Nagasat dagiti Natarnaw iti Pusoda

Magmagna a bumaba iti beach iti Caribbean ti maysa a nainit a bigat sumagmamano a tawen ti napalabas, nakitami nga agassawa ti sumagmamano a babassit a bilog a pagkalap iti ikan [fishing boat] a naisang-at iti kadaratan. Idi nagsardengkami a mangkita kadagiti bilog, nasursurok ti maysa a banag maipapan iti panagkalap a diak kaano man nalipatan. Imbes nga usarenda dagiti iket, wenno banniit, inusar dagiti mangngalap iti lugar dagiti pagtiliw a naaramid iti iket a barut. Nasukog a kasla maysa a kahon ti tunggal pagtiliw. Gettengen dagiti mangngalap dagiti patakder a pagserkan iti agarup walo a pulgada ti kaatiddogna iti tunggal sikigan ti pagtiliw ket kalpasanna kulpien dagiti nagetteng a barut nga agpauneg, a mangparnuay kadagiti akikid a paglusotan a mabalin a pagserkan ti ikan.

Mabalinmo a pugtuan no kasano a gumana ti maysa a pagtiliw. Nangala ti maysa a mangngalap iti napainan a pagtiliw ket imbabana daytoy iti lansad. No umasideg ti ikan nga umdasen a pangrabii iti pupokan ken makitana ti appan, makitana ti pagserkan iti sikigan ti pupokan ket langoyenna a sumrek, ipiten bassit dagiti nagetteng a barut. Kalpasanna, no gandaten ti napupok nga ikan ti aglangoy a rummuar, matakuatan a nalaka nga ipiten dagiti nagetteng a barut tapno sumrek iti pupokan, ngem saanen a posible tapno aglangoy kadagiti natadem nga ungto tapno rummuar—natiliwen daytoy. Idi nagsubli dagiti mangngalap, ginuyodda ti pupokan nga iruar iti danum, ket naaramid ti natiliw a sadiwa nga ikan a maysa a taraon a pangrabii.

Adda ti pakaammuan iti Daan a Tulag maipapan iti maysa a tao a nagbalin a biktima iti kasta met laeng. Ti nabileg nga Ari David dayta a lalaki, ken no ania ti napasamak ket maysa kadagiti kalidayan nga estoria iti nasantuan a kasuratan.

“Ket napasamak nga … iti panawen a mapan dagiti ari iti paggugubatan, imbaon ni David ni Joab, a kakuyogna dagiti adipenna, ken ti amin nga Israel; ket [kinarangetda ni Ammon]. Ngem nagtalinaed pay laeng ni David iti Jerusalem.

“Ket naaramid iti malem, nga idi a ni David, bimmangon iti iddana ket nagnagna iti pangatepan ti balay ti ari: ket manipud iti pangatepan nakitana ti maysa a babai nga agdigdigos, ket ti babai naimnas unay ti langana” (2 Samuel 11:1–2).

Naammuan ni David a Batseba ti nagan ti babai. Adda iti adayo ti asawana, a ni Uria, maysa a soldado, a makirangranget kadagiti Ammonitas a kaduana dagiti nabati pay iti buyot, a nasken koma a pakirangetan ni David, nga arida. Pinayeg ni David ni Batseba iti palasio. Naglabsingda iti pannakikamalala, nagdadagsen ti babai, ket nangrugi a nagbuteng ni David amangan ta maduktalan ti pannakiabigda. Mangnamnama a mangabbong iti basolna, imbilin ni David a maibaon nga agsubli ni Uria iti Jerusalem. Nagsubli ni Uria, ngem nagkedked iti maysa a prinsipio nga agawid iti pagtaengan a mangsarungkar ken ni Batseba. Kalpasanna nangurnos ni David iti pannakapapatay ni Uria iti pagbabakalan (kitaen iti 2 Samuel 11:3–17). Daytoy a serye dagiti nakaam-amak a pangngeddeng ti nangisangbay iti ipapatay ni Uria ken panagladingit kada David, Batseba, ket idi agangay ti sibubukel a pagarian. Iti di unay napateg a sitwasion, kuna ti Biblia, “Ti banag nga inaramid ni David pinagrurodna ni Jehova” (2 Samuel 11:27).

