Nahibal-an Ko Ining Mga Butang sa akon Kaugalingon

Ang pagkahibalo sa aton mga kaugalingon nga ang ginpanimbalik nga ebanghelyo ni JesuCristo isa ka pinakadako kag pinakamalipayon nga mga eksperyensya sa kabuhi. Basi ayhan magsugod kitá paagi sa pagsalig sa mga pagpamatuod sang ibansa pagsiling, katulad sa ginsiling sang mga lamharon nga mga mangangaway, ”Walâ kami nagaduhaduha nga nahibal-an ini sang amon mga iloy.”³Ini maayo nga lugar sa pag-umpisa, apang dapat kita magpasad halin dira. Agud mangin mabakod sa pagtuman sang ebanghelyo, walâ na sang mas importante pa sang sa pag-angkon kag pagpabakod sang aton pagpamatuod. Dapat nga sarang kitá magdeklarar, katulad ni Alma, ”Nahibal-an ko ining mga butang sa akon kaugalingon.”⁴

”Kag paano sa inyo hunahuna nga nahibal-an ko ang ila kapat-uran?” Si Alma nagpadayon. ”Yari karon ginasiling ko sa inyo nga ang mga ini ginpahibalo sa akon sang Balaan nga Espiritu sang Diyos. Yari karon, nagpuasa ako kag nagpangamuyo sa madamo nga mga inadlaw agud mahibal-an ko ining mga butang sa akon kaugalingon. Kag karon nahibal-an ko sa akon kaugalingon nga ang mga ini matuod.”⁵

Katulad ni Alma, si Nephi nakahibalo man sang kamatuoran sa iya kaugalingon. Matapos magpamati sa iya amay nga nagsugilanon sang iya madamo nga espirituhanon nga mga inagihan, si Nephi naluyag maghibalo sang nahibal-an sang iya amay. Ini labaw pa sa simple lang nga pagpangusisayadto isa ka butang nga iya tudok nga ginhandum. Bisan pa nga siya ”tunay pa ka lamharon,” siya may ”daku nga mga handum nga makahangop sang mga katalanhagaan sang Dios.”⁶ Siya naghandum nga ”makakità, kag makabatî, kag makahibalo sining mga butang, paagi sa gahum sang Balaan nga Espiritu.”⁷

Samtang si Nephi ”nagapungko kag nagabinagbinag sa [iya] tagipusuon,” siya nadala ”sang Espiritu ... sa isa ka tuman kataas nga bukid,” nga sa diin siya ginpamangkot, ”Ano ang ginahandum mo?” Ang iya sabat simple: ”Nagahandum ako nga makità ang mga butang nga nakit-an sang akon amay.”⁸ Bangud sa iya tudok nga pagpati kag sang iya mahimulaton nga mga kabudlay, si Nephi ginbugayan sang isa ka makatilingala nga eksperyensya. Siya nakabaton sang panaksi sa palaabuton nga pagkatawo, kabuhi, kag Paglansang sa Krus sang Manluluwas nga si JesuCristo; nakità niya ang pag-abot sang Libro Ni Mormon kag ang Pagpanumbalik sang ebanghelyo sa ulihing mga adlawang tanan bunga sang iya tampad nga handum nga makahibalo para sa iya kaugalingon.⁹

Ining personal nga mga eksperyensya nga upód ang Ginuo naghanda kay Nephi sa mga kalisud kag mga panghangkat nga iya madali nga gin-atubang. Sila nagpasarang sa iya nga magtindog sing malig-on sang ang iban nga mga miyembro sang iya panimalay naghiwaos. Nahimo niya ini bangud siyanakatuon para sa iya kaugalingon kag siyanakahangop para sa iya kaugalingon. Siya ginbugayan sang iya kaugalingon nga pagpamatuod.

Katulad ni Nephi, ang Propeta nga si Joseph Smith ”tunay pa ka lamharon” man sang ang iya ”hunahuna gintawag sa madalom nga pagbinagbinag” nahanungod sa espirituhanon nga mga kamatuoran. Para kay Joseph, yadto isa ka panahon sang ”daku nga di-pagkahamtang,” sa pagpalibot sang mga nagasupak kag nagaengkwentrohanay kag marikot nga mga mensahe nahanungod sa relihiyon. Gusto niya mahibal-an kon diin nga simbahan ang matuod.¹⁰Nainspirado sang sining mga pulong sa Bibliya: ”Kon may yara sa inyo nga kulang sang kaalam, magpangayo siya sa Diyos,”¹¹ siya naghimo sa iya kaugalingon nga makità ang sabat. Sang isa ka matahom nga aga sang primabera sang 1820, siya nagsulod sa mga kakahuyan kag nagluhod para magpangamuyo. Bangud sa iya pagtuo kag bangud ang Diyos may pinasahi nga buluhaton para iya, si Joseph nagbaton sang mahimayaon nga palanan-awon sang Diyos nga Amay kag ang Iya Anak, nga si JesuCristo, kag nahangpan niya kon ano ang iya himuon.

