Ang Pagpundok sa Nagkatibulaag nga Israel

Sa karaang panahon, ang Ginoo mipanalangin kang Amahang Abraham uban sa usa ka saad nga ang iyang kaliwatan mahimong usa ka pinili nga katawhan.¹ Ang mga pakisayran niini nga pakigsaad anaa sa tibuok mga kasulatan. Nahilakip mao ang mga saad nga ang Anak sa Dios moabut pinaagi sa kaliwat ni Abraham, diin pihong mga dapit mapanunod, nga mga nasud ug mga kaliwatan sa yuta mapanalanginan pinaagi sa iyang binhi, ug daghan pa.² Samtang pipila ka mga bahin niana nga pakigsaad natuman na, ang Basahon ni Mormon nagtudlo nga kining pakigsaad kang Abraham matuman lamang niining ulahing mga adlaw!³ Gipasabut usab niini og maayo nga apil kita sa mga tawo sa pakigsaad sa Ginoo.⁴ Ang ato mao ang pribilehiyo nga personal nga makasalmot sa katumanan niini nga mga saad. Pagkanindot nga mabuhi niining panahona!

Isip mga kaliwat ni Abraham, ang mga tribo sa karaang Israel makagamit sa katungod sa priesthood ug mga panalangin sa ebanghelyo, pero sa katapusan ang katawhan misupak. Ilang gipatay ang mga propeta ug gisilotan sa Ginoo. Napulo ka mga tribo ang nasakop sa Assyria. Gikan diha nawala sila sa mga rekord sa katawhan. (Dayag lang, ang napulo ka mga tribo wala nawala ngadto sa Ginoo.) Duha ka nahabiling mga tribo nagpadayon sa mubong panahon ug dayon, tungod sa ilang pagsupak, nasakop sa Babelonia.⁵ Sa dihang mibalik sila, nahimuot kanila ang Ginoo, pero sa gihapon wala nila Siya tahura. Ila Siyang gisalikway ug gipanamastamasan. Usa ka mahigugmaon apan nagmagul-anon nga Amahan misaad, “Kamo pagatibulaagon ko taliwala sa mga nasud,”⁶ ug Iya kanang gibuhat––gipatibulaag sila ngadto sa tanang mga nasud.

Ang saad sa Dios alang sa pagpundok sa nagkatibulaag nga Israel gipadayag sa parehong paagi.⁷ Si Isaias, pananglitan, nakakita na nga sa ulahing mga adlaw ang Ginoo mopadala og “matulin nga mga sinugo” ngadto niining mga tawhana kinsa labihan ka “nagkatibulaag ug nahinlo.”⁸

Kini nga saad sa pagpundok, nga makita diha sa daghang mga tudling sa kasulatan, matuman ingon ka sigurado sa mga panagna sa pagpatibulaag sa Israel.⁹

Sa wala pa ang Iyang Pagkalansang sa krus, si Ginoong Jesukristo miestablisar sa Iyang Simbahan. Naglakip kini sa mga apostoles, mga propeta, mga seventy, mga magtutudlo, ug uban pa.¹⁰ Ug ang Manluluwas mipadala sa Iyang mga disipulo sa kalibutan aron sa pagsangyaw sa Iyang ebanghelyo.¹¹

Sa wala madugay, ang Simbahan nga gi-establisar sa Ginoo nasugamak ngadto sa espirituhanong pagkadaut. Ang Iyang mga pagtulun-an gibag-o; ang Iyang mga ordinansa giusab. Ang Dakong Apostasiya miabut sama sa gitagna ni Pablo, kinsa nasayud nga ang Ginoo dili moanhi pag-usab “hangtud mahitabo una ang pagsupil.”¹²

Kining Dakong Apostasiya misunod sa sumbanan nga mitapos sa kada usa sa miaging dispensasyon. Ang pinakauna mao ang panahon ni Adan. Dayon miabut ang mga dispensasyon nila ni Enoch, Noe, Abraham, Moises, ug uban pa. Ang kada propeta adunay balaang mando sa pagtudlo sa kabalaan ug sa doktrina ni Ginoong Jesukristo. Sa kada panahon kini nga mga pagtulun-an gitumong aron sa pagtabang sa mga tawo. Apan ang ilang pagkadili masulundon miresulta sa apostasiya. Sa ingon, ang tanang miaging mga dispensasyon nalimitahan sa panahon ug dapit. Nalimitahan sila sa panahon tungod kay ang kada usa natapos sa apostasiya. Nalimitahan sila sa dapit ngadto sa gamay ra nga bahin sa planetang earth.

