Veitacini Marama: Isa, Eda Gadreva Meda Veiyagani Vakataki Keda

Ena vidio oya eda raica kina e walu na matanitu ka rogoca e ciwa na vosa duidui. Vakatayaloyalotaka mada e vica tale na vosa sa vakuri ena iotioti ni tikina oya. Sa dua na ka taleitaki me da kila ni da dua na veitacini marama e vuravura raraba a rawa ni da vakarogoya na domoda ena kena vakadinadinataki na dina tawamudu ni da luvena yalewa e dua na Tamada Vakalomalagi dauloloma.

Sa dua na ka dokai cecere me da tiko eke ena soqoni vakairogorogo oqo ka vosa vei kemuni kece na marama yabaki walu ka lako cake ena Lotu. Sa koto e dua na igu vakasakiti ena noda duavata ena bogi nikua. Niu raici keda na soqoni vata ena Vale ni Koniferedi kau vakasamataki ira na udolu vakaudolu era sarava tiko na kakaburaki oqo mai na veivanua eso e vuravura raraba, sa vakasinaiti dina ena mana cokovata ni noda ivakadinadina kei na noda vakabauti Jisu Karisito na soqoni qaqa oqo ni marama ena itukutuku ni Lotu, kevaka e segai ena itukutuku kei vuravura.

Ena bogi nikua eda reki ena veiitavi duidui ni da marama ena Lotu. E dina ni vuqa na sala eda duidui kina, eda vakadinadinataka talega ni da luvena yalewa na Tamada Vakalomalagi vata ga ka vakavuna na noda veitacini. Eda sa duavata ena tarai cake ni matanitu ni Kalou kei na veiyalayalati eda sa cakava, se cava ga na keda ituvaki. Na soqoni cokovata oqo, e sega ni vakatitiqataki, ni veitacini marama lagilagi duadua e delai vuravura!¹

Me da veitacini marama e kena ibalebale ni da vauci ena dua na ivau ena sega ni tagutuvi rawa. Kemuni na marama ni dau veiqarauni, ni dau veivakatawani, ni dau veivakacegui, ka mo ni dau veitokoni ena veigauna vinaka kei na veigauna ca. E kaya na Turaga, “Io au sa kaya vei kemudou, mo dou duavata sara; ia kevaka dou sa sega ni duavata, dou sa sega ni noqu.”²

Na meca ena vinakata me da dau veicati se veivakalewai vakataki keda. E dau vinakata o koya me da dau kauwaitaka vakabibi na veika eda duidui kina ka dau veiqati me da vinaka cake mai vua tale e dua. O na taleitaka beka mo dau vakaukauwa yago vakaukauwa me dua na auwa ena dua na siga baleta ni dau vinaka vei iko, ia o au e vaka niu vakaitavi ena dua na qito levu na noqu cabeta cake na ikabakaba ka sega ni vodo ena liva. E rawa ni da veitokani tikoga, se sega beka?

Ni da marama, ena so na gauna eda sa rui dau qarauni keda tale vakasivia. Ni da vakatauvatani keda vei ira tale eso, eda na dau sega ni vakacegu rawa se da na yaloca tu ga ena vukudra na tani. A kaya vakaoqo o Sisita Patricia T. Holland ena dua na gauna, “Na ka ga au via tukuna, ni da sega ni rawa ni vakatokai keda tiko me da tamata Vakarisito ka qai ia tikoga na veivakalewai vakaca me baleti ira tale eso—se vei keda vakataki keda.”³ E tomana ena nona kaya e sega sara ni dua na iulubale me rawa ni vakadonui kina na kena vakayali na noda yalololoma kei na noda mataveitacini marama. Eda gadreva me da yalovakacegu ga ka rekitaka na keda duidui vakalou. Sa dodonu me da kila ni da gadreva kece me da veiqaravi ena matanitu, me vakayagataki kina na taledi kei na isolisoli e dui tu vei keda ena noda dui ivakarau ga. Eda sa na qai marautaka kina ni da veitacini marama na noda veimaliwai ka tekivu veiqaravi.

Na ka dina, ni da veigadrevi dina sara vakataki keda. Na marama e itovo tudei ni nona bula me vakaitokani, me tokoni, ka veitokani. E levu na ka e tu me da vulica mai vei ira tale eso, ka da dau vakatara ena vuqa na gauna me vakataotaka noda marautaka na veiwekani ka rawa ni veivakalougatataki cecere ni noda bula eso na ka eda vakavuna ga o keda. Me vaka oqo, o keimami na marama sa qase toka vakalalai keimami gadreva na veika e rawa ni o ni solia na goneyalewa ena Lalai. E rawa ni keimami vulica mai vei kemuni na ivakarau ni loloma kei na veiqaravi Vakarisito.

