Em̧ōņōņō Aolep ro Erreo Būruweer

Etetal ļo̧k ioon juon jikin tutu iaar ilo Caribbean juon jibbon̄ edet jet iiō ko remootļo̧k, n̄a im lio peleeō kar lo jet waan en̄od jiddik ko me rekar erki ioon bok. Ke kom̧ro ekar bōjrak n̄an lale waan en̄od ko, ikar ekkatak juon men kōn en̄od me ijjāmin meļo̧kļo̧k. Ijjelo̧kin aer kōjerbal ok in en̄od, eo, ak kāāj ko, rien̄od ro ilo jikin eo rekar kōjerbal wu ko reddik kōm̧m̧an jān loklok in to waer ko. Kajjojo iaan wu kein kar ļōmaer wōt juon bo̧o̧k. Rien̄od ro rej m̧wijit peļļo̧k ko ilo jekjek in vertical jon̄an wōt 8 inij ko aitokōn ilo kajjojo turajet ko innem kubōle lowaļo̧k waer ko, kōm̧m̧an bwe en wōr peļļo̧k ko n̄an an ek ko maron̄ deļo̧n̄.

Komaron̄ make ļōmņake im jeļā wāween an juon kein aujiid jerbal. Rien̄od ro rej bōk juon wu ewōr mo̧o̧r ie n̄an lo̧jet im door laļļo̧k n̄an ioon lūm̧. N̄e juon ek bōkan kōjota ej itok epaake wu eo im āt bwiin mo̧o̧r eo, ej kappukōt juon peļļo̧k ilo rejet ko im deļo̧n̄e, ej keņaakļo̧k kōtaan waer ko em̧ōj m̧wijiti. Innem, n̄e ek eo eaujiid ej kajjeon̄ diwōj, enaaj lo bwe ekar jab juon men em̧m̧an n̄an koboobļo̧k ilo to waer ko n̄an deļo̧n̄e wu eo, ak ekar juon men eļapļo̧k an oktak im ben n̄an diwōjļo̧k ilo jem̧ļo̧k ko rekkan̄—ekar ko̧o̧jōk. N̄e rien̄od ro rej ro̧o̧ļo̧k, rej tōbe lōn̄tak wu eo jān lo̧jet, im ek eo ilo wu eo ekar erom juon kōjota m̧ōn̄ā in lo̧jet kāāl tata.

Ewōr juon bwebwenato ilo Kallim̧ur Mokta kōn juon eo ekar ko̧jōk ilo juon wu āinļo̧k wōt in. Em̧m̧aan in ekar Kiin̄ David eo ekanooj kajoor, im ta eo ekar waļo̧k ej juon iaan bwebwenato ko rekaburom̧ōjm̧ōj ilo jeje ko rekwojarjar.

“Im ilo bar iiō eo juon … iien eo ke kiin̄ ro rej ilen tariṇae, Devid ear jilkinḷọk Joab im ro doon ippān im aolepān Israel; im rej [tariņae ņae Amon]. Ak David ekar pād wōt ilo Jerusalem.

“Im juon raan ke e jota, Devid ear jerkak jān aowej eo an, im ear etetal raan ṃweo iṃōn kiin̄ eo; Im jān kejenwan eo ear lo juon kōrā ej tutu; im kōrā eo e kanooj deo̧” (2 Samuel 11:1–2).

David ekar jeļā bwe etan kōrā eo ekar Batshiba. Ļeo pāleen, Uraia, juon ritariņae, ekar ettoļo̧k jene ilo an kepata ippān ro nejin Amon ro ippānļo̧k ritariņae ro jet, ijo David, kiin̄ eo aer, en kar pād ie. David ekar kōm̧m̧an bwe ren boktok Batshiba n̄an m̧weo im̧ōn. Rekar ko̧kkure kien erreo, liin ekar bōro̧ro, im David ekar jino mijak bwe renij jeļā ke rekar ko̧kkure kien erreo. Kōjatdikdik n̄an ņooje jerawiwi eo an, David ekar kipel bwe ren bar kōro̧o̧le Uraia n̄an Jerusalem. Uraia ekar bar jepļaak, ak ekar makoko in jepļaak n̄an m̧weo im̧ōn n̄an loļo̧k Batshiba. Innem David ekar kōm̧m̧an karōk bwe Uraia en mej ilo jikin tariņae (lale 2 Samuel 11:3–17). Aolepān kālet kein rekauwōtata rekar boktok mej n̄an Uraia im būrom̧ōj n̄an Devid, Batshiba, im āliktata aolepān aelōn̄ in kiin̄ eo. Kōn juon ļōmņak in ekajet eo ebōd, Bible eo ej ba, “Men in Devid ear kōṃṃane ear kaillu Jeova” (2 Samuel 11:27).