Sa ingon ang usa ka hingpit nga pagpahiuli gikinahanglan. Ang Dios Amahan ug si Jesukristo mitawag kang Propeta Joseph Smith nga mahimong propeta niining dispensasyon. Ang tanang balaang mga gahum sa miaging mga dispensasyon gikinahanglang ipahiuli pinaagi kaniya.¹³ Kini nga dispensasyon sa kahingpitan sa panahon dili malimitahan sa panahon o sa dapit. Dili kini matapos sa apostasiya, ug mopuno kini sa kalibutan.¹⁴

Sama sa gipanagna nila ni Pedro ug Pablo, ang tanang mga butang kinahanglang ipahiuli niini nga dispensasyon. Busa, kinahanglang adunay moabut, isip bahin niana nga pagpahiuli, ang dugay nang gipaabut nga pagpundok sa nagkatibulaag nga Israel.¹⁵ Usa kini ka gikinahanglang panghitabo sa dili pa ang Ikaduhang Pag-anhi sa Ginoo.¹⁶

Kini nga doktrina sa pagpundok maoy usa sa importante nga mga pagtulun-an sa Ang Simbahan ni Jesukristo sa mga Santos sa Ulahing mga Adlaw. Ang Ginoo namahayag: “Ako mohatag nganha kaninyo sa usa ka timailhan … nga Ako mopundok, gikan sa ilang dugay nga pagkatibulaag, sa akong mga katawhan, O balay ni Israel, ug motukod pag-usab taliwala kanila sa akong Zion.”¹⁷ Ang pag-abut sa Basahon ni Mormon usa ka timailhan ngadto sa tibuok kalibutan nga ang Ginoo nagsugod na sa pagpundok sa Israel ug sa pagtuman sa mga pakigsaad nga Iyang gihimo ngadto ni Abraham, Isaac ug Jacob.¹⁸ Wala lamang nato gitudlo kini nga doktrina, pero misalmot pa kita niini. Ato kining gibuhat samtang nagtabang kita sa pagpundok sa pinili sa Ginoo dinhi sa kalibutan ug didto sa kalibutan sa mga espiritu.

Ang Basahon ni Mormon maoy sentro niini nga buhat. Nagpadayag kini sa doktrina sa pagpundok.¹⁹ Nakapahimo kini sa mga tawo nga makat-on kabahin ni Jesukristo, nga motuo sa Iyang ebanghelyo, ug mopasakop sa Iyang Simbahan. Gani, kon wala pa ang Basahon ni Mormon, ang gisaad nga pagpundok sa Israel dili unta mahitabo.²⁰

Alang kanato ang pinasidunggang pangalan ni Abraham importante. Gihisgutan kini sa daghan pang mga bersikulo sa mga kasulatan kabahin sa Pagpahiuli kay sa tanang mga bersikulo diha sa Biblia.²¹ Si Abraham gilambigit sa tanang mga miyembro sa Ang Simbahan ni Jesukristo sa mga Santos sa Ulahing mga Adlaw.²² Ang Ginoo mipamatuod pag-usab kalabut sa pakigsaad kang Abraham sa atong panahon pinaagi kang Propeta Joseph Smith.²³ Diha sa templo makadawat kita sa atong kinadak-ang mga panalangin, ingon nga mga kaliwat ni Abraham, Isaac, ug Jacob.²⁴

Kini nga dispensasyon sa kahingpitan sa mga panahon nakita na sa Dios ingon nga panahon sa pagpundok, sa langit ug sa yuta. Si Pedro nasayud niana human sa panahon sa apostasiya, usa ka pagpahiuli ang moabut. Siya, kinsa kauban sa Ginoo didto sa Bungtod sa Transpigurasyon, namahayag:

“Busa paghinulsol kamo, ug pamalik na kamo kaniya, aron mapala ang inyong mga sala, aron ang mga panahon sa kahayahay magaabut gikan sa atubangan sa Ginoo; …

“Siya nga kinahanglan pagahawiran una sa langit hangtud sa panahon sa pagtuman na sa tanang gisulti sa Dios pinaagi sa ba-ba sa iyang mga balaang propeta sukad pa sa karaang kapanahonan.”²⁵

Sa modernong mga panahon ang mga Apostoles nga sila si Pedro, Santiago, ug Juan gipadala sa Ginoo uban “sa mga yawe sa [Iyang] gingharian, ug sa kapaigoan sa ebanghelyo alang sa katapusan nga mga panahon; ug alang sa kahingpitan sa mga panahon,” diin Siya “mopundok ngadto sa usa sa tanan nga mga butang, nga anaa sa langit, ug anaa sa yuta.”²⁶

Sa tuig 1830 si Propeta Joseph Smith nasayud kabahin sa usa ka langitnong sinugo nga ginganlan og Elias, kinsa naghupot sa mga yawe sa pagpahinabo “sa pagpahiuli sa tanang mga butang.”²⁷

Unom ka tuig ang milabay, ang Templo sa Kirtland gipahinungod. Human dawata sa Ginoo kanang balaang balay, langitnong mga sinugo miabut dala ang mga yawe sa priesthood. Si Moises mipakita²⁸ “ug mitugyan … sa mga yawe sa pagpundok sa Israel gikan sa upat ka mga bahin sa yuta, ug sa pagdala sa napulo ka mga kaliwatan gikan sa yuta sa amihanan.

