E Hòmber di Saserdosio

Nos tur tin hérue, spesialmente ora bo ta yòn. Mi a nase i a lanta na Princeton, New Jersey, na Merka. E ekiponan di deporte mas famoso serka di kaminda nos tabata biba tabata tin nan sede na e suidat di New York. E tabata e sede di tres ekipo di beisbòl profeshonal den e tempu di pasado ei: Brooklyn Dodgers, e Gigantenan di New York, i Yankees di New York. Philadelphia tabata ainda mas serka di nos kas i tabata e sede di e ekiponan di beisbòl Atletikonan i Phillies. tabata tin hopi hérue potensial di beisbòl pa mi den e ekiponan ei.

Joe DiMaggio, ku tabata hunga pa Yankees di New York, a bira mi hérue di beisbòl. Ora mi rumannan i mi amigunan tabata hunga beisbòl riba e tereno di skol banda di nos kas, mi tabata swing e bate manera mi tabata pensa ku Joe DiMaggio lo hasié. Esei tabata promé ku e époka di televishon (esaki ta historia bieu), kermen ku mi tabatin solamente potrèt [kòrtá] di korant pa usa pa kopia su swing.

Ora m’a krese, mi tata a hiba mi e stadion di Yankees. Esei tabata e úniko biaha ku mi a mira Joe DiMaggio hunga. Manera mi ta einan ainda, den mi mente mi por mir’é swing e bate i mira e bala blanku bula stret te den e públiko den center field.

Awor, mi abilidatnan di beisbòl nunka no a yega serka di esun di hérue di mi tabata infansia. Pero e poko biahanan ku mi a dal e bala bon, m’a kopia e nivel di e swing di mas poderoso mas mihó ku mi ta por.

Ora nos ta skohe hérue, nos ta kuminsá kopia, konsientemente o inkonsientemente, loke nos ta atmirá mas di nan

Felismente, e mayornan di mi kasá a pone héruenan grandi den mi kaminda komo mucha. Mi tata a hiba mi na e stadion di Yankee, solamente un biaha pa mi opservá mi hérue di beisbòl hunga, pero tur djadumingu e tabata laga mi opservá un hòmber di Saserdosio ku a bira un hérue. E hérue ei a moldia mi bida. Mi tata tabata e presidente di Rama di e rama chikitu ku tabata reuní na nos kas. Por sierto, si bo baha di e promé piso riba djadumingu bo ta den Eskuela Dominikal. Nunka nos rama no tabatin mas ku trinta hende asistiendo.

Tabatin un hóben ku tabata hiba su mama [ku outo] na nos kas di reunion, pero nunka e no ta drenta den e kas. E no tabata un miembro. Tabata mi tata ku a logra, dor di bai serka dje kaminda e l a parker e outo, pa invit’é drenta den nos kas. el a boutisá i a bira mi promé i úniko lider di Saserdosio Aaróniko. El a bira mi hérue di saserdosio. Te ainda mi ta kòrda e estatua di palu ku el a duna mi komo rekompensa despues ku nos a komplementá un proyekto di kòrta palu [pa tira den chimenea] pa un viuda. Mi a trata di bira manera e, ora mi ta alabansa hustifiká na un siervo di Dios.

Mi a skohe un otro hérue den e rama chikitu di Iglesia ei. e tabata ta un marinero Merikano ku a bin nos reunionnan bistí na su unifòrm di “green marine”. Tabata den tempu di guera, esei so a hasié mi hérue. El a wòrdu mandá na e Universidat di Princeton dor di e marineronan pa kontinuá su estudio. Pero hopi mas ku atmirashon pa su unifòrm di militar, mi a wak e hunga den e stadion di Palmer komo kapitan di e ekipo di futbòl [amerikano] di Universidat di Princeton. Mi a mir’é hunga den e ekipo di basket di e universidat i tambe a wak e hunga komo e kècher estrea den nan ekipo di beisbòl.

Pero mas ainda, el a bin nos kas durante e siman pa mustra mi kon pa tira un bala di basket ku tantu mi man robes komo mi man drechi. El a bisa mi ku mi mester di e habilidat ei, pasó riba un dia lo mi hunga basket den bon ekiponan. Mi no a realisá e ora ei, pero pa hopi aña e tabata, pa mi, un modelo di un hòmber berdadero di saserdosio.

Kada un di bosonan lo bira un modelo di un hòmber di saserdosio, sea ku bo ke òf no. Bo a bira un bela ku ta duna lus, ora bo a aseptá e saserdosio. e Señor a pone bo riba e kandelar pa iluminá e kaminda di tur ku ta rondoná bo. Esei ta spesialmente bèrdat pa esnan ku ta den bo Quorum di saserdosio. Bo por ta un gran modelo, un promedio, òf un mal modelo. Bo por pensa esaki no ta importá mi, pero Señor si e ta importá. El a bis’é di e manera aki:

“Boso ta e lus di mundu. Un suidat ku ta riba un seru no por wòrdu skondé.

