Soun Epwelo

I kalahnganiki ei patehng kumwail nihpwong wet. Lih en Mwomwohdiso en Sises Krais wie mwekmwekidlahng wiahla pwihn en lih me ahn Soukohp Joseph Smith nohnohu, Lucy Mack Smith, kawehwe ni mahsen pwukat: “Kitail anahne kesempwaliki emenemen, tetehk emenemen, kaloalamwahuih emenemen oh alehdi kaweid, pwe kitail en kak koaros patpene de mwohdpene nanleng.”¹

Mie pali siluh en kawehwe kaselel en koasoandi kan ong patpene nan irair en peren rehn Koht. Ehu iei en nsenohki emenemen. Pil ehu iei en padahkih emenemen oh en kin alehda padahk. Oh kesiluh iei en pato de mwohdpene rehn Koht.

Ahi pwukoa pwohnget iei en seweseikumwail kehn kaping oh kalahngan en Koht pwehki dahme kumwail wiahier pwehn sewese emenemen kapwaiada pwukoa lap wet. Oh keriau, iei en kawehwe ekis en dahme kohkohdo nan amwail doadoahk minimin en papah.

Duwehte lih akan en ansou ieu mwowe, kumwail sapengehr malipilip en Kauno en kihda epwel sawas ong mehteikan. Nan 1856, soukohp Brigham Young pekihda Souleng Kan en kohla sewese paionihr me iangodo riahka me tengala nan sinoh en nan nahna kan. E mahsanih ong towe kan nan ansoun anahn wo ni ehu tiepene lap: “Amwail pwoson, lamalam, oh kamwomwehda pwoson lamalam wet, sohte pahn doarehla emen te nanpwungamwail nan wehi celestial en atail Koht, ma kumwail sohte pahn kapwaiada tepin padahk duwe met me I padapadahkihieng kumwail ansou wet. Kohla oh wahlongodo aramas pwuko me mihier nan mohs akan, oh apwaliala mwahu soahng kan me kitail kin nda pid paliwar, … ma soh amwail pwoson pahn sohte katepe.”²

Lien Utah epwiki kei mwekidki. Nan arail pai suwed irail audehkihda kuruma mehkoaros me re kak kihda oh mehkoaros me re kak kihpene sang mehteikan pwehn apwaliala irail akan me mih nan kahpwal. Emen lih pwoson pwuko ntingihdi, “I sohte kin pehm nsenamwahu, oh I kakete nda, peren nan sohte lipilipil doadoahk me I kapwaiadahr nan ahi mour, pwehki pepehm en ehupene me mie.”³

Ni ansou me unsekla doadoahko oh sinoh kan peipeseng, lih ohte ntingihdi peidek en ah mohngiong pwosono: “Dah mehn uhd wiawi ong peh kan me inangih doadoahk?”⁴

Nan atail ansou, pwihn kan en lih pwoson pohn sampah pwon kin wekidala arail pwoson ong mwekmwekid nan wasa epwiki kei. Oh irail kin idek nan mohngiongirail oh arail kapakap peidekohte duwen ehu rahn ong arail mour en papah.

Emenemen kumwail mihmi nan irair tohrohr nan amwail seiloak ong mour soutuk. Ekei kumwail ahniki sounpar tohto en kakoahiek, oh mehteikan apwtehn pahn tapiada amwail mour en tohnpadahk pohn sampah. Emenemen tohrohr ni wiepen pein ah poadoapoad oh kahpwal. Ahpw kumwail koaros lih pirien oh sapwellimen Sahm Nanleng lih me e poakohng, oh e mwahngih oh kin ketin tetehk emenemen kumwail.

Dahme kumwail wiahpenehier me inenen mwahu iei en kesempwaliki, tetehk, oh kaloaloamwahuih emenemen. I kadehde duwen pali siluh wet ni mwekid kapwuriamwei ehu rahn teiohte ni amwail papah emen lih. Ni duwen ei wia ah pahpa, I men kalahnganohng Koht, me kaweidih emen sounpadahk en pas.