Makità balá ninyo sa eksperyensya ni Joseph ang pagsulundan nga inyo idapat sa pag-angkon ukon sa pagpabakod sang inyo kaugalingon nga pagpamatuod? Si Joseph nagtugot nga ang balaan nga mga kasulatan magtudok sa iya tagipusuon. Hugot niya ini nga ginbinagbinag kag gindapat sila sa iya kaugalingon nga kahimtangan. Pagkatapos ginhimo niya ang iya natun-an. Ang bunga amó ang mahimayaon nga Unang Palanan-awonkag ang tanan nga nag-abot matapos sina. Ining Simbahan sa kamatuoran gintukod sa prinsipyo nga ang sin-o manlakip ang isa ka 14-ka-anyos nga bukidnon nga batang lalakimaka ”pangayo sa Diyos” kag magbaton sang sabat sa iya mga pangamuyo.

Masami kitá makabati sa mga miyembro sang Simbahan nga nagasiling nga ang ila pagpamatuod ila pinakabilidhon nga ginapanag-iyahan. Ini isa ka sagrado nga dulot halin sa Diyos nga nagaabot sa aton sa gahum sang Balaan nga Espiritu. Ini ang malinong, pat-od nga pagsalig nga aton maangkon samtang kitá nagatuon, nagapangamuyo, kag nagatuman sang ebanghelyo. Ini ang isa ka balatyagon halin sa Balaan nga Espiritu nga nagapamatuod sa aton mga kalag nga ang aton nahibal-an kag ginahimo husto.

Ang iban nga mga tawo nagahambal sa isa ka pagpamatuod nga ang ini daw isa ka swit sang sugaayhan ini nagasiga ukon patay; ayhan ikaw may pagpamatuod ukon walâ. Sa kamatuoran, ang pagpamatuod daw katulad sang kahoy nga nagaagi sa madamo nga halintang sang pagtubò kag paglambo. Ang iban nga pinakamataas nga mga kahoy sa kalibutan makità sa Redwood National Park sa katundan sang Estados Unidos. Kon kamo magtindog sa idalom sining dalagku nga mga kahoy, makatilingala nga ang kada isa nagtubò halin sa isa ka gamay nga liso. Gani amó man ang aton mga pagpamatuod. Bisan pa nga sila nagahalin sa isa ka espirituhanon nga eksperyensya, sila nagatubò sa sulod sang panahon paagi sa padayon nga pagsustener kag nagadinasondason nga espirituhanon nga mga eksperyensya.

Indi makatilingala, subong sini, nga, sang ang propeta nga si Alma nagpaathag kon paano kitá makapalambò sang isa ka pagpamatuod, siya naghambal sang kahoy nga nagatubò halin sa binhi. ”Kon hatagan ninyo sang duog,” nagsiling siya, ”nga ang isa ka binhi mahimo nga matanom sa inyo tagipusuon, yari karon, kon ini matuod nga binhi, ukon isa ka maayo nga binhi, kon indi ninyo ini pagsikwayon tungod sang inyo pagkawalay pagtuo, ... magasugod ini nga magahabok sa sulod sang inyo mga dughan; kag kon inyo mabatyagan ining nagahabok nga mga hulag, magasugod kamo sa pagsiling sa sulod sang inyo mga kaugalingonNagapatimaan nga isa ini ka maayo nga binhi, ukon nga ang pulong maayo, kay ini nagasugod sa pagpadako sang akon kalag; huo, ini nagasugod sa pagpasanag sang akon paghangop, huo, ini nagasugod nga mangin manamit sa akon.”¹²

Ang pagpamatuod masunson nga nagaumpisa katulad sini: may sagrado, nagapasanag, nagapat-od nga mga balatyagon nga nagapakilala sa aton nga ang pulong sang Diyos matuod. Ugaling, bisan pa sa katalanhagaan sining mga balatyagon subong, sila nagasugod pa lamang. Ang inyo buluhaton nga magpatubò sang inyo pagpamatuod indi pa nahimolabi pa sang sa hilimuon sang pagpatubò sang redwood nga kahoy nga natapos na kon ang una nga salingsing maggwa sa duta. Kon aton isikway ukon patumbayaan ang temprano nga mga paandam, kon indi naton sila saguron paagi sa pagtuon sa balaan nga mga kasulatan kag magpangamuyo kag mag-angkon sang madamo pa nga mga eksperyensya upód ang Espiritu, ang aton mga balatyagon kag ang aton mga pagpamatuod mabuhinan.

