Ngai Bon Ana Reirei Iesu Kristo,” Ibukin Kakorakoraia Kairake, Tianuare. 2024.
2024 Aia Kibu ni Koora Kairake
Bon Ngai ana Reirei ni koaua Iesu Kristo
Ko kona n iriira te Tia Kamaiu ao ni kabutaanako Ana taeka nakoia aomata nako.
Ko a tia ni miimi bwa bukin tera, imwiin kamaiuakia aomata, e tuangia tabeman mai buakoia aomata Iesu bwa a na aki tuanga temanna (taraa Mareko 7:36)? Teuana bukina e riki ma aekakiiia taan ririmwiina ake E kainnanoiia. Ko na bae n iangoia bwa ngkana a taetae aomata i bukin taekan ana kamaiu, e na riki bwa te anga ae raoiroi ibukin Iesu n anai nanoia taan iriiria. Ma, e aki ti kainnanoiia taan ririmwiina Iesu. E kainnanoia ana reirei.
E taku Iesu nakon Betero ao Anterea, “Mai ri mwiu” (Mataio 4:19). Ana Rairairi Iotebwa Timiti n kiibu aikai a taku, “Bon ngai are e koreaki taekana irouia burabeti; iriirai” (Joseph Smith Translation, Mataio 4:18 [n Mataio 4:19, te bwai ae na taraaki i nano a]). Te kakao bon tiaki ibukin te tai ma ngaia ae uarereke. E tangiriia bwa a na riki bwa Ana reirei n akea tokina.
E aki ti tangiria bwa a na nooria n Reireia aomata, tangiriia aomata, ao ni karaoi kakai. E tangiriia bwa a na karaoa ae ai aron akanne. E tangira Ana mwakuri bwa a na riki bwa aia mwakuri. Rineakin Kristo e nanonaki bwa a na reiakina te beku n aron Are e karaoia ao Iango n arona n Iango. A na karaoa maiuia n ai Aron maiuna, ao E na reiakiniia ao n anganiia te buoka ae a kainnanoia n riki n ai Arona.
Te taeka n Kuriiki ibukin ana reirei Iesu bon mathetes. E korakora riki nanona nakon te tia iriiria ke ataein te reirei. E rarairaki bwa te tia kataneiaaki. I nanon ana bong Kristo, ana reirei a rinea aia toka mairouia ake a tangiria n reiakinaki ma te taratara nakon rikiia n toka ngaiia. E aki ira te katooto anne Kristo. E bitia ao n ukoria Ana reirei. N te bong aei, e weteira Kristo bwa ti na nako Ina. E weteira bwa ti na riki bwa Ana reirei ao n katanoata Ana taeka i buakoia Ana aomata bwa aonga n karekea te maiu ae aki totoki (taraa 3 Nibwaai 5:13).
Temanna te ataeinnaine mai Haiti n te Caribbean e kaota nanona ae korakora n riki bwa ana reirei Kristo man kaoan raoraona ae tiaki te membwa n te Ekaretia bwa e na nako ma ngaia nakon te maungatabu n te FSY. N te moantai ao taman raoraona e aki anga te kariaia nakon natina te aine bwa e na nako. Taan kairiiri n te Ekaretia a kabwarabwara taekan te waaki ae nakoraoi imwaina ao taan ibuobuoki aika kairake ni ikawai ake a na kawakinna. E anga te kariaia tamana nakon natina te aine bwa e na nako, ao imwiin nooran te kaokoro ae riki ni maiuna, e anga naba te kariaia n kaea bootakin te Taromauri ao—onoua te namwakaina imwiina—e bwabetitoaki.
Temanna te ataeinimwaane mai Amerika Maiaki e kaota nanona ae korakora n riki bwa ana reirei Kristo man tibwaakin ana kanree ma raoraona ngke a toka n te bwati nakon te reirei. Ngke e roko n te kanre are renganana te koobe, e kabwarabwara bwa e tuai man katoonga rengarenga n aron anne ngkai bon akea mairouia ana utu ae a mooi n te koobe. Anne e kariiri nakon te rairaki ibukin te Ekaretia, are e karekea te kakao nakon te roko n bootaki, are e karekea kairakin raoraona ni kaaina te Ekaretia ao n karaoa ana mwakuri ni mitinare i Chile.
Tiaki ni kabane aomata ake ko marooro ma ngaiia i bukin te Ekaretia ke ni kaoia nakon te waaki n te Ekaretia ae a na kaaina te aro. E Tamaroa Anne. Tiaki ni kabane ake e taekinna Kristo i nanon Ana tai ni mwakuri iaon te aba ae riki bwa kaaina naba. Ngkai, ti rineaia bwa ti na riki bwa ana reirei Iesu Kristo ao n katanoata Ana taeka, E na anganira te korakora ao te buoka mai karawa. Ti na rekinna bwa e kanga aron te riki n ai Arona, ao anne ae a kakaraoia ana reirei.