O Perofeta, Taitaiga, ma le Tulafono Faalelagi

Ou uso e ma tuafafine pele, ou te momoli atu faamanuiaga ma alofaaga ia te outou mai le Au Peresitene Sili ma le Korama a Aposetolo e Toasefululua. Matou te faafetai atu mo le tou faatasi mai ma i matou i lenei po ma le sauniaina o o outou loto ma mafaufau ina ia aoaoina faaleagaga.¹

Talu mai Ianuari 2016, lea sa ou lauga atu ia te outou i lenei faatasiga i le faigalotu i le lalolagi atoa, sa ou faatasi ai ma le toatele o outou ina ua ou malaga atu i Iapani, Filipaina, Saina, Kanata, Egelani, Uelese, Siamani, Italia, Sepania, ma nofoaga i le Iunaite Setete atoa.

Ia Setema talu ai, sa ou maua ai se aafiaga lemafaagaloina ma Elder M. Russell Ballard ma isi taitai o le Ekalesia ina ua matou o atu i Baton Rouge, Louisiana, e feiloai ai ma tagata ina ua mavae se lolovai matautia. I le Aso Sa, sa tofu i matou ma ni sauniga faamanatuga tetele se fa sa faia—o le tasi mo e na mafatia ma le tolu mo volenitia sa malaga mai le tele o setete e fesoasoani i le faamamaaga. O ata nei o loo maua ai sina manatu o na faatasiga i le aso Sapati o loo i ai le faitau selau o e na laeiina la tatou mitiafu iloga o Mamona Lima Fesoasoani.

Ia matau foliga fiafia o alii ma tamaitai talavou na tuua o latou aiga ae fesoasoani atu i tuaoi latou te le masani ai, i le lotolotoi ai o le aasa o le vevela o le taumafanafana, ma o e na taofia mea uma i le Sapati ae tapuai atu i le Alii. A o ou vaavaai atu i na faapotopotoga ofoofogia o tagata lotonaunau, o le toatele o i latou o le tou tupulaga, sa ou maua se uunaiga faagaeetia e faapea o loo ou tilotilo atu i ni alii ma ni tamaitai o le a le pine ae avea ma ni taitai o lenei Ekalesia.

O le po nei la, a o ou vaai faalemafaufau atu ia te outou o loo potopoto i le lalolagi atoa, ou te fia faamamafaina ma talanoa atu i lena uunaiga. O outou o taitai o le lumanai o le Ekalesia a le Alii! Ua outou saunia ea e tauave ia tiute o le taitaiga?

Ina ua ou talanoa atu ia te outou i le tausaga ua te’a, sa ou lu’iina outou ia tutula’i a’e o ni tagata moni o le meleniuma na fanauina outou e avea ai. E ao ona outou fesoasoani e saunia le lalolagi mo le nofotupu o le Faaola i le meleniuma e ala i le fesoasoani e faapotopoto le au filifilia mai tulu’iga e fa o le lalolagi, ina ia mafai ai e i latou uma e filifili e fai lena mea ona mauaina le talalelei a Iesu Keriso ma ona faamanuiaga uma. O le po nei ou te fia talanoa atu ia te outou e uiga i le auala e mafai ai ona e saunia.

Muamua, ia taulai atu i lau faaipoipoga ma le aiga. Ia faatino ni uunaiga na e maua ina ua e faalogo atu i upumoni e fa a “Aunty Wendy” e uiga i le alofa ma le faaipoipoga.

O lou tiutetauave i le Alii e fesoasoani ai e faapotopoto le au filifilia ia o ese mai le fenumiai i uiga le mama ma le anoanoai o agasala ua siomia ai i o tatou aso e le o se tamai galuega. O loo faaaogaina e Lusifelo ma ana au ituaiga uma o tekinolosi ma fesootaiga e faasalalau ai pepelo e uiga i le olaga ma uiga i le punavai moni o le fiafia. O lea, o le faia o le mea na outou o mai ai i le lalolagi e fai o le a manaomia ai ni tomai faaletaitaiga sili ona lelei e mafai ona gafataulimaina e la outou tupulaga.