Sa ginsiling ni Alma: ”Apang kon inyo patumbayaan ang kahoy, kag indi magpanghunahuna sa pagsagod sini, yari karon indi ini magpanggamot; kag kon ang kainit sang adlaw magaabot kag initan ini, sanglit walâ ini sing gamot ini malayong, kag inyo ini gabuton kag ihaboy palayo.”¹³

Sa kalabanan nga mga hitabo, ang aton mga pagpamatuod magtubò katulad sang pagtubò sang mga kahoy: amat-amat, halos indi matalupangdan, bilang resulta sang aton padayon nga pagsagod kag maukod nga mga kabudlay. ”Apang kon inyo saguron ang pulong,” si Alma nagpangako, ”huo, saguron ang kahoy samtang ini nagasugod sa pagtubò, paagi sa inyo pagtuo, upód ang dako nga kaukod, kag upód ang pagpaumod, nga nagaabot sa bunga sini, ini magapanggamot; kag yari karon, mangin isa ini ka kahoy nga nagatubò padulong sa kabuhi nga dayon.”¹⁴

Ang akon pagpamatuod nag-umpisa sang ako nagtuon kag nagbinagbinag sang mga panudlo nga makità sa Libro ni Mormon. Samtang ako nagluhod sa pagpangayo sa Diyos sa mapainaumuron nga pagpangamuyo, ang Balaan nga Espiritu nagpamatuod sa akon kalag nga ang akon ginabasa matuod. Ining temprano nga pagpamatuod amó ang nangin nagpadasig sa akon padulong sa pagpamatuod sang madamo pa nga mga kamatuoran sang ebanghelyo, kay man, sa gintudlo ni Presidente Monson: ”Kon nahibal-an naton nga ang Libro ni Mormon matuod, nagasunod nga si Joseph Smith matuod nga propeta kag nakità niya ang Diyos ang Walay Katapusan nga Amay kag ang Iya Anak nga si JesuCristo. Nagasunod man nga ang ebanghelyo ginpanumbalik sa sining ulihing mga adlaw paagi kay Joseph Smithlakip ang pareho nga pagpanumbalik sang Aaronic kag Milchizedek Priesthoods.”¹⁵ Halin sadtong adlaw, may madamo ako nga mga eksperyensya sa Balaan nga Espiritu nga nagpamatuod liwat sa akon nga ang ginpanumbalik nga ebanghelyo ni JesuCristo matuod. Kaupod ni Alma, makasiling ako sing pat-od nga nahibal-an ko ining mga butang sa akon kaugalingon.

Lamharon ko nga mga abyan, karon amó ang panahon kag karon nga adlaw amó ang adlaw nga pat-uron liwat ang pagpamatuod sa aton mga kaugalingon nga ang ebanghelyo matuod. Ang kada isa sa aton may importante nga buluhaton. Agud matuman inang buluhaton, dapat kitá nga may pagtuo ni Alma, ni Nephi, kag ni Joseph Smith para nga makaangkon kag makapadugang sang aton kaugalingon nga pagpamatuod.

Katulad sang lamharon nga diyakono nga akon una nga ginsiling, ako nagahangad kay Presidente Monson sa iya pagpamatuod. Ini katulad sang matayog nga redwood, bisan pa ang pagpamatuod ni Presidente Monson nagkinahanglan nga magtubò kag magdaku sa sulod sang panahon. Makahibalo kitá sa aton mga kaugalingon, kasubong man sa pagkahibalo ni Presidente Monson, nga si JesuCristo amó ang aton Manluluwas kag Manunubos sang kalibutan, nga si Joseph Smith propeta sang Pagpanumbalik, lakip ang pagpanumbalik sang priesthood sang Diyos. Kitá nagakapot sinang balaan nga priesthood. Kabay pa nga matun-an naton ining mga butang kag mahibal-an naton sila sa aton mga kaugalingon amó ang akon mapainubuson nga pangamuyo sa balaan nga ngalan ni JesuCristo, amen.