Nait lih Elizabeth, me kin kousoan nan ehu state tohrohr me ansou ni kuloak pil weksang kiht, mihmi nihmweo rehn nah seri sounpar siluho. Nah seri teio ahpwtehn wihk ehu nan pwihn kaiahn. Elizabeth liseian sounpwong weneu oh kaskasik ipwidien kesilimen en nah seri, me toahktehko nda pahn pil serepein. Ah pwoudo, Joshua, wie doadoahk.

Ni eh kilang me nta kohkohsang reh oh me e wie lalaudila, e delepwohnlahng ah pwoudo. Ah pwoudo ndahieng ih en delepwohnlahng ambulance oh me e pahn tuhwong ih nihmwen wini, me mih minit 20 sang nihmweo. Mwohn eh kak delepwohn, e rongada letelet ni wenihmwo.

Ni wenihmwo e pwuriamweiki eh kilang ienge sounpadahk en paso nan Pwihn en Sawas en Lih. Ira sohte koasoandi en tuhpene nihmensengo. Iengeo me pein pehmete me e konehng kohdo oh tehkada Elizabeth.

E sewesehlong Elizabeth nan were sidohsao. Ira lella nihmwen wini minit kei mwohn Joshua eh lella sang eh wasahn doadoahko. Ni ansou me mwotomwot sang minit 20, toahkte ko koasoanehdi ren pwalangadahsang serio pwehn doarehla Elizabeth oh nah serio. Eri kisin serepein pwidikidik kis pidolongodohng sampah, wie weriwer ngihl laud, wihk 15 mwohn me konehng. E paun ehu, ons eisek ehu (765g). Ahpw e momour, iangahki Elizabeth.

Lepin mahsen sang Lucy Mack Smith pweida rahno. Towe loaloapwoat en Pwihn en Sawas en Lih, ni eh mwekidki Ngehn Sarawi, tetehk, kesempwaliki, oh kaloalamwahuih rie lih men nan wehin Koht. Ih oh nen kan en mehteikan me kihdahr soangen papah kamarain duwe met nan dih kan kohkohdo kaidehn te alehdi kalahngan en irail akan me re sewese oh me poakohng irail ahpw pil kaping en Kauno.

Kumwail taman Sapwellime mahsen en kaping ong irail akan me kin alehdi tikitik kaping en sampah pwehki arail limpoak: “Nanmwarkio ahpw pahn ketin sapeng irail, mahsanih, Kumwail en ese pwe soahng koaros me kumwail wiahiong emen riei me tikitik pwukat, ngehi me kumwail wiahiong.”⁵

Ahpw manaman en emen lih en Pwihn en Sawas en Lih eh lella pwehn sawas ni ansouohte me anahn kin kalaudla sang ni manaman en pwihn en lih akan me minimin. Iet kisehn me ahn Elizabeth pisopo kadaralahng Elizabeth oh Joshua nihmwen winio awa kei mwurin serio eh ipwidi:

Pisopo doula nda, ni eh lokolokaiahki pein ih oh ward-o: “Se pil kohdohier nihmwen wini oh mwomwohd rehn serihkan nan perehn mwadong ni ansou me nohno kan sohte men ren mihmi ekis wasa tohrohr.”

Oh eri: “Uhdahn se sohte pahn kamwakid koasoandio mwohn aht ehukihieng kumwa oh kumwa pwungkihdahr. Se men kumwa en esehte me kumwa en dehr pwunodiki soahng kan me se kak [oh pahn] kapwaiada.”

Dahme re sewesehki nei serepeino elehieng eh kak ahniki ansou mwahu ni eh tepin koledi nah kisin serepeino.

Oh eri pisopo keimwsengki ah mahsen pwoat ong Joshua oh Elizabeth me lih akan kin kadar sang ni arail loaloapwoat nan sampah pwon en papah mehteikan ong Mwohnsapwo: “Kolokol pwosono.”

