Ana Ɔda Ho Yɛ Wo Nwanwa a?

Me yer na emi, yɛdze enyikã na yɛdze tsetsee hɛn mbofra beenum wɔ kurow a ɔbɛn Paris, kuropɔn nwanwa no. Dɛm mfe no mu, yɛpɛɛ dɛ yɛma hɔn akwannya a ɔsom bo dɛ wobohu ndzɛmba a ɔyɛ nwanwa wɔ wiadze yi mu. Ɔhyewber biara no, hɛn ebusua tu akwan tsentsen dze kɔ nserahwɛ wɔ Europe ehonyi horow a wɔayɛ adansew, mbea a ɔayɛ atsenkã, nye ɔdomakoma abɔdze nwanwa. Ewiei no, yedzii mfe 22 wɔ Paris nkwaado no, nna yɛreyɛ krado dɛ yebotu. Meda ho kae da no a, me mba baa me nkyɛn na wɔsee dɛ. “Dada, iyi yɛ enyimguase dodow! Yɛatsena ha wɔ hɛn nkwa nda nyina mu, na yɛnnkɔhwɛɛ Eiffel Abantsentsen no da!”

Awanwadze pii wɔ wiadze yi mu. Naaso, mber pii sɛ ɔda hɛn enyim aber biara a, yemmbu no hwee. Yɛhwɛ, naaso yennhu no yie, yɛtse, naaso yɛnntsie no yie.

N’asaase do som dwuma ber mu no, Jesus see N’esuafo no dɛ:

“Nhyira akã enyiwa a ohu dza hom hu yi:

“Na mese hom dɛ, Nkɔnhyɛfo nye ahemfo pii pɛɛ dɛ wohu dza hom hu yi, na woennhu, na dɛ wɔtse dza hom tse yi, na wɔanntse”.¹

Mber pii na m’adwendween mbrɛ ɔbɛtse dɛ nkyɛ etsease Agyenkwa N’aber do no. Ibotum esusu dɛ etsena n’anan ase? Eretse dɛ Oefua wo? erohwɛ No enyikan ber a Ɔrosom binom a? Naaso bebree a wohyiaa No no enntum annhyɛ no nsew—dɛ “wohu”—dɛ Nyankopɔn Ne Ba ankasa tse hɔn mu.

Hɛn so yenya akwanya dze tse ase wɔ mber soronko mu. Tsetse Nkɔhyɛnfo no hun Nsan-ananmu edwuma no dɛ ɔyɛ “edwuma a ɔyɛ nwanwa … , nyew edwuma a ɔyɛ nwanwa na ahobow.”² Mberano biara nnyi hɔ a wɔafrɛ asɛmpasomafo pii dɛm, wɔdze asɛmpa no akɔ amanaman pii do, na woesisi temple pii wɔ wiadze mu.

Hɛn dɛ yɛyɛ Latter-day Saintfo no, anwanwasɛm so sisi wɔ hɛn ankorankor abrabɔ mu. Hɛn ankasa ankorankor no, nyiano a yenya no wɔ mpaabɔ ho, na nhyira awɔse mu a Nyankopɔn dze sosɔ hɛn do dabiara no.

Mbrɛ asɛmpã no besi ayɛ wo nwanwa no yɛ gyedzi ho asɛnkyerɛdze. Ɔno nye dɛ yebohu Nyankopɔn Ne nsa wɔ hɛn abrabɔ mu nye ndzɛmba a ɔbɔ hɛnho aprɔw nyina mu. Hɛn ahobowdze so ma hɛn sunsum mu ahoɔdzen. Ɔma hɛn ahom ma yɛdze tsim wɔ hɛn gyedzi mu, dze yɛ nkwagye ho edwuma.

Naaso wɔma yɛnhwɛ yie. Tum a ɔma adze yɛ hɛn nwanwa no yɛ mberɛw. Mber tsentsen mu no, ndzɛmba bi tse dɛ yɛridzi mbrasɛm do biarabiara no, akwadwer mu, anaa ɔbrɛ mpo botum akã hɛn ma yɛayew atsenkã a ɔwɔ asɛmpa no mu asɛnkyerɛdze n’awanwadze mpo no.

