Bulahan Ang Tanang Putli og Kasingkasing

Naglakat sa usa ka baybayon sa Caribbean usa ka hayag nga kabuntagon pila ka tuig ang milabay, ang akong asawa ug ako nakakita og daghang sakayan nga pangisdaan nga giguyod ngadto sa balas. Diha nga nanghunong mi aron pagtan-aw sa mga sakayan, may nakat-onan ko bahin sa pagpangisda nga dili gayud nako makalimtan. Imbis nga mogamit og pukot, pasol, o taga, ang lokal nga mga mananagat migamit og yano nga lit-ag nga hinimo sa alambre. Ang matag lit-ag gi-porma sama sa usa ka kahon. Ang mga mananagat mihiwa og pinatindog nga ablihanan nga mga walo ka pulgada ang gitas-on matag kilid sa lit-ag ug dayon gibawog ang pinutol nga alambre pasulod, naghimo og hiktin nga gawang diin ang isda makasulod.

Tingali makatag-an kamo kon gi-unsa paglit-ag. Ang mga mananagat midala og gipan-an nga lit-ag ngadto sa dagat ug gipaubos kini sa kinahiladman. Kon usa ka dakong isda mopaduol sa lit-ag ug makamatikod sa paon, makakita kini og agianan sa kilid sa lit-ag ug molangoy pasulod, igo nga makalusot sa pinutol nga mga alambre. Dayon, kon ang usa ka nalit-ag nga isda maningkamot sa paglangoy pagawas, kini makakita nga sayon ra ang paglusot agi sa pinutol nga mga alambre aron makasulod sa laang, apan lahi kaayo ang paglangoy nga mosugat niadtong mga talinis nga tumoy aron makagawas––—nasakpan kini. Dihang mibalik ang mga mananagat, ilang gibitad ang laang gikan sa tubig, ug ang nalaang nga isda nahimo dayon nga usa ka lab-as nga pagkaon sa panihapon gikan sa dagat.

Dunay usa ka asoy diha sa Daang Tugon mahitungod sa usa ka tawo nga nahulog sa sama nga laang. Kana nga tawo mao ang halangdon nga si Hari David, ug unsa ang nahitabo mao ang usa sa pinakamasulob-on nga mga istorya diha sa mga kasulatan.

“Ug nahinabo nga … sa panahon nga ang mga hari minggula sa pagpakiggubat, nga si David nagsugo kang Joab, ug sa iyang mga alagad uban kaniya, ug sa tibuok Israel; ug ilang [gilaglag ang mga anak sa Ammon]. Apan si David nagpabilin didto sa Jerusalem.

“Ug nahinabo nga sa pagkahapon na, si David mibangon gikan sa iyang higdaanan, ug milakaw sa ibabaw sa atop sa balay sa hari: ug gikan sa atop nakita niya ang usa ka babaye nga naligo ug ang babaye maanyag kaayong tan-awon”(2 Samuel 11:1–2).

Nahibaloan ni David nga ang ngalan sa babaye mao si Bathsheba. Ang iyang bana, si Uriah, usa ka sundalo, didto sa layo nakiggubat sa mga Ammonites kauban sa mga sundalo, diin si David nga ilang hari diha unta. Gipadala ni David si Bathsheba ngadto sa palasyo. Sila nakahimo og pagpanapaw, nagmabdos siya, ug si David nagsugod og kahadlok nga ang ilang pagpanapaw mahibaloan. Naglaom nga matabunan ang iyang sala, gimando ni David nga ipabalik si Uriah sa Jerusalem. Si Uriah miuli, apan gibarogan ang pagdumili sa pag-adto sa iyang balay aron sa pagduaw ni Bathsheba. Gihikay dayon ni David nga si Uriah mamatay didto sa panggubatan (tan-awa sa 2 Samuel 11:3-17). Kining nagsunodsunod nga makahahadlok nga mga desisyon midala og kamatayon ni Uriah ug kasub-anan ni David, Bathsheba, ug sa kataposan sa tibuok gingharian. Sa pagpagamay sa hitabo, ang Biblia nag-ingon, “Ang butang nga gihimo ni David wala makapahimuot sa Ginoo” (2 Samuel 11:27).

