Pwapwan ewe Pristut

Chommong ier a no am me ekkoch chiechiei kaptinin sepenin auwa ekieki aupwe eponuweta am anean nupwen am kukkun at ne forisefani efoch sepenin minen nom. Amw meinisin auwa meni ewe sepenin mi ta minen 1938 iwe auwa poputani ewe angang ne for sefani an epwe niwin sefan ngeni napanapan. Ewe angang a fis pwe angangen tong. Awor auchean wewen ngeni ei pokiten ngang uwa kaeo uwou sepenin won effoch a nonno ngeni nupwen ai chiwen emon chok sarafo.

Ei sepenin a akawin kouta ina epwe 35 ier mwirin an ekkewe pwipwi Wright we fori war ewe aewin akkom mei itefouno. Ai ekieki usun ei a ngeni ei ai mefi pwe uwa wesen chinap.

Mwesinan we ese wor amanauan; nupwen en ka asanapen ewe mwesinan seni ewe nenien chon uwei sepenin, emon epwe nomw won ewe pun epwe wisen komoch ne pusei tori an ewe mwesin epwe manaw. Ew me ew mwesin epwe manaw non ekis fansoun ren motores me pwara.

Nupwen a nom non asapwan, a fateno pwe ewe kukkun sepenin ese for an epwe mwitir. Nge iwe mwo, nupwen epwe wor asapwan mei pochokun, ussun nge am ekieki pwe ese mwo ekis mokutukut. Uwa chechemeni ai we uwei ewe sepenin nge nei we enuwon at mei fiti ei asen ewe an non Germany, ekkewe taraku fan ra akomweno mwem!

Nge, oii, ellet ngang uwa fakkun sani ei kukun sepenin! Amen fakkun mwirino anen ai uwa fen fori ewe amwararen me ningochun ai uwei ewe sepenin. Ka tongeni rongorong, mefi, tini, neni, me kuna ifa ussun ach uwou sepenin. Ekkewe pwipwi Wright ra apasa non ei ninikink: “Ese wor [och mettoch] a nonno ngeni ewe pwapwa nupwen ka as won sepenin.”¹

Non ewe angang, nukanapen ei ier awor ai tufich ai upwe uwei ewe jet F-18 mi weires fengen me ewe mei itefouno non fonufan itan Blue Angels, ewe timen chon pwomweni won ekkewe sein neifi non fonuwen merika. Ussun chok ach fiti en sepenin asan iwe a fansoun nakatamen ach chechemeni pokiten a fen 50 ier me mwen, arapakan ngeni ewe ran, ngang uwa fen awesi ai sukunen emon pilot.

Ewe F-18 jet uwa fen pin uwei, ewer, amen fakkun wate sokofesenin seni ewe efoch non ewe kukkun sepenin. A ekuna ngeni ei waten ningochun an chang. Ussun chok an amosou ngeni ewe ennukun tou ren mwokutun asapwan non ekkoch ekkewe an mei mwirino. Iwe mwo, sai won sepenin fiti ekkewe Blue Angels mei pwal mwitir ne achema ngeni ei pwe poputan ach emon chon uwei ekkewe sepenin chet ussun an ekkewe sarafo urumwet. Ach sipwe anono sefani ngeni ekkewe pwipwi Wright, “A wate seni mettoch ese nifinifin ussun ewe uwei ekkewe sepenin a ew mettoch mei mwirino non kinamwei.”²Ai chang fiti ekkewe Blue Angels a ngeniei ew sokkonon nikinik unukui.

Ika pwe ke eisinei meni nein ekkei ruwofoch sepenin uwa fen pin uweir uwa kon sani, eni usap sineiochu met upwe oronuk. Non ekkkoch anen ai nenengeni, ramen fakkun sokofesen, ai upwe apasa ussur. Iwe pwal non ekkoch anen, ramen fakkun nono.