O le mea e faafetai ai, o loo i ai ni faataitaiga maoae tatou te mulimuli ai. E ui atonu e taulai atu le lalolagi i tomai iloga faaletaitaiga a alii ma tamaitai e pei o Napoleone, Joan of Arc, George Washington, Mahatma Ghandhi, Mother Teresa, ma isi, ae ou te talitonu o taitai sili ona lelei ua savalia le lalolagi o perofeta ia a le Atua.

E oo mai i le asō, ua 16 tamalii ua filifilia e le Alii e avea ma Peresitene o Lana Ekalesia, ua toefuataiina mai i lenei tisipenisione—i lenei tisipenisione faaiu i le talafaasolopito o le lalolagi. Ou te masani patino lava i le toa 10 o na tamalii e 16. (Ua faamatala atili ai e lena mea lo’u matua nai lo se isi lava mea. Sei ou fai atu i le ala lenei: Ou te le o toe faatauina lava ni fa’i matua.)

Afai la e te manatu mamafa e uiga i le tula’i a’e o se tagata moni o le meleniuma, ou te uunaia oe ia suesue i soifuaga ma aoaoga a nei perofeta e 16 a le Atua.² O lena suesuega o le a suia ai lou olaga. E mafai ona faasoa atua ni nai mataupu faavae faaletaitaiga ua ou aoaoina mai ia i latou?

O Peresitene Iosefa Filitia Samita, le Peresitene lona 10 o le Ekalesia, sa nofo i se fale e le mamao ese mai le fale na ou ola ae ai. O ona atalii laiti e toalua, o a’u uo ia a o matou laiti. Sa tele lava ina la valaauliaina au i lo latou fale.

Sa avea Peresitene Samita ma Peresitene o le Ekalesia i le 1971, ina ua valaauina au e avea ma Peresitene Aoao o le Aoga Sa. Ina ua ma faafeaoina atu ma lo’u toalua ua maliu o Dantzel o ia mulimuli ane i lena tausaga i le konafesi muamua lava faaleeria sa faia i Manchester, Egelani, sa ou matauina ai se lesona mamana i le taitaiga mataalia a o fesili atu Peresitene Samita mo lipoti mai le Au Pulega Aoao o e na faatasi i se tamai potu a o lumanai ia le konafesi.

I le mavae ai o aoaoga uma, nai lo le ofoina atu o se faatonuga pulepuletutu, sa tulai Peresitene Samita ma le malualii faaperesitene, ma valaaulia i latou ia aoao mai le atamai o ona tausaga e 94, a o ia faailoa atu lona alofa ma le manao faamaoni e fesoasoani ia i latou. Sa ou maofa i le mana o lenei taitai i le faailoaina atu o le alofa ma le talitonuga i ona tagata. Ina ua mavae le konafesi faaleeria, ma ina ua matou faamalo atu ia Peresitene Samita i lana savali matagofie, sa na ona ia tali mai lava, “Ou te lei sau iinei ina ia toilalo.”³

Sa ia te ia le faatuatua o le a taialaina e le Alii na taualumaga a o faia e Peresitene Samita mea uma i lona malosi e faalautele ai le galuega. O le faatuatua, tatalo, suesue, ma le galue malosi e maua ai se tuufaatasiga mo le manumalo. E pei lava o le malaga o Peresitene Samita i Egelani ina ia le toilalo, e faapena foi le auina maia e lo tatou Tama o outou i le lalolagi i lenei tisipenisione faaiu ina ia le toilalo ae ia faamanuiaina—ma ia maua le olioli a o faia lena mea.

Sa na o le lua tausaga talu ona valaauina Peresitene Ezra Taft Benson o se uso o le Korama a Aposetolo e Toasefululua ae valaauina o ia ia Tesema 1945 i le faatoa mavae ai o le Taua Lona Lua II, a le Lalolagi, e Peresitene Siaosi Alapati Samita, a o valaauina i lena taimi ia Elder Benson, e pulefaamalumalu i le Misiona a Europa. Sa ogaoga tulaga iina. I se misiona 10 masina o le alofa i tagata na faatamaiaina o latou olaga e le taua, sa faimalaga ai Elder Benson i Siamani atoa, Polani, Siekisolovakia ma Scandinavia, e tufatufa atu meaai, lavalava, ma moega i Au Paia mafatia.⁴ Sa fetaiai soo pea o ia ma mea sa foliga mai na le mafai ona foiaina. Ae sa ia faaalia pea le “faatuatua malosi i le mana o le Alii e faatoilalo ai faafitauli.”⁵

Fa sefulu tausaga mulimuli ane, ia Novema 1985, sa tofia ai au a o avea au ma se uso fou o le Toasefululua e Peresitene Benson, o lē faatoa faauuina lava i lena taimi o le Peresitene o le Ekalesia, e talai faitotoa o atunuu o Europa i Sasae a o puleaina faakomenisi i lena taimi.

