Ua Taofia e Janeelyn le Faasologa

Sa faasolo e Janeelyn lona limamatua i le isi itu o le lau o le telefoni. Vitio na feemoemoai mai. Sa taofi o ia e matamata i se tasi, ona toe faasolo lea. Ona ia taofi lea i se isi vitio. Sa tele gagana leaga, ae sa malie, o lea sa ia matamata ai pea. Ona faaauau ai lea ona faasolosolo.

“Janeelyn! E te fia tusi ata?” Sa faalealea mai e lona uso laitiiti o Jojo se fasi pepa.

Sa tilotilo a’e i luga Janeelyn. “E le o le taimi nei.”

“Ua lelei.” Sa faanono Jojo ma tuu i lalo le pepa.

Faasolo. Faasolo. Faasolo. Vitio o manu aulelei. Vitio o tagata lauiloa. Vitio o tamaiti o loo sisiva. Ma ni nai vitio na iloa e Janeelyn e le lelei i le matamata. Ua lelei, atonu e sili atu nai lo nisi. Sa amata ona lagona e Janeelyn e tatau ona taofi lona matamata iai.

Ae sa tusia foi e tagata le tele o mea mananaia, sa ia mafaufau ai. Sa ia aoaoina foi ni auala fou e tusi ai ata mai ni nai vitio.

“Janeelyn,” na valaau atu ai Tina.

“Aaa?” E lei tilotilo i luga Janeelyn i le taimi lea.

O loo fai le tatou alaisa falai meaaisami nanei,” o le tala lea a Tina. “E mafai ona e fesoasoani ia te a’u i le faiga?”

Sa fiafia Janeelyn i le alaisa falai meaaisami. Ae sa lei manao o ia e tu i luga i le taimi lea.

“E mafai ona ou setiina le laulau?” sa ia fesili ai. “E mafai foi ona ou fesoasoani i ipu pe a maea.”

“Ua lelei lena,” na fai mai ai Tina. “Ae e tatau ona e faatulagaina sa’o pe a ou fesili atu ia te oe. Ona oo lea i le taimi e toe faafoi ai le telefoni. Malie iai?”

“Malie,” o le tala lea a Janeelyn.

Sa matamata pea Janeelyn i vitio. Sa ia toe lagonaina foi e le tatau ona ia tilotilo atu iai. Ae sa matuai manao lava o ia e matamata i le isi vitio. Ma le isi. Ma le isi. Faasolo. Faasolo. Sa faigata ona taofi!

Mulimuli ane na tuu ai i lalo e Janeelyn le telefoni. Ia, atonu sei ona faaumaina le vitio mulimuli lea … .

Leai, sa ta’u atu ma le mausali e Janeelyn ia te ia lava. Sa uunaia o ia e le Agaga Paia, ma sa ia manao e faalogo. Sa latalata pea lona lima i le telefoni. Sa matuai faatosina lava! Sa moeiini mata o Janeelyn.

Tama Faalelagi pele, sa ia tatalo le leoa. O loo ou taumafai malosi e faalogo i le Agaga Paia, ae ou te manaomia le fesoasoani. Ou te manao e taofi le matamata i nei vitio, ae ou te le o mautinoa pe faapefea. I le suafa o Iesu Keriso, amene.

O le taimi lava lena, na valaau atu ai Tina ia te ia e seti le laulau. Sa oso i luga Janeelyn ma ataata. O se tasi lena o auala e fesoasoani e aveese ai o ia mai le telefoni.

Sa faatulaga e Janeelyn ipu mafolafola i luga o le laulau. “Tina, sa ou vaai i ni mea leaga i luga o le telefoni,” sa ia ta’u atu ai.

Sa ea a’e Tina mai lana kuka. “O a ituaiga o mea?”

“E pei lava, o upu leaga ma vitio leaga.” Sa faamimigi tauau o Janeelyn. “Ae e le leaga uma.”

“O le a se mea na e faia ina ua e vaai i mea leaga?” O le fesili lea a Tinā.

Sa filemu Janeelyn mo sina taimi. Sa ia setiina se ipu inu i nofoaga taitasi.

“Sa ou matamata pea,” na ia fai atu ai. “Ou te lē iloa pe aisea. Ae na ta’u mai e le Agaga Paia ia te a’u e taofi, o lea sa ou faia ai se tatalo mo se fesoasoani.”

Sa seti e Tina se ipu meaai vevela o le alaisa falai meaaisami i luga o le laulau. “O nisi taimi e faigata tele ona tuu le faia o mea e tusa lava pe tatou te iloa e leaga,” o lana tala lea. “Ma a tupu lena mea, o le mea sili e mafai ona tatou faia o le tatalo.”

Sa ataata Janeelyn. “Na ou iloa na ou faia le mea sa’o.”

“Ua e mautinoa lava.” Sa tuu atu e Tina ia Janeelyn sipuni e tuu i luga o le laulau. “Ma e le leaga tele le initoneti. E mafai ona fesoasoani ia i tatou e fesootai ai ma uo ma fefaasoaai manatu. Ae e mafai foi ona faigata ona aloese mai mea leaga uma. Amata atu nei, afai o le a e matamata i vitio, tatou matamata faatasi i ai. Ina ia mafai ai ona ma fesoasoani ma Tama pe a e matamata i se mea leaga.”

Sa luelue le ulu o Janeelyn. O le isi taimi o le a ia matamata faatasi ai ma Tina ma Tama i vitio. Ae seia oo i lena taimi, sa tele ni mea malie e mafai ona ia faia e aunoa ma le telefoni.

“E mafai ona e ta’u atu i tagata uma ua oo i le taimi o le taumafataga o le afiafi?” O le fesili lea a Tinā.

“Ioe! Ma a uma le taumafataga o le afiafi, o le a ou tusia ni ata ma Jojo!”

Ata

Tala PDF

O ata na tusia e Mitch Miller