« Fa’aea Janeelyn i te fa’ahaere i te paruai », Hoa, Māti 2024, 36–37.
Fa’aea Janeelyn i te fa’ahaere i te paruai
’Ua hina’aro mau ’oia e hi’o i te video i muri iho. ’E tō muri iho. ’E tō muri iho.
’Ua tupu teie ’ā’amu i Malaisie.
’Ua fa’ahe’e iho ra Janeelyn i tōna manimani rima rahi i ni’a i te paruai o te niuniu ’āfa’ifa’i. ’Ua pura mai te mau video. ’Ua fa’aea ’oia nō te māta’ita’i i te hō’ē, muri iho ’ua fa’ahaere fa’ahou. I muri iho ’ua fa’aea ’oia i ni’a i te tahi atu video. E rave rahi mau parau ’ino, e mea ’ārearea rā, nō reira ’ua tāmau noa ’oia i te māta’ita’i. ’E i muri iho ’ua tāmau noa i te fa’ahaere.
« Janeelyn ! E hina’aro ānei ’oe e haere mai e pāpa’i hōho’a ? » ’Ua tāhirihiri mai tōna tuahine ’āpī a’e ’o Jojo i te hō’ē ’api parau.
’Ua hi’o atu Janeelyn iāna. « ’Eiaha i teienei ».
« Nā reira ». ’Ua tu’atu’a te mata ’o Jojo ’e ’ua tu’u i te ’api parau i raro.
’Ua fa’ahaere. ’Ua fa’ahaere. ’Ua fa’ahaere. Te mau video nō te mau ’ānimara nehenehe. Te mau video nō te mau ta’ata tu’iro’o. Te mau video nō te mau tamari’i e ’ori ra. ’E te tahi mau video tā Janeelyn i ’ite e ’ere i te mea maita’i ’ia māta’ita’i. Nā reira, pēnei a’e hau atu i te tahi noa. ’Ua ha’amata Janeelyn i te feruri ē, e ti’a iāna ’ia fa’aea i te māta’ita’i i te reira.
’Ua ha’aparare ato’a rā te mau ta’ata e rave rahi mau mea maita’i, ’ua mana’o ’oia. ’Ua ha’api’i ato’a mai ’oia i te mau rāve’a ’āpī nō te pāpa’i hōho’a maoti te tahi mau video.
« Janeelyn », ’ua pi’i atu māmā.
« Hmm ? » ’Aita ’o Janeelyn i ’amo noa a’e i te mata i te reira taime.
« E ’amu tātou i te raiti farai ’e te mau hotu o te moana i teie pō », ’ua parau māmā. « E tauturu mai ānei ’oe iā’u nō te rave i te reira ? »
Mea au roa nā Janeelyn te raiti farai ’e te mau hotu o te moana. ’Aita rā ’oia i hina’aro e ti’a i teienei.
« E nehenehe noa ānei au e fa’anaho i te ’aira’a mā’a ? » tāna ïa uira’a. « E nehenehe ato’a vau e tauturu nō te horoi i te mau ’āu’a i muri mai ».
« Nā reira ïa », ’ua parau māmā. « E ti’a rā ia ’oe e fa’anaho i te mau mea ato’a, ’ia ani atu ana’e au ia ’oe. ’E i muri iho, e tae mai te taime nō te fa’aho’i mai i te niuniu. Pāpū ? »
« Pāpū roa », ’ua parau Janeelyn.
’Ua tāmau noa Janeelyn i te māta’ita’i i te mau video. Fa’ahou ā, ’ua tae mai te mana’o ’eiaha ’oia e hi’o i te reira. ’Ua hina’aro mau rā ’oia e hi’o i te video i muri iho. ’E tō muri iho. ’E tō muri iho. ’Ua fa’ahaere. ’Ua fa’ahaere. E mea fifi roa ’ia fa’aea !
I te pae hope’a, ’ua tu’u atu Janeelyn i te niuniu i raro. ’Ā, pēnei a’e ’ua ti’a noa iāna e fa’aoti roa i te hō’ē video hope’a…
’Aita, ’ua parau pāpū maita’i ’o Janeelyn iāna iho. ’Ua muhumuhu mai te Vārua Maita’i iāna, ’e ’ua hina’aro ’oia e fa’aro’o. ’Ua vai noa rā tōna rima i pīha’i iho i te niuniu. E mea fa’ahema roa ! ’Ua tāpiri Janeelyn i tōna mata.