Me ruwepek ewe kukkun sepenin me ewe F-18, uwa mefi Pwapwa, ningoch, me pwapwan uwei ekkewe sepenin. Me ruwepek ngang uwa tongeni mefi ewe kokon ren ewe Toropwen charame ngeni ewe Fonufan me (poruk) ekkewe kuchu non neuwemongun poun kewe.³

Iei, ina kopwe eis, met ekkei ruwofoch sokofesenin sepenin uwa pin uweir repwe fori ngeni am ei mwich ikenai ika ngeni ewe pristut sia tongeni ach sipwe apasau ika fiti ewe angangen pristut kich meinisin sia men fakkun tongei?

Pwi kena, mei pung pwe an emon me emon tongeni angang non ewe pristut meinisin mei tongeni sokofesen? Upwe apasa, ekkoch me neimi aua fiti ekkewe sepenin F-18, nge ekkoch oua fiti ekkewe kukkun sepenin. Ekkoch me neimi ouwa nomw non wart ika steik ikeweie meinisin ekkewe wis, seni asistan ngeni ekkewe pris mei tekia ir ra chon emweni ngeni ewe mwichen seketerin tiken, a amasou seni ekkewe mei wor wiser non pristut. En ew feioch amw ka fiti mokutukutun non ewe kinikinin wart ewe mei mwirino.

Ekkoch me neimi omi nom non kinikinin fonufan ian a chokukun chon ewe mwichefen me chon ewe priesthood. En kopwe mefi akanamon me chou ren choun menisin kewe mettoch epwe kawes. Me reom eni epwe chommong pau ren om kopwe emokutu ewe mwesinin priesthood epwe poputa. Fan ekoch epwe pwano nge usun om branch ika wart esap fetan ngeni mwaan.

Nge, ese pwan nifinifin met wisom ika om angang, en me ngang sa sinei pwe mi wor auchean pwapwa a eto seni ach achocho non angangen priesthood.

Uwa men sani ai upwe uwei ekkewe sepenin, ika mo non efoch Piper Cub, efoch F-18, ika pwan ekkoch sepenin. Nupwen ai nomw non ewe Piper Club, use tongeni ai upwe kapas fan iten mangen an sa; nupwen ai nomw non ewe F-18 use ngunungun nupwen ewe pochokunen mwokun ewe asapwan a pwarano pwe ua chinnap.

Ewer, amen wor anen ekkewe ekkoch mettoch ese mwirino. Ewer, amen mecheres ach sipwe kuna mettoch sipwe anini ussun.

Nge pwi, kich sia amochu ewe Ngunun Pristut, mwirin ewe Efeioch ren Noun Kot we Anamon! Emon me emon kich a wor paw ra iseta won mokurach, iwe sia angei ewe pristut seni Kot. Sia fen angei ewe mumuta me wisach ach sipwe fori non Itan me Noun chon angang won ei fonufan. Ese nifinifin ika non ekkewe waten wart ika non ekkewe kukun pranch, kich meinisin sia koko ren ach sipwe aninis,efeioch, me fori non mettoch meinisin ren ochunon meinisin me mettoch meinisin a ani epunukunuk ren ach tumun. Epwe wor mettoch mei wate apwapwan?

Sipwe weweiti, kinisou, me mefi ewe pwapwan aninis non ewe pristut.

Ai we sani ne uwow sepenin awewe ngeni anen non nonomun manawei. Nge nupwen a awora pochokun me ekinamwe ai kewe sine ussun emon chon uwow sepenin ra, ai sine ussun emon memper ren ei Mwichefel amen fakkun wate anononun, wate pwapwan, napanon waten anonnon. Nupwen ngang uwa fen angei ewe efeiochun inisi non angangen Mwichefel, ngang uwa mefi an Kot umoumochun manaman ussun chok an kirokiroch.

Nupwen ngang emon chon uwei ekkewe sepenin, uwa atapa ekkewe kuchu. Ussun ai emon memper non ei Mwichefel, ngang uwa mefi masowen nang.

