“Hoko ko e Kaungāmeʻa ʻOkú Ke Fiemaʻú,” Ki Hono Fakamālohia ʻo e Toʻu Tupú, ʻEpeleli 2024.
Hoko ko e Kaungāmeʻa ʻOkú Ke Fiemaʻú
Te ke lava ʻo tokoni ke fakahaofi ha taha.
Tā fakatātaaʻi ʻe Uran Duo
Kuó ke hū atu nai ki ha paati, hulohula, pe ʻekitivitī kehe ʻo kumi fakamātoatoʻi ha taha ʻokú ke ʻiloʻi? Naʻá ke fakaʻamu ke nau kumi koe pea fakahaofi koe mei hoʻo tuenoá. ʻI he tafaʻaki ʻe tahá, kuó ke hū atu nai ki ha loki ʻoku fonu ai ha kakai peá ke fakatokangaʻi ha taha kehe ʻoku siʻi tuʻu toko taha pē? ʻIkai nai ʻoku tatali foki mo ia ki ha taha ke fakahaofi ia?
Ngāue, ʻOua ʻe Tatali
ʻOku tau takitaha fiemaʻu ha kaungāmeʻa. ʻOku ʻuhinga ia ʻoku ʻi ai mo ha kakai kehe ʻoku nau talitali atu kiate koe ke ke hoko ko honau kaungāmeʻa.
Naʻe pehē ʻe Palesiteni Henelī B. ʻAealingi, Tokoni Ua ʻi he Kau Palesitenisī ʻUluakí, “ʻOku tau fiemaʻu kotoa pē ha ngaahi kaungāmeʻa moʻoni ke ʻofa ʻiate kitautolu, ke fanongo kiate kitautolu, ke fakahā mai ʻa e halá, pea mo fakamoʻoniʻi ʻa e moʻoní kiate kitautolu koeʻuhí ke tau lava ʻo pukepuke ʻa e takaua ʻa e Laumālie Māʻoniʻoní.”1 Kapau ʻoku tau fiemaʻu kotoa ha kaungāmeʻa moʻoni, tā ʻoku fiemaʻu ke tau hoko ko ha kaungāmeʻa moʻoni.
Kapau te ke hoko ko e kaungāmeʻa lelei ʻoku fekumi ki ai ʻa e niʻihi kehé, ʻoku ʻikai fiemaʻu ia ke ke tatali ke nau toki kumi koe. Te ke lava ʻo fekumi ki he niʻihi kehe ʻoku nau fiemaʻu ha kaungāmeʻá peá ke ʻuluaki ʻalu koe ʻo fakahaofi kinautolu!
Ko e Meʻa ʻOku Fai ʻe he Ngaahi Kaungāmeʻa Moʻoní
ʻOku fakakaukau ʻa e kakaí ʻi he taimi ʻe niʻihi ʻoku ʻuhinga ʻa e hoko ko ha kaungāmeʻa leleí ke poupouʻi ʻa e ngaahi fili ho kaungāmeʻá—ʻo tatau ai pē pe ʻoku hala pe fakatuʻutāmaki ʻa e ngaahi fili ko iá. Kae hangē ko e akonaki ʻa Palesiteni ʻAealingí, ʻoku fakahaaʻi ʻe he kaungāmeʻa leleí ʻa e founga ke tau maʻu ai ʻa e Laumālie Māʻoniʻoní.
ʻOku ʻuhinga leva ʻa e hoko ko ha kaungāmeʻa leleí, ko e taimi ʻe niʻihi ʻe fiemaʻu ke tau tataki lelei hotau ngaahi kaungāmeʻá ki he hala ʻo e tuʻunga fakaākongá. He ʻikai tokoni ʻetau tukuhifoʻi hotau ngaahi kaungāmeʻá mo e loto-fakamāú. Ka ʻo kapau ʻoku tau ʻofa moʻoni ʻiate kinautolu, te tau loto ke ʻofaʻi kinautolu ʻi ha founga te nau foki ai ki he maluʻanga ʻo e hala ʻo e fuakavá ʻo hangē ko ia naʻe fai ʻe he Fakamoʻuí. Tatau ai pē pe ko e hā hono fuoloá.
Ko hai ʻokú ne fiemaʻu hoʻo tokoni fakakaungāmeʻá ke fakahaofi kinautolu ʻi he ʻaho ní?