Mormon Nwoma no kyerɛkyerɛ mber bi a, ɔtse dɛ hɛn ber yi a, osii ansaana Messiah no rebɛba Amerika no. Awerɛfir mu ara nsɛnkyerɛdze a ɔfa N’awoe ho no pueei wɔ wi mu. Ihu kɛse bɔɔ nyimpa no ma wɔberɛɛ hɔn ho adze, na hɔn mu dodowara na wɔsakyeree. Naaso, wɔ mfe anan ekyir no, “dɔm no hyɛɛ ase dɛ hɔn werɛ rifir dɛm nsɛnkyerɛdze nye anwanwadze no a wohunii no, na nkakrankakra sor asɛnkyerɛdze hyɛɛ ase dɛ origyaa hɔn ahobow yɛ, … na wɔhyɛɛ ase dɛ wɔregye kyim wɔ dza wɔtsee na wohunii nyinara ho.”³

Mo nuambanyin na nkyerɛbaa ana, asɛmpa no da ho yɛ hom nwanwa a? Hom daho hu, hom tse, hom nya atsenkã, na nwanwa a? Anaa hom sunsum mu nkã-tsedze no apa ada? Mbrɛ w’ankorankor gyinabew tse biara no, moto nsa frɛ wo dɛ ibɛyɛ ndzɛmba ebiasa.

Odzi kan, mma mmfona dɛ ebɔkɔ do ahwehwɛ asɛmpa no mu nokwar bio na bio. Ɔkyerɛwfo Marcel Proust kãa dɛ, “Akwantu mapã a wɔdze hwehwɛ adze fofor nnyɛ dɛ ebɔhwehwɛ mbea fofor ara, na mbom ebenya enyiwa fofor”⁴ Ana ekae ber a odzi kan a ekenkan asɛmpa mu nkyekyɛmu bi ma etsee dɛ ɔyɛ dɛ mbrɛ Ewuradze nye wankasa rekasa a? Ana ebotum akae aber a odzi kan a Sunsum Krɔnkrɔn Ne nhyɛdo dɛɛdɛw baa wo do, mpo ansaana erubohu dɛ ɔyɛ Sunsum Krɔnkrɔn no a ? Ana dɛm mber soronko yi nnyɛ krɔnkrɔn ?

Ɔwɔ dɛ sunsum mu nyimdzee ho kɔm na nsukɔm dze hɛn daa nyina. Dɛm ankorankor ndzeyɛɛ yi ne fapem yɛ adzesua, ndwendwenho, na mpaabɔ. Ɔtɔ fabi a hɛn adwen tum yɛ hɛn dɛ, “Minnhia dɛ mubosũa kyerɛwsɛm ndɛ; M’akenkan ne nyina dada” anaa “Minnhia dɛ mokɔ asɔr ndɛ; biribi fofor biara nnyi hɔ.

Naaso asɛmpa no yɛ nyimdzee nsunyiwa bi a ɔnnwew da. Kwesida biara adzesuadze na atsenkã fofor bi wɔ hɔ yebotum enya, wɔ nhyiamu biara, na kyerɛwsɛm mu nkyekyɛmu biara mu. Gyedzi mu no yesuo bɔhyɛ dɛ “[yɛ]nhwehwɛ, … [ye]bohu.”⁵

Otsĩa ebien, fa wo gyedzi si asɛmpa mu anokwar a da hɔ turodoo no do. Dza ɔyɛ hɛn nwanwa wɔdɛ otsim hɛn gyedzi nhyehyɛɛ fapem do, hɛn ahyɛmudzi na ayɛdze a ho tsew ho na hɛn som ndzeyɛɛ a ɔnnyɛ kyinkyinɛnn

Akyerɛbaa asɛmpasomafo bi kaã asɛm faa mbanyin baasa bi a ohyiaa hɔn wɔ mansin ehyiadzi ber wɔ Ebibiman mu. Wofi ekuraase bi a ɔatsew noho wɔ ekyirekyir bea a wɔnkyekyeer Asɔr no bi wɔ, naaso wɔwɔ asɔrmba anokwafo 15 na mpɛnsam-pɛnsamufo bɛyɛ 20. Mbanyin yinom anantsew etwa akwansin bɔbor 300 afa anamɔnkwan a nsutɔree ber no atɛkyɛ ataataa mu, ama woeetum aaba ehyiadzi no na wɔdze hɔn kuwmba no ebupɛn-du no aba. Wɔfaa adwen dɛ wɔbɛtsena hɔ dapɛn ne nyina dze enya kwan edzi sakramɛnt Kwesida a ɔtoa do no, na nkyii enyidado dɛ hɔn edzi firii no, wɔasoa ndaka a Mormon Nwoma ahyɛ no mã wɔ hɔn etsifi dze akɛma hɔn nkorɔfo wɔ ekuraase hɔ no.

