Pero Bisan Indi …

Sang bata pa ako, nagpauli ako halin sa pang-grade 8 nga torneo sa basketbol nga nagapangasubo, dismayado, kag ginaligban. Maabtik ko nga ginsiling kay nanay, “Ambot kon ngaa napirde kami—may pagtuo man ko nga madaog kami!”

Narealisar ko subong nga wala ko pa sadto nahibaluan kon ano gid ang pagtuo.

Ang pagtuo indi pagpaisog-isog, indi lamang handum, indi lamang paglaum. Ang matuod nga pagtuo amo ang pagtuo kay Ginuong Jesucristo—kompiyansa kag pagsalig kay Jesucristo nga nagatulod sa isa ka tawo nga magsunod sa Iya.¹

Pila ka siglo na ang nagligad, si Daniel kag ang iya lamharon nga mga kaupod gulpi lang nga ginkuha sa seguridad sang ila mga panimalay pa-gwa sa kalibutan—kalibutan nga tuhay kag makahaladlok. Sang si Sadrac, Mesac, kag Abed-nego nagpamalibad nga magluhod kag magsimba sa bulawan nga imahen nga ginpatindog sang hari, ginsilingan sila sang akig nga Nabucodonosor nga kon indi sila magsimba suno sa ginasugo, ihaboy sila gilayon sa nagadabadaba nga hurno. “Kag sin-o bala ina nga Dios nga makaluwas sa inyo sa akon mga kamot?”²

Ang tatlo ka pamatan-on maabtik kag may kompiyansa nga nagsabat, “Kon amo ini [kon imo kami ihaboy sa hurno], ang amon Dios nga ginaalagad namon makasarang magluwas sa amon sa nagadabdab nga hurno sang kalayo, kag sia magaluwas sa amon sa imo kamot.” Daw amo-amo sina ang akon pagtuo sang ara pa ako sa ika-walo nga grado. Pero ila dayon ginpakita nga lubos nila nga naintiendihan kon ano ang pagtuo. Padayon nila, “Pero bisan indi, … indi kami mag-alagad sa imo dios, ukon magsimba sang larawan nga bulawan nga imo ginpatindog.”³ Isa ina ka pahayag sang matuod nga pagtuo.

Nahibal-an nila nga makasalig sila sa Dios—bisan pa nga indi matabo ang mga butang sa paagi nga ila ginalauman.⁴ Nakahibalo sila nga ang pagtuo masobra pa sa pag-ugyon sa hunahuna, masobra pa sa pagkilala nga ang Dios buhi. Ang pagtuo amo ang lubos nga pagsalig sa Iya.

Ang pagtuo amo ang pagpati nga bisan wala naton maintiendihan ang tanan nga mga butang, nakaintiendi Sia. Ang pagtuo amo ang pagpati nga bisan limitado ang aton gahum, ang Iya indi. Ang pagtuo kay Jesucristo nagalakip sang lubos nga pagdangop sa Iya.

Sanday Sadrac, Mesac, kag Abed-nego nakahibalo nga makasalig sila pirme sa Iya tungod nahibal-an nila ang Iya plano, kag nahibal-an nila nga wala Sia nagabag-o.⁵ Nahibal-an nila, pareho sa nahibal-an naton, nga ang kabuhi sa duta wala natabuan lang. Isa ini ka malip-ot nga bahin sang dako nga plano⁶ sang aton mapinalanggaon nga Amay sa Langit agud mangin posible para sa aton, nga Iya mga anak nga lalaki kag babayi, nga mabaton ang pareho nga mga bugay nga ara sa Iya, kon gusto naton.

Nahibal-an nila, pareho sa nahibal-an naton, nga sa aton kabuhi antes sa duta, gintudloan Niya kita parte sa katuyuan sang kabuhi sa duta: “Mahimo kita sang duta nga sa diin ang mga ini makapuyo; Kag tilawan naton sila sa sini, agud mahibaloan kon himuon nila ang tanan nga butang nga isugo sa ila sang Ginuo nga ila Dios.”⁷

May pamatuod kita—isa ini ka pagtilaw. Ang kalibutan isa ka lugar sang pagtilaw para sa mortal nga mga lalaki kag mga babayi. Kon maintiendihan naton nga ini tanan pagtilaw, nga ginhatag sang aton Amay nga Langitnon, nga gusto nga magsalig kita sa Iya kag tugotan Sia nga buligan kita, makita naton ang tanan sing mas maathag.