Nakita ba ninyo kon giunsa pagkabitik ni David niini nga laang? Siya diha sa ibabaw sa atop sa iyang palasyo, ug nagtan-aw sa ubos sa nataran sa kasilinganan, iyang nakita ang usa ka butang nga dili gayod unta niya angay nga makita. Mao kadto ang paon sa kaaway. Ang kaligdong, kaputli, ug maayong paghukom nagkinahanglan nga si David motalikod dayon ug dili motan-aw, apan wala niya buhata bisan asa niini. Hinoon, siya mitugot sa iyang hunahuna nga mobali ngadto sa ginadili nga mga pantasya, kadto nga mga hunahuna mipadulong ngadto sa buhat, ug ang mga sitwasyon daling mipadulong paingon sa ubos gikan sa dautan ngadto sa labaw pa ka dautan ngadto sa grabe kaayo nga kahimtang. Si David nalaang, ug alang kaniya ang sangputanan mahangturon.

Adunay espiritwal nga lit-ag karon nga gitawag og pornograpiya, ug daghan, ang nadani sa mahagiton nga mga mensahe niini, mosulod niining makuyaw nga laang. Sama sa bisan unsa nga laang, sayon ang pagsulod apan lisod nga mogawas. Ang uban mangatarungan nga sila mahimong makatan-aw og pornograpiya nga dili mag-antos sa makadaot nga mga epekto niini. Sila makaingon sa una nga, “Dili man kaayo ni dautan,” o, “Kinsay magbuot? Wala may mahimong kalainan niini,” o, “Kuryuso lang ko.” Apan nasayop sila. Ang Ginoo mipahimangno, “Ug siya nga magtan-aw sa babaye nga may kahigal ngadto kaniya naglimud sa tinuohan, ug dili makaangkon sa Espiritu; ug kon siya dili maghinulsol siya isalikway” (D&P 42:23). Kana gayod ang nahitabo ni David: siya mitan-aw kang Bathsheba, nga may kahigal kaniya, ug gibiyaan sa Espiritu. Unsa kaha kalahi ang nahabiling kinabuhi ni David kon milingiw lang unta siya.

Uban sa pagkawala sa Espiritu, ang mga mogamit og pornograpiya mawad-an usab og panglantaw ug husto nga panghukom. Sama ni Hari David, nagtinguha sila sa pagtago sa ilang sala, nakalimot nga walay matago gikan sa Ginoo (tan-awa sa 2 Nephi 27:27). Ang tinuod nga mga sangputanan magsugod sa pagkadaghan ingon nga ang pagtamud sa kaugalingon magkawala, ang matam-is nga mga relasyon magkaaslom, mga kaminyoon madaot, ug ang inosente nga mga biktima magkadaghan. Makita nga ang ilang gitan-aw dili na makatagbaw, sila mosulay og mas labaw pa ka grabe nga mga imahe. Hinay-hinay sila nga maadik bisan og wala sila mahibalo niini o ila kining gilimod, ug sama ni David, ang ilang kinaiya nagkagrabe samtang ang ilang moral nga sumbanan nag-anam og kawala.

Samtang ang inila nga kultura sa tibuok kalibotan nag-anam og kaubos ang kalidad, ang kahugaw naghinay-hinay og sanap sa media, kalingawan, pahibalo, ug sa Internet. Apan ang popularidad sumala sa pabiling mga naandan sa kalibotan usa ka makuyaw nga timbangan nga gamiton sa pagsukod unsa ang matarong o gani unsa ang dili makuyaw. Usa ka sine o salida sa telebisyon mahimong inila kaayo ug magustohan sa minilyon ka tumatan-aw, ug bisan pa niana naglarawan og mga imahe ug binuhatan nga malaw-ay. Kon sa usa ka salida adunay “dili kaayo ngil-ad”, kana direkta nga nagpasabot nga dili usab kini maayo kaayo. Sa ingon, ang kamatuoran nga ang uban motan-aw og mga sine o moabli sa mga Web site nga dili maayo dili rason alang kanato. Ang mga kinabuhi sa mga naghupot sa pagkapari kinahanglan nga mosunod sa mga sumbanan sa Manluluwas ug sa Iyang Simbahan, dili sa mga sumbanan sa kalibotan.

Ang Manluluwas mitudlo, “Ug bulahan ang tanan nga may maputli nga kasingkasing, kay sila makakita sa Dios” (3 Nephi 12:8). Ang mga saad sa ebanghelyo makabayaw ug makapadungganon, gani makapahimaya. Kita modawat niini nga mga saad pinaagi sa mga panaad nga gikondisyon sa atong pagpuyo sa mga kinabuhi nga putli ug may moralidad. Kon kita magpuyo nga matarong ug mangita sa paglimpyo sa atong mga kasingkasing, kita mas maduol sa Dios ug sa Espiritu. Ang kahimtang sa atong kasingkasing maoy mohukom kon unsa kadako sa pagkabalaan ang atong makita sa kalibotan karon ug mohimo kanatong takos alang sa mahitabong katumanan sa saad nga ang putli “maoy makakita sa Dios.” Ang ato mao ang pagpangita alang sa kaputli. Sa ingon, ang Apostol nga si Juan misulat:

“Mga hinigugma, kita karon mga anak sa Dios; kon maunsa unya kita, kini wala pa ipakita, apan kita nasayud nga sa igapadayag na siya, kita mahisama kaniya, kay kita magasud-ong man unya kaniya sa iyang pagkamao.

“Ug ang tanan nga nagabaton sa maong paglaum kaniya nagaputli sa ilang kaugalingon, maingon nga kadto siya putli man” (1 Juan 3:2–3).

Kon kamo nasulod na sa laang sa pornograpiya, karon mao ang panahon sa pagpalingkawas sa inyong kaugalingon inubanan sa tabang sa Manluluwas. Adunay paagi sa paggawas, apan nagkinahanglan ka sa Iyang panabang aron makalingkawas. Ang inyong hingpit nga kaayohan mag-agad sa inyong hingpit nga paghinulsol. Duol dayon sa inyong bishop. Pangayoa ang iyang dinasig nga giya. Siya motabang kaninyo sa pagpahigayon sa usa ka plano sa paghinulsol nga mopabalik sa inyong pagsalig sa kaugalingon ug modala sa Espiritu balik sa inyong kinabuhi. Ang makaayo nga gahom sa Pag-ula ni Ginoong Jesukristo motagad sa tanang mga kasakit, bisan pa kini. Kon kamo moduol ngadto sa Manluluwas sa tibuok mong kasingkasing ug motuman sa tambag sa inyong bishop, inyong makaplagan ang pag-ayo nga inyong gikinahanglan. Ang Manluluwas motabang kaninyo nga maangkon ang kalig-on sa pagbatok sa tintasyon ug ang gahom sa pagbuntog sa adiksyon. Sama sa gitudlo ni Moroni:

“Moduol ngadto ni Kristo, ug mohupot diha sa matag maayo nga gasa, ug ayaw paghikap sa dautan nga gasa, ni sa mahugaw nga butang. …

“Oo, duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo” (Moroni 10:30, 32).

Hinaut nga ang Dios manalangin sa atong tinuod nga paningkamot nga mahimong putli og kasingkasing ug hunahuna, nga ang “hiyas [maoy] modayan-dayan sa [atong] mga hunahuna nga walay paghunong”(D&P 121:45). Ako mopamatuod sa matubsanong gugma sa Manluluwas ug sa makalimpyo nga gahom sa Iyang Pag-ula sa ngalan ni Jesukristo, amen.