Kwoj ke loe wāween an kar David ko̧jōk ilo aujiid in? Ekar pād ilo ilōn̄tata in m̧weo im̧ōn, im kalimjōk laļļo̧k meļaaj eo an ro rūtūrin rej jokwe ie, ekar loe juon men ejjab aikuj kar loe. Menin ekar mo̧o̧r in aujiid eo an rinana eo. Karbōb, erreo, im ekajet em̧m̧an kar menin aikuj bwe Devid en m̧ōkaj in eļļo̧k im jab lale, ak ekar jab kōm̧m̧ane jim̧or men kein. Ijjelo̧kin, ekar kōtļo̧k bwe kōlm̧enļo̧kijeņ eo an en jeerļo̧k n̄an men ko emo ļōmņaki, ļōmņak rōt in rej tōl n̄an m̧akūtkūt, im em̧ōkaj aer ettōr laļļo̧k jān nana n̄an lukkuun nana n̄an kauwōtata. David ekar po, im n̄an e kaje ko rekar indeeo.

Ewōr juon aujiid ilo jetōb rainin ņa etan pija nana, im elōn̄, rej toojļo̧k eo aer jān enaan ko an kōkakūtōtō, deļo̧n̄ ilo wu in ekamejmej. Āinwōt jabdewōt wu, epidodo deļo̧n̄e ak eben diwōj. Jet rej ļōmņak im ba bwe remaron̄ alooje wōt pija ko renana ilo aer ban en̄taan kōn jelōt ko rekamettak. Rej ba, “Ejjab nana menin,” ak, “Wōn ej kea? Eban kōm̧m̧an jabdewōt oktak,” ak “Ikōņaan wōt jeļā.” Bōtaab rebōd. Irooj ekar kakkōl, “Im e eo ej kalimjek juon kōrā n̄an mejkaiie ilo̧kan lio naaj kaarmejjete tōmak eo, im naaj ban bōk Jetōb eo; em eļan̄n̄e ej jab ukeļo̧k naaj kadiwōjļo̧k e” (K&B 42:23). En̄in ej ta eo ekar waļo̧k n̄an Devid: ekar kalimjōkļok Bathsheba, ļōn̄ kake, im kar jako Jetōb eo jān e. Ewi jon̄an an naaj kar oktak aolepān mour eo an David eļan̄n̄e en kar bōk bōran im reilo̧k jān e.

Ippānļo̧k an jako Jetōb eo jān ippān, ro rej kōjerbal pija ko renana renaaj barāinwōt marokļo̧k mejāer im jab eddōkļo̧k. Āinwōt Kiin̄ Devid, rej kajjeon̄ ņooje jerawiwi ko aer, meļo̧kļo̧k ke ejjeļo̧k men emaron̄ nokjak jān Irooj (lale 2 Nipai 27:27). Kaje ko rem̧ool rej jino ļapļo̧k ilo an ejjeļo̧k kautiej kōj make, jemjerā ko reaorōk jorrāān, m̧are ko rūb, im lōn̄ļo̧k armej ro ejjeļo̧k ruwāer rej jorrāān. Loe bwe ta eo eto aer lale ejako an kabwe aer kōņaan, rej kōmālmel kōn pija ko eļapļo̧k wōt aer nana. Rej jidik jidik eddōkļo̧k ilo aer an̄ūrlep men̄e rejjab jeļā kake ak rej kariab e, im āinwōt Devid, m̧wilier rej nanaļo̧k ilo an jon̄ok ko in aer mour jim̧we rej makoņļo̧k

Ilo an m̧anit ko rebun̄bun̄ ipeļaakin laļ in rūm̧ļo̧kļak, m̧wil ak men ko rekajōjō rej ļapļo̧k ilo aer kobrak miitia, menin kalimomo ko, kadeelel ko, im intōnet. Ak bun̄bun̄ ekkar n̄an jon̄o̧k ko an laļ in ej juon jon̄o̧k eo ekauwōtata n̄an kōjerbale n̄an jo̧ņe ta eo ejimwe ak em̧ool ta eo ejjab kauwōtata. Juon pija in alooj ak juon television show emaron̄ ļap an bun̄bun̄ im em̧m̧an ippān milien armej ro rej lale im, im ijo wōt ke ej kwaļo̧k pija ko im m̧akūtkūt ko me renana. Eļan̄n̄e juon men ilo juon pija in alooj “ejjab lukkuun nana,” menin ej kajju meļeļe in bwe ejjab bar em̧m̧an. Kōn menin, kōn un eo em̧ool me ro jet rej alooj ak kōpeļļo̧k Web site ko me rejjab ekkar ejjab jekpen ņae kōj. Mour ko an ro rej kabwijer priesthood eo rej aikuj kalikkar jon̄ak ko an Rilo̧mo̧o̧r im Kabun̄ in An, ejjab jon̄ok ko an laļ in.