“Tampoko hendenan ta sende un bela i skondé bou di kama, sino riba un kandelar; i e ta duna lus na tur ku ta den kas.

“Laga boso lus bria pa e hendenan, pa nan por mira boso bon obra, i glorifiká bosoTata ku ta den Shelu.”¹

Mi a wòrdu bendishoná ku ehèmpelnan di gran poseedornan di saserdosio den Quorumnan kaminda mi tabata fortuná di sirbi. Boso por hasi loke nan a hasi pa mi dor di ta un ehèmpel pa otronan por sigui.

Mi a opservá tres karakterístika komun di e poseedornan di saserdosio kendenan ta mi hérue. Un ta e patronchi do orashon, di dos e kustumber di sirbi i e di tres ta desishon firme di ta honesto.

Nos tur ta resa, pero e poseedor di saserdosio ku bo ke ta, ta resa frekuentemente i ku berdadero intenshon. Anochi lo bo baha na rudia i gradisí Dios pa e bendishonnan di e dia. Lo bo gradisié pa bo mayornan, bo maestronan, i pa e gran ehèmpelnan pa sigui. Lo bo deskribí den bo orashon ken a bendishoná bo bida i kon, durante e dia. Esei lo tuma mas di un par di minüt i mas ku un pensamentu chikitu. e lo sorpresá bo i kambia bo.

Ora bo resa pa pordon, lo bai ta pordoná otronan. Si bo gradisí Dios pa Su bondat, lo bo pensa riba otronan, ku nan nòmber, kende mester bo bondat. Atrobe, e eksperensha lo sorpresá bo tur dia, i ku tempu e lo kambia bo.

Un forma ku lo bo kambia dor di e orashon ferviente ta, mi ta primintí bo ku bo lo sinti ku di bèrdat bo ta un yu di Dios. Ora bo sa ku bo ta un yu di Dios, lo bo sa tambe ku E ta spera hopi di bo. Pasó bo ta Su yu, E ta spera ku lo bo ta sigui Su enseñansanan i e enseñansanan di su Yu stimá, JesuCristu. E ta spera ku bo ta generoso i amabel ku demas [hendenan]. El lo ta desapuntá si bo ta orguyoso i egoséntriko. E lo bendishoná bo pa yega na e deseo pa pone e interes di otronan riba esun di bo.

Algun di bosonan ya kaba ta modelo di servisio di saserdosio desinteresá. den tèmpel rònt mundu, poseedornan di saserdosio ta yega promé ku solo sali. I tin ta sirbi hopi despues ku solo baha. No tin rekonosementu òf aklamashon den e mundu aki pa e sakrifisio di tempu i esfuerso. Mi a yega di bai ku hóbennan ora nan tabata sirbi esnan den e mundu spiritual, ku no ta apto pa reklamá bendishonnan di tèmpel pa nan mes.

Ya komo mi ta mira felisidat na lugá di kansansio den e karanan di esnan ku ta sirbi tempran i lat, mi sa ku tin gran rekompensá den e bida aki pa e tipo di servisio di saserdosio desinteresá, pero e ta solamente un muestra di e goso ku nan lo kompartí ku esnan ku nan a sirbi den e mundu di spiritu.

Mi a wak e mesun felisidat den e karanan di esnan ku ta papia ku otro riba e bendishonnan, ku lo bin dor di pertenesé na e Reino di Dios. Mi sa di un presidente di rama, ku kasi tur dia ta trese hende pa e mishoneronan pa nan siña. Algun luna pasá, e no tabata ni un miembro di Iglesia. Awor tin misioneronan ku ta siña i un rama kresiendo den kantidat i forsa dor di dje. Pero mas ku esaki, e ta un lus pa otronan ku lo habri nan boka i asina aselerá e rekohementu di e yunan di Tata Selestial.

Ora bo ta resa i sirbi otronan, no konosementu ku bo ta un yu di Dios i bo sintimentunan p’E lo oumentá, Lo bo bira mas konsiente ku E ta tristu si bo ta deshonesto di kualke manera. Lo bo ta mas determiná pa warda bo palabra na Dios i na otronan. Lo bo ta mas konsiente di no tuma algu ku no ta di bo. Lobo ta mas honesto ku bo dunadó di trabou. Lo bo ta mas determiná pa ta na tempu i kompletá kada tarea ku Señor duná bo, i ku bo a aseptá di hasi.

Na lugá di puntra bo mes si bo maestro orientador lo bin, e yunan di e famianan ku bo a wòrdu yamá pa siña lo ta antisipando ansiosamente riba bo bishita. Mi yunan a risibí e bendishon ei. Miéntras nan tabata kresiendo, nan tabata tin héruenan di saserdosio pa yuda nan stipulá nan propio direkshon di sirbi e Señor. E ehèmpel bendishoná ta pasando pa e di tres generashon.