Ni wekpeseng kan me kumwail ahniki nan irair me kumwail mih loale de lelohngehr, I kak ndahieng kumwail kisehn me kohkohdo nan amwail mour. Ni amwail pahn kolokol pwosono, kumwail pahn diar amwail pahn kin kalapw alehdi luk sang Kauno en papah emen me anahn ni ansou me e sohte wia ansou mwahu. E kak mwomwen wia doadoahk sohte kaperen oh me mwomwen sohte kak pweida. Ni ansou me malipilipo pahn kohdo, e kak mwomwen me sohte anahnepamwail de me emen tohrohr kak kihda ni mengei sawaso.

Taman me ni ansou me Kauno mweidehng kitail en tuhwong emen me anahn, kitail kin wauniki mehn Sameria mwahuo pwehki dahme e sohte wia iangahkihte dahme e wia. E sohte kote wasao palio ahlo mendahte soun seiloak ohlao pohn ahlo wia mehn liki men de mwein imwintihti. E wia dahme e kak oh wiahda koasoandi ehu pwe mehteikan en kak pil kalaudehsang. E wia met pwehki e wehwehki me sawas mwein pahn anahne laudsang me emen te aramas kak kapwaiada.

Padahk kan nan soai pwoatet kak kaweid kumwail nan sohte lipilipil me kohkohdohng kumwail. Padahngkohte mie nan irair kan me kumwail lelohng ni amwail seri oh pil irair kerendo kan.

Pak ehu, de mwein pak tohto, kumwail kin pwuriamwei ni amwail tuhwong aramas emen me anahne sawas. Mwein nohno de pahpa, nohno de pahpa kahlap, emen lih, de serihmen me soumwahula de ahniki kahpwal tohrohr. Ahmw pepehm kan en limpoak me kehlailsang ahmw ineng en aramas. Eri ke tepida kihda sawas.

Duwehte soun seiloako nan soai en pwuhk sarawi en mehn Sameria mwahuo, mweinte sawas me anahno wiahla epwel ong ansou reirei me ke sohte kak kihda kelehpw. Mehn Sameriao anahne kihla epwelpen soun seiloako ong soun apwalih imwen keiru. Sapwellimen Kauno koasoandi ong papah mehteikan me anahn kin doadoahngki pwihn.

Pisop kan oh president kan en Pwihn en Sawas en Lih kin ansou koaros luke towe kan en peneinei en sewese emenemen ni ansou me mie anahnepen sawas en welfare. Mie kahrepe tohto en padahk wet. Me keieu iei en kamangaiong aramas tohto kapai en kalaudlahn limpoak me kin kohdo sang papah emenemen.

Kumwail kilangehr oh kehnehr kapai wo. Ni ansou me kumwail apwalih aramas emen menda ma kisin ansou kis te kumwail kehn limpoak ong aramas me kumwail papah. Ni ansou en kihda epwel eh reireila, pepehm kan en limpoak laudla.

Pwehki kitail ahniki mour en pohn sampah, kalaudlahn limpoak wo kak en pil pid pepehm kan en pwunod oh pwangada. Met iei pil ehu kahrepen Kauno eh kin ketin mweidehng kitail en alehdi sawas en mehteikan nan atail kin papah irail akan me anahn. Met me kahrehda Kauno eh koasoanehdi pwihn kan en soun epwel.

Wihk kei samwalahr I pato wasa me peinakapw men uhda pwehn kasarawi nan mihting en kamadipw sarawi ni duwen assistant coordinator en padahk en pas, pwukoa ieu me I sehse mie. I medewe ma e ese uwen kaping me Kauno ketikihieng ih. Pwehki seri limwekidikid e anahne kohkohsang mihtingo mwohn ei kak ndahieng ih uwen Kauno eh poakohng oh kalahnganiki ah sawas koasoanehdi doadoahk en Sapwellime tohnpadahk kan.

Apwalih irail akan me anahn kin anahne pwihn ehu, pwihn ehu me limpoak oh minimin. Iei met me Kauno ketin kawkauwada nanpwungamwail. E poakohng kumwail pwehki pali me kumwail kapwaiada.