Au a rogoca ena dua na gauna walega oqo e dua na italanoa vakasakiti me baleta e dua na goneyalewa lailai na yacana o Sarah ka a donumaki tinana na madigi me vukea e dua na marama ena nona tabanalevu ka yacana o Brenda, ka tauvi koya tu e dua na mate ni wakilakila ni yago. E dau taleitaka o Sarah me lako vata kei tinana me vukei Brenda. E dau sova o koya na waiwai e ligai Brenda ka masia na iqaqalo ni ligana kei na ligana me vaka ni dau mositi koya tu vakalevu. Oti sa qai vulica o Sarah me dau dodoka na ligai Brenda ki uluna me vakaukauwataka nona masela. E dau seruta na ului Brenda ka veitalanoa tiko vata kei koya ni qarava tiko o tinana na veika tale eso. A vulica o Sarah na bibi kei na reki ni noda qarava tiko e dua tale na tamata ka yaco me kila ni rawa ni vakayaco ka ena bula ni dua na tamata e dua na gone.

Au taleitaka na ivakaraitaki ena imatai ni wase ni Luke ka vakamacalataki kina na veiwekani vinaka e tiko vei rau o Meri, na tinai Jisu, kei na tavalena o Ilisapeci. A goneyalewa voli o Meri ena gauna e tukuni kina vua na nona ilesilesi vakasakiti me tinana na Luve ni Kalou. Taumada e vaka me dua na icolacola bibi me colata taudua. Na Turaga sara ga e qai vakarautaka e dua me rawa ni wasea kina o Meri na nona icolacola. Mai na itukutuku nei Keverieli, a tukuni kina vei Meri na yacana e dua na marama nuitaki dauloloma me dau gole kina ni gadreva na veitokoni–na tavalena o Ilisapei

E dua na ivau e rau wasea vata na yalewa dauveiqaravi gone oqo kei na tavalena, “sa qase … mai,”⁴ ena nodrau bukete ena cakamana, ka rawa niu vakatayaloyalotaka na tolu na vula erau a tiko vata kina ka rawa kina me rau veitalanoa, veiwasei vakataki rau, ka veitokonitaka vakataki rau na nodrau dui ilesilesi. Erau sa ivakatakarakara talei ni dauveisusu vakamarama ena maliwa ni veitabatamata.

O keda eda sa matua cake toka e rawa ni yaga sara vakalevu ki na nodra bula na itabatamata gone na noda ivakaraitaki. Ni se goneyalewa lailai sara na tinaqu, erau a luluqa ruarua tu ena Lotu na nona itubutubu. Ni se qai yabaki lima, e dau taubale taudua ki valenilotu me tiko ena nona soqoni—na Lalai, Wilivola ni Sigatabu, kei na soqoni ni sakaramede—duidui kece na kena gauna.

Au tarogi tinaqu ena dua na gauna lekaleka oqo se cava e dau vakakina oya e veimacawa ni sega na veitokoni kei na veivakayaloqaqataki mai vale. Na kena isau mai vua: “Era dau lomani au na qasenivuli ena Lalai.” Era kauwaitaki koya na qasenivuli oqori ka vakavulica vua na kosipeli. Era vakavulica vua ni tiko e dua na Tamana mai Lomalagi, ka lomani koya, ka dau vakavuna na nona lako tiko mai e veimacawa na nodra kauwaitaki koya. E kaya vei au na tinaqu, “Oya e dua vei ira na veivakauqeti bibi duadua ena noqu bula taumada.” Au nuitaka ni rawa niu na vakavinavinaka vei ira ena dua na siga! E sega ni dua na iyalayala ni yabaki ni bula ena veiqaravi Vakarisito.

Ena vica na macawa sa oti, au sota kei na dua na peresitedi ni Goneyalewa ena iteki mai California ka tukuna vei au ni se qai kacivi wale ga na tinana yabaki 81 me dauvakasala ena Leba. Sa dua na ka noqu kurabui, au mani qirita na tinana. Ni kerea na bisopi nei Sisita Val Baker me rau sota, a vakanuinui tiko o koya me kacivi me qarava na valenivola se daunitukutuku makawa ni tabanalevu. Ni kerei koya me veiqaravi vakadauvakasala ni Leba, na kena isau mai vua, “O dina?”

A sauma yani ena vakarokoroko na bisopi, “Sisita Baker, kua ni leqa; oqo na kaci mai vua na Turaga.”

E kaya o koya ni sega tale ni qai tukuna rawa e dua na ka me sa, “Donu vinaka.”

Au taleitaka na veivakauqeti e vakila na bisopi ni levu sara na ka eratou na vulica na Leba e va ena tabanalevu mai na nona yalomatua, na veika e kila kei na ivakaraitaki ni bula taucoko ni marama matua oqo. Kilakila mada se o cei ena gole kina o Sisita Baker ni gadreva na veivuke me vakaduri nona draunipepa ni Facebook?

