Kua ni Veiraiyaki, Rai Cake!
Ni da sureti ira mai na tani me ra lako mai vei Karisito e dua na noda inaki, ka na rawa ga na inaki oqo kevaka eda rai cake vei Jisu Karisito.
E noqu inaki meu “sureti ira tale eso vei Karisito.”1 Oqo na nomuni inaki talega. Sa rawa ni da sotava na inaki oqo kevaka eda rai cake vei Jisu Karisito.
Au a papitaiso kei rau na noqu itubutubu na gauna au se yabaki 16 kina. Na taciqu e gone vei au, o Kyung-Hwan, e yabaki 14, a lewena kina na Lotu ena veisureti mai vua e dua na noqu momo, Young Jik Lee, ka dau sureti keirau ki na nona lotu. Keitou yadua na lewe 10 ena neitou vuvale keitou dui lotu tu, sa dua na ka na neitou marau ni mai kunei na dina ka gadrevi me wasei na marau sa mai kunei ena kosipeli nei Jisu Karisito ni oti na neitou papitaiso kina.
Na tamaqu e dau malaude vakalevu me dau vulica ka wasea na dina. E dau yadra vakamataka me dau wilika ka vulica na vosanikalou me rua na auwa ena veisiga. Ni suka na cakacaka e dau gole keirau na kaulotu me lai sikovi ira na matavuvale, itokani kei ira na tu wavoliti koya voleka ni veisiga. Ni oti e vitu na vula mai na gauna keitou papitaiso kina, 23 na lewe ni neitou vuvale sara mai lewena na lotu. Oqori e muria mai na veivakakurubuitaki ni keitou raica e 130 na tamata era mai papitaiso ena loma ni yabaki ka tarava ena nona lewe ni lotu kaulotu voli na tamaqu.
Na tuva kawa e dua na ka bibi a qarava o koya, ka qarava kina e walu na itabatamata vei ira na tubui keitou era sa liu yani. Mai na gauna keitou mai lewena kina na lotu vakavuvale, ka tekivu mai vua na taciqu yabaki 14, sa toso cake tiko ga na veisala, ka sega walega ni vei ira na bula tu ia o ira talega sa mate. Ni vakuri tiko ga mai na cakacaka mai vei tamaqu kei ira na kena vo, na neitou vuvale sa teteva yani e 32 na itabatamata, ka keitou saga tiko oqo me keitou vakaotia na vo ni cakacaka e valetabu vei ira na veitabana. Nikua au kurabui kau vakila vakalevu na marau ena noqu rawa niu semati ira na noqu kawa vei ira na vuda.
A vola o Peresitedi Gordon B. Hinckley talega na ka e a sotava o koya ka a via tautauvata kaya ena Valetabu mai Columbus Ohio:
“Niu vakananuma tiko na nodratou bula na [tukaqu vakarua, tukaqu kei na tamaqu] turaga e tolu oqo niu dabe tiko ena valetabu, au digovi luvequ yalewa, … kei na luvena yalewa, na makubuqu, kei iratou na luvena, na makubuqu vakarua. Au kidacala niu vakananuma niu tu sara ga ena maliwa ni vitu na itabatamata—e tolu e liu vei au, ka tolu e muri vei au.
“Ena loma ni vale tabu ka vakalou o ya au vakananuma kina na noqu ilesilesi talei meu na vakatetea yani na veika kece au sa mai taura sa isolisoli vei au mai vei ira na noqu qase e liu ki na itabatamata era sa muri au tiko mai.”2
O keda kece eda oka tu ena dua na maliwa ni dua matavuvale tawamudu. Sa noda itavi meda kauta mai na veisau oqo ka na rawa ni na yaco ena sala vinaka se sala ca. A qai tomana o Peresitedi Hinckely, “Mo kua ni vakatara vei iko mo vuni malumalumu ena nomu kawa.”3 Na nomu yalodina ena kosipeli ena vakaukauwataka na nomu matavuvale. Eda na rawa ni vakadeitaka vakacava ni o keda na isema kaukauwa ni noda vuvale tawamudu?