Ehu kisehn Sapwellime kalahngan laud iei me Koht kin ketin mweidehng kumwail en pehm laudlahn limpoak ong irail akan me komw kin papah. Met iei kahrepen omw kin mwahiei ni mehlahn aramas emen me komw papah ansou werei. Katiasang ansou mwahu en apwalih irail kak en mwomwen laudsang tohrohrpeseng wo en kisin ansou. I rongada lih emen—me I ese ansou werei—me keren, wihk me ah pwoudo mehla, kihda kadehde ehu en kaping pwehki ansou mwahu en papah ih lel imwin ah mour. Sohte pilen mese sansal, ahpw ah sirei peren me sansal.

Mendahte papah limpoak me werei ong aramas eh kin mie kapaipe laud, kumwail esehier me mie idin uwen me kak pweida ni paliwar, pali en pepehm, oh pelien mwohni. Aramas me kin kihda sawas reirei kak en wiahla emen me anahne sawas.

Kauno, me Soun Epwel Saman apwalih aramas me anahn, kihda kaweid kamarain ong soun epwel pwangadahr kan ni mahsen sang Nanmwarki Benjamin me kileldi nan Pwuken Mormon: “pwehki sang kolokol pen lapwapen dipamwail akan …, I men kumwail en kin kihla amwail dipwisou kan ong me semwehmwe kan, aramas koaros nin duwen me irail anahne, me rasehng kamwenge me semwehmwe kan, kalikouiada me kilisou kan, pwaralang me soumwahu akan, oh kihla sawas en pali ngehn oh paliwar, nin duwen arail anahn akan.”⁶

E ahpw doula oh kihda kaweid en kaper ong kumwail akan me sohte kin pahsan kilel kan me amwail nohnla doadoahk laud oh nohn wereila nan amwail papah limpoak: “Oh kumwail en kin kilang pwe mepwukat koaros en kin wiawi ni marain oh en kin koasoandi pwung; pwe sohte anahnepen aramas emen en tang marahra sang eh kehl. Oh pil pwurehng, e konehng me e pahn nantihong, pwe sang ni irair wet, ih en kak ale kisakiso; ihme kahrehda, me koaros pahn kin wiawi ni pwung en koasoandio.”⁷

Kaweid wo kak en apwal en alahlda ni ansou me pilipilo mwomwen mih nanpwungen en kapwaiada amwail ineng en wia uwen me kumwail kak pwehn sewese mehteikan oh en eripit en apwaliala pein amwail anahn akan pwehn kak miehte ahmw kehlail en papah. Kumwail mwein kilangehr mehteikan tihwohkihla soangen pilipil apwal pwukat. Ehu karasaras iei pilipil en song apwalih aramas me kerenlahngehr imwin ah mour nan imwen apwalih me mah ni omw mwein pwangadahr mehlel.

Dahme kumwail ese duwen pilahn en komouro me kak en wia amwail kaweid nan soangen pilipil apwal duwe met. Met iei ehu kahrepe kan me Lucy Mack Smith nda ni eripit me lih akan pahn “alehdi kaweid”.

E sawas ma ke ahniki kadehde en koasoandi en Kauno ong emenemen sapwellimen Koht seri nan irair apwal kan en mour wet. E padahngki me lamalam poahsoan en pilahn en komour ong Soukohp Joseph ni wiepe wet ni eh nannanti en wehwehki ah kasongosong me kerenieng sohte uhdi: “Oh eri, ma komw pahn nantihieng mwahu, Koht pahn ketin kalapalapiala komwi wasa ile.”⁸

Atail pilipil kan en sewese emen ni keieu mwahu nan kasongosong apwal eri kin wiahla: “Mehnia ahl me I pahn idawehn me pahn keieu sewese aramaso me I poakepoake oh kin papah en pweida mwahu’?” Atail pwukoa iei en kamangaila en kin pwoson Krais, kolokol koapwoaroapwoar marain en mour soutuk, oh kin momourki limpoak mehlel, limpoak unsek en Krais, lel imwin arail mour.

I kilangehr lih akan nan wehio nsenohki duwen Sounkomouro oh Sapwellime doadoahk. Medewe ansou kan me komw pidolong nan pere ehu wasa me Pwihn en Sawas en Lih de Primary de Peinakapw Akan ahpwtehn tuhpene loale.