Sa ou lagona le le saunia mo se tofiga faigata faapena, ae sa amatalia e Peresitene Benson le galuega e muamua atu ia te au. E mafai la faapefea ona ou le faia e pei ona sa ia faia? Sa faaosofia e lana faataitaiga au ia tatalo ma galue i le malosi ou te mafaia ona vaavaai lea i le aao fesoasoani faavavega o le Alii.⁶

A i ai se tasi o i tatou e lagonaina le lofituina, e mafai ona tatou aoao tele mai ia Peresitene Benson. Sa ia auauna atu mo le valu tausaga i le taimi lava e tasi o se Aposetolo ma o se failautusi foi o faatoaga i le kapeneta a le peresitene o le Iunaite Setete o peresitene Dwight D. Eisenhower.

Na faapefea ona ia taulimaina? O ana upu nei: “Ou te galue i le malosi ou te mafaia ma faia mea uma i lo’u malosi. Ma ou te taumafai e tausi ia poloaiga. Ona ou tuu atu lea i le Alii na te faaatoaina le eseesega.”⁷ O upu na e ola ai.

O Peresitene Gordon B. Hinckley o se taitai malosi o ana aoaoga i le puleaina o le Ekalesia sa tulagaese. A o lumanai ai lana auaunaga o le Peresitene lona 15 o le Ekalesia, sa avea o ia ma se fesoasoani i Peresitene e toatolu na muamua atu. I le foi mai ai mai lana misiona a o avea ma se alii talavou i Egelani, sa faigaluega o ia i le Ekalesia i ni vaega eseese, ae sa i lalo lava o le taitaiga a le Au Peresitene Sili ma le Korama a le Toasefululua i taimi uma. Sa talosagaina soo o ia e foiaina ni luitau iloga. Mo se faataitaiga, sa tofia e Peresitene Tavita O. MaKei ia Uso Hinckley e fuafua pe faapefea ona faatino sauniga o le faaeega paia i se ata ina ia mafai ona faafetaia’ia ai manaoga o faaliliuga mo le Ekalesia ua faatoateleina.

O Peresitene Hinckley o se tagata sili ona leleio fesootaiga. Sa ia talanoa ma le maumaututu e uiga i le talalelei i tagata uma mai tagata tusitala atamamai i taitai o le lalolagi. Sa ou molimauina le auala na ia faamalūlūina ai le loto o Mikhail Gorbachev, le peresitene muamua o Rusia, lea na muai teenaina le fonotaga ma Peresitene Hinckley i lona ofisa. Ae, sa manao Gorbachev e susu atu Peresitene Hinckley i le potu o Gorbachev i le faletalimalo. Ae ina ua la feiloai i le laumua o le Ekalesia, sa faasino atu e Peresitene Hinckley o ia i le laupapa uliuli e fai i le walnut i totonu o le potu fono a le Au Peresitene Sili. Ina ua tau atu e Peresitene Hinckley ia Mr Gorbachev le mea na aumai ai lena laupapa, sa maofa le susuga ia Gorbachev! O lena laupapa e aumai mai le itulagi tonu lea sa soifua mai ai o ia i Rusia!⁸ Sa vave ona faamafanafanaina ona lagona.

Sa i ai pea ia Peresitene Hinckley le faamoemoe i taimi uma, o se taunuuga o lona faatuatua atoatoa i le Alii. I le taimi o le toetoe 13 tausaga o avea ma Peresitene, sa ia taitaia ai le Ekalesia i se vaitau ofoofogia o fatufatuga o mea fou e aofia ai le mamanuina o malumalu laiti, le fausiaina o le Maota Autu mo Konafesi, le faasilasilaga o malumalu fou e 79, ma le faapaiaga po o le toe faapaiaga o malumalu e 95 o le 124 sa faaaogaina i lena taimi. O le vaaiga mamao a Peresitene Hinckley, ma mea sa ia manaomia mai ia te ia lava ona o lena vaaiga mamao, sa leai ni tuaoi.