Makitam kadi no kasano a natiliw ni David iti daytoy a palab-og? Adda isuna iti maysa nga atep ti pangukoman iti palasiona, ket iti ikikitana iti baba iti maysa a paraangan ti sangakarrubaan, nakitana ti maysa a banag a nasken koma a saanna a nakita. Dayta ti appan ti kabusor. Ti kinaemma, kinadalus ti dayaw, ken nasayaat a pangngeddeng a kasapulan a tallikudan a dagus ni David ket saanna a kitaen, ngem saanna nga inaramid ti kasta a banag. Ngem ketdi, impalugodna a maiturong ti panunotna kadagiti maiparit a panaggartem, nagbanag dagita a pampanunot iti madi nga aramid, ket limamlan dagiti banag a nangrugi iti dakes a situasion agingga iti nakadakdakes a nagbanag iti nakaam-ames a situasion. Napupok ni David, ket para kenkuana agnanayon dagiti bungana.

Adda maysa a naespirituan a palab-og ita a maaw-awagan iti pornograpia, ken adu, a nasulisog kadagiti makagargari a mensahena ket sumrek iti daytoy a makasabidong a palab-og. Kas iti ania man a pupokan, a nalaka ti sumrek ngem narigat ti rummuar. Sumagmamano ti mangikalintegan a gagangay a makabuyada iti pornograpia a dida agsagsagaba kadagiti epekto ti kinapeggad daytoy. Kunada iti damo, “Saan met unay a dakes daytoy, wenno, “Asino koma ti makibiang? Awanto met pakaidumanna,” wenno, “kuriosak laeng.” Ngem nagbiddutda. Imballaag ti Apo, “Ket isu a mangmatmat iti babai tapno gartemanna ilibakna ti pammati, ket mapukawna ti Espiritu; ket no saan nga agbabawi mapapanawto” (D&K 42:23). Dayta ti eksakto a napasamak ken ni David: pinaggartemanna ni Batseba, ket napukawna ti Espiritu. Kasano koma a maiduma ti nabati pay a biag ni David no inadaywanna laeng.

Kagiddan ti pannakapukaw iti Espiritu, mapukaw pay dagiti agbuybuya iti pornograpia iti pannirigan ken proporsion. Kas ken ni Ari David, padasenda nga abbongan ti basolda, a lipatenda nga awan banag a nailemmeng manipud iti Apo (kitaen iti 2 Nephi 27:27). Mangrugi a maurnong dagiti pudno a bunga no mapukaw ti respeto ti bagi, umalsem dagiti nasam-it a relasion, madadael dagiti panagasawa, ket mangrugi a madangran dagiti inosente a biktima. Iti pannakakita a saanen a makapakapnek dagiti buybuyaenda, agsapulda kadagiti napalpalaus pay nga imahe. In-inut a dumakkel ti pannakairuamda uray no dida ammo daytoy wenno ilibakda daytoy, ket kas iti inaramid ni David, dimmakes ti ugalida bayat ti pannakapukaw dagiti pagrukodanda iti moralidad.

Bayat ti panagbaba dagiti nalatak a kultura iti lugar ti lubong, umad-adu nga agwaras dagiti nababa a klase iti media, pagaliwaksayan, advertising, ken ti Internet. Ngem ti popularidad mayannurot iti babaen dagiti agraira a panagug-ugali iti lubong ket napeggad unay a mangrukod no ania ti umno wenno uray no ania ti saan a napeggad. Mabalin a nalatak ti pabuya iti sine wenno telebision ken magustuan unay ti minilion nga agbuybuya ken nupay kasta mangipabuyada kadagiti imahe ken ugali a mainaig iti pornograpia. No ti maysa a banag iti maysa a pelikula “ket saan unay a dakes,” kayatna a sawen a saan met unay a nasayaat daytoy. Iti kasta, ti kinapudno nga agbubuya dagiti dadduma iti sine wenno aglukatda kadagiti Web dagiti site a saan a maitutop ket saan pambar para kadatayo. Nasken a tuladen dagiti priesthood holder dagiti pagrukodan ti Mangisalakan ken ti Simbaanna, saan a dagiti pagrukodan ti lubong.