Meinisin iei me non ekkan, uwa positi ai momot non ewe, Nenien chon uwei sepenin. Nge non ai angang ren pwi kewe me fefinei non ei Mwichefel amen mecheres ach fori. Ai Poputa ne mefi ewe memefin kinamwei me pwapwa ekkewe ra marita seni ekkewe kukunun kinikinin ren ei waten mokutukut me angang, ngang use mochen upwe mwo misini och non ei fonufan.

Ikenai sia chufengen usun ew watten mwichen ewe pristut. A ach pwapwa me tongeni ne angang ngeni ewe Samol me chiechiach kewe, ach sipwe pwon ren ochun an nomw rech sia tongeni anisata ekkoch me euweta ewe Muun Kot.

Sia sinei me weweiti pwe ewe pristut ina ewe manaman esemuch me mumuta seni Kot. Sia tongeni apasa wewen ei seni ach chechemeni. Iwe mwo, kich mei elletin Angei ewe ellletin met sia apasa? Eto upwe eniwini sefani:Ewe pristut ina ewe manaman ese much me mumuta seni Kot.

Ekieki ussun. Seni ewe pristut, Kot a forata me ennuku lang me fonufan.

Seni ei manaman, A angasa me etekia noun semirit, me a uwato, “pekin esap chiwen wor mano me ewe manaw ese much ren aramas.”⁴

Ewe pristut, usun ewe Soufos Joseph Smith a awewei, “ekkewe aourur seni meni nein ewe Umoumoch a awewei ngeni An ning fansoun an … fori ei fonufan, me seni meni an Atewe a sapweno ne pwarano inisin ngeni ekkewe semirit ren aramas non ekkei fansoun, me seni an Atewe fori ar repwe sinei an popun ngeni ewe fansoun saponon”. ⁵

Samach won lang ewe mei wate manamanan a ngeni kich ewe mumutan pristut—aramas ekkewe wewen, rese unusoch. A mut ngenikich ewe mumuta pwe sipwe angangn non Itan fan iten manauen Noun kewe. Ren ei manaman sia mumuta ne afanafana ewe kapas allim, fori epinipinin manau, anisi kautan ewe muun Kot won fonufan, me afeiochu me angang ngeni ach famini me chiechiach.

Iei ewe monomonun pristut sia amochu.

Sie tongeni meni ika annuku. Nounoun ei manaman ese tongeni epwe siwin, mwokut fetan, ika achimw ren wis, pisekisek ika pochokun. Ew manamanen ewe ngun a wisen emweni ennukun non lang. Samach won lang a foreta waten umoumochuch ngeni kich meinisin. An we manaman a tongeni emokutu me emweni seni chok nongonongun an aramas pung, ⁶ esap inis — pung.

Kraist i ewe popunapen ennetin mumutan pristut me mamein manaman won fonufan.⁷ Iei an angang, minne sia tufich ne aninis non. “Iwe ewe wor emon a tongeni aninis non ei angang tiwenon chok ika epwe tipetekison me uren tonge, wor an nuku, apinukunuk, me unusen tong, me aukuk non mettoch meinisin, met chok epwe kawor ngeni an tumun.”⁸

Sise fori ren ach pwisin mochen, nge sia kutta ach sipwe anisi me echimwata ekkoch. Sisap emwen non ach echimw chok nge seni “pesepes, … songomang, … ekinamwe me mosonoson, me ren tong ese tongeni epwe much. “⁹

Ewe pristutun Umoumochun Kot a kawor ngeni ekkewe mwan mei nimenimoch ian chok ra nom ia- ika mwo ar kewe newo, ika mwo ifan ukukun tipekekisonun nonnomur, non ar kane ngeni ika towaw seni a repwe tori ewe fonufan. Mei kawor ese fiti moni ika ese nifinfin niwinin. Ussun ewe kapas monomon an ewe soufosun nom Isaiah, ngeni meinisin io mei kaka a tongeni feito ngeni ekkewe konik, nge ese fiti moni amw kopwe feito iwe mongo!¹⁰