E te Metua i te ao ra, ’ua pure ’oia ma te muhu ’ore. Tē tāmata itoito nei au i te fa’aro’o i te Vārua Maita’i, tē hina’aro nei rā vau i te tauturu. Tē hina’aro nei au e fa’aea i te māta’ita’i i teie mau video, ’aita rā vau i ’ite e nāhea ra. Nā roto i te i’oa ’o Iesu Mesia, ’āmene.
I taua iho taime ra, ’ua tuō mai māmā iāna nō te fa’anaho i te ’aira’a mā’a. ’Ua ti’a mai ra Janeelyn i ni’a ’e ’ua ’ata’ata ihora. ’O te hō’ē ïa rāve’a nō te tauturu iāna ’ia fa’aātea ’ē i te niuniu.
’Ua fa’anaho Janeelyn i te mau merēti i ni’a i te ’aira’a mā’a. « Māmā, ’ua ’ite atu vau i te tahi mau ’ohipa ’ino i roto i te niuniu », ’ua parau a’era ’oia.
’Ua hi’o mai ra māmā iāna nā roto mai i te fare tūtu. « E aha te reira mau mea ? »
« Mai te mau parau ’ino ’e te mau video ’ino ». Amo ihora Janeelyn i tōna paufifi. « ’Aita rā te mau mea ato’a i te mea ’ino roa ».
« E aha tā ’oe i rave ’a ’ite ai ’oe i te mau mea ’ino ? » Ui a’e ra māmā.
’Ua vai māmū noa Janeelyn ma’a taime ri’i. ’Ua tu’u atu ’oia i te hāpaina i te mau vāhi ato’a.
« ’Ua tāmau noa vau i te māta’ita’i », tāna ïa i parau. « ’Aita vau i ’ite nō te aha ra. Terā rā, ’ua parau mai te Vārua Maita’i iā’u ’ia fa’aea, nō reira ’ua pure au nō te ani i te tauturu ».
’Ua tu’u atu ra māmā i te hō’ē fāri’i pārahurahu o te raiti farai ’e te mau hotu o te moana i ni’a i te ’aira’a mā’a. « I te tahi taime e mea fifi roa ’ia fa’aea i te rave i te mau mea, noa atu ’ua ’ite tātou e mea ’ino te reira », tē parau ra māmā. « ’E ’ia tupu ana’e mai te reira, te ’ohipa maita’i roa a’e tā tātou e nehenehe e rave ’o te pure ïa ».
’Ua ’ata’ata Janeelyn. « Nō reira ’ua rave au i te ’ohipa ti’a ».
« Pāpū roa ’ua nā reira ’oe ». ’Ua hōro’a atu māmā i te mau punu tāipu ia Janeelyn nō te tu’u i ni’a i te ’aira’a mā’a. « ’E e ’ere te natirara i te mea ’ino roa. E nehenehe te reira e tauturu ia tātou ’ia tāu’aparau ’e te mau hoa ’e ’ia fa’a’ite i te mau mana’o. Terā rā, e mea fifi ato’a ’ia fa’aātea ’ē i te mau mea ’ino ato’a. Mai teie taime atu, mai te mea e māta’ita’i ’oe i te mau video, e māta’ita’i ’āmui ana’e tātou i te reira. Mai te reira, e nehenehe māua pāpā e tauturu, mai te mea tē māta’ita’i ra ’oe i te hō’ē ’ohipa ’ino ».
’Ua tā’iri’iri Janeelyn i te upo’o. I te taime i muri nei, e māta’ita’i atu ’oia i te mau video ’e ’o māmā ’e ’o pāpā. I teie rā taime, e nehenehe ’oia e rave i te mau mea ’ārearea ma te niuniu ’ore.
« E nehenehe ānei ’oe e parau i te mau ta’ata ato’a, ’ua tae te taime nō te tāmā’a ? » Ui a’e ra māmā.
« ’Oia mau ! ’E i muri a’e i te tāmā’ara’a, e pāpa’i hōho’a māua Jojo ! »
Fa’ahōho’ara’a nā Mitch Miller