Ang iya buluhaton kag Iya himaya, siling Niya sa aton, amo “ang ipahanabo ang pagkawala’y kamatayon kag kabuhi nga wala’y katapusan sang tawo.”⁸ Nalab-ot na Niya ang pagkadios. Karon ang Iya solo nga katuyuan amo ang buligan kita—ang pabakuron kita nga makabalik sa Iya kag mangin pareho sa Iya kag magkabuhi sang klase sang Iya kabuhi sa wala katapusan.

Tungod nahibaluan nila ini tanan, wala nangin mabudlay para sadtong tatlo ka pamatan-on nga mga Hebreo nga maghimo sang ila desisyon. Sundon nila ang Dios; ipakita nila ang pagtuo sa Iya. Luwason Niya sila, pero bisan indi—kag nahibal-an na naton ang natabo sa istorya.

Ginhatagan kita sang Ginuo sang kahilwayan sa pagpili, sang kinamatarong kag responsibilidad nga magdesisyon.⁹ Ginatilawan Niya kita paagi sa pagtugot nga mahangkat kita. Ginapasalig Niya kita nga indi Niya pagtugtan nga matentar kita nga sobra sangsa aton masarangan pakigbatuan.¹⁰ Pero kinahanglan naton nga maintiendihan nga ang dalagko nga mga hangkat nagapatubas sang mas maayo nga mga tawo. Wala naton ginapangita ang kabudlayan, pero kon nagaakto kita nga may pagtuo, ginapabakod kita sang Ginuo. Ang mga pero bisan indi sarang nga mangin dalagko nga mga bugay.

Natun-an ni Apostoles Pablo ining importante nga leksyon kag nagpahayag, pagkatapos sang dinekada nga matutom nga pangmisyonaryo nga buluhaton, “[Nagakalipay] kita sa mga pag-antos … nga nakahibalo nga ang pag-antos nagapatubas sing pagbatas; Kag ang pagbatas sing [eksperiyensya]; kag ang [eksperiyensya] sing paglaum: Kag ang paglaum wala nagapakahuya sa aton.”¹¹

Ginpasalig sia sang Manluluwas, “Ang akon [grasya] tuman sa imo, kay ang akon gahum ginahimpit sa kaluyahon.”¹²

Si Pablo nagsabat: “Sa labing dako nga kalipay magapabugal ako sa akon mga kaluyahon, agud nga ang gahum ni Cristo magpabilin sa akon. … Nagakalipay ako sa mga kaluyahon, sa mga pasipala, sa mga [kawad-on], sa mga paghingabot, sa mga kasakitan, tungod kay Cristo; kay kon maluya ako, niyan gamhanan ako.”¹³ Sang gin-atubang ni Pablo ang mga hangkat sa iya sa pamaagi sang Ginuo, nagtubo ang iya pagtuo.

“Bangud sa pagtuo si Abraham, sang sia gintilawan, naghalad kay Isaac.”¹⁴ Si Abraham, tungod sang iya dako nga pagtuo, ginpromisahan sang kaliwatan nga mas madamo pa sangsa mga bituon sa kalangitan, kag nga ang ina nga kaliwatan magahalin kay Isaac. Pero insigida nga ginsunod ni Abraham ang sugo sang Ginuo. Pagatumanon sang Dios ang Iya promisa, pero bisan indi sa pamaagi nga ginapaabot ni Abraham, nagsalig sia gihapon sa Iya sing lubos.

Ang katawhan makahimo sang matahum nga mga butang paagi sa pagsalig sa Ginuo kag pagtuman sang Iya nga mga kasuguan—paagi sa paggamit sang pagtuo bisan pa nga wala nila mahibal-i kon paano sila ginaporma sang Ginuo.