“Human niini, si Elias mipakita, ug mitugyan sa kapaigoan sa ebanghelyo ni Abraham, miingon nga diha kanamo ug sa among binhi sa tanan nga mga kaliwatan nga mosunod kanamo pagapanalanginan.”²⁹

Dayon si Elijah ang propeta miabut ug mipadayag, “Tan-awa, ang panahon miabut na sa hingpit, nga gipamulong pinaagi sa ba-ba ni Malaquias––nga nagpamatuod nga siya [Elijah] kinahanglan nga ipadala, sa dili pa moabut ang mahinungdanon ug makalilisang nga adlaw sa Ginoo––sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon uban sa usa ka tunglo.”³⁰

Kini nga mga panghitabo nahitabo niadtong Abril 3, 1836,³¹ ug sa ingon natuman ang panagna ni Malaquias.³² Sagradong mga yawe niini nga dispensasyon gipahiuli na.³³

Sa maloloy-ong paagi, ang pagdapit nga “duol ngadto kang Kristo”³⁴ mahimo usab nga ipadangat niadtong kinsa namatay na nga wala kahibalo sa ebanghelyo.³⁵ Kabahin sa ilang pagpangandam nagkinahanglan sa mga paningkamot sa uban dinhi sa yuta. Atong pundokon ang mga pedigree chart, maghimo og mga family group sheet, ug mopahigayon og buhat sa templo alang sa mga nangamatay na aron sa pagpundok sa mga indibidwal ngadto sa Ginoo ug ngadto sa ilang mga pamilya.³⁶

Dinhi sa yuta, ang misyonaryo nga buhat kinahanglanon kaayo sa pagpundok sa Israel. Ang ebanghelyo kinahanglang dad-on una ngadto sa “nangawalang karnero sa banay ni Israel.”³⁷ Isip resulta, ang mga sulugoon sa Ginoo nanaglakaw aron sa pagsangyaw sa Pagpahiuli. Sa daghang mga nasud ang atong mga misyonaryo nangita alang niadtong nagkatibulaag nga Israel; ila silang gisuhid sa “mga lungag sa mga kabatoan”; ug ila silang gipamukot sama sa gibuhat kaniadto sa karaang panahon.³⁸

Ang pagpili sa pagduol ngadto kang Kristo wala magdepende kon asa ka nagpuyo; nagdepende kini sa indibidwal nga pasalig. Ang mga tawo mahimong “pagadad-on sa kasayuran sa Ginoo”³⁹ nga dili mobiya sa ilang mga yutang natawhan. Tinuod, sa unang mga adlaw sa Simbahan, ang pagkakabig sa kasagaran nangahulugan usab og pagbalhin. Pero karon ang pagpundok nahitabo diha sa kada nasud. Ang Ginoo mimando sa pag-establisar sa Zion⁴⁰ sa matag kayutaan diin Iyang gihatag sa Iyang mga Santos ang ilang natawhan ug nasyonalidad. Ang kasulatan nanagna nga ang mga tawo “matigum pagbalik ngadto sa kayutaan nga ilang panulundon, ug mapahiluna sa tanan nila nga mga yuta sa saad.”⁴¹ “Ang matag nasud mao ang dapit sa pagpundok alang sa kaugalingon niining katawhan.”⁴² Ang dapit sa pagpundok alang sa Brazilian nga mga Santos mao ang Brazil; ang dapit sa pagpundok alang sa Nigerian nga mga Santos mao ang Nigeria; ang dapit sa pagpundok alang sa Korean nga mga Santos mao ang Korea; ug uban pa. Ang Zion mao “ang putli og kasingkasing.”⁴³ Ang Zion mao ang dapit diin anaa ang matarung nga mga Santos. Ang mga publikasyon, mga komunikasyon, ug mga kongregasyon anaa karon aron sa ingon hapit tanang mga miyembro makagamit sa mga doktrina, mga yawe, mga ordinansa, ug mga panalangin sa ebanghelyo, nga dili magsapayan sa ilang mga nahimutangan.

Ang espirituhanong seguridad kanunay nga magdepende kon giunsa sa pagpakabuhi sa usa ka tawo, dili kon asa ang usa ka tawo nagpuyo. Ang mga Santos sa matag dapit adunay patas nga pag-angkon sa mga panalangin sa Ginoo.

Kini nga buhat sa Labawng Makagagahum nga Dios tinuod. Siya buhi. Si Jesus mao ang Kristo. Kini Iyang Simbahan, nga gipahiuli aron sa pagtuman sa balaang padulngan niini, lakip na sa gisaad nga pagpundok sa Israel. Si Presidente Gordon B. Hinckley usa ka propeta sa Dios karon. Mopamatuod ko sa ngalan ni Jesukristo, amen.