Hoê taime no te faaineine

Te faatumu nei te pene va‘u o te buka Ia Poro Haere i Ta’u nei Evanelia i to tatou feruriraa i ni‘a i te faaohipa-paari-raa o te taime. I roto i te mau parau omuaraa, ua faahaamana‘o o Elder M. Russell Ballard ia tatou e, e ti‘a ia tatou ia haamau i te mau fâ e ia haapii nahea i te faaohipa i te mau rave‘a no te faatupu i taua mau fâ ra (a hi‘o Ia Poro Haere i Ta’u nei Evanelia : Te Hoê Arata‘i no te Ohipa Misionare [2004], 146). Te riroraa ei faatere aravihi i to tatou mau taime o te rave‘a ïa no te faaohipa-maite-raa i te mau rave‘a e hinaarohia no te tapae atu i ta tatou mau fâ.

Ua mauruuru roa vau no te hoho‘a o te Peresideni Thomas S. Monson. No te mau mea atoa ta’na e rave ei peropheta no te Atua, ua haapapû oia, mai ta te Faaora i rave, e te vaira â te taime no te haere e farerei i te feia ma‘i (a hi‘o Luka 17: 12–14), no te faaitoito i te feia paruparu i te pae varua, e ia riro ei tavini no te taatoara. Te mauruuru atoa nei au no te hoho‘a maitai o te tahi atu mau taata e rave rahi o te horo‘a nei i to ratou taime i te taviniraa i to ratou taata tupu. Te faaite papû nei au e te horo‘araa i to tatou taime no te taviniraa ia vetahi ê, e au maitai te Atua i te reira e e haafatata’tu ia tatou Ia’na ra. E haapa‘o to tatou Faaora i Ta’na parau e « o tei haapao maitai e ua paari hoi i teie nei, ua taiohia ïa ei mea tia ia noaa te mau aorai i faaineinehia no’na e to’u Metua ra » (PH&PF 72:4).

Eita roa te taime e hoohia ; noa’tu ta outou tamataraa, e taoa faufaa rahi te taime o te ore roa e noaa i te hoo mai i te fare toa noa’tu eaha te moni hoo. Ia faaohipahia râ ma te paari eita ïa to’na faufaa e noaa i te faitohia. Ua horo‘ahia ia tatou i te mau mahana atoa, ma te moni ore, te hoê â rahiraa minuti e te hora no te faaohipa, e e ite oioi tatou, mai ta te himene matauhia i haapii-maite-hia mai ia tatou, « oioi te mau mahana i te ma‘iriraa, ua tae ana‘e mai ra, mo‘e roa’tu ra » (« Haapao i to Taime », Te mau Himene, no. 134). E ti‘a ia tatou ia faaohipa i to tatou taime ma te paari. Ua parau te peresideni Brigham Young e, « Ua aitarahu tatou i te Atua no te rave‘a i te faaohipa i te taime no te haamaitai ia tatou, e e titau oia ia tatou ia faaite i te huru no to tatou faaohiparaa i te reira » (Te mau Haapiiraa a te mau Peresideni o te Ekalesia : Brigham Young [1997], 286).

No te mau titauraa e anihia ia tatou, e ti‘a ia tatou ia hapii i te faanaho i te mau mea matameha‘i i roto i ta tatou mau ma‘itiraa no te faaau i ta tatou mau fâ ia ore tatou ia tomo i roto i te mau mata‘i no te faataimeraa e ia horo noa mai tera e i tera ohipa faufaa ore. Ua haapii maitai te Orometua Haapii ia tatou no ni‘a i te mau mea matamua a parau ai Oia i roto i Ta’na A‘o i ni‘a i te mou‘a, « E mata na nâ outou i te imi i te basileia o te Atua, e te parau-tia na’na ; e amui-atoa-hia mai taua mau mea ra ia outou » (Mataio 6:33, faahororaa a ; no roto mai i te iritiraa a Iosepha Semita, Mataio 6:38). (A hi‘o ato‘a Dallin H. Oaks, « Focus and Priorities », Liahona, Tiurai 2001, 99–102.)