Au vakasamataka na veivuke levu era na rawata na marama ena iSoqosoqo ni Veivukei ena nodra kidavaki na marama gone ka ra se qai lako mai na Goneyalewa. Era dau vakila ena so na gauna na goneyalewa ni sega na nodra tikina ka sega ni dua na ka era tautauvata kina kei ira ena iSoqosoqo ni Veivukei. Ni ra se bera ni yabaki 18, era gadreva na iliuliu ni Goneyalewa kei ira na tina era na vakadinadinataka ena marau na veivakalougatataki cecere ni iSoqosoqo ni Veivukei. Sa dodonu me ra nanamaki ki na nodra laki lewena e dua na isoqosoqo lagilagi. Ni ra tekivu lakova na iSoqosoqo ni Veivukei na goneyalewa, na ka era na gadreva vakalevu duadua e dua na itokani me ra dabe tikiva, dua na liga me toka e tabadra, kei na dua na madigi me ra veivakavulici ka veiqaravi. Me da dolele yani ka veivukei ena gauna ni toso kei na veigauna bibi ni noda bula.

Vinaka vakalevu vei kemuni kece na marama ena Lotu ko ni kosova tiko yani na yabaki ni bula kei na veitovo vakavanua mo ni veivakalougatataki ka veiqaravi kina e vukudra na tani. Era sa veiqaravi tiko na goneyalewa vei ira na Lalai kei ira na itabaqase. O ira na marama sega ni vakawati ena veitabayabaki, e sega ni wiliki rawa na auwa era vakayagataka ena nodra qarava tiko na nodra gagadre o ira era tu wavoliti ira. Eda vakadinadinataka na udolu vakaudolu na goneyalewa era sa solia tiko e 18 na vula ni nodra bula me ra wasea na kosipeli ki vuravura. Na veika kece oqo sa ivakadinadina ni ka e tukuna na qaqa ni sere lomani, “Kauta na itukutuku ni agilosi, na itavi ni marama.”⁵

Kevaka e tu na ilati, e baleta ni o keda ga eda vakavuna. Me da muduka noda raica tikoga na noda duidui ka vakasaqara na veika eda tautauvata kina; sa rawa ni da qai kila na veika cecere e rawa ni da rawata ka rawata na vinaka cecere duadua ena vuravura oqo. A kaya ena dua na gauna o Sisita Marjorie P. Hinckley, “Isa, eda veigadrevi dina vakataki keda. O keimami sa qase cake, keimami gadrevi kemuni na gone. Ka nuitaki, vei kemuni na gone o ni na gadreva eso vei keimami sa qase. E dua na ka dina ena bula vakaveimaliwai ni o ira na marama era na gadreva na marama. Eda gadreva na titobu ni vakacegu kei na veitokani yalodina vakataki keda.”⁶ E dina o Sisita Hinckley; isa, eda veigadrevi dina vakataki keda!

Kemuni na marama, e sega tale ni dua na ilawalawa marama e vuravura e rawa ni ra rawata na veivakalougatataki cecere cake me vakataki keda ni marama Yalododonu Edaidai. Eda lewe ni nona Lotu na Turaga, se cava ga na keda ituvaki, e rawa ni da marautaka kece na veivakalougatataki taucoko ni mana ni matabete ena noda maroroya na veiyalayalati eda sa vakayacora ena papitaiso kei na valetabu. Era tu na parofita bula me ra liutaki keda ka vakavulici keda, ka da marautaka na isolisoli cecere ni Yalo Tabu, ka dau veivakacegui ka veituberi ena noda bula. Eda vakalougatataki ni da cakacaka ena veitauriliga kei ira na turaga buladodonu ni da vaqaqacotaka na vuvale kei na matavuvale. Eda rawa ni rawata na igu kei na mana ni veicakacaka vakalotu ni valetabu kei na vuqa tale.

Me ikuri ni kena marautaki na veivakalougatataki vakasakiti kece oqo, eda dui tu o keda—veitacini marama ena kosipeli i Jisu Karisito. Eda sa vakalougatataki tu ena itovo ni bula totoka ka dauloloma ka rawa kina vei keda me da dauveiqaravi Vakarisito ena loloma kei na dina vei ira era tu wavoliti keda. Ni da raibaleta na duidui ni noda yabaki, noda itovo vakavanua, kei na noda ituvaki ni bula me da veiqaravi kina vakataki keda, eda na vakasinaiti ena loloma savasava i Karisito kei na veivakauqeti ka na vakavuna me da kila na gauna kei koya me da qarava.

Au sureti kemuni ena dua na veisureti a vakayacori ena dua na gauna e liu mai vua e dua na peresitedi raraba ni iSoqosoqo ni Veivukei, ka kaya, “Au sureti kemuni mo ni sega walega ni veilomani vakalevu cake ia mo ni veilomani vakavinaka cake ” ⁷Me da kila na levu ni noda veigadrevi, ka me da veilomani vakavinaka cake, sa noqu masu ena yaca i Jisu Karisito, emeni.