O Peresitene Hinckley o se tagata tomai faapitoa o talafaasolopito o le Ekalesia. Sa avea foi o ia ma tagatavaai. I lena tulaga, sa le fefe ai o ia e folafola atu mea o le lumanai. Faafofoga i ana upu: “O lenei galuega [a Keriso] o le a taavale atu i le mamalu ma le mana e faatumulia ai le lalolagi. O faitotoa o loo tapunia i le taimi nei i le talaiga o le talalelei o le a matala. A tusa ai, atonu e luluina e le Silisili Ese ia malo ina ia faalotomaualaloina ai i latou ma faaosofia i latou ia faalogo i auauna a le Atua soifua. Po o le a lava se mea e manaomiaina, o le a faataunuuina lava.”⁹

O le taimi nei o Peresitene Thomas S. Monson o le perofeta soifua a le Alii i le lalolagi. E maeu lo tatou alolofa ia te ia, lagolagoina o ia, ma tatalo mo ia! Ma e maeu lo tatou aoao mai ia te ia! Mafaufau i ai. Sa valaauina o ia e avea ma epikopo i le 22 tausaga. Sa i ai i lana uarota ni tina se 80 ua maliliu a latou tane. Sa valaauina o ia e avea ma epikopo i le 36 tausaga. Sa soifua Peresitene Monson i lona soifuaga e tusa ma le mautauave “Afai e finagalo le Alii e fai se mea, ou te manao ia Ona silafia e mafai ona Ia faalagolago mai ia Tom Monson na te faia.”¹⁰

Ua ia faaali mai ia i tatou le auala e aapa atu ai ma laveai mai le tasi. Ua ia aoaoina i tatou e ala i faataitaiga o le tausiaina o tagata e sili atu ona taua i taimi uma nai lo le puleaina o le taimi, po o fonotaga, po o fuafuaga.

I lona soifuaga atoa, e masani ai lava ona uia e Peresitene Monson ni auala e le masani ai i le faaiuga o se aso umi o galuega. O nisi taimi e afe ai i se falemai e faamafanafana i latou o mafatia. O isi aso e taitai atu ai o ia i ni fale patino e asiasi i ai. E tele lava ina tali mai ana tuitui i faitotoa e se tagata o tagi o loo faapea mai i ni upu faapenei, “Na faapefea ona e silafiaina o le faamanatuga lenei o le aso na oti ai lo’u afafine?” po o le “Na faapefea ona e silafiaina o nei lo’u aso fanau?”

I lona soifuaga atoa, sa faaali ai lava e Peresitene Monson ni uiga auau mama taua se lua ia e avea ai perofeta a le Atua ma ni taitai tulagaese. Muamua, ua ia faataitaia ia poloaiga sili muamua ma le lua—ia alofa atu i le Atua ma o tatou agaga atoa ma ia alolofa atu i o tatou tuaoi, o fanau a le Atua, e pei ona tatou alolofa ia i tatou lava. Ma le lona lua, e silafia e perofeta taitasi le auala e maua ai faaaliga ma tali vave atu i ai pe a oo mai. O Peresitene Thomas S. Monson o le faataitaiga atoa o le taitaiga amiotonu.

O Perofeta a le Atua e tele uiga e tutusa ai. O le tasi, e malamalama perofeta taitasi i le taua o le tulafono faalelagi. O le malamalama i le tulafono faalelagi ma le taitaiga mataalia amiotonu e vaavaalua. O le faateleina o lou iloa o tulafono a le Atua—ma le mea e sili atu ona taua, o le auala e te ola ai i na tulafono—o le mataalia atili foi lena o le a i ai lau taitaiga amiotonu.