Rilo̧mo̧o̧r ekar katakin, “Im em̧ōņōņō ro aolep rej erreo ilo bōro, bwe renaaj lo Anij.” (3 Nipai 12:8). Kallim̧ūr ko an gospel eo rej kōketak im kautiej, aaet indeeo. Jej bōk kallim̧ūr kein jān bujen ko rej pedped wōt ioon wāween ad mour erreo im jim̧we. N̄e jej mour jim̧we im kappukot n̄an karreoik būruwōd, jej epaakeļo̧k Anij im Jetōb. Jon̄an eo būruwōd etōpar e ej kalikkar eo jon̄an kam̧ool kōn Anij jej loe ilo laļ in kiiō im ekōkarbōb kōj n̄an jem̧ļo̧k eo āliktata kōn kallim̧ūr eo bwe ro rerreo “renaaj lo Anij.” Eo ad ej juon kōttōpar n̄an erreo. Kōn menin, Rijilōk Jon ekar je:

“Kom̧ ro jitōnbōro, kōj ro nejin Anij, im e jan̄in polel an waļo̧k enaaj kōjkad: Je jeļā bwe eļan̄n̄e, eļan̄n̄e Enaaj weaaktok, jenaaj āinwōt E; bwe jenaaj lo E ilo wāween An pād.

“Im ro otemjej, kōjatdikdik in kōn E ej ippāer, rej karreo er āinwōt Ej erreo” (1 Jon 3:2–3).

Eļan̄n̄e kwoj lokjak ippen kein aujiid in an pija ko renana, kiiō ej iien eo n̄an kōrōļo̧k eok make kōn jipan̄ eo an Rilo̧mo̧o̧r Ewōr juon iaļ in diwōj, ak kwonaaj aikuji jipan̄ eo An n̄an rōļo̧k. Wāppen in am̧ ājmour enaaj pepe wōt ilo dedeļo̧k in am̧ ukweļo̧k. Mōkaj in etal ippān bisop eo am̧. Kappukot tōl eo an. E enaaj jipan̄ eok karōke juon karōk in ukweļo̧k me enaaj jipan̄ kōroolwaj am̧ kautiej eok make im bar kōjepļaaktok Jetōb n̄an mour eo am̧. Kajoor in kōmour eo an Pinmuur eo an Irooj Jisōs Kraist ej tōpar aolep en̄taan ko, em̧ool bar menin. Eļan̄n̄e kwonaaj oktakļo̧k n̄an Rilo̧mo̧o̧r kōn aolepān būruōm̧ im ļoor naan in kapilōk ko an bisop eo am̧, kwonaaj loe kōmour eo kwoj aikuji. Rilo̧mo̧o̧r enaaj jipan̄ eok kappukot kajoor eo n̄an eļļo̧k jān kapo ko im bōk kajoor eo n̄an anjo̧ jān an̄ūrlep. Āinwōt an Moronai kar katakin:

“Itok n̄an Kraist, im ekkejel wōt ioon aolep mennin letok em̧m̧an, im jab un̄ūr mennin letok enana, im jab men eo ettoon. …

“Aaet, itok n̄an Kraist, im weeppān ilo E, im kaarmejjete kom̧ make jān aolep men ko rejjab em̧m̧an, im iakwe Anij kōn aolep am̧ maron̄, ļōmņak im kajoor, innām An jouj enaaj bwe n̄an kom̧, bwe jān An jouj kom̧ maron̄ weeppān ilo Kraist; im eļan̄n̄e jān jouj an Anij kom̧ij weeppān ilo Kraist, kom̧ ilo ejjeļo̧k jabdewōt wāween maron̄ kaarmejjete kajoor eo an Anij.” (Moronai 10:30, 32).

Anij en kōjeram̧m̧an kijejeto ko ad rejej uwaer bwe ren erreo ilo bōro ko im ļōmņak ko ad, bwe “erreo en [maron̄] kainōknōk ļōmņak ko [ad] ilo ejjeļo̧k m̧wijkōk” (K&B 121:45). Ij kam̧ool bwe iakwe in pinmuur eo an Rilo̧mo̧o̧r im kōn kajoor in karreo eo an Pinmuur eo An ilo etan Jisōs Kraist, amen.