Ehu kilel en Sounkomouro de Sapwellime mahsen kakete sohte sansal, ahpw ke ese me kadehde en mehlelpen oh kesempwalpen Sapwellime Tomwo re kehn nan awao duwehte me wiawi nihsoutik wet. Mwein sohte kilel en tehnpas sarawi de lepin lokaia kan en “Families Can Be Forever,” ahpw ke kak kilang koapwoaroapwoar nan arail sirei kan.

Oh kumwail kilangehr, duweie, sounpadahk en pas eripit eh kin kakairada koapwoaroapwoar rehn lih emen me nannanti nan kahpwal, me ah sawas ong emen tohrohr, mendahte ah luwetalahr, anahn oh kesempwal. President kaselel kan en Pwihn en Sawas en Lih kin diar wiepe kan en mweidehng irail akan me anahne sawas nan epwelpen mehteikan. Irail wiahda ansou mwahu kan ong lih akan me kin nantihieng arail kasongosong kan mwahu ni arail kin apwalih emenemen nan limpoak unsek en Krais. Met kak iangahki kangoang tikitik en soun epwel me pwangadahr en kommoal oh alehda sawas sang mehteikan.

Lih akan kin kahrehieng met eh kak pweida sang ni arail kin sohte mwadang en kadeik irail akan me mihmi nan kosongosong. Pali laud en aramas me wiswisik me toutou kin tepida peikasaliki pein irail oh kateparail. Kitail kin kamarahda arail wisik toutou kan ni atail kin kanengamahieng arail luwet akan oh pereniki sohte lipilipil mwahu me kitail kak kilang rehrail. Kauno kin wia met. Oh kitail konehng idawehn Sapwellime karasaras,Ih soun epwel me keieu mwahu.

Kitail kin kalapw koasoia kehlail en pwihn en lih akan nan Mwomwohdiso en Sises Krais. Kitail uhdahn anahne esehla kasawiada me Sounkomouro kin ansou koaros ketket nan pokono ni atail kin lukehdo Ih.

Me kin kalapw wihwiawi met, kitail kin kilang sapwellimen Koht lih akan lukehdo lih ong nan pwonopwono rehrail. Ni lih akan ahr kin kohlongodo nan mihting oh rapahki wasa me re pahn mwohd, irail pahn rong lokaia ngihl meleilei, “Menlau, kohdo me mwondi rehi.”

Kitail pahn rong lepin lokaia pwuko nan rahn me Lucy Mack Smith kilenglahng ni ansou me lih kan pahn “mwohdpene nanleng.” Kitail sohte kin kaunopada ong rahno nan kisin ansou kis. E pahn kohdo sang rahn oh sounpar en apwahpwalih emenemen oh kihieng lepin lokaia kan en mour soutuk en loalidi nan mohngiongitail kan.

Ahi kapakap iei me tohto kitail pahn patpene nan rahn lingan me kohkohdo me kitail sosohpai. I kihda ahi kadehde me amwail koapwoaroapwoarki rahn pwuko pahn pwungila. Kauno Sises Krais sang Sapwellime Tomw poatoapoat elehieng eh kak pweida ong emenemen kumwail. Sahm Nanleng kin ketin karonge oh sapeng amwail kapakap kan en pwoson en alehdi kaweid oh sawas en kapwaiada amwail papah ong Ih.

Ngehn Sarawi kin poahngoaklahng kumwail oh ong irail akan me kumwail kin apwalihlR. Kumwail pahn kakehlailda oh kamarainda en ese idin oh uwen amwail kak en papah. Ngehno pahn kaloalamwahuih kumwail ni amwail pahn mwein medewe, “E itar uwen me I wia?”

I kadehde me Kauno pahn ketin ieiang kumwail oh me ahl mwohmwail pahn kaunopda oh kileldi ong kumwail sang Ih nan amwail papah irail akan me E ketin poakoahng nan arail anahn oh kasongosong. Ni mwahr sarawi en Sises Krais, ahmen.