Dua na siga, oti toka e vica na vula na noqu papitaiso, au rogoca eso na lewe ni lotu ni ra vakalelewa toka e valenilotu.Au a vakadrukai saraga kina vakalevu. Au lako ivale kau tukuna vei tamaqu au sa kua tale ni lako i lotu. E a dredre sara meu raica ni ra vakalewai ira na tani eso na lewenilotu. Ni sa vakarogoci au oti, na tamaqu a qai vakavulica vei au o koya ni a vakalesui mai na kosipeli ka taucoko tu, ia o keda na lewena eda sega ni taucoko vakakina o koya kei au. E vakadeitaka o koya, “Kakua ni vakayalia na nomu vakabauta ena vukudra na tamata era tu wavoliti iko, ia taracake e dua na veikilai qaqa kei Jisu Karisito. Kua ni Veiraiyaki, Rai Cake!”
Rai cake vei Jisu Karisito—oya na ivakasala yalomatua i tamaqu, ka vakaukauwataka na noqu vakabauta ena gauna au sotava kina na dredre. E vakavulica vei au o koya meu bulataka na ivakavuvuli nei Karisito me vaka noda wilika na nona vosa: “Drau vakararavi tiko mai vei au ena vakasama kece; kakua ni vakatitiqa, ka kakua ni rere.”4
Ena gauna au veiqaravi voli tu kina mai na tabana ni Kaulotu e Washington Seattle, e dau tau vakalevu na uca ena lomani yabaki. Ia era dau vakaroti na kaulotu me ra dau gole yani me veivakavulici ena gauna ucauca. Au dau kaya vei ira, “Ni gole yani ena tau ni uca, rai cake ki lomalagi, dolava na gusumu ka gunuva! Ena gauna o rai cake kina, o na vakaukauwataki mo ni dolava na gusumu vei ira na tamata ka mo sega ni rere.” A qai dua na ivakavuvuli vei ira me ra dau rai cake ena gauna era sotava tu kina na dredre yaco madaga ni sa oti nodra kaulotu. Yalovinaka mo ni kua ni cakava oqo ena vanua e duka tu vakalevu.
Niu se veiqaravi voli mai na tabana ni kaulotu e Seattle, au ciqoma e dua na qiri ena televoni mai vei luvequ ka qase duadua, o Sunbeam, e kenadau ni taba piano. A qai kaya mai ni soli vei koya e dua na madigi me na vakaitavi kina ena Olo e Carneigi mai New York oti nona qaqa ena dua na veisisivi levu. Keitou a marau sara vakalevu ka malaude saraga ena vukuna. Ia, ena yakavi oya, gauna au masu tiko kina ena vakavinavinaka, na marama na watiqu a qai vakasamataka mai ni keirau na sega ni rawa ni lai tomani koya ena nona vakaitavi, ia au mani kaya vua na Tamada Vakalomalagi: Tamaqu Vakalomalagi, au vakavinavinakataka na nomuni veivakakalougatataki ni sa solia vei Sunbeam. Ia, au kerea tiko na nomuni veivosoti niu na sega ni rawa ni lako. Ia au na rawa ga ni gole kevaka Ni solia na nomuni veivakakalougatataki meu gole ni bera se oti na noqu kaulotu. Au sega ni vosa kudrukudru tiko yani, ia e tarai au toka e dua na yalo ni veivosoti.”
Ena gauna ga e tinia kina na nona masu, a rogoca e dua na domo matata: “Baleta ni o sega ni rawa ni o lako, e sa soli kina na madigi oqo vei luvemu. Drau gadreva me drau veisau?”
E a kurabui na watiqu. E kila o koya ni ra na vakakalougatataki o ira na gone mai vei ira na nodra itubutubu’ ni ra cakacaka tiko ena vakabauta ena nona matanitu na Turaga, e sa kila kina vakamatamata o koya na bibi ni tavi e qarava voli. E sau yani vakatotolo o koya: “Sega, e sega ni dua na ka keu sega ni lako. Me soli vei koya na rokovi.”