Mi mensahe tambe ta di gradisimentu.

Mi ta gradisí bosonan pa boso orashonnan. Mi ta gradisí pa bai na rudia rekonosiendo e hecho ku boso no tin tur e kontestanan. Boso ta resa na Dios den Shelu pa ekspresá boso gratitut i pa invoká su bendishonnan riba boso bida i boso famianan. Mi ta gradisí boso pa boso servisio na otro i pa e tempu ku boso no a sinti e nesesidat pa rekonosementu pa boso servisio.

Nos a aseptá e atvertensia di Señor ku si nos buska krédito den e mundu aki pa nos servisio, nos por pèrdè bendishonnan mas grandi. Lo bo kòrda e palabranan aki:

“Mira pa boso no hasi bo limosnanan dilanti e hendenan, pa wòrdu mirá pa nan: di otro manera lo boso lo no tin rekompensa di e Tata ku ta na Shelu.

“P’esei ora boso duna boso limosnanan, no zona un tròmpèt dilanti bosonan, manera e hipokritnan ta hasi den e snoa i riba kaya, pa nan por tin gloria di hòmber. Di bèrdat mi ta bisa boso, nan tin nan rekompensa.

“Pero ora boso duna limosna, no laga bo man robes sa kiko e man drechi a hasi:

“Ku boso limosna lo ta den sekreto: i boso Tata ku ta mira den sekreto E mes lo rekompensá boso públikamente.”²

Esnan ku tabata mi modelonan di gran poseedornan di saserdosio no fásilmente ta rekonosé ku nan tin kalidatnan heroiko. Enbèrdat, nan ta parse ku nan tin difikultat pa wak e kosnan ei ku ami asina tantu ta atmirá den nan. Mi a menshoná [ku] mi tata tabata un presidente di un rama chikitu di e Iglesia na New Jersey. Despues e tabata miembro di e Hunta General di Eskuela Dominikal di Iglesia. Te ainda mi tin kuidou di papia ku modestia di su servisio di saserdosio, pasó e tabata modesto.

E meskos ta bèrdat pa e marinero ku tabata mi hérue di infansia. Nunka e no a papia ku mi di su servisio di saserdosio òf di su logronan. solamente e tabata duna servisio. Mi a siña di su fidelidat pa demas [hendenan]. Si e lo a mira e karakterístikanan den su mes ku mi tabata atmirá, esei mi no por bisa.

Asina ta ku mi konseho na boso, esun ku ke bendishoná otro ku e saserdosio tin di haber ku bo bida, ku ta privá pa tur ku eksepshon di Dios.

Resa na Dje. Gradisié pa tur kos ku ta bon den boso bida. Puntr’é pa sa kua personanan El a pone den boso kaminda pa boso sirbi. Roga pa E yuda boso duna e servisio ei. Resa pa boso por pordoná p’asina boso por wòrdu pordoná. Despues sirbi nan, stima nan, i pordoná nan.

Riba tur kos, kòrda ku di tur servisio ku boso duna, niun no ta mas grandi ku yuda hende kalifiká pa bida eterno. Dios a duna e direkshon asina abrumador ei na nos di kon usa nos saserdosio. e ta e ehèmpel perfekto di esaki. Esaki ta e ehèmpel ku nos ta mira den partinan chikitu den e mihó di Su siervonan mortal:

“I e Señor a papia ku Moises, bisando: E shelunan, ta hopi, i nan no por wòrdu konta dor di hòmber; pero nan ta kontá pa Ami, pasó nan ta di Mi.

“I manera un mundu ta pasa bai, i e shelunan di dje meskos un otro lo bin; i no tin fina na mi obra, ni na mi palabra.

“Paso ata ki, esaki ta mi obra i mi gloria—trese inmortalidat i bida eterno pa hòmber.”³

Nos mester yuda den e obra ei. Kada unu di nos por hasi e diferensha. Nos a wòrdu prepará pa nos tempu i lugá den e delaster dianan di Su obra sagrado. Kada unu di nos a wòrdu bendishoná ku ehèmpelnan di esnan ku a hasi e obra ei e propósito primordial di nan tempu na mundu.

Mi ta resa ku nos por yuda otro logra e oportunidat ei.

Dios e Tata ta biba i lo kontestá boso orashonnan pa e ayudo ku boso mester pa sirbié bon. JesuCristu ta e Señor resusitá. Esaki ta Su Iglesia. E saserdosio ku boso ta poseé ta e poder pa aktua den su nòmber den Su obra pa sirbi e yunan di Dios. si boso duna henter boso kurason na e obra aki, E lo magnifiká boso. Esei mi ta primintí den nòmber di JesuCristu, amèn.