Ua parau Alama no ni‘a i te mau ti‘araa hau a‘e a haapii ai oia e « i riro ai teie nei ora ei tau tamataraa, e ei tau ia faaineine i te farereiraa’tu i te Atua » (Alama 12:24). E titauhia paha te tahi arata‘iraa e nahea i te faaohipa-maitai-raa i te tao‘a faufaa rahi o te taime no te faaineine i te farerei i te Atua, e mea papu râ e tuu tatou i te Fatu e to tatou mau utuafare i mua roa i ni‘a i te tabula. Ua faahaamana‘o mai te Peresideni Dieter F. Uchtdorf ia tatou e « i roto i te autaatiraa utuafare te here o te piapa ïa o te t-a-i-m-e » (« Te Mau Mea Faufaa a‘e », Liahona, Novema 2010, 22). Te faaite papû nei au e ia imi-mau-ana‘e-hia te tautururaa na roto i te pure e tauturu mai ïa to tatou Metua i te Ao ra ia tatou ia haapa‘o maitai i te mea e titau i to tatou taime hau atu i te tahi atu mea.

E fetii piri roa te haamau‘araa taime e te faaea-noa-raa ma te ohipa ore. A pee ai tatou i te faaueraa ia « faaore roa i te faaea noa ma te ohipa ore » (a hi‘o PH&PF 88:124), e ti‘a ïa ia tatou ia haapapû e ia ohipa ana‘e tatou te rave ra ïa tatou i te tahi ohipa maitai. Ei hi‘oraa, e mea faahiahia ia noaa ia tatou te mau rave‘a aparauraa vitiviti no teie tau, ia haapapû râ tatou eiaha tatou ia riro ei tîtîraa no teie mau rave‘a apî no te aparauraa. Te ite nei au e ua topa te tahi i roto i te herepata no te hoê peu faatîtî apî no te haamau‘araa i te taime—te hoê peu o te faatîtî tamau nei ia tatou ia hi‘o e ia haapono i te mau poro‘i na roto i teie rave‘a e o te horo‘a mai i te hi‘oraa hape e mea ohipa roa tatou e te raveraa i te ohipa maitai.

E rave rahi mau mea maitai na roto i ta tatou rave‘a ohie no te aparauraa e te haamaramaramaraa. Ua ite au i te ohieraa ia ma‘imi i te mau tuhaa parau, te mau a‘oraa no te amuiraa, te mau buka tupuna, e i te fariiraa i te mau imere, te mau faahaamana‘oraa i roto i te Facebook, te mau poro‘i i roto i te ‘tweets’ e te mau poro‘i poto. Noa’tu e mea maitai ana‘e teie mau mea, eita râ e ti‘a ia tatou ia faati‘a ia ratou ia tura‘i i te hiti taua mau mea hau atu i te faufaa rahi. Auê ïa te oto ia mono ana‘e te niuniu paraparau e te matini roro uira e ta ratou mau rave‘a apî i te huru ohie no te hoê pure i te hoê Metua here i te Ao ra. Ia haapeepee ana‘e na tatou i te tuturi mai ta tatou e na reira nei no te hapono i te mau poro‘i.

Eita te mau ha‘uti roro uira e te mau farereiraa na roto i te itenati e riro ei mono tamau no te mau hoa mau o te nehenehe e horo‘a mai i te hoê tauahi no te faaitoito, o te nehenehe e pure no tatou e o te imi i te maitai no tatou. Auê ïa to’u mauruuru i to’u iteraa i te mau melo no te pŭpŭ autahu‘araa, no te piha haapiiraa e no te Sotaiete Tauturu i te tahoêraa no te turu te tahi i te tahi. I taua mau taime ra, ua ite papû vau i te mana‘o o te aposetolo Paulo a parau ai oia « E teie nei, e ere atura outou i te taata ĕê e te purutia, hoê atoa râ to outou oire e te feia mo‘a e no te fetii o te Atua » (Ephesia 2:19).