A o avea au ma se tamaitiiti aoga faafomai, o au suesuega faigata o le tino o le tagata na faatalitonuina ai au o loo soifua le Atua. Ma a o faasolo ina ou iloaina o le tino o le foafoaga a le Atua, sa oo ina faateleina lo’u tosina atu i tulafono a le Atua ia e puleaina matafaioi o le tino. E ala i sailiiliga lautele i potu suesue, sa ou aoaoina ai mulimuli ane i le tulafono e puleaina le tata o le fatu. Ma le isi, sa ou aoaoina ai o le tata o le fatu e mafai ona taofia ma le saogalemu i se taimi le tumau ina ia faafaigofie ai togafitiga o taotoga maaleale. E mafai ona faia lenei mea i le suia o le pasene o le sodium/potassium i le toto e auina atu i le fatu. Mulimuli ane, a fafagaina e le toto le fatu i se pasene masani o le sodium/potassium, o le a toe tata lelei le fatu. O nei taunuuga na faamaonia le faamoemoeina, faatuatuaina, ma le faia soo.

Talu ai nei sa ou mauaina le avanoa e faamalamalama ai lenei mea i se vasega o se aoga faafomai. Sa i ai iina se polofesa atamai na fesili mai ia te au, “Ae faapefea pe a le tino mai?” Sa ou tali atu, “E tino mai lava i taimi uma ! E tino mai e tusa ma le tulafono faalelagi.”

O le tulafono faalelagi e le mateenaina ma mautinoa. O le tulafono faalelagi e le mafai ona faafitia pe faafenumiaia. Ma a usitaia tulafono a le Atua, e taunuu lava faamanuiaga fitoitonu i taimi uma ! O faamanuiaga i taimi uma e fua lava i le usiusitai i tulafono e faatatau i ai.¹¹

O tagata e talitonu i filosofia o le olaga faaletagata e mafai ona faamalamalama; o tagata e mulimuli i filosofia e le o i ai ni upumoni aiai o le olaga e mafai ona faamaoniaina i o latou manatu faatapulaaina o le mea moni—e faapea o le upumoni ua na o se aafiaga faaletagata—ae o tulafono o tulafono lava ia! O le upumoni a le Atua e moni ma faamaoni! O le mea e fetalai mai ai le Atua e sa’o e sa’o lava! Ma o le mea e fetalai mai ai o Ia e sese e sese lava!

O le mafuaaga lena e taua tele ai lou iloaina o tulafono a le Atua. O loo latou puleaina lenei atulaulau ma le anoanoai o isi. A solia ia tulafono faalelagi, e mulimuli mai ia taunuuga. E ui lava tatou te faanoanoa mo i latou e solia ia tulafono a le Atua, ae e tatau lava ona totogi ia sala. E tatau ona usitaia ia tulafono faalelagi.

Sa ou aoaoina lenei mea a o avea ma fomai tipitipi a Peresitene Spencer W. Kimball. Ina ua faafuasei ona faaletonu le tamai masini sa tuu i totonu mo lona fatu, sa toe foi mai Peresitene Kimball ia te au mo se fesoasoani. Ae sa muamua lava ona ia talosagaina au e fai sona faamanuiaga faaleperisitua. Ina ua uma le faamanuiaga, lea na folafola atu i ai le toe faasa’oina o le faaletonu o le tamai masini, sa ia fai mai ia te au, “Ia ua mafai nei ona e faia soo se mea e te manaomia ona fai ina ia avea ai lena faamanuiaga o se mea moni.”

Sa ou faagasolo i le taotoga. I le uaea lea e alu atu ai le eletise mai le tamai masini i lona fatu, sa ou maua ai se vaega na motusia. Ina ua ou suia lena uaea faaletonu, sa vave ona toe ola le tamai masini, ma mafai ai e le fatu o Peresitene Kimball ona toe tata lelei. E oo lava i le perofeta a le Atua e le mafai ona le amanaiaina le tulafono e fesootai ma le feaveaiga o le eletise.

O le mea moni, o Peresitene Kimball o le perofeta a le Atua. A o ou matauina ma le totoa o ia i ona gasegase eseese ma matauina ana suesuega loloto ma ootia a o ia saili atu i faaaliga, sa avea o ia ma ou faufautua. E le faatuaoia lo’u alofa mo ia!

