Pangitaa ang Inyong Kalig-on diha kang Jesukristo

Wala kamo moabot dinhi tungod sa sulagma o sayop nga hitabo. Mipili kamo nga moanhi dinhi sa yuta aron magkat-on, molambo, mobuhat og dalaygon nga mga butang, ug mahimong mas sama sa inyong Langitnong Amahan. Niini nga panaw, mag-atubang kamo og mga panahon sa kalisod, personal nga pagsulay, pagkawala sa kadasig, ug kasagmuyo nga mahimong mabati nga sobra ra kaayo. Tingali gibati ninyo nga nalit-ag sa ingon nga panahon karon gayod.

Atol niana nga mga panahon, palihog hinumdomi nga ang inyong Langitnong Amahan nahigugma kaninyo. Gibuhat Niya kanunay, ug buhaton Niya kanunay. Tungod sa Iyang walay kataposan ug hingpit nga gugma, Siya mipadala sa Iyang Anak, si Jesukristo, aron sa paglig-on kaninyo ug pagtabang kaninyo nga mopadayon sa pag-uswag. Ug si Jesus mianhi tungod kay Siya usab nahigugma gayod og maayo kaninyo.

Subo lang, wala giila sa ubang mga tawo ang ilang panginahanglan alang sa usa ka Manluluwas. Wala sila makasabot nga sila, sama sa tanang tawo, makahimo og mga sayop nga dili nila maayo, makasinati og mga kapildihan nga dili nila mabawi, ug mag-atubang og mga kasamok ug mga trahedya nga dili nila malahutay sa ilang kaugalingon. Ni sila makabuntog sa sala ug kamatayon pinaagi sa ilang kaugalingon. Kini nagpasabot nga sila—ug tanang tawo—nagkinahanglan sa Pag-ula ni Jesukristo, uban sa kalig-on nga madala niini.

“Nindot kana, Elder Holland,” kamo tingali naghunahuna, “apan unsaon man nako paghimo ni Jesukristo nga akong kusog?” Sa pagtabang og tubag niini nga pangutana, palihog tugoti ko nga mopakigbahin og pipila lang sa dili maihap nga mga paagi nga si Jesukristo nagpalig-on kaninyo sa matag adlaw.

Sa Iyang kataposan nga gabii sa mortalidad, si Jesukristo misulod sa Tanaman sa Getsemani. Didto, siya miluhod taliwala sa mga kahoy nga oliba ug misugod sa pagdala diha sa Iyang Kaugalingon sa mga sala sa kalibotan. Kining dako ug walay kinutoban nga pag-antos “nakapahimo [kaniya], … ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit” (Doktrina ug mga Pakigsaad 19:18).

Si Jesus gidala dayon ngadto sa Kalbaryo ug gilansang. Didto Iyang gikompleto ang Iyang maulaong sakripisyo. Siya andam nga mihatag sa Iyang kinabuhi, ug dayon Siya madaogon nga mibangon gikan sa kamatayon. Niining panahon sa Pasko sa Pagkabanhaw, ako nalipay sa pagpahayag nga si Jesukristo buhi! Ako usab mopahayag nga Siya dili lang mokuha sa kabug-at sa sala apan usab “[mi]antos sa mga sakit ug mga kasakit ug mga pagtintal sa matag matang” sa pagbuhat sa ingon (Alma 7:11).

Ang Manluluwas mibati sa matag kasakit ug kasubo ug milahutay, sa usa ka personal nga paagi, sa tanang kaguol ug pag-antos nga nasinati ninyo, nako, ug sa matag kalag nga nabuhi o mabuhi sukad. Tungod sa unsay Iyang giagian sa pisikal, mental, ug espirituwal nga paagi alang kaninyo, Siya nasayod unsaon sa paglig-on kaninyo.