Ua ite au e e tae mai to tatou oaoaraa rahi roa‘e ia fariu ana‘e tatou i ni‘a i te Fatu (a hi‘o Alama 37:37) e i taua mau mea ra o te hopoi mai i te utu‘a mure ore eiaha râ i te fariuraa e rave rahi mau hora i ni‘a i te Facebook, i te mau ha‘utiraa roro uira i roto i te niuniu afa‘ifa‘i. Te ti‘aoro nei au ia tatou tata‘itahi ia rave i taua mau mea ra o te faaere nei ia tatou i te taime faufaa rahi e ia faaoti e o tatou to ratou faatere, eiaha râ ia faati‘a ia ratou ia riro ei faatere no tatou na roto i to ratou natura faatîtîraa.

No te farii i te hau ta te Fatu i faahiti (a hi‘o Ioane 14:27), e ti‘a ïa ia tatou ia horo‘a i to tatou taime i te mau mea tei hau atu i te faufaa rahi, e mea faufaa a‘e te mau mea a te Atua. Ia paraparau ana‘e tatou i te Atua na roto i te pure mau, ia tai‘o e ia tuatapapa ana‘e tatou i te mau papa‘iraa mo‘a i te mau mahana atoa, e ia feruri hohonu ana‘e tatou i te mea ta tatou i tai‘o e i ite, e ia faaohipa tatou e ia ora ana‘e tatou i te mau haapiiraa i haapiihia mai, e haafatata atu â ïa tatou Ia’na. Teie ta te Atua fafauraa ia imi itoito ana‘e tatou mai roto mai i te mau buka maitai a‘e « E horoa’tu ïa [Oia] ia [tatou] i te ite na roto i to’na Varua Mo‘a » (PH&PF 121:26; a hi‘o ato‘a PH&PF 109:14–15).

E faahema Satane ia tatou ia faaohipa hape i to tatou taime na roto i te mau faaoaoaraa haavare. Noa’tu e tae mai te mau faahemaraa, ua haapii o Elder Quentin L. Cook e, « te Feia Mo‘a o te pahono i te poro‘i a te Faaora e ore ïa ratou e arata‘i-ê-hia’tu na roto i te mau imiraa ino e te faufaa ore » (« E feia mo‘a anei oe ? » Liahona, Novema 2003, 96). Ua haapii mai o Hiram Page, te hoê o na ite toova‘u o te Buka a Moromona i te hoê haapiiraa faufaa rahi no ni‘a i te mau mea e faahahi ê ia tatou. Te vai ra ta’na hoê ofa‘i e na roto i te hi‘oraa’tu i roto i te reira ua papa‘i oia i te mea ta’na i mana‘o e mau heheuraa na te Ekalesia (a hi‘o PH&PF 28). I muri a‘e i to’na faahapa-raa-hia, te parau nei te hoê aamu e ua rave-ê-hia’tu te ofa‘i e ua faahu‘ahu‘ahia ia ore te reira e riro faahou ei hahiraa.¹ Te ani nei au ia tatou ia ite i te mau faaoaoaraa e haamau‘a nei i te taime i roto i to tatou mau oraraa e ti‘a ia hunahia i raro i te repo. E ti‘a ia tatou ia haapapû ma te paari e ua aifaito te mau faito o te taime no te tuu atu i roto te Fatu, te utuafare, te ohipa e te mau faoaoaraa maitai. Mai te mau taata e rave rahi i ite a‘ena, e rahi te oaoa i roto i te oraraa ia faaohipa ana‘e tatou i to tatou taime no te imi i taua « mau mea maitai ra, te mau mea faahiahia, te mau mea roo maitai, e te mau mea poupouhia ra » (Te mau Hiroa Faaroo 1:13).

Te tere vitiviti nei te tau. Teie te taime tano, a tere noa‘i te hora no te oraraa tahuti nei, no te hi‘opo‘a i te mea ta tatou e rave nei no te faaineine ia farerei i te Atua. Te faaite papû nei au e te vai ra te mau utu‘a faahiahia no te feia o te rave i te taime i roto i te tahuti nei ia faaineine no te tahuti ore e te ora mure ore. Na roto i te i‘oa o Iesu Mesia ra, amene.