E ui ua faatumulia le lalolagi i le le mautonu, ae e le manaomia ona i ai se le mautonu i lou loto ma le mafaufau e uiga i mea e moni ma mea e le moni. O le le mautonu e tupu mai i faamatalaga le atoatoa pe lemailoa. I le avea ai ma se Aposetolo, ou te augani atu ia te outou ia aoao i tulafono lemafetuunaia a le Atua. Aoao i ai e ala i le suesue ma le faatuatua. O lona uiga, faatasi ai ma isi mea, “[o le ola lea] i afioga uma e tulei mai le fofoga o le Atua.”¹²

Tatalo ia iloatino le eseesega i le va o tulafono a le Atua ma filosofia a tagata, e aofia ai togafiti taufaasese a le fili. I le gasologa o taimi, ua faaleleia ai e Lusifelo ana togafiti. E atamai o ia i le faalavefau, taufaasese, faa’ole’ole, ma le taitaisese. Ou te augani atu ia te outou ia aloese mai ana togafiti faamailei e pei ona outou aloese mai se faamai!

O mailei ua mamanuina e Satani e na o le faanoanoa, pologa faaleagaga, ma le oti na te aumaia ia te oe.¹³ E moni lenei mea i taimi uma . O taunuuga faanoanoa o le gauai atu i faatosinaga a Lusifelo e faamoemoeina, faatuatuaina, e fai soo, ma e faanoanoa.

I se isi itu, ou te folafola atu a e tausia poloaiga a le Atua, a e ola i Ana tulafono, o le a faateleina pea ona e saoloto. O lenei saolotoga o le a tatala atu ai ia te oe lou natura paia ma faatagaina ai oe ia uluola oe lava ia. O le a faasaolotoina oe mai le pologa o le agasala. O le a e saoloto e avea ma oe—o se taitai mataalia ma amiotonu. O le a saunia oe e taitai e ala i mataupu ma e ala i faataitaiga po o fea lava e manaomia ai oe. O le mea e fiafia ai, o faamanuiaga o le tausiga o poloaiga a le Atua e faamoemoeina, faatuatuaina, ma fai soo foi.

I le avea ai ma tagata o Lana Ekalesia toefuataiina, ua tatou iloa ai o Iesu Keriso lo tatou Matai, o lo tatou Fautua sili lea. I le avea ai ma tagata moni o le meleniuma, ua e fanau mai ai e avea ma soo moni o Iesu Keriso. O le mea moni, e na o le pau le auala e avea ai ma se tagata moni o le meleniuma o le avea lea ma se tasi o Ona soo moni!

E mafai faapefea ona e faateleina lou avea ma soo? E i ai sa’u valaaulia mo outou o le a fesoasoani lea—o se galuega faatino, moni—pe afai e te filifili e taliaina. E amata atu i le po nei ia faapaiaina se vaega o lou taimi i vaiaso taitasi e suesue mea uma na fetalaia ma faia e Iesu e pei ona tusia i le Feagaiga Tuai, aua o Ia o le Ieova o le Feagaiga Tuai. Suesue Ana tulafono e pei ona tusia i le Feagaiga Fou, aua o Ia o le Keriso [o le Feagaiga Fou]. Suesue Lana mataupu faavae e pei ona tusia i le Tusi a Mamona, aua e le o i ai se isi tusi o tusitusiga paia ua sili atu ona faaali manino mai ai Lana misiona ma Lana galuega. Ma suesue Ana fetalaiga e pei ona tusia i le Mataupu Faavae ma Feagaiga, aua o loo faaauau pea ona Ia aoaoina Lona nuu i lenei tisipenisione.

Atonu e foliga mai o se galuega faatino tele lenei, ae ou te uunaia oe ia taliaina. Afai e te faagasolo e aoao mea uma e te mafaia e uiga ia Iesu Keriso, ou te folafola atu ia te oe o lou alofa mo Ia, ma mo tulafono a le Atua, o le a faatupulaia e sili atu i mea e te mafaufauina i le taimi nei. Ou te folafola atu foi ia te oe o le a faateleina lou tomai e liliuese ai mai le agasala. O le a faateleina lou manao e tausi i poloaiga. O le a e iloaina le sili atu ona e mafai ona savali ese mai faafiafiaga ma mea faatasina a i latou e faatauemu i soo o Iesu Keriso. Ina ia fesoasoani ia te oe, ia tagai i le Taiala i Tusitusiga Paia mo maufaasino i lalo o le autu “Iesu Keriso.”¹⁴