“Bangud sa pagtuo si Moises … [nagpamalibad] nga pagatawgon nga anak sang babaying anak ni Faraon;

“Nga nagapasulabi sa pag-ambit sang pagpintas kaupod sa katawhan sang Dios sangsa pag-agom sang umalagi nga mga pagpangalipay sang sala;

“Ginkabig niya ang pagtamay nga pag-antos tungod sa Cristo nga dako pa nga manggad sangsa mga bahandi sa Egipto. …

“Bangud sa pagtuo ginbayaan niya ang Egipto, nga wala nagakahadlok sa kaakig sang hari. …

“Bangud sa pagtuo nagtabok ang katawhan sa Dagat nga Mapula subong sang sa mamala nga duta. …

“Bangud sa pagtuo [narumpag ang mga pader] sang Jerico.”¹⁵

Ang iban “paagi sa pagtuo nakadaog sing mga ginharian, … nakaagom sang mga saad, [nakapakipot] sang mga baba sang mga leon,

“Nakapalong sang gahum sang kalayo, nakalikaw sa sulab sang espada, gikan sa kaluyahon nagbakod, naggamhanan sa inaway.”¹⁶

Pero sa tunga sinang tanan nga mahimayaon nga mga resulta nga ginhandum kag ginpaabot sang mga nagpasakop, may ara gid pirme sang mga pero bisan indi:

“Ang iban nag-antos sang pag-uligyat kag paghampak, … mga gapos kag pagbilanggo:

“Ginbato sila, ginpang-utod sa lagari, [gintentar], ginpamatay sa espada: nagdalangdalang sila … nga nawad-an, ginpapiotan, ginpintasan; … ¹⁷

“Ang Dios may natigana nga maayo pa tungod sa [ila] mga pag-antos, [kay kon wala sing mga pag-antos] indi sila maghimpit.”¹⁸

Ang aton balaan nga mga kasulatan kag ang aton kasaysayan puno sang mga istorya sang halangdon nga mga lalaki kag babayi sang Dios nga nagtuo nga Iya sila luwason, pero bisan indi, ginpakita nila nga magasalig sila kag mangin tampad.

May gahum Sia, pero aton ini pagtilaw.

Ano ang ginapaabot sang Ginuo sa aton nahanungod sa aton mga hangkat? Nagapaabot Sia nga himuon naton ang tanan naton nga masarangan. Sia ang magahimo sang nabilin. Si Nefi nagsiling, “Kay nahibal-an naton nga paagi sa grasya kita naluwas, pagkatapos sang tanan nga aton mahimo.”¹⁹

Kinahanglan naton nga mag-angkon sang pareho nga pagtuo sa ila ni Sadrac, Mesac, kag Abed-nego.

Ang aton Dios magaluwas sa aton sa pagtamay kag pagpamigos, pero bisan indi. … Ang aton Dios magaluwas sa aton sa masakit kag balatian, pero bisan indi … . Pagaluwason Niya kita sa kapung-aw, depresyon, ukon kahadlok, pero bisan indi. … Ang aton Dios magaluwas sa aton sa mga hangkat, pagbutang-butang, kag kawalay kompiyansa, pero bisan indi. … Luwason Niya kita sa kamatayon ukon kahalitan sa aton mga mahal sa kabuhi, pero bisan indi, … magasalig kita gihapon sa Ginuo.

Siguruhon sang aton Dios nga mabaton naton ang hustisya kag pagkaalalangay, pero bisan indi. … Siguruhon Niya nga pagapalanggaon kita kag kilalahon, pero bisan indi. … Makabaton kita sang perpekto nga kaupod kag matarong kag masinulundon nga kabataan, pero bisan indi, … magatuo kita kay Ginuong Jesucristo, nga nakahibalo nga kon himuon naton ang tanan naton nga masarangan, kita, sa Iya tiyempo kag sa Iya paagi, pagaluwason kag magabaton sang tanan nga ara sa Iya.²⁰ Nagasaksi ako sini sa ngalan ni Jesucristo, amen.