Vei kemuni na taciqu kei na ganequ, e sega ni ka rawarawa me da kila na loloma mai vua na Tamada Vakalomalagi ni da veiraiyaki ena matada vakayalo eda na raica ni tu na veidredre kei na galili e liu. Ia ena dua na yasana, eda na raica na veivakakalougatataki ni da rai sivita ka rai cake. A qai vakaraitaka na Turaga, “Ia ni da sa rawata e dua na veivakalougatataki mai vua na Kalou, sa rawa ena vuku ni da sa talairawarawa ki na lawa sa vakayavutaki kina.”5 Vei kemuni kece na vakailesilesi ena dua na veiqaravi ni Kalou, mo kila ni o iko e dua na isema kaukauwa ni veivakakalougataki vei ira na nomu kawa era se bera mai kei ira era sa liu.
Nikua, au vakavinavinakataka niu raica e levu vei ira na noda matavuvale era sa vakabauta na sala ni veiyalayalati, ia e mosita na yaloqu niu raica ni ra lala na idabedabe voliti keda. A kaya o Elder M.Russell Ballard: “Kevaka o sa digitaka mo luluqa vakalotu se biuta na Lotu i Jisu Karisito ni Yalododonu Edaidai, o na lako kivei? Cava o na cakava? Na lewa mo “sega tale ni lako vata kaya” kei ira na lewe ni Lotu kei ira na iliuliu digitaki ni Turaga ena rawa me balavu na kena revurevu ka sega ni raici rawa ena gauna oqo.”6 Monson e vakauqeti keda, “Me da digitaka na dodonu e dredre ka kakua ni cala e rawarawa.”7
E se sega ni bera meda rai cake vei Jisu Karisito. Ena tadola na Ligana vei keda. E levu vei ira na noda kawa e tu e matada kei ira era sa liu era vakanuinui toka vei keda meda muri Karisito me rawa ni da vei semati vakamatavuvale tawamudu ni Kalou.
Ena gauna au a cegu kina mai na veikacivi ni peresitedi ni iteki, eratou sa marau na luvequ tagane ni na levu na neitou gauna vata. Oti e tolu na macawa au a kacivi meu mai lewena na Vitusagavulu. Au nanuma ni ratou na sega ni ciqoma, ia na luveqau tagane gone duadua a qai kaya mai ena yalo malua, “Tata. ni kua ni leqa. Kedatou e dua na vuvale tawamudu.” Sa dua na dina matata sara oya! Au leqataka vakalevu baleta niu raica wavoki na bula vakavuravura walega, ia na luvequ tagane e marau baleta ni o koya e sega ni rai wavoki e rai cake ka vakanamata ki na tawamudu kei na inaki ni Turaga.
E sega ni rawarawa na noda rai cake kevaka era sega ni ra duavata tiko kei na kosipeli o ira na noda itubutubu, ni da lewena e dua na tabanilotu lailai, qai sega ni lewe ni lotu na watimu, ni o se galala voli ia o saga ena nomu igu taucoko mo vakawati, ni sa lako sese e dua na gone, ni o sa itubutubu duadua, ni ko sotava na dredre vakayago se vakayalo se o a dua e sotava na leqa ena gauna ni leqa tubukoso, kei na so tale. Ni tautauri matua ki na nomu vakabauta ena gauna dredre oqo. Rai cake vei Karisito mo rawata mai kina na kaukauwa kei na veivakabulai. Ena kaukauwa ni Veisorovaki i Jisu Karisito, “raica sa veivuke na ka kecega me ra vinaka kina.”8
Au vakadinadinataka ni o Jisu Karisito e noda iVakabula ka Dauveivuieti. Ni da vakamuria na noda parofita bula, o Peresitedi Thomas S. Monson, eda sa raica cake tiko vei Jisu Karisito. Ni da masu ka vulica na vosa ni kalou ena veisiga, ka vakaitavi ena sakaramede ena veimacawa, eda na rawata na kaukauwa meda dau rai cake tu ga Vua. A marautaka niu mai lewena na Lotu oqo kau mai lewe ni vuvale tawamudu. Au marautaka niu wasea na kosipeli totoka oqo vei ira na tani. Ni da sureti ira mai na tani me ra lako mai vei Karisito e dua na noda inaki, ka na rawa ga na inaki oqo kevaka eda rai cake vei Jisu Karisito. Au sa vakadinadinataka na veika oqo ena yaca i Jisu Karisito, emeni.