbuhat bisan unsang supak sa kamatuoran, wala gayud magmahal kaniya.

“Dugang pa, ang gugma dili mopasilo mopasakit sa iyang minahal. … Walay kabangis diha sa gugma … sama sa matuod diha sa dili matuod. …

“Ang gugma usa ka positibo nga aktibong pwersa. Pagtabang kini sa minahal. Kon adunay panginahanglan, tagbawon kini sa gugma. Kon dunay kahuyang, ang gugma moilis niini og kalig-on.… Ang gugmang walay ikatabang, peke o gugmang dili tinuod.

“Bisan maayo man kini nga pagsulay, duna pay mas labaw. Ang tinuod nga gugma mosakripisyo para sa minahal. … Kana ang katapusang pagsulay. Gitugyan ni Kristo ang Iyang Kaugalingon, Iyang kinabuhi, para kanato, ug gipamahayag ang reyalidad sa iyang gugma para sa mortal niyang mga kaigsoonan.”³

Ang atong Langitnong Amahan midapit kanatong tanan, nga Iyang mga anak, sa paghatag ug pagsakripisyo alang niini nga gugma. “Miingon ang Manluluwas: “Panghatag kamo, ug kamo pagahatagan.”⁴ “Nakadawat kamo nga walay bayad, busa panghatag kamo nga walay bayad.”⁵

2. Ang Pasko panahon sa pag-alagad.

Ang atong Ginoo ug Manluluwas personal nga nangalagad sa katawhan, mibayaw sa nanag-antus, midasig sa nawad-an og kadasig, ug nangita sa nangawala. Giayo ang buta, giayo ang masakiton ug gipalakaw ang bakol, ug gibuhi ang patay.

Atol sa Pasko, naghunahuna ko sa mga misyonaryo—mga elder, sister, senior missionaries, ug mga mission president sa tibuok kalibutan—nga, nagrepresentar ni Jesukristo, libreng mihatag sa ilang panahon ug serbisyo sa tanang katawhan. Naghunahuna ko sa tanang kaigsoonan nga migahin og daghang oras sa matinud-anong pagserbisyo sa ilang mga calling. Niining panahona usab, naghunahuna ko sa mga lalaki ug babaye nga nagserbisyo sa militar alang sa atong kasiguroan. Salamat sa inyong pagserbisyo!

Pero bisan dili full-time ang atong pagserbisyo sa Ginoo o sa atong nasud, walay limit ang atong mga oportunidad sa pagserbisyo. Ang mabinationg mga pulong ug buhat makagaan sa palas-anon ug modasig sa kasingkasing! Kitang tanan gidapit sa Amahan sa Langit sa pagserbisyo. Ug kon atong buhaton, “ang Hari magaingon [kanato], Sa pagkatinuod magaingon ako kaninyo, Nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat ninyo usab kini kanako.”⁶

3. Ang Pasko panahon sa pagpasaylo.

Ang pagpasaylo sa uban magdala og kalinaw ug kalipay sa atong kinabuhi. Mitudlo si Presidente Hebar J. Grant: “Walay labaw nga makadala kanato sa Espiritu sa Dios kay sa … magmabination, mahunahunaon, manggihatagon, mainantuson ug mapasayloon. Walay makadala kanato og dugang kalipay kay sa mamahimong andam ug matugtanon sa pagpasaylo sa mga kalapasan sa atong mga kasilinganan batok kanato, ug walay lain nga makadala kanato og dugang pagkaalaot kay sa pagpatig-a sa atong mga kasingkasing ug mamahimong masuk-anon ug mapanimaslon sa atong pagbatii niadtong naglibut kanato.”⁷

Aron madawat ang kapasayloan sa atong mga sala, pasayloon nato ang uban.

Ang pagpasaylo sa uban magtugot nga mabuntog nato ang atong mga pagbati sa kasuko, kaligutgot, o kasilag. Ug kinsa ba ang gustong duna niana nga mga pagbati sa Pasko? Ang pagpasaylo makaayo usab sa espiritwal nga mga samad ug magdala og kalinaw ug gugma diin Dios lang ang makahatag.

Gusto sa atong Amahan sa Langit nga maghinulsol kita ug pasayloon ang tanan—lakip ang atong kaugalingon. Sama sa giingon ni Elder Jeffrey R. Holland: “Bisan unsa pa kamo kaulahi sa inyong hunahuna, bisan pila pa ka kahigayunan ang wala ninyo mapahimusli, bisan unsa kadaghang sayop ang inyong gibati nga nahimo o mga talento nga wala kaninyo, o unsa kalayo sa panimalay ug pamilya ug sa Dios ang gibati ninyo nga inyong gipanaw, mopamatuod ko nga wala kamo malayo nga makab-ot sa balaanong gugma. Imposible nga ang mahangturong kahayag sa Pag-ula ni Kristo dili moabut kaninyo.”⁸

Mga kaigssonan, niini nga Kapaskohan, ihatag nato ang pinakanindot nga gasa. Isakripisyo nato uban ang mapasalamatong kasingkasing ang paborito natong mga dulaan—dili ang mga guba na. Ug ihatag nato ang gasa sa gugma, ang gasa sa pagserbisyo sa naglibut kanato, ug ang tinuod nga gasa sa pagpasaylo. Kay kon maghinulsol kita, pasayloon kita sa Usa nga Balaan sa Israel. Mopamatuod ko nga Siya buhi. Siya ang Hari sa mga hari, ang Prinsipe sa Kalinaw, atong Manluluwas, atong Manunubos, ug atong Higala. Sa pangalan ni Jesukristo, amen.