Asɛmpasomafo yi gyee dase faa nwanwa atsenkã a enuanom yinom daa no edzi, na hɔn akoma nyina mu afɔrbɔ a wɔbɔe dze nyaa ndzɛmba a ɔnoara daa ɔfa no kwa no, mbrɛ osi kitsaa no.¬

Ɔdwen ho dɛ: “Sɛ mobɔsɔr Kwesida dakor anapa bi wɔ Arizona, na mubohu no dɛ me kaar nnyɛ edwuma, ana mebɛnantsew akɔ Asɔr wɔ bea a ɔnnwar koraa fi me fie a? Anaa mebɛtsena fie a ɔnam dɛ kwan no war dodow osiandɛ nsu rotɔ?”⁶ Iyinom yɛ nsɛmbisa oye ma hɛn nyina dɛ yesusu ho.

Odzi ewiei, Moto nsa frɛ hom dɛ hom nhwehwɛ Sumsum Krɔnkrɔn N’ayɛnkoyɛ na Ɔnsom hom bo. Asɛmpa mu awanwadze dodow no yenntum mmfa honam mu atsenkã nnya. Ɔyɛ ndzɛmba a “enyiwa nnhunii, na aso nntsee, … ndzɛmba a Nyankopɔn esiesie ama hɔn a wɔdɔ no.”⁷

Sɛ Sunsum no kã hɛnho a, hɛn sunsum mu atsenkã yɛ ndam na hɛn adwen mu yɛ ndam na ɔmma hɛn werɛ mmfir awanwadze na nsɛnkyerɛdze a yeehu no. Dɛm botum ayɛ siantsir a, wohun dɛ Jesus rebegya hɔn hɔ akɔ no, Ne Nephifo esuafo no dze mpaabɔ dzendzen bisaa “dza wohia, na wɔserɛɛ dɛ wɔmfa Sunsum Krɔnkrɔn mma hɔn.”⁸

Ɔwɔ mu dɛ wɔdze hɔnankasa enyiwa hun Agyenkwa na wɔdze hɔn nsa kekãa N’epirakur no mu dze, naaso wonyim dɛ hɔn dasegye no bɔwodow sɛ wɔannkɔ do ennya tum a ɔwɔ Nyankopɔn No Sunsum no fofor a, hɔn dasee ano bɛbrɛ adze. Mo nuanom mbanyin na mbaa, mma hom nnyɛ biribiara a ɔbɛma hom ayew dɛm akyɛdze a ɔyɛ nwanwa yi----Sunsum Krɔnkrɔn N’ayɛnkofa. Fa mpaabɔ dzendzen na ahotsew abrabɔ hwehwɛ.

Megye me dasee dɛ dwuma a yeridzi yi yɛ “anwanwa dwuma na ahobow”. Sɛ yɛkɔ do kã Jesus Christ do a, Nyankopɔn dze dase a ɔyɛ “ nsɛnkyerɛdze na ahobowsɛm, na ɔnye anwanwadze ahorow, na Sunsum Krɔnkrɔn akyɛdze, wɔ noara ne pɛ mu mã hɛn.⁹ Dɛm da soronko yi, megye dase dɛ ahobow na nwanwa a ɔwɔ asɛmpa mu no, woetsim no wɔ Nyankopɔn N’akyɛdze nyina mu kɛse no— Agyenkwa No Werdambɔ do no. Iyi nye akyɛdze mapã a ɔyɛ ɔdɔ a Egya na Ɔba no dze adwen kor, dze ama hɛn mu kor biara. Menye hom, “Migyina nwanwa mu wɔ ɔdɔ a Jesus dze ma me ho. Oh, ɔyɛ ahobow, ahobow dze ma me!”¹⁰

Nkyɛ mber nyina, yebotum enya enyiwa a ohu, asowa a ɔtse, na akoma a otum nya ahobow na nwanwa a ɔwɔ nsɛmpa no mu nye me mpaabɔ wɔ Jesus Christ dzin mu, amen.