Suesue i mea uma e faatatau ia Iesu Keriso e ala i le saili malosi ma le agaga tatalo ia malamalama i uiga taitasi o Ona faalagiga ma suafa mo oe patino lava ia. Mo se faataitaiga, o Ia moni lava o lou Fautua i le Tama. O le a i ai o Ia i lou itu. O le a Ia tu mai mo oe. O le a ia fetalai mo oe , i taimi uma, pe a e filifili e avea atili e pei o Ia.¹⁵

Ia iloa o Ia e ala i le suesue i mea uma o loo faaauau pea ona Ia aoao mai e ala mai i Ana perofeta soifua ma aposetolo. Suesue le “O Le Aiga: O Se Folafolaga i le Lalolagi.” Suesue le pepa o faamatalaga “O Le Keriso Soifua”. O nei mea uma e lua na mauaina e ala i faaaliga. Faasalalau i luga o le initoneti ma mea e mafai ona e vaai atu i ai i aso taitasi.

O na upu faaalia o mea ia e talitonu i ai tagata moni o le Au Paia o Aso e Gata Ai. Tatalo mo se molimau o na upumoni ua fai ma faatusa o le tulafono faalelagi. Aoao e toe faamatala na upumoni i au lava ia upu. Faataitai! Ona tatalo lea ma tagai mo ni avanoa e tautala atu ai e uiga i mea e te talitonu i ai. O le a faateleina lou tomai e taitai ma maua faatosinaga amiotonu pe a e faia.

I se aso o lumanai, o le a e tu ai oe lava ia i luma o le Faaola. O le a lofituina oe i loimata i lou i ai i Lona afioaga paia. O le a e tauivi e sue ni upu e faafetai atu ai ia te Ia mo le totogiina o au agasala, mo le faamagaloina o oe i soo se agaleaga i isi, mo le faamaloloina o oe mai manuaga ma amioletonu o lenei olaga.

O le a e faafetai atu ia te Ia mo le faamalosia o oe e fai mea faigata, mo le liliuina o ou vaivaiga e avea ma malosiaga, ma mo le faafaigofieina mo oe ia mau faatasi ma Ia ma lou aiga e faavavau. O Lona faasinomaga, Lana Togiola, ma Ona uiga paia o le a patino ma moni ia te oe.

Ae e te le tau faatali seia oo i lena taimi. Filifili ia avea ma se tasi o Ona soo moni i le taimi nei. Ia avea ma se tasi e alofa moni ia te Ia, o le e manao moni ia auauna atu ma taitai e pei ona sa Ia faia.¹⁶

O i tatou o Ona tagata! Ua tatou osifeagaiga e avatu le savali o le talalelei i malo uma, ituaiga, gagana, ma nuu. A tatou galulue ma le loto i ai ia avea ma ni taitai amiotonu, e mafai ona tatou pepese ma le loto e tasi, “Faamalosi ia i le galuega nei [a le Alii].”¹⁷

O lenei, i le avea ai ma se tasi o Ana Aposetolo, ou te faaaogaina ai na ki e tuu atu ai se faamanuiaga i luga o outou uma taitoatasi. Ou te faamanuia ia te outou ia iloa tulafono a le Atua ma ola ai. Ou te faamanuia ia te outou ia avea ma se faataitaiga lelei, i upu ma galuega, o se soo moni o Iesu Keriso. Ou te faamanuia ia te outou ina ia saoloto mai le agasala, ia faasusulu atu le lelei ma le malamalama i se auala o le a tosina mai ai isi ia mananao ia iloa ma lagona le puna o lou malamalama. Ou te faamanuia ia te outou ia manuia tou taumafaiga faaleaoaoga ma faalegaluega. Ou te faamanuia ia te outou ia saili ma tausi sau soa amio mama. Ma ou te faamanuia ia te outou taitoatasi ia avea ma se taitai amiotonu i lou aiga, nuu, atunuu, ma i le Ekalesia.

Ou te faamanuia atu ai, ma tautino atu o loo soifua le Atua! O Iesu o le Keriso! O Lana Ekalesia lenei! Ou te molimau atu ai i le suafa paia o Iesu Keriso, amene.