Iwe pokiten ren ewe manaw ese much me ewe Acheasefan mi weires ach sipwe weweitian ach we Samon, Jises Kraist, ewe pristut ren Kot a tongeni moneta ina mwo ika ka turuno ika en mei nimenimengaw me nomw. Seni ewe ngunun eningano me ewe anen enimenim anongonong won ach aier, ka tongeni “uta iwe eningano mwom”!¹¹ Pokiten tungor, omusomusen tong ren ach we Samonme Chon Amanaw, ka tongeni anenoi meseomw, pokiten a nimenimoch me a musono tipisin, iwe a for sefan non pung me Sufon noun Kot kewe at—nimenimoch ra pwarano ewe pristut mei monomon ren ewe Umoumochun Kot.

Uwa mefi och netipengaw ren ekkewe ir resap etiwa me kinisou ren ewe angangen me mumutan ewe pristut. Ir ra ussun ekkewe chon fiti sepenin ekkewe ra awora ar fansoun ngunungun ussun nonnon chotan ekkewe pinach fansoun ar einetir won asapwan, ase chikin ekkewe kuchu—och mettoch ekkewe kingen nomw repwe fangeno meinisin Pisekir repwe satuni fan ew chok!

Pwi, kich sia feioch ach sipwe tipetekison ne angei ei waten mumuta me manamanen pristut. Eto sipwe aneno mesach me kuna, kunaeochu, me etiwa ei fansoun ren met mei wesewesen.

Seni ach tupwon, tong, me anganga angangen pristut, sia tongeni sinei ewe elletin wewen ewe kapasen pwarata: “Ngang upwe feino me mwen meseomw. Ngang upwe nomw peniemwanum poumw me pwan won peniengawen poumw, Me Nguni epwe nom non netipom, nge nei chon ngang repwe pwenuk, pwe repwe anisuk eta.”¹²

Eto sipwe pwapwa me weweiti amwararen me tufichin ewe pristut. Eto sipwe etiwa me tongei ekkewe wis ra tungor sipwe apwonueta—wis non imwach kewe me non ach kewe kinikinin Mwichefel, ese pwal nifinifin ifan waten ika kukunun. Eto sipwe wetteno non wenechar, nikitu, me angangen pristut. Eto sipwe kuta ewe pwapwan aninis non ewe pristut!

Sia tongeni fori ei ren an ach aea ekkewe nongonongun tipachem, aneasochis, me nuku.

Pwe wewen, ewin, sipwe sinei me weweiti ewe pwonen ewe pristut a pwa non ewe puken kapasen Kot. Mi auchea ach sipwe weweiti ekkewe pwon me ekkewe annuk won met mokutukutun ewe pristut. ¹³

Mwirin, sipwe mirit me pwomweni ussun ei tipachem fansoun meinisin me etiwa ochu. Nupwen sia aneasochisi ekkewe annukun Kot, a ekinamwei ach ekiek me inisich, me aronga ach ewe mokutukutn wenechar soufos ra aitikich, sipwe mefi ewe pwapwan aninis ren ewe pristut.

Amuchunon, sipwe anapano ach nuku non ach Samon, Jises Kraist. Sipwe uweata won inisich Itan we me sipwe pwon iteiten ran ach sipwe fetan non minafon ewe anen chiechioch. Mut ngeni ach kewe angang epwe fori ach nuku epwe unusoch.¹⁴ Seni ach chiechioch sia tongeni unusochuno ren ach sipwe ew fan ew ipwach non fansoun ach anisi famini, chiechiach, me Kot.

Nupwen ach aninis non ewe pristut ren unusen non netipach, ngunuch, ekiekich, me ach pochokun, mei wor ach pwonen tipachem watte, kinamwe, me ekkewe nifangen ngun mi fel. Nupwen ach asamonu ewe ngunun pristut, Kot epwe asamonu kich, iwe sipwe “uta non ach nimenimoch me mwen [ I ]non ewe fansoun saponon.”¹⁵