Tingali lisod alang kaninyo nga motuo nga si Jesus mahimong interesado sa pagtabang kaninyo isip usa lamang taliwala sa minilyon kinsa managsama og edad. Kon maghunahuna kamo nga Siya adunay mas maayo nga mga butang nga buhaton kaysa sa paglig-on kaninyo sa inyong mga panahon sa panginahanglan, hunahunaa Siya diha niana nga tanaman, hunahunaa Siya diha niana nga krus. “Siya namatay, [siya midugo] ug nag-antos”² alang kaninyo tungod nasayod Siya nga kamo bililhon alang niini. Nasayod gihapon Siya niana. Siya hilabihan ka interesado, andam, ug makahimo sa pagtabang kaninyo—karon gayod ug sa kahangtoran. Siya mihatag sa Iyang kinabuhi aron Siya makapalig-on kaninyo samtang kamo modawat sa Iyang makapausab sa kinabuhi nga imbitasyon: “Duol kamo kanako” (Mateo 11:28).

Inyohang pagpili ang pagsunod ni Jesukristo ug paghimo Kaniya nga inyong kalig-on. Ang “dalan Niya may timaan”³ balik ngadto sa Langitnong Amahan. Sa pagkatinuod, Siya mao “ang dalan, ang kamatuoran, ug ang kinabuhi” (Juan 14:6).

Makit-an ninyo ang dalan pinaagi sa paghangop sa ebanghelyo ni Jesukristo samtang kamo magpakita og hugot nga pagtuo Kaniya ug maghinulsol sa inyong mga sala. Inyong mapalawman ang inyong relasyon Kaniya kon mopili kamo nga magpabunyag sa Iyang ngalan ug modawat sa gasa sa Espiritu Santo. Kamo dayon magpadayon diha sa Iyang dalan sa ebanghelyo pinaagi sa pagtuman sa mga sugo, pagdawat og mga ordinansa, pagtahod sa mga pakigsaad, ug pagpakabuhi isip Iyang disipulo.

Kini nga mga aksiyon mohimo og gamhanan nga koneksiyon—usa ka koneksiyon sa pakigsaad—nga seguradong mobugkos kaninyo ngadto ni Kristo—ug Siya diha kaninyo. Samtang kamo mosunod Kaniya ug sa Iyang mga pagtulon-an, Siya ug ang Amahan mamahimong inyong kinadak-an nga mga tinubdan sa espirituwal nga direksiyon ug kalig-on. Kamo dayon makapadayon sa unahan sa luwas ug malipayon nga paagi sa matag adlaw, mamahimong mas sama Kanila, ug usa ka adlaw mobalik aron mopuyo uban Kanila ug makabaton sa matang sa kinabuhi nga Ilang gipuy-an.

Sa tibuok kong kasingkasing, ako magpamatuod nga si Jesus mao ang Kristo. Kon kamo maningkamot nga mahimong espirituwal nga mas duol Kaniya, mosalig Kaniya, ug modapit Kaniya nga mahimong inyong kalig-on, Siya mopanalangin kaninyo sa Iyang espiritu ug kamo makakaplag Kaniya.⁴ Walay pagpili nga inyong mahimo nga sa bisan unsa nga paagi mobutang kaninyo nga lapas sa Iyang tabang. Ako nagtuo sa tibuok nakong kasingkasing sa unsay akong gisulti kaniadto: “Imposible nga ang mahangtorong kahayag sa Pag-ula ni Kristo dili moabot kaninyo [o ni bisan kinsa].”⁵

Kon kamo moduol ngadto kang Kristo, una ug kanunay nga motuman sa Iyang mga sugo uban sa “hingpit nga katuyoan sa kasingkasing” (3 Nephi 18:32), Siya motabang ug molig-on kaninyo sa inyong inadlaw nga kinabuhi. Siya mogunit sa inyong kamot ug mamahimong inyong paglaom. Siya mamahimong inyong kalig-on. Ug Siya magdala og malungtaron nga kalipay, tinuod nga kalinaw, ug dako nga kamaya nganha kaninyo.

Isip usa sa Iyang espesyal nga mga saksi, ako nagpamatuod ug nagsaad nga kini tinuod.