Insuro ti Mangisalakan, “Ket nagasat dagiti nadalus ti pusona, ta makitadanto ti Dios” (3 Nephi 12:8). Dagiti kari ti ebanghelio ket makaitag-ay ken makapangayed, ken kasta met a makaitan-ok. Awatentayo dagita a kari babaen iti katulagan babaen iti kondision nga agbiagtayo iti kinatarnaw ken moralidad. No agbiagtayo a nalinteg ken agkalikagum a mangpatarnaw ti puspusotayo, umas-asidegtayo iti Dios ken iti Espiritu. Ti kasasaad ti pusotayo ti mangikeddeng no kasano ti kadakkel ti pakakitaan ti kinadios a makitatayo iti lubong ita ket mangpaikari kadatayo para iti in-inut a pannakatungpal ti kari a dagiti natarnaw “makitadanto ti Dios.” Pagrebbengantayo ti panagsapsapul iti kinatarnaw. Iti kasta, insurat ni Apostol Juan:

“Ay-ayatek, ita annaknatayo ti Dios, ket saan pay a maiparangarang no ania tayto: ngem ammotayo, nga no isu maiparangarangto, umaspingtayto kenkuana; ta isu makitatayonto kas iti kinasiasinona.

“Ket isu amin dagiti addaan itoy nga inanama kenkuana, aggugor a kas isu nadalus” (1 Juan 3:2–3).

No naipupokkayon iti palab-og ti pornograpia, itan ti panawen a wayawayaanyo ti bagiyo babaen ti tulong ti Mangisalakan. Adda maysa a wagas tapno makaruk-at, ngem kasapulamto ti tulongna a makaruar. Ti naan-anay a panangpasubli agpannurayto iti naan-anay a panagbabawiyo. Mapanka a dagus iti bishopmo. Gun-odenyo ti naparegta a pannarabayna. Tulongannakanto a mangisaad iti maysa a plano ti panagbabawi a mangisublinto iti panangraem iti bagi ket isublina ti Espiritu iti biagyo. Tumultulong ti pangpaimbag a bileg ti Pannubbot ni Apo Jesucristo a mangtulong iti amin a sagabaen, a pakaibilangan daytoy. No umasidegkayto iti Mangisalakan iti amin a pusoyo ken surotenyo ti pammagbaga ti bishopyo, masarakanyonto ti pannakapaimbag a kasapulanyo. Tulongannakayonto ti Mangisalakan a mangsarak iti pigsa a mangkedked iti sulisog ken iti pigsa a mangparmek iti adiksion wenno pannakairuam. Kas iti insuro ni Moroni:

“Umasidegkayo ken ni Cristo, ket agtalekkayo iti tunggal nasayaat a sagut, ket saanyo a sagiden ti dakes a sagut, wenno ti narugit a banag. …

“Wen, umasidegkayo ken ni Cristo, ket agbalinkayo a naan-anay kenkuana, ket tallikudanyo ti amin a saan a nadiosan; ket no tallikudanyo ti amin a saan a nadiosan, ket ayatenyo ti Dios iti isu amin a kabaelan, panunot ken pigsayo, agpaay kadakayo ti paraburna, ket babaen ti paraburna agbalinkayo a naan-anay ken ni Cristo” (Moroni 10:30, 32).

Sapay koma ta bendisionan ti Dios dagiti napudno a panagkagumaantayo nga agbalin a natarnaw iti puso ken panunot, a “ti saguday [mabalinna a] taraonan ti pampanunot[tayo] nga awan ressatna” (D&K 121:45). Paneknekak maipapan iti manangsubbot nga ayat ti Mangisalakan ken ti pangpatarnaw a pannakabalin ti Pannubbotna iti